Buatsaihtute Hmathlir

Editor YMA Palai 2008

Pawl tam lutuk

Ram hmasawn tur leh changkang tur chuan Sawrkar chak leh tha, ruahmanna siam thiam a pawimawha. Chutiang deuh bawk chuan khawtlang hmasawn tur chuan ‘Pawl’ (Association) chak a ngai thin.
Hetiang pawl hrang hrang hian khawtlang an khaiding in Sawrkar hmalakna tam takah nasa takin an theihna leh tangkaina zawnah chuan an pui thin. Entirnan YMA chu E/Roll, Ration Card etc. siam thleng kawngah Sawrkar kutke ber a ni. Hetianga pawl tangkai tak tak a awm mek lai hian, a tangkaina sawi tur chu sawiloh khawtlang leh Sawrkar tiluhaitu pawl kan tam ta lutuk niin tunah chuan a lang ta. Pawl kan lo din ve takah chuan hmalakna tur leh kan tha tichak turin ‘Sum’ kan mamawha, pawl zawng zawng deuh thaw hian Sawrkar kan behchhan ta thin si a, a luhaithlak zawng a ni.
Chumi pawl chu tia han sawi dawt chu thil tha ber pawh a ni kher lovanga, han ngaihtuah vang vang mahila, Mizo mipui ngaihtuah hian pawl chu kan tam lua deuh a ni. Pawl tangkai tak tak an awm kan tih laiin heng pawl thenkhat kan sawite hi chu mipuiin kan chhawr tangkai tur lam ai mahin kan pamham leh mahni tanghma hai vang liau liaua kan dinte a ni hlawm. Chhungtin hi han inbihchiang ila, chhungkaw member zinga a tu emaw ber hi chu eng pawlah emaw chuan nihna nei kan ni deuh vek ang. Pawl ding hrim hrim hi kan sawisel tumna lam a ni lova, kan tangkaipui theih ngei tur pawl hi din thiam a tha khawp mai. Hetiang kawngah hian mipuite pawhin ngaihtuahna sen tam deuh pawh a ngai. Engpawh nise, pawl kan dinna chhan tam tak hi chu lar duh vangte, tin, thatchhiat vangte pawh a ni tel thei tho. Chuvangchuan, mipuite hi inngaihtuah chiang nawn leh ila, pawl din thintute chu keimahni kan nih avangin ngaihtuahna thar nen hma ila ang u.

0 comments: