Vengsang YMA (Vengsang)

YMA GENERAL CONFERENCE TIAK TA.

The Vengsang 26th October: Kum 2008 YMA General Conference Serchhip a neih chu tluang taka zawh fel a ni ta. Palai kal riaklut zawng zawng hi mi 2167 an ni. He Conference a kal te hian a hlimawm an tiin hlawkthlak an ti hle. Tun tum Conference ah hian Mizo nunze mawi inzirtir na lam an uar hle a, Conference tawp zan ah phei chuan hmeichhia, Puan bih lova Kekawr tlawn nen a kal te chu Pandal a luh phal lovin an dang vek a ni. Conference tawp zan hian Sub-Hqrs. Champhai President Pu C.Lalawmpuia’n hunserh hmangin Function a tan a. Hun hlim awm tak hmang hovin ui takin kum leh a Darlawn lama inhmu leh turin khawmpui hi an khar a ni.

Tun tum Conference ah hian thu pawimawh tak tak rel ho a niin rorel palai kal h mi 759 an ni. A hnuai ami tehi an thurel tlangpui te a ni.

I. YMA Khawih:
a) “Mizo nun zemawi uar zawka inzirtir nise” tih chu zau taka sawiho a niin lungrual taka pawm a ni.
b) “YMA DANPUI (YMA Constitution) a siamthat ngaite ennawn ni rawh se.” tih chu remtih a ni.
Sawrkar khawih:
a)Mizoram sawrkar hna lak thinah hian a tling leh tlak te chauh lak a nih theih nan sawrkar a thlen ni rawh se, tih chu lungrual taka pawm a ni.
b) Saitluk Airport siam a nih theih nan Mizoram Sawrkar ah ngen ni rawh se.

II. Central YMA Budget 2008 - 2009:
2008 - 2009 Central YMA Budged atan Rs 83,97,400/- chu lungrual taka pawm a ni.

III. 2009 YMA General Conference Thlen Dilna:
Kum 2009 YMA General Conference thlen diltu pali Chalfilh Group (Darlawn ah); Zemabawk & Zemabawk N Br. YMA; Zawlbuk Group YMA (Thingsulthliah ah); YMA Sub-Hqrs. Kolasib (Kolasib ah) te chu an dilchhan te ngaihthlak a nih hnuin 2009 Conference neihna atan Chalfilh Group in Darlawnah thleng se tih a ni.

IV Annual report 2007-2008 Chung Chang:
Central YMA President Pu C.Lalruatkima’n Ni 21.10.’08 zana Report a pek chu lungrual taka pawm a ni.

V Finance Report 2007 - 2008:
Pu R.Lalngheta, Fin. Secy, Central YMA hnen atanga Finance report chu lungrual taka pawm a ni bawk.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

INDIA AIAWH DAWN
Nl Lalsangzuali, chuan tunah hian Bangalore ah training a nei mek a. Thla thar a Common Wealth Games, Canada a neih turah India aiawhin a khel dawn. Tha tak a a khelh kan duhsakin medal la ngei turin duhsakna kan hlan e.


NEI THAR
Kan Joint Editor Tv. JC Lalrammmawia chuan NUPUI ni lovin Computer thar tha tak mai a nei thar a, kan lawmpui hle a, room a zauh lian hle a, nupui a nei dawn emaw kan lo tih laiin Computer zawk a nei thar ta a ni. Tun atanga hun reilote ah hian nupui lam pawh a nei mai thei. Lawm tur a ngah hle. Computer zan lama khelhpui chak hmeichhia han khalhpui neuh neuh tur chiah a mamawh ta. Nula in tan la r’u.

BRANCH
Ni 19,20 leh 21 Oct. ‘08 zingkar khan Hall te hnuai lai a hnatlang neih a ni. Nimin Ni 22.10.’08 khan nilengin hnatlang hi neih chhunzawm a ni bawk. Member hnatlang chhuak te an fakawm thin hle. Hnatlang a thawkchhuak hi Member tam lam chhut chuan kan thawkchhuak tha tawk lo hle thin a. YMA Member tinte tan la thar leh deuh turin kan in ngen a ni.
Tlawmngaia Thingpui lumsaktu leh man tlawm taka Motor hman tirtu Pu PC Zaingena te chhung chungah Branch YMA chuan lawmthu a sawi mawlh mawlh a ni.Nl Zohmangaihi (Mami) K Sec. chu Branch hnatlangah hian a tel kim veka a entawn tlakin a chhuanawm hle.


&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

LAWMMAN LA TUTE
Central YMA Chanchinbu la tha lawmman dawng tute:

Aizawl khawpawn:
1) Vengthlang Br. YMA, Champhai
2) Kahrawt Br. YMA, Champhai
3) Vengthar Br. YMA, Khawzawl
(An vai hian Sub-Hqrs, Champhai huamchhung ami vek an ni.)

Aizawl khawchhung:
1) Chaltlang Br. YMA
2) Chhinga Veng Br. YMA
3) Armed Veng Br. YMA

Member atanga chhut in:
1) Bukpui Br. - 52.11%
2) Sateek Br. - 42.75%
3) Mualvum Br. - 31.25%

Kumpuan bawhzui tha lawmman:

Branch:
1) Zotlang ‘E’ Br. Champhai
2) Venglai Br. Champhai
3) Muallungt6hu Br.

Group:
1) Tuipuiral Group
2) Saitual Group
3) Zawlbuk Group

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

Editorial
KHAWMPUI
Pawl emaw kohhran ani emaw ah hian khawmpui hian hmun pawimawh tak a luah tlat a, khawmpui rorel thu a kal thin kan nihna hi thil hlu leh tha tak a ni awm e.
Pawl inkaihhruaina ah hian mimal ngaihdan leh hruaitute ngaihdan in thil chu thui tak a kal chang a awm mai thei e. Amaherawhchu, pawl member tam zawk te ngaihdan a pawl kaihhruai a nih theihna tur in khawmpui hi neih a ni thin. Hei hi Democracy ramhlutna a ni. Tu thu hnuai ah mah kan kun lo.
Hetiang hi a nih avangin khawmpui ah hian a pawimawh lai ber chu rorel hi a ni. Rorelna a kan uluk peih tawk lo leh kan thurel pawh ngaihtuahna hmang lem lo a khawmpui palai kan nih chuan kan palai chhan ah kan hlawhchham tihna a ni. Kan kalchhan ah chian a pawimawh. Pawl innghahna leh kal zel dan tur reltu ah meuh kan tang a nih chuan ngaihtuahna tak tak sen a tul khawp mai.
Khawmpui hi a hautak thei khawp mai a, sum leh pai, tha leh zung kan senral thin ngaihtuah hian kan khawmpui hlutna nen hian buk ta ila a hlu a ngem. Hlimna leh lawmna kan uar tluk hian takna leh taimakna uar ila kan thatpui zawk awm e. Khawmpui ah hian kan tum ber hi enge? Huau huau a in hawt buk ringawt hi em ni? Pawl in a mamawh thil tak tak kan khawmpui hian a thlen em? Dan pangngai ah kan neih vang a khawmpui hi nei kan nih chuan hun leh tha, sum leh pai kan senral hi a uihawm ngawt ang.
Khawmpui hi ngun taka ngaihtuahna senga kan hman thin a tul tawh takzet a ni. Pawl mamawh leh kalphung, a kal zelna atan a pawimawh relchhuahna hunah i hmang ang u.

KEIMAHNI
Kan chanchinbu lam ah rokhawlhna engemaw avangin phek li ni thin kha phek hnih in kan rawn chhuah a, chhiartute ngaihhnathiamna kan ngen e. Tin, a man lam la luttha lo fo a, chanchinbu latute khan khawngiah a lo pe zel turin kan ngen che u a ni.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

SECTION NEWS
KHUANGCHERA
Tunkar chho hun remchang ah hian section Committee neih an tum a, Committee memberte lo inring theuh nturin ngen in ni.

Tin, Section hrang hrang a Electric Bill khawntute khan a rang thei angin Electric Bill kha khawn leh tur a ni. Tumah innghah khawtlai leh in tur chawp ngailo turin Section hruaituten ang ngen che u.

FAKAWM
Police Station hnuai kawng min ina a hnawh avanga lirthei leh mihring tan pawh a kal hrehawm tak thin kha tunah chuan thenfai a ni tawh a. Hemi then fainan hian Pu B.Remmawia Kahrawt chuan a JCB rawn thawh chhuah in a thlawn vekin lei vung hi paihin nilengin hna a rawn thawk a. Hetiang mi, Mi thilphal leh khawtlang thatna atana insengso phal an awm hi a fakawm tak zet a ni. An chungah khawtlang hruaitute an lawm tak zet a ni.


KHAPNA THUPEK
Deputy Commisioner, Champhai District hnen atanga thu kan hmuh angin Kawgpui kama thingphunte a lo him zawk theih nan te, Kawng a kal tan leh khualzin mite tana a nawm zawk nan te, Lirthei Accident thlenga a him zawk theih nan te Kawngkam a thing ding te hi an pawimawh a. Hei vang hian Kum 2009 thlawhhma tur, lo vat tur reng rengin kawng atanga feet 24 a thui zuah ngei ngei tur a ni. Thupek pawisa lo chu an chungah na tak a action lak tur a ni.

FIMKHUR RU
Tunlai hian kan Vengchhungah Ui leh Ar Bo sawi a awm zeuh zeuh a. Thawmhnaw zarlai leh thildang eng eng emaw pawh a bo fo mai a. Chhungtinte fimkhur theuh turin kan inhriattir a ni. Tin, hetiang misual man chhuah kawngah hian mitinten mawh kan phur tih hria i la, rinhlelhawm deuh te kan hria a nih chuan chhui chiangin thuneitute hnenah report thin nise.
Internet Kaltlangin chhiar theih
Kan veng chanchinbu Vengsang hi Internet kaltlangin www.ymapalai.blogspot.com ah chhiar theih a ni ve ta. Mahni chhungkua hmundanga awmte pawh i hrilh ang u.

&&&&&&&&&&&&&&&&&&&&&&&&&&&&&&&&&&&

J Mangur, Blade a ngai lo. Nunpuia englo ih tilh na (Veet) kha kan hmang a, Kan kal mam mal mal mai.
- Mami & Zopuii K.Sec
J Thianten Nupui ngamlo min ti vei rawk rawk a, ka leng haw in zan dar 12:00 ah ka kai tho a, Sikri ka aipui hmiah mawle ! A phun ngam dek lo...
-Lianzuala V.Sec
J Ka Nu nen hmanni a Vety kan kal khan khan Vety Doctor in ka ..englo a la deih mai a, fa pawh ka nei theih ka ring ta lo!
- Ngurbiaki K Sec.
J Ka Blood group hi engemaw a nih ang le? ka rin dan mai mai chuan LOCAL emaw BEDC a nih deuh ruih ka ring.
- Kawlnia (Makpa thirchhia) V Sec.
J Zo Star Concert hi kei aia tangkaipui an awm lo ang, ka chhass Mahruaii nen kan endun nasa keu vel . ** kan uar lutuk a, hmel hmuhtlak pawh ka nei ta lo!
- Maro-a K Sec.

0 comments: