Vengthlang Kohhran (Kohhran Aw)

Sex Education zirna: By-Rev.L.H.Rawsea
CHRISTIAN SEX EDUCATION FOR CHILDREN

Kan rama nu leh pa tam ber hi chuan Sex Education han tih hian sawi thiang lo sawi ang leh zahmawh sawi angah kan ngai deuh tlat thin. Kan fate hi zirtir ngei ngei ngai chuan kan hria a, mahse han zirtir chiah tur erawh chuan kan tim deuh a. Zirtir pawh lo tum ta tehreng ila, a zirtir dan tur te, zirtir tur te, a zirtir hun te, tawngka hman tur te thlengin kan hre tawk lova, sawi lohvah bawk kan tlak leh thin a ni. Se chungchangah kher hi chuan kan faten thudik an hriat hi tul kan ti lo a ni ber mai awm e. Chutiang nu leh pate chuan an fate chu an len deuh ur tawh hnuah pawh naupang chhe cheia cheiin an tipuitling lo duh hle. Zirtirna tha dawng lo te, a hun laia zirtirna dawng fuh tawh lote chuan a tak taka mihring nun an rawn daiin harsatna an tawk nge ngen thin a ni.

Naupangin an hriat ngei ngei tur an hriat loh va, zirtirna tha an dawn loh hian rah tha lo tak a chhuah thei. An taksa a lo thang a, an lo puitlin dawnah mite hriatpui lohvin harsatna an l tawk thin. Hmeichhe naupang, a hma lama zirtirna leh thu tha dawng lawk lote chu thanthi an neih tan dawn leh a neih hnu thleng pawhin a tul lova buaina, lungngaihna leh rilru nawm lohna te, inthiamlohna lian tak te an nei thei a ni. Mipa naupang lam pawhin chi thlah thei tura puitling an lo nihin harsatna an tawk ve bawk. Entirnan zan mutnaa an chi lo chhuak te chu an hrethiam lova, an nun a zar buai hle thei bawk. Amaherawhchu, hrilhlawk thlap an nih a, zirtir an nih phawt chuan an tan buaina tur a awm lova, puitling an nih ve tawh tih lo lan chhuahna a ni a, an tan a hlimawm zawk em em ang.

Hmeichhia in thanthi an lo neih dan te, a n hnute lo um te, nau an lo pai mai dan te leh hrin dan te hi chiang taka hrilhfiah an mamawh a. Chutiang bawkin mipa naupang pawh chi thlah thei an lo nih dan te chiang taka hrilh an mamawh. Naupangte hi an taksa lo than leh danglam chhoh lai vel hian ngahsak an mamawh hle tih hre reng ila.

Sex Education:AIDS ven nan

Naupang leh tleirawl a kalkan lo: HIV/AIDS hi engtiang chiah in nge a darh tih hi hre fai vek lo ah ila, a darh nasa hle in a hriat. Chung zingah chuan naupang leh tleirawl zawk te pawh an tel a ni. He natna tihbaiawm tak hian nunna a zah lova, Pathian in duh taka a siam, kum lama naupang tak tak pawh kalkan bik hek suh. A thente chu an vanduai vanga kai te, an nu leh pate atanga lo kai te pawh an awm bawk. A vanduaithlak tak zet a ni.

An naupan lai atanga i ven that loh chuan.........: Thil tha hi tih thut theih a ni lo. Khawtlang nun siamthat te, rorelna siamthat te pawh vawilehkhata tih phut a, hlawhtlin nghal duak theih a ni ngai lo. Nimahsela, zawi zawia kan tih erawh chuan a tawpah hlawhtlinna kan hmu ang. A hun laia thil ka tih loh erawh chuan tlakchhiat rup mai pawh hi a awl thin. Fate enkawl kawnga nu leh pa tam takte tihsual fo chu an che tlai a, a hunah an fate an enkawl thin loh avangin kawng dik lo an lo zawh han ta thin hi a ni. A hun taka tih hian awzia a nei thin a, a tlo pawh a tlo deuh nge ngen thin a ni. ( chhunzawm zel tur.....)

&&&&&&&&&&&&&&&&&&&&&&&&&&&&&&&&&&&&&&&&&&&

- E d t i t o r i a l -
Camping chhuakte nghehna
Tunhma atangin Camping hi kan nei fo thin a, kohhran in nasa takin a chak phah a, sum leh pai, hun leh tha tam tak seng thin mahse, thlarau bo pakhat tal chhanchhuah a awm chuan a tluka hlu a awm chuang lo. Chuvangin kohhran pawhin thlarau bo chhanchhuah nan leh muthlu te kaitho turin sum leh pai tam tak sengin Camp a buatsaih a ni.

Tunhma chuan Campers ten chhuah hnua an hreh tak mai pakhat chu thenrual te nena inkawm leh hun a ni a. Tawngtaina ah pawh an hlan tam thin a ni. Tunlai ah chuan khatiang hun te kha kalsan in thiantha piangthar chu kan inlawmpui tawh em em zawk a, hei hi tun tum Camp chhuah ah pawh hian kohhran mi zawng zawng ten kan hriatreng a pawimawh. Camp chhuak te fiamthu a bawl liam a, an tluk leh hun chang ran lovin, nghet taka an kal theihna tur leh kohhran an belh tlat theihna turin kan pui tur a ni ang.

Camp chhuak te tan pawh kan thiantha tak te pawh hi khawvel lama min hruaikir fotu an ni tih hria in fimkhur a tul a, Piantharna kan chan chiah a Kohhran kan belh tlat hi kan nghehna pakhat a ni tih kan hriat a tha hle.

&&&&&&&&&&&&&&&&&&&&&&&&&&&&&&&&&&&&&&&&


Vawiin Inkhawm dan tur
Puitling: Vawiin Chawhma atangin Biak Inpui ah Camping Follow-up programme hman tan a ni ang a, Puitling Sunday School a awm lovang.
Inter, Sacrament leh Senior Deptt.: Senior Room ah a huhovin inkhawm tur a ni a.

Primary leh Junior Deptt.: Primary Room ah inkhawm tur a ni.

Beginner Deptt. in Nauhual inkhawm an nei dawn a, zirtirtu leh naupang te bakah Nau hual tura hming lak zawng zawng te chu Beginner Room ah inkhawm vek tur a ni.

Rawngbawltu Camp hlawhtling
Camp vawihnihna atana Rawng-bawltu Camp kan neih chu nimin khan an chhuak ta a, Camp lut zawng zawng hi mi 119 an ni a, heng zingah hian Kohhran Committee 11, KTP Comte. 5 leh Hmeichhe Comte. 15 an tel thei a, rawngbawlna hrang hrang chelhtute an tel tha in Bialtu Pastor pawh lut zingah hian a tel.

Vawk vulh la dil theih
Mi harsa te chhawmdawlna atana buatsaih Endowment Fund hmanga Vawk vulh duh te tan dilna hun Pathiannileh thleng khian hawn ala ni. Tunah hian mi thahnem takin an dil tawh a, amaherawhchu diltuten Politics ang deuha in sawipui chi a nilo tih hriat tlan a tha ang.

&&&&&&&&&&&&&&&&&&&&&&&&&&&&&&&&&&&&&&&&&&&

Camping Vawi 3-na
Mipui Camp
Naktuk ni 20.10.08 (Thawhtanni) atang hian Camping vawi 3-na chu tan a ni leh dawn ta a, Inrinni ah chhuah tur a ni ang.
Camper-te hriattur:
1. Registration: 10:00Am-4:00 P.m
Biak in Veranda ah.
2.Camp Fee : Rs 50 & Buhfai 3 Kgs.
3. Luh dan : Tlai dar 4 ah luh kim tur a ni a, Camp- ah zanriah ei tawh tur a ni ang.
4. Sermon tan : 7:00 P.m.
5. Mobile Phone : Campers te tan kenluh phal a ni lova, Pawnlam biak mamawh zual tan Biak In kawtah landline dah a ni.
6. Ruih loh tur: Camp-na hmun hi Biak In a nih avangin zah tur a ni a, Camp lut tur te Ruih phal a nilo.

Naupang Lang Camp
Nimin nileng khan Team hoten Naupang Lang Camp an buatsaih a, kan kohhran naupang thahnem tak an kal a, hlawkthlak an ti hle.

Thilpek pe/ pek zel theih
Kan Kohhran Camping tanpui nan mi inphal ten pawisa leh chawhmeh te an pe zel thin a, Camping hruaitute an lawm hle. Mi inphal te tan Camp tanpui na hi pe zel turin an sawm bawk a ni.

Tawngtai Khawl
Camping puala tawngtaina chu PS-II hnuai, Education Conf. Hall ah neih thin a ni a, Chhun ah leh zanah hun hman thin a ni a, mahni hman hun apiangah tawngtaina hun hmanga kal tur hian Committee hruaituten kohhran mite an sawm a ni.

NEICC pual tawngai
Vawiin hi North East India Christian Council (NEICC) puala Tawngtai Ni a ni a, NEICC a tel member kohhran te chuan hemi pual tawngtaina hi hmangin inkhawm vawikhat thawhlawm chu NEICC puala lakkhawm a ni ang. NEICC ah hian kohhran 35 leh kohhran nilo Pawl (Para Church/Organisations) Associate members 12 an awm mek. Kan Kohhran pawhin hemi pual hian zanah hun hman a ni ang.

Vengthlang ‘N’ ah Camp
Pu Zodinsanga Khiangte leh Tv.C.Lalhmingsanga te Speaker a hmanga Vengthlang North Kohhrana Special Camp kar 2 chhung an neih chu an chhuak ta a. Naktip Thawhlehni atang khian kar 2 chhung awh tur Camp hi an chhunzawm leh ang.

Synod Deptt. Committee
October ni 20 atang hian Synod hnuaia Department/ Board Committee hrang hrang te chu Synod Committee Room ah an thu-khawm dawn. Tunkar ah hian PPF Board, PresCom Board, Sunday School leh Mission Board te an thukhawm ang. Kan Kohhran atang pawhin Upa C.Keikhuma (SEC) leh Upa JC Rohnuna (Pastoral) te Committee member an ni.

Vengthlang MPF in tan ta
MPF Vengthlang Local Committee chuan MLA thlan huna Party leh tlawmngai pawl te nena hmalak dan tur an rel chu nitin chanchinbu lamah an tarchhuak tawh a. Hei hi zawm theuh turin mitinte an ngen a. Inthlanna felfai nei turin chak taka hmalak an tum.

&&&&&&&&&&&&&&&&&&&&&&&&&&&&&&&&&&&&&&&&

0 comments: