Vengsang Branch YMA

INTHLAN THUCHAH
The Vengsang 19th October: Ni 14.10.2008 khan Sub-Hqrs. YMA, Champhai Executive Committee te thukhawmin kumin November Ni 29 a MLA thlanna kan neih tur chung chang an thlir ho va. Inthlanna felfai, thianghlim leh boruak muanawm kan neih theih nan heng a hnuai ami te hi Sub-Hqrs. YMA, Champhai chuan zawm theuh turin Party tin te leh mipui te a ngen a ni.
1) India khua leh tui kan nihna lantir turin mitinte’n rilru thianghlim leh ngaihtuahna zalen tak chunga ram rorel tura kan mi duh thlang (Vote) theuh turin.
2) Inthlanna neih chhungin danin a phal bak sum leh pai seng lo tur leh Campaign ruai buatsaih lo turin.
3) Inthlan Campaign laiin mipui ti chiai zawng leh vantlang tana bengchheng lutuk a Aurinna (Mike) hmang lo turin.
4)Khawlai dung leh vantlang hmun te ti hmelhem khawp a Party Banner leh Flag te tar lo turin.
5) Hel leh ralthuam hmang a inrikrapna a awm lohna turin eng Party mahin hetiang a ngaih theih te hmanrua a hmang lo turin.
6) Ram leh khawtlang tana tha leh hmasawnna, tih hlawhtlin theih ngei turte chauh mipui a tlangzarh turin Party tin Candidate te kan ngen bawk a ni.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
branch
Ni 16.10.2008 zan khan O.B. Meeting neih a niin YMA General Conference Vawi - 63 na October 21-23, 2008 a Serchhip a neih tur chung chang an thlir ho a. He Conference ah hian Branch aiawhin Palai pahnih intirh nise, kan Branch atanga kal tum ve dang te nen Sub-Hqrs. Motor hman turah kal ve mai se tih a ni. Kan Branch atang hian mi 6 vel kal an tum.

SUB - HQRS.
Ni 16.10.2008 a Committe thuchhuak angin Champhai atanga General conference a kal turte kalna tur Motor an ngaihtuah sak. Motor chuan man hi mahni intum tur a ni ang a, a hmuna motor innghah tyirna man chu Sub-Hqrs. in a tum ang. Sub-Hqrs. YMA Champhai hian Bus an hmang dawn a, mi 23 vel kal turin an in report a ni.

Tin, tun MLA inthlan Ni 29.11.2008 a lo awm turah inthlanna thianghlim leh fel fai a awm theih nan inthlan thuchah siamin an an sem chhuak bawk.

MIZO INPUI PEIH FEL

YMA General Conference Vawi - 63 na October 21-23, 2008 a Serchhip a neih tur ah Conferencve hmanna tur Pandal, serchhip Ground No 2 a an sak, MIZO INPUI tia ahming an vuah chu tunah hian an peih thawkhat ta.

Conference thleng tur hian Serchhip khaw mipui lam pawh an inpuahchah nasa in an inhuam thui hle. Conference a kal tur hian YMA Branch hrang hrang ah sawmna an semchhuak vek a ni.

Central YMA chuan Conference a kal turte Kumpuan ‘RUIHHLO DO’ ngai pawimawh a ruihtheih thil lak a fihlim theuh tur leh a theih ang tawk a intodelh turin a ngen a.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

J Zan thim hnuaiah hi chuan Nula lampang hi chu an chhip sam atangin ka tan tawp zel. Kan nu pawh hi a Chhip sam atanga ka pawh chhuah a nih hi.
-Puia N.sec.
J Kei chu piang nawn leh dawn ta i la, ka duhthusamah chuan Pumpui tha mi, englo... tak deuh deuhte pawh haw miah lo a lo digest hmiah hmiah thei ka duh. -Rindika N. Sec
J Kei chu Nula ka be tha ngam tawh lo, ka Nupui hian khawlai-ah min AMBUSH leh ang tih ka hlau tlat tawh!
- Biakni-a V Sec.
J Kan Veng la tel ve ngai lohna Icon (LPS) hi ka tan chona lian tak ni ni ka hria. Hemi tur hian In lamah leh Kohhran Hall hnuai-ah ka in tat hriam mek
- Jonathana (Rock Star) K Sec.
J Kan Venga innei an awm hi chhas lamah ka tan malsawmna a ni tawp.
- Lungmuani Mualbawk.
J Vengte u, Kei Makpa thirchhia hian Nupui nei tha thei leh ngat dawn ta i la, Dan khat-na ngat ka thlang tawh ang.
- Kawlni-a V Sec.
J Awmpui pheia Beautycian ngat khu a nia nitin, zantina ka zuk fân vel ziah na chu. - Zorina T sec.
J Bethel Veng Nuthlawi hmeltha nen khan kan ... LEH ta, in rin loh lai takin ka ti ve rup dawn.
- Ate-a YMA Hall hnuai
J Kei Lalkhimawii (Nuntawmi) hian ka pasal Aroa hi ‘Lalduhawma’ mi tihpui turin thenrual thate ka rawn sawm che u e.
- Nuntawmi Tower veng
J Kei hi Vanram ka kai ang em aw, aia lian tih ka ching âwr âwr e mai.
- Zoted Br. Secy



PA TLAWMNGAI
‘Liam lul suh’ tia kan auh lawm lawm Tlawmngaihna Mizo nun cheimawi a ti nuam tu in mual a liam mek a kan hriat laiin hriat loh lam atangin a lo lang chhuak leh hlawl thin hian mizo nih a va tinuam thin em. Mahni inphat a Tha luh zung senga phut let nei hauh lova mite tana hna thawk thin tu, Zonunmawi tung ding thin tute hian MIZO nun an timawiin Mizo nih an ti nuam thin. Hetiang mite hi a ni Chawimawi a Chawisan an phu a ni.
Pu C.Lalbiakthanga, Kum 40, tuna Taitesena section a khawsa mek chu kar hmasa Inrinni khan Khuaimual ramah a mahin a ramvak a. Zan Dar 7:00 a ri tep tawh a, in lam pana a haw mek lai chuan Khuaimual tawp Paihte peng kan tihmai ah sawn Naupang mangang au thawm a hre ta tlat mai. Ngun taka a ngaihthlak hnu chuan Naupang mangang authawm rikna lam pang chu a pan ta a. Hetah hian Pathianni kalta a vuiliamtak Pu CVR Lalhmachhuana Fate pahnih kum 12 leh 13 mi lek, Khuaizuk avanga na tuara kal hlei thei tawhlo chu a va hmu hlawl mai . Heng naupang te hian an kal theih tawh loh avangin Mobile Phone an ken chuan an nu chu hruai turin an lo Phone mek a. Nachhawkna a lo ak remchang hlauh a. A Damdawi ah te chu pein an chanchin te a han zawhchian hnu chuan a chau zawk chu puain hmanhmawh takin khaw lam panin a rawn kalpui ta a ni.
Naupang te Nu Pi Mavani hian Taxi rawn hruaiin Falkawn bul an lo thleng tawh a. An bulah hian naupang te chu hnutchhiahin hah pawh sawi lovin Pu Biaka chuan Ramhnuai a Pu Hmachhuana leh a unaupa, Pu Lalawmpuia te na tuar kal thei tawh lo te awmna lam chua pan leh nghal a. An awmna a zuk thlen leh chuan Pu Hmachhuana chu na tuarin a lokal hlei thei tawh lo va. A ni hian rawn paw hawngin 2KM vel lai a hla chu rawn in chhawm chhovin an rawn in hawn a ni.
Pu Biaka hi a nupui Pi Chhuani leh a fate Panga nen T.Sec LAD Qtr. Bulah an khawsa mek a, a mah hi LAD a MR a thawk a ni. Hetiang mi mangang leh tanpuingai te, hah pawh sawi lova theih tawp chhuah a chhuanlam engmah siam lo leh phut let nei lova a tanpui avang hian kan ngai sang tak zet a. Chhiartuten in ngaihhlut ve kan rin avangin a chanchin kan rawn tarlang a ni.

Editorial
INTHLAN THUCHAH
November Ni 29 hi Mizoram tan ni pawimawh tak a ni dawn. Kan ram leh hnam tana thil pawimawh tawpkhawk, ram, khawtlang , chhungkua leh mimal nun thlenga pawimawh ran hruaitu kan thlan ni atan ruat a ni ta. Hemi denchhen hian Inthlan thuchah chu kan siam ta chur chur a nih hi.
Democracy ram ah chuan mimal tin in mahni chhia leh tha hriatna thiang hmang in a aiawhtu tur a aduh zawng a thlang thei. Hei hi thil hlu tak leh pawimawh lutuk a ni. Tumah chu a chia leh tha hriatna a hmanna tur chu an dal thianglo. Ram hruaina kawng a mi duhzawng leh ram tana a mi rin ber a thlan kha India mi tuapwh in a thiang a ni.
Party ruihchilh a, party in a bual tlat te hian Inthlan thuchah hi engtinnge kan ngaih le? Party a kan telna chhan tam ber hi ram siamthat tumana aiin sawrkarna chan hun a therhlo leh hamthatna kan um vang a ni tlangpui.Party kan chhuahsan a, perty dang a inleh chhan te pawh mahni hmasialna vang a ni thin bawk. He ram hian hmangaihtu a nei lo ni te hian a lang thin. Ram hmangaihtu ni a lang te pawh hian mahni tho kan inhmangaih a, chu mahni hmasialna avang chuan party kan luhchilh a, lalna leh thiltih theihna chan a, inhaivur ve beisei in party kan bel thin zawng a nih ber hi maw?
Tichuan, Inthlan Thuchah chu hei hi a ni, Lalpa kan Pathian duhdan enge ni ang tih ngaihtuah in, he ram rorelna hna thawktu tur Lalpa Pathian rawn chungin i dil ang u. Tawngtai a ngaihven in he ram tana Lalpa ruat ni a kan hriat i thlang ang u.
Tun atang hian mahni hmasialna leh party ruihchilhna rilru, ram aia mahni hmasakna, ram rawng aia party rawngbawlna rilru paih in zoram thar siam turin theihtawpin tan i la ang u. Ram hi Lalpa ta a ni a, a chhunga awm zawng zawng te pawh.Lalpa ta a nihvangin rorelna chelh tur a kan thlan tur pawh ngun taka ngaihtuah in i thlang ang u.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
SECTION NEWS
TAITESENA
Nimin Ni 18.10.2008. (Inrinni) nileng khan hnatlang an nei a. He hnatlang ah hian Pi Zailemi In bul leimin an then fai sak a, a in leh a vel te thlawhfai sakin hna tul ang ang an thawhsak a ni.

NEUVA
Ni 17 leh 18, Oct. 2008 zingkar khan Thlanmual chhak kawng cheimam in hnatlang an nei. Naktuk Zing ah hian hnatlang neih chhunzawm keh an tum a, Memberte hnatlang a thahnem ngai taka thawkchhuak turin ngen in ni e.

VANAPA
Nimin Ni 18.10.2008 khan Pu HKL Thanga te huanah section Sum tuak a inhlawh hnatlang an nei a. member 25 vel an thawk chhuak. Hnatlang thawkchhuak te chungah leh inhlawhna siam sak tute chungah Section hruaitute an lawm hle. Tin, Hnatlangte Thingpui lumsaktu Pu Laltanpuia Ralte chungah an lawm hle.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
THALAITE HMABAK
K. Malsawma

‘Hmabak’ kan tih hi thiltih tur tih lai mek dawta tihtur leh zel tur la awm tihna a ni tlangpui a ni. Heti hian sawifiah han tum ila lo neitu chuan a hmasa berin a ‘Lo” tur en chu a tihtur a lungkham em em a ni a, a ‘lo’ tur a thlan fel hnu chuan a ‘hmabak’ chu ‘lo vah’ a ni leh a. Lote a vahzawhah ‘lo hal’ a hmabak leh a. Lo a hal zawh chuan chu a lo chu buh chin nana tihfai- chu chu ‘mangkhawh’ an ti bawk, chumi rual chuan ‘thlam sak’ a ni leh a. A tihfaia thlam a sak zawhfel hnu chuan buh tuh leh thlai chi thlak chu a hmabak a ni ta a. A thlai chi thlakte leh a buhtuhte a lo to hnu chuan ‘ hlo thlawh’ a hmabak leh a, vawihnih vawithum a thawh hnuah a lo awl thawng thei ta a. Hei hi ‘favang awllen lai’ an tih chu a ni- chumi hnu chuan ‘buhseng’ ‘buhchhek’ leh ‘buhphurh’ te a la hmabak zel a. A lo thata a buhte a that a, a thlawh hneh a zuva ten zah an ngaih chuan a thawh hah man buh tam tak a lo thar ta a, hmanlai chuan ‘ a hausa’ an ti thin.
Tichuan kan thupui ‘Thalaite hmabak’ han tih lam hi hetiang deuh hian kalpui ta ila a tha awm e. Mizo leh hnam dangte pawh an ni ve thoin a rinawm a.Kan pian atanga kan thihni thlen thleng hi bung lian tak tak bung thumah an then theih awm e. Kan pianni atanga kum 14 kan tlin thleng hi chuan ‘ naupang’ kan ni a. Kum 14 - 45 thleng hian ‘Thalai’ kan nih hun a ni a. Kan chak lai, kan hrisel lai, kan ngaihtuahna pawh a chak lai tak a niin a lang a. Tin, hemi hun chhunga chengte hi a hlawm lian ber an ni. Hetiang hun lai hi hun pawimawh lai ber a ni a, hetih hun lai hmang uluk thiam leh thiam lo chu an nun kal zel tur hriltu a nih avangin an hmabak a inthlau thei kher mai le. Mihring nun vanglai tak a nih avangin mi hrisel pang ngai tan chuan a nuamin a hlimawm em em. Taksa a mawi a, tha a za a, mahni tawk tawkah hmel a tha bawk a. Tin, rilru in engpawh a zuam a, hnathawh chi hrang hrang ah pawh mahni hmazawnah huphurh a awm lo va, engkimah nun hi kan zuam sarh mai a ni. Tihfuh ngial ngail a tam duh a, tih fuh loh ngial nial a tam thei bawk. Hetih hunlai pawimawh zia hrethiam apiangten an nun kal zelah hmabak nuam tak a nei a. A hrethiam lo te erawh chu chu ti hlauh chu an ni thung. A hetih avang hian hunlo thleng zel tur atana in buatsaihna huntha ber anlo ti hial reng a ni. A rei zawngah chuan thalai hun hi kum - chhunglai a ni a, rilru nei deuh chuan, “Ka nakin nun lo thleng tur atana inbuatsaihna hun rei tawk leh tha tawk Pathianin min pek a nih avangin fimkhur tak leh awmze nei takin ka hman tur a ni” ti ran in fin takin kawng engkimah ngaihtuahna fim takin thil an ti thin. An hmabak a nawm dawn leh a hlimawm dawn leh dawn loh chu dam tha an nih ngei chuan an thatlai hun an hman fimkhur leh khur loah a in nghat tih an hre ran a, an tihtur apiangah hnunglama mitnei ang ran in an ti thin. Puitu leh anmahni aia thil hre zawk, fing zawk an bul hnaite-ah an nei reng a, chungte chuan hmangaih tawplo in an hmangaih a, an lainat a, an duhsak a, thilawm dan an zirtir ngun hle thin. An tan an tuar ngama, an tan thih an ngam bawk. Heng an mahni kan puitu kan tih hi an nu leh pa te an ni ber a. Nu leh Pate hi fel tak tak an awm a, fello leh mawl tak tak te pawh an awm bawk. Mahse nu leh pa te hi an mawl emaw an fello emaw pawh nise la, fel leh fing leh Lehkhathiam engang pawh nise la an fate chunga an thil neih hlu tak chu ‘Hmangaihna’ a ni. An fate hmangaihna, lainatna, duhsakna leh khawngaihna an nei vek. An fate thiltha kawhhmuh na chang hre lo an awm lo. An fate kha an hmabak rawn thlentirtute an nih an hretlang vek a. An faten an zirtirna leh an zilhna pawm chuan an hmabak leh an fate hmabak a eng a, an zawm loh chuan an hmabak a thim tlang ani mai a nih tlang pui hi. Chuvangin thalaite hian nu leh pa zirtirna leh zilhna hi pawm i tum hram hram ang u.
Tunlai khawvelah hian harsatna chi hrang hrang thalaite khawvel ah a lut a, chhungkua in kan buaipui a, khawtlangin kan buaipui ber a ni ta. Heng harsatna te hi Zu in chinte, Drugs tih chinte, mipat/hmeichhiat hma khawlohte, hnathawh tur hriat/humh lohte an ni tlang pui awm e. Heng harsatna hrang hrang zingah hian Zu hi a upa bera, mizo zingah phei chuan Kristian kan nih hma daiha lo awm tawh a ni. Amaherawh chu chung hun laia an in tlangpui deih ber chu Zufang, Zupui, Tin-zu te an ni ber. Mahse nula/tlangvalin an in ngailo a ni ber. Chawngchen, khuangchawi leh sechhun nikhua-ah chauh an in thung. Chuvangin Mizorama chanchin tha lo thlen hmate kha chuan nula/tlangval zingah khawlai a rui leh buaina siam an awm ngai lovin a sawi theih. Taima takin thlawhhma an la a, kham khawp bun/bal thlawh chhuah theih chu an tum ber a ni.
Amaherawh chu nu leh pate zingah (tlema upa deuhte) zu inho leh zu hmuna zai bung bung an ching thung a. Zu an in hnem tak tak hma chuan an hlim em em thin. An ruih deuh hnah chuan zu khan anmahniah zia a rawn tilang a, inhnial, inhau, insual te an nei tan a, a chang phei chuan invuak thluk hialte pawh a thlentir thin. Chuvangin Kristian hmasate chuan ‘Zu that loh zia leh mihrang nun a tih chhiat theih zia an hriat chian em avangin leh ‘Zu inmi’ ni chung chuan a ‘Kristian’ tak tak theihloh zia an hmu a, Kristiante tan zu in an khap ta a ni. Tun thlengin zu inmi chu an Kristian tha tak tak hlei thei lo a nih hi. Sap thufingah pawh ‘Zu inah hian bung hnih a awm a. In tihhlimna atana insatliah hi a bungkhatna a ni a. A bung hnihna chu Zuin a intu a inve thung hun hi a ni. Heng zuin bung hnihte hi bung tha lo ve ve an ni a. A bung hnihna thlen chinah phei hi chuan hriselna, chhungkua leh khawtlangin a tuar a. An thi a, a tam ber chu Hremhmunah an liam ta thin a ni. Chuvang chuan Pachhiat, retheih, hriselloh, dam rei loh, chhungkaw hlim loh, mi hmusit, nuihzat leh Hremhmun a awm i duh loh chuan zu lakah inthiarfihlim ang che. Tin, Zu avang hian imsumtheihlohna leh ngaihsamna a lo chhuak a, chuvangin a hmei a pa tan pawh HIV/AIDS kai a awlsam a, a pawi em em a ni.Hmabak êng tak nei tur chuan Zu lakah inthiarfihlim ang che.
Zu dawtah chuan Drugs hmansual chin hi a ni leh a. Hemi hi khawvela an chin tannna chu mithiamten Indopui I-na hun tawp lam khan niamin an sawi a. A lo chhuah tanna chu Central Europe - Switzerland leh a chhehvel ram khu niin an sawi. He hriin Mizoram a lo thlen ve hun hi chiang taka sawi theih a ni lo. Hriatdan tlanglawn ber chuan 1980 vel kha niin a lang. A chhan chu 1984 khan kan thalaite zingah thihphah an awm tan a, tunah phei chuan kan nula/tlangval 1500 lai nunna chhattu ani. Tun laiah phei chuan a hnathawh dan hi mitin hriat a nih tawh avangin sawi atul tampui awmlove. Drugs hmansual dan tlangpui chu a ei a ei, a in a in leh inchiuna atana hman ani. Drugs hi natna tidam turte na chhawk tur te a saim an ni a.Hun bi neia, azat tur bituka ei tur te, in turte leh inchiunaa hman tur te an ni a. Ei tam lutuk te, in tam lutuk te hi drugs hmandikloh leh hmansual an ni tlangpui. Tin, inchiunaa hman pawhin a tawkte a awm thin. Tin, inchiuna atana siam ni lote pawh a awm bawk. Sawrkarin a tha lo tia a khap tlata pawh a awm a ni. Heng bakah hian a hnima hnim a intihruih theihna chi pawh a awm. Eng Drugs pawh hi hmansual chuan mihring nunna atan a hlauhawm thei vek. Drugs hmansual hnathawhte chu overdose a thih thutna, thi em lo pawh nise taksaahnghawng tha l tam tak a thlen thei. Kut keah pan leh thil tha lo a awmtir thei a, chu chuan ban tan, ke tan leh piansualna dang a awm tir. Rilru a ti chhia a, mi ang lo leh atna hial a thlen thin. A ti thatchhia a, a ti thin chhia, rukruk leh tualthah - lungin tan, leichawi, vahvaih, retheih, kutdawh leh thil tha lo hrang hrang sawi sen loh a thlen thin. Tin, inchiuna inhman tawm avangin HIV/AIDS a kai tir a. Mipat/ hmeichhiatna lama inthlah dah avangin HIV/AIDS a kai theih bawk. Heng thil tha lo leh mihring nuna pawi thei zawng zawng laka fihlim theihna chu DRUGS laka fihlim a ni mai. Hmabak tak nei tur chuan drugs lakah fihlim ngei ngei tur a ni bur mai.
Tin, tunlaia kan buaipui em em, khawvel pumpui pawhin a buaipui a, thalaite leh mi tam takin a maktaduai tela an vei leh an thihpui tawh chu AIDS hi a ni. An thi mek a, an thi zel dawn. Thalaite u, fimkhur teh u. Hemi inkaichhawn theihna pumpelhna tur chu drugs-a inchiuna hriau inhman tawm loh hrim hrim. Mipat / hmeichhiatna hman fimkhur. Nula emaw tlangval emaw mipat hmeichhiatna i hmanpui dawn chuan HIV/AIDS hrik an la pai lo tih hrechiang phawt ang che. Tin, mawngkaw hur reng reng nen chuan inpawl loh hrim hrim a ni mai.
Kan han sawi tak - Zu, Drugs leh HIV/AIDS te hi kan thalaite hmabak ti thimtu ber te an ni. Henga tlulut tawhte chuan inchhir hle mahse kalsan harsa an ti tawh. AIDS phei hi chu a chhuahsan theih tawh lo hrim hrim a. Drugs erawh chu miin sim a tum tlat chuan a sim thei. Zu pawh hi a bawiha lut tawh tan chuan kalsan har tak a ni a, dam chhunga then thei tawh lo te an ni. Thil hreawm tak chu kan thalai duhawm, pianfel lahkhathiam thei tak tak, pumraw tha tak tak, taima em em te khing hmelmaten khawvel leh khawvel lo la awm turah pawh hmabak nei miah lo Nun pangai tak chuan nung sela future bright tak tak tur - future nei reng reng lo va, rethei leh pachhitna khura nun hrehawm tak mai a Zu, Drugs leh AIDS avanga an han khawsa ta teuh mai hi a ni.
Anni hi retheiin engmah ti thei lo mahse, khawvel hmasawnna hi a kal muah muah reng a. Mi tam tak mahni hmaabak tur hre reng a, nun kawng fimkhur taka zawh, zu in lo, drugs ti lo leh mipat / hmeichhiatna kawnga invawng thianghlim mi, an nunkawng hruaitu atana Pathian ring tlat a, a thu zawm tlattute chuan thil tha eng pawh mai hi an tlachham dawn reng reng lo. FImkhur taka mahni hmabak tur buatsaihtute tan chuan unemployment problem - te hi a awm ve reng reng lo. Sawrkar hna khera eizawn kan tumte hi tlansan a hun ta a. Kan ram boruak lah hi a tha khawp a, patling nutling tan chuan intodelh te, hausak te, zahawm te hi a harsa lo em em a ni. Lehkha thiam tan hlei hlei hian sawrkar hna kher lo vah pawh hnathawh tur hi a tam hlei hlei.
A tawp berah chuan kan ram thatna tur leh dinchhuahna tur chuan kan thalaite hian rilru an siam a pawimawh ber.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
V/C NEWS
Ni 100 inhlawhna hlawh la la lo ten VC Secretary Pu V. Vanlalfaka hnenah lam vat tur a ni.
Hospial lam Thlanmual chhak kawng chu Neuva Section ten inhlawhnan an laih chhunzawm dawn.

EDU. SAT
Tunkar kalta khan Government Gandhi Memorial Higher Secondary School Champhai, ah EDU. SAT an rawn bun thar. Hei hi tunlai thiamna hmanga Aizawl a SCERT room a Conference neih a nih in School atnga hian a tel theih tawh dawn a ni. Aizawl a an thiltih kha Champhai atangin kan lo hmuh mai bakah anni pawhin min lo hmu thei dawn a, Conference tur hian Aizawl a kal kher ngai lo in Computer a Screen lian ah kan lo tel thei tawh dawn a ni.

MOTOR THAR
Pu Lalthanzuala Pautu K. Sec chuan motor thar (Car) nalh zet mai an nei a, kan lawmpui e.

BENGCHHENG LO ANG
Thla thar chho ah khian Sikul naupangte tan kumtawp ekzam an nei tawh dawn a, kan zirlaite tibuai lo zawng in mipui lam pawhin bengchheng i siam lo ang u. Tin, naupang lam pawhin theihtawp chhuah in lehkha i zir ang u.

I FIMKHUR ANG
Tunlai hian natna, mitna hri, hritlang leh khawsik, kawthalo leh a dang a leng a, heng natna laka kan fihlim theihna turin mitinte kan fimkhur tlan a ngai hle. Damloh hi a hlawk lo in, natna laka inven theih dan kawng hrang hrang a awm. A pawimawh ber chu fimkhur hi a ni. Tihdam aiin Inven a tha zawk si a.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

0 comments: