Sermon 'Bethesda Dil a fawn mek' Rev. Laldailova

Sermon: Camp lut tura sawmna By: Rev.Laldailova
“BETHESDA DIL A FAWN MEK”
Kan Lal Isuan he leia rawng a rawn bawl lai khan Galili dung leh vang a fang a. Natna chi hrang hrang a na mi tam tak a tidam thin. Mi tam takin an zui a, a hnen atangin damna an beisei a, a thiltih mak te pawh tam tak an hmu bawk. Chutia, Lal Isua a zin velna ah chuan Jerusalem khaw kianga dil pakhat Bethesda Dil an tih kiang chu a lo thleng a. He dil hi vantirhkoh in a zu tifawn thin a, chutia dil fawn lai taka zuk inchiah hman apiang chu eng natna vei pawh nise an dam thin. He dil hulhliapa damlo pakhat kum 38 na tawh pawh dil fawn nghakin a awm ve reng a. Mahse, dil a lo fawn laia tuia dah tu a nei ve lo. Chu mi hnenah chuan Lal Isuan, “Tihdam i duh em?” tiin a zawt a. He mi hi Lal Isuan a khawngaih hle a niang, a tidam ta a, a awngphah la a kal tawh turin a hrilh ta a ni. He mi tan hian a lawmawm ngawt ang. Kum 38 chhung zet natna a lo tuar tawh a, Dil fawnah damna a beisei a, mahse dil fawn pana a kal chhungin, chu dil fawn chu a lo reh hman leh si thin a. Han buaipui tu laina emaw pawh a nei lo a niang, Chu dil hulhliapah chuan a awm ve ngawt ngawt mai a ni. Mahse, he mi hian khawngaihtu a tawng ta.
Awle, hei kan hriat leh hmuh theuh ang hian kan kohhran ah chuan Lalpan khawngaihna hna a rawn thawk ta a. Damna tui chu a fawn mek a ni. Mi tam tak, Eden sual natna vei te, mahnia intidam thei si lo te, sual setanan an chak zawng leh nuam tih zawng tak hmanga a phuar tlatte chuan Lal Isua Krista Kraws thiltihtheihna changin, thlarau damna Bethesda dil fawna inchiah lai hmel te, damna changa an mutna sual puanthuah tel a, Krista thawhlehna tawmpui a, nundan thara nung tawh tura Eden bawhchhiatna hmun thawhsanin Lalpa an han fak ta te hi a va ropui em! Haleluia!! Lalpa chu fakin awm rawh se.
Ka unau duh tak, vawiin hian Thlarau Thianghlim chuan a sawm che a sin! I damna tur hmun Kalvari-ah i Lalpan a lo nghak che a. Eng ang Eden sual natna vei pawh ni mah la, tihdam theih loh a nei ve lo. Taksa, rilru leh Thlarau damna Bethesda dil fawnah hian kan chhungkua kan inchiah tawh em le? Bethesda tih hi KHAWNGAIHNA HMUN tihna a nih chu. Unaute u, tunah ngei hian khawngaihna kawng hawn lai mek a ni a, he khawngaihna hun hian a liamsan hma in hmanhmawh ang che.
He khawngaihna hmunah hian kan pum a inchiah tur a ni a. Camper chhuak awh zawng zawngte pawh i in enfiah nawn leh teh ang u. Kalvari damna i chan hian i nun pumpui a huam em? I thinchhiat na te, i chapona te, mahni hmasialna te, duhamna te, midang huatna te, midang itsikna te, midang tihchhiat duhnate a tidam che em? Sum leh pai lak luhna diklo duhamna te, pawnlanga tha der, chhungril nun tenawm si te hi an va hnawk em? Kan hlawkna leh chan thatna tura khaw hmu thei lo, duham taka tlan thin ringtu, rawngbawltu hi Bethesda dil fawnah tunah hian inchiah ve rawh se.
Midang chunga rilru tha lo tak pu thin hian Kalvari thisenah hian damna chang tawh se la. Mahni inthup thei si lo, mahni felna, chakna, theihna rinchhan thin hi a reh tawh nan Bethesda dilah Lal Isuan inchiah a zuanglut turin a ngen. Kan thatna ze der te, mit chakna te, beng zatna thalo te, TV en chakna, mobile phone sual kawnga min hnuklut thin chakna thalo te hi min tidam teh se. Thatchhiatna leh dawngdahna te zawng zawng hi min tidam se la. Mahni inngaihdam ching, inphat mawi ching thinlung sual hi he khawngaihna tuifawn hian min lak bo sak vek rawh se.
Awle, kan ram a dam theihna tur atan te hian zoram Kristiante hian Bethesda dil fawna kan puma kan inchiah a va duhawm em!! Kan party politics tenawm tak mai te hi a lo thianghlim theih nan politician te, party worker te leh mahni hmasial Unit hruaitute zawng zawng hian Bethesda dil fawna damna lo chu kan ramin damna tur thil dang a mamawh lo tih hi chiang takin hre teh se. Unau duh tak, Bethesda khawngaihna Dil tui a fawn mek a, Damna chang turin i zuang lut ve ngam em???

0 comments: