Kahrawt YMA (Kahrawtians)

Branch OB meeting neih ani.
Kahrawt Branch YMA OB meeting chu ni 31.10.2008 zan khan neih ani a, chuta an thurel pawimawh zual deuh deuh te chu:
1. Executive committee neih hun tur ngaihtuah ani a, a hun atan Dt.6.11.2008 (Nilai thawhtan) zan dar 6:30 ruat a ni a. He Executive meetingah hian a hnuaia mi ang hian ngaihtuahho tur chhawpchhuah nise tiin rel ani a, chung te chu:
i) Central YMA in Kumpuan neih tawh loh a rel tak si avangin kan veng chhunga Ruihhlo do kan kalpui zel dan tur chu Branch Executive ah thlen nisela, Executive in rem atih chuan veng chhung nu leh pa te emaw chhungkaw aiawh zo ngei tur koh khawm a ngaihdan lak nise tin, a kal te hming lak vek ni bawk se . ii) Dry area a kan in puan hi chhunzawm zel tha kan ti nge tilo ?
iii) Hremna dan mi thenkhat chunga kan la lek mek hi ruihhlo do chhunzawm zel tawh loh kan ti anih chuan kan phelh ve mai dawn nge? do tlang zel kan tih chuan la hrem zui zel tur?
2. MHIP Kahrawt Branch chuan kuang chunga dah tur pangpar leina tur an rawn dil chu remtih sak an ni a, kan pawisa kawltute nen a tul ang chu lo buaipui mai nise tih ani.

&&&&&&&&&&&&&&&&&&&&&&&&&&&&&&&&&&&&&&&&&&&&&

MPF Local Forum leh Party hruaitute thuchhuak
1. Kahrawt veng huam chhungah aurinna hmangin eng pawl/party mah campaign loh nise.
2. House to house campaign hi tih loh nise, kawngzawh pawh tihloh nise
3. Sum leh therhlo dang hmanga vote lei leh hralh hi tih loh nise.
4. Ruaitheh leh picnic hi tih loh nise.
5. Invau leh inrikrap awm lo turin theihtawp chhuah theuh nise.
6. Party manifesto, Policy & Programme, candidate hriatchianna atana lehkha buatsaih etc sem chi a awm chuan party malin buaipui lovin MPF kutah pekluh nise, a sem chungchangah mawh lo phurin a theih chn chinah a rual tlanga sem tum nise.
7. MPF kaihhruaina hnuaiah chauh Jt. Platform buatsaih nise.Party malin a hranpaa public meeting neih an duh anih pawhin MPF kaihhruaina hnuaiah ni thei se.
8. Mipui, pawl hrang hrang leh mimalin candidate te hnenah thil phut neih loh nise.
9. Party leh candidate ten Silpauline, Football, Jersey etc hi sem loh nise.
10. Flag hi in khatah pakhat aia tam tar loh nise. Tin, Banner 2 leh Poster 50 aia tam lo tar nise. MPF in tar dan turah chuan mawh lo phur se.
INTHLAN NI-AH
1. Vantlang tana thungpui lum leh polling booth area bul hnaia Electoral roll en hi party ten tihloh nise, Electoral roll a serial number lo enlawk na tur erawh chu MPF in lo buaipui se.
2. Vote thlak tur phurh khawmhi tih loh nise, tar leh damlo chaklo an awm chuan MPF in ruahmanna siam se.
INTHLAN ZAWH.
1. Vote chhiar leh puan laiin bengchheng siam loh nise, halpuah leh puakthei lamchi phei chu khap bur nise.
2. A tling te pawhin a tling lo te tana hriat nuam zawnga boruak siam tlan tum nise, indeuh sawhna lam chi leh tawngkam dengkhawng, mi rilru tina zawnga nei lo turin mahni party theuhah tan lak nise.


&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

Teuh lo mai !! SMS By: Vice President
Kum 2008 YMA General Conference Serchhipa kan kal dawn a ka rilru a thil riak tlat, kan chak leh phur ang pawh a min awmtir theilo tu thil pakhat hruaitute thinlunga riak tlat chu.. Kan President Pu Thanghuliana, conference na a kal chak em em, ama ho ngeiin kal ila kan tih laia damlohna avanga a kal ve theih tak dawn loh thu kan hriat kha ani.
Thingsul dai kan thlen chuan ka mobile handset chu a rawn nghawr dar dar a. Kan nu SMS ni ngei a ka rin laiin, ka han en nak chuan a teuh lo mai !! Kan President khawhar lungleng SMS chu lo niin, ti hian alo in ziak a, a lunglen thlak teh asin.
“Kum 2008 kut ni vangthla, thlaral lam a lo ni ta reng mai. CYMA Gen.Conference vawi 63 na hmang turin khawmpui hlawkzia leh nawmzia lo hre tawh te chu awm mai mai thei lovin Serchhip lam pana Branch hrang hrangte kawng dunga inngeih taka an han in tlanpel a, ban an han in vai lawp lawp turte, tanpui ngaite tanpuitu YMA an nih anga an in tanpui turte ka mitthla an cham reng a. Aww... an zinga telve ka va chak tak em..” tiin
(Nakumah Darlawn lama kal thei ngei turin duhsakna kan hlan mawlh mawlh e. - Editorial board)

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

CYMA Pre. kamchhuak
“...YMA hi kan hmalak a zauin tihbik neih a harsa a, chuvangin hun hman thiam “Time Budgeting” kan thiam a ngai a, kan chhungkua leh eizawnna kan ngaipawimawh em em tur ani. Kan tlin tawk bak inphut lo ila, YMA hna hi tlawmngaihna leh inpekna “Voluntary” ani tih i hre reng ang u. Heng kan hma lakna zawng zawngte hi Zoram lo la awm leh zel tur atan te, ka tu leh fate leh tuna thalaite tana kan thawhna ani. Kan Zonun parmawi tluchhe mek hi tungding leh ila, kei, kei, ti lovin, nang, nang, ti zawkin, sem sem dam dam ei bil thi thi ti zelin, raltiang ram kai tur leh Mizo ti hmeltha zel turin he “MIZO INPUI” atang ngei hian bul i tan leh ang u.”
Naupang ninhlei
Kan veng thlanmual velah naupang leng vak leh lehkha zir chhuanlama kal vel thin ten thing tiak leh thlana mi pangpar khawilai tihchhiat an ching a, a pawi hle. Tun chinah thlanmual ramah naupang vah vel mai mai phal ani tawh lova, thil tichhia hriat an nih a man chhuah an nih chuan na taka hrem an ni tawh ang.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&


CHKD

z Kan Pastor hi a chhuah dawh chuan chhuak thuai thuai teh se. Chuti lo chu a hnunga lo awm turte thawh tur a thawk zo takngial dawn. - Thau a
z Tluangte, nitin hian Sailoa nen vawi li kan in miss-call ziah thn asin. - Zari (V.Sec)
z Zin haw hlan kan nghakhlel ve em em a, kan han haw ve ta cheng a haw kawnga nupuite zin tur nen a kan han intawk zet chu ngaihtuahna a bing mum mum mai alawm.
- Pu Langa(V.Sec)
Lawmthu
Kar hmasa lamah kan lo mangnghilh palh, tun tum YMA General conference Serchhipa neih ah khan kan Branch atanga Palai kalte duat tak leh a tul ang apiang lo buaipuia lo mikhual tu Pu V.Lalrintluanga, T.Sec Leader thin a hna avanga Serchhip lama min awmsan tu chungah Palai kalte an lawm hle a. Tin, kan veng Presbyterian Kohhran Pastor thin Pu R.Lalrinsanga te chhung pawhin palaite an lo buaipuiin an lo lawm thiam hle a, an chung ah pawh lawmthu palaiten an sawi mawlh mawlh bawk ani.

Pem lehkha
Vengsang Branch YMA atangin Pu Nangdeihpianga te chhungkua member 6 awmna pem lehkha fel tak hmuh ani.
Ninawm suh
Kan hma lawk November 6 atang khian MSLC/MESLC te chuan board exam an tan tawh dawn a, chuvangin veng chhungah zirlai ti buai thei chi reng reng bengchheng siam lo turin kan in ngen a. Midangte tana ninawm khawpa ring a Tape play te, guiter nena kawtthler ah emaw inchunga zai etc te tih tawh loh nise. Zai nuam ti mi kan ni anih pawhin tun Exam hma leh a hun chhung hi chuan insum hram hram turin kan in ngen ani.
Gas nei ta
LPG Manager Pu Lalrinthanga zarah Commercial Gas connection kan dil chu nimin piah khan tihfel ani ta a, Cylinder lian chi hall-ah kan hung ta ruau mai, a lawmawmin a thlamuan thlak ta hle mai.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&


Enkawltute
Kamchhuak
Kumpuan thlah nan vawi khat na na na chu in sawi leh lawk teh ang. YMA lama kan roreltu sang lampang ten kumin chu Kumpuan neih loh an rel takah chuan khua te pawh a har lawk ang reng khawp mai Ram leh khawtlang chhan na atana branch hrang hrangte kan thawh honaah thian tam tak kan inchhar phah ringawt maite pawh hi a lehlam zawnga ngaihtuah chuan hlu tak ani.A thim a var pawh thlu lova rampalaileng a vur leh dai kar atanga inchharchhuak te phei chu in ngainatna a thuk duh bik te pawhin a hriat nghe nghe ani.
YMA in kumpuan a hlih tak avang hian ruihhlo zuar leh ngaite an zalen ta tihna ani chuang lova.Kan thuthlung anih miau avangin ram leh khawtlang thatna tur chuan YMA chuan a bei zui zel dawn tho ani. Veng thianghlim nih chu duh lo kan awm hauh lovang a, chumi nei thei tur chuan kumpuan a awm emaw awm lo emaw kan kal dan pangngaia kan kal zel hi a him berin a rinawm.
Kan tu leh fa te awmna tlaka kan khawtlang hi siam kan duh anih chuan tun atanga hma kan lak chhoh hi a ngai tho tho a. Nakin a tih atana kan dah anih chuan a tuar tu tur chu keimahni tho kan ni leh dawn. Chuvang chuan kan khawtlang kan tanrual a sualna chi hrang hrang kan do tlan hi kan tihtur leh kan mawhphurhna ani tih hre thar leh ila, sualna do tura ke pen chhuak theuh thei turin YMA members te leh veng chhung nu leh pate i han in sang phek tha leh teh ang u. Kahrawt zawng Kahrawt nge nge tih anih thin kha hre rengin veng dang te entawn tlak in kan khawtlang hi in din thar leh teh ang.

0 comments: