YMA Palai

63rd YMA General Conference a tiak ta. Nakumah Darlawnah
Vengthlang,26th Oct. (Pathianni) : 63rd YMA General Conference - 2008, Dt. 21-23.10.2008 chhunga Serchhipa neih chu tluang taka zawh a ni ta a, Conference-ah hian Palai riak lut mi 4000 vel an awm. Nakum YMA Conference hi Darlawnah nghah a ni dawn a, kum dang ang lo takin tun kum Conference-ah hian Kumpuan neih loh an tha an ti a. He Conference-ah hian Pu C.Rokunga, CYMA President hlui chu Khuallian atan hman a ni a, a ni bakah hian Pu T.Sangkunga, CEC member chuan Khawtlang siamthat (Moral & Social Reform) tih a sawi a, Pu C.Zoramliana, CEC member pawhin Khawtlang nun siamthat (Politics & Economics) tih a sawi bawk. He Conference-ah hian lawmman hrang hrang sem a ni a, nakum Budget atan Rs. 83,97,400 (Nuai sawmriat pathum, Singkua, Sang sarih zali) chu pawm a ni. Dt.22.10.08 a Palai rorel Minute hetiang hi a ni.
I. YMA KHAWIH:
a) ‘Mizo nun ze mawi uar zawka inzirtir nise’ tih chu zau takin kan sawi hova, lungrual takin kan pawm.
b) ‘YMA DANPUI (YMA Constitution) -a siam that ngaite ennawn ni rawh se’ tih chu lungrual takin kan remti.

SAWRKAR KHAWIH :
a) ‘Mizoram sawrkar hna lak thinah hian a tling leh tlakte chauh lak a nih theih nan Sawrkar-ah thlen ni rawh se’ tih chu ngun takin kan sawi hova, lungrual takin kan pawm.
b) ‘Saitluk Airport tihpuitlin a nih thuai theih nan Mizoram Sawrkarah ngen ni rawh se’ tih chu ngun takin kan sawi hova, a thu siam remin ‘Saitluk ramah Airport siam a nih thuai theih nan Mizoram Sawrkarah ngen ni rawh se’ tih chu lungrual takin kan pawm.


II. CENTRAL YMA BUDGET 2008-2009 :
Pu Vanlalrema Rokhum, Treasurer, Central YMA Budget 2008-2009 atan Rs. 83, 97,400.00 (Nuai sawmriat pathum, Singkua, Sang sarih leh zali) a pharh chu, zawhfiah ngaite kan zawhfiah hnuah lungrual takin kan pawm.


III. 2009 YMA GENERAL CONFERENCE THLEN DILNA :
Kum 2009 YMA General Conference thlen diltute :
1. Chalfilh Group YMA - Darlawnah
2. Zemabawk & Zemabawk North Branch YMA - Zemabawkah
3. Zawlbuk Group YMA - Thingsulthliahah
4. YMA Sub-Hqrs. Kolasib - Kolasib-ah
Kum 2009 YMA General Conference thlen diltu aiawh theuhte an dil chhante an sawifiah hnuah, palaite’n Secret Ballot-a vote lain, kum 2009 YMA General Conference chu Chalfilh Group-in Darlawnah thleng se kan ti.


IV. ANNUAL REPORT 2007-2008 CHUNGCHANG :
Pu Lalruatkima, General Secretary, Central YMA hnen atanga Annual Report 2007-2008, Ni 21. 10.08 (Palai lawmna inkhawm) zana ngaihthlak chu kan pawm.

V. FINANCE REPORT 2007-2008 CHUNGCHANG :
Pu R.Lalngheta, Finance Secretary, Central YMA hnen atanga Finance Report 2007-2008, Ni 21.10.2008 (Palai lawmna inkhawm) zana kan ngaihthlak chu kan pawm.

Palai rorel inkhawmah hian mi 759 zet an tel thei a, rorel tan hmain Guwahati Mizo Welfare Association (GMWA) atanga Conference tluang taka hman anih theih nana duhsakna kan dawn chhiarchhuah a ni bawk.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&


Camp nei mek
Vengthlang Kohhranah Thawhlehni atang khan Gospel Thunder, Speaker Pu R.Zaihmingthanga hovin Camping chhawng 3-na neih mek chu nimin zing khan an chhuak fel ta. Camping-ah hian mi 420 lutin Pathianah nunthar neiin Camp hi an chhuahsan a ni. Tunkar chhung hian Camping Vawi 4-na tur neih leh a ni dawn a, a duh a piang lut turin min sawm a ni.

Vengthlang North Kohhranah pawh Tv. C.Lalhmingsanga leh Pu Zodinsanga Khiangte bakah midang 10 hovin Camping hi buatsaih a ni a, Camp lut zawng zawng hi mi 14 an ni. Heng zinga 7 hi Jail atanga rawn lut an ni a, Lockup atang 1 bakah khawtual mi 6 an awm bawk. Anni hian kar hnih chhung zel Camping neiin karleh Inrinni khian chhuah an tum a, chawhmeh leh an ei in tur bakah sum leh paia tanpuitu zawng zawng chunga Camping buatsaihtuten lawmthu an sawi mawlh mawlh a, Kohhran mipuite tawngtai puina an ngen reng bawk.
Thawk reng
V.C ten NREGS hmalakna atanga kawngpui siamrem hna an thawh mek, Book room bul atanga Pu Vanenga Varte inkar kawng an laih chu an zawh tawh hnuah a zauh belh nan P/S-II lungrem sa thiatin a tharin chawl lovin an thawk mek reng a, khawtlang tana an School ram petu P/S-II Headmaster & Staff te leh Education Deptt. hotute chungah khawtlang kan lawmin an fakawm kan ti hle.
Kohna
Vawiin tlai Dar 3:00 hian Vengthlang Branch YMA Sports Sub-Committee member zawng zawngte YMA Runah kim taka kal tur a ni e. Palai bak kohna siam a nih loh avangin member ten hei hi kohnaa ngaih theuh tur a ni.
Khawl chhiat vang
Kan Branch Rising Day October ni 13 denchhena a mamawh apiangte hman atana Champhai Civil Hospital-a thisen pek (Blood Donate) Branch Committee in a lo rel tawh chu Blood Bank a chhiat avangin pek theih a ni ta lova, remchang dang a la awm thei anih chuan la ngaihtuah thar leh chauh tur a ni ang.
Zirlaite Ngenna
Kumtawp exam a lo hnai leh ta hle mai a. Zirlai naupang zawng zawngte zing leh tlai lamah lengchhuak lo turin kan inngen thar leh e. Tin, nu le pate pawhin kan naute teivak mai mai hian midangte a tibuai a ni tih hriain khuahkhirh an tha hle.
Lawmman kan dawng
YMA General Conference Serchhipa neih zawh taka lawmman hrang hrang an sem zingah kan Branch chuan Aizawl khawpui pawna Central YMA Chanchinbu la hnem ber lawmman pakhatna kan dawng. Lawmman hian Tangka fai Rs.3000 leh Certificate a kengtel a ni. Chanchinbu la tha ah hian Aizawl khawpui chhungah Chaltlang Branch 1-na an ni a, Member za zela chhuta la tam ber chu Bukpui Branch (Serchhip) a ni.
Tug of War Inelna
Champhai District Tug of War Association leh Mizoram Tog of War (MTWA) Gen. Hqrs. Aizawl buatsaihin Thawhlehni hian Chhangphut Field-ah Champhai District huam chhunga V.C bial tinte inelna tur Inhruipawh (Tug of war) buatsaih a ni dawn. Lawmman atan 1-na Rs. 4,000, 2-na Rs.3,000, 3-na 2,000 a ni ang.
Silver leh Bronze la
Champhai District Athletics Meet ni 2 awh neih zawh takah kan veng atangin Lalbiak tluanga s/o R.Kapthanga chuan 800m ah Silver leh 3000m ah Bronze a la a, midang medal la kan veng atangin an awm lo. He Meet ah hian a pumpuiah Kanan 1-na an ni a, Tlangsam 2-na niin Venglai 3-na an ni.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

0 comments: