Vengthlang Kohhran (Kohhran Aw)

PCUSA atangin mikhual
Presbyterian USA atangin mithiam, Dr. Jerry Lambert chuan November Ni 11-13 hian Presbyterian Hospital, Durtlang a rawn tlawh dawn a. Dr. Lambert hi Physician lar tak, Medical Benevolence Foundation USA a thawk lai ani a.PCUSA hnuaia International Short Term Mission Service programme te a duansak thin.Tin, Hospital tihdam rawngbawlna lam endiktu a ni bawk.Tun tumah hian India rama Medical Hospital hrang hrangte a tlawh pahin Presbyterian Hospital hi a rawn tlawh tel nghal dawn a ni.

Revival rawngbawlna
Synod Executive Committee in kumin MLA inthlanah hian - Inthlanna dik leh thianghlim aawm theih nan Synod revival Team ten Pastor Bial zawng zawng fang chhuak se tia a rel angin August - September thla chhungin Mizoram Pastor Bial zawng zawng fan chhuah a niin Kohhran leh Branch Church 755 ah rawngbawl a ni.

Ruihhlo ngaite pual Camping
Vengthlang North Kohhran Biak Inah- Ruihhlo ngaite pual Camping chu an nei chhunzawm leh ta a. Camper 20 chuang zet an lut a ni. Kan sawi tawh thin angin anniho hi Pathian rinchhana thil ti tawp mai an ni a.Tanpuina pe theite kan awm anih chuan pek theih reng an ni e. Chawlhkar hnih chhung programme a ni a. Tawngtaipui thei apiangin tawngtaipui bawk ila a tha ange.

MPF Champhai District tan la dawn
Zirtawpni khan MPF, Champhai District chuan kan Kohhran Committee Room ah Committee pawimawh tak kovin,MLA inthlan kan hmachhawn tura hma lakna tur hrang hrangte an duang a. Chung zingah chuan:
1. Naktuk, Thawhtanni Chawhma dar 11:00 hian MPF, Champhai North & South Constituency hruaitute leh Local OB zawng zawngte,NGO ( MPF chhungkua) a hruaitu zawng zawngte chuan kan Kohhran Committee Room ah inhmukhawma, chak taka thawhho dan tur an relho dawn a ni.
2. Champhai Town chhunga Kohhran hrang hrangah MPF Campaign neih tum a ni a.Hemi atan hian hun pawh dil mek a ni.
3. Champhai District huam chhunga Constituency 5-ah MPF chak taka kalpui chhunzawm zel tum a ni.
( MPF hi Mizoram Kohhran hrang hrang leh NGO hrang hrang- MUP, MHIP leh YMA ten kan ramah inthlan felfai tak leh Sorkar thianghlim tak kan neih ngei theih nana, Pathian rinchhana an din a ni a. Chuvangin, heng Pawl hrang hranga memberte chu MPF member kan ni vek a ni. He pawl hi a chak loh chuan kan zavaia tlawmna, kan zavai atana pawi tur a ni tih leh a hlawhtlin chuan kan ram leh hnamin kan Pathian kan chawimawina leh A hnehna ropui tak a ni ngei dawn a ni. member tinin tan i la zel ang u )

&&&&&&&&&&&&&&&&&&&&&&&&&&&&&&&&&&&&&

Vawiin Inkhawm dan tur
Puitling Sunday School:
Vawiin hian, Chawhma Sunday School a awm anga. Zirlai 4 khaikhawm a ni ang. Chawhnu Inkhawm atang erawh chuan Camping Follow Up programme hman chhun zawm leh nghal a ni ang.

NPSS inkhawm dan:
NPSS lamah erawh chuan, mahni Department theuhah, Sunday School Zirlai pangngai zir chhunzawm tawh tur a ni ang.

Pathian ram thilpek
Vawiin hi Kohhranhoten November thla chhung atana Pathian ram thilpek kan lakkhawm ni hmasa a lo ni leh ta. Pathian malsawmna kan dawn nasatzia hi inchhut nawn leh theuh ila. A hmangaihna kan chhan let vena hun min siamsak avangin Pathian hnenah lawmthu sawi ila.Kan neih tawk/ kan theih tawk anih chuan tlem lua / tam lua a awm love.Pathian tan i han pe ve hrim hrim teh ang ule.

Nilai Zan hun hman
Kan Kohhranin Chawlhkar 4 lai Camping neia, hun kan hman chhung khan kan member thenkhatte kan lo hloh ve mek bawk a lo ni reng mai !! Nilai Zan inkhawmah khan inngaihna suala tlu member 7 (pasarih) lai chu thunun thar an ni leh ta tlat mai !!

S u n n a
Kan memberpui duh tak,
Pu C.Rothianga chuan Dt.4.11.08
( Thawhlehni) Zing dar 3:00 khan Kohhran hote chatuan ram min lo pansan leh ta. A kalsan tak, a nupui leh a chhungte kan tuarpui em em a, Pathian awmpuina leh thlamuanna kan duhsak takzet e.

Pavalai Pawl din a ni
Kan Kohhranah Pavalai Pawl chu din fel a ni ta a. Hetiang hian hruaitu an inruat :
Chairman:Pu C.Hrangmanthanga
Vice : Pu PC Laltlanthanga
Secretary : Pu TC Lalhuapzauva
Asst. Secy : Pu Lalpanliana
Pu K.Lalhriata
Adviser : Upa Vanlalhranga
Upa Lalthlamuana
Ex- Officio : Rev. Laldailova
*** Tunah hian Pavalai Pawl ah hian member 50 zet an inpe tawh a. An tangkai theih ang anga Lal Isua leh a Kohhranho tan, chak taka hmalak an tum hle. An hmalakna hmasa atan hlate zirin zanin hian Biak Inah rem an tum nghe nghe a ni.
***A thei apiangin tawngtaipui zel ila a lawmawm hle ang.

Hallo ....Hallo
Pavalai Pawlten vawiin Chawhma Inkhawm ban hian Biak Inah hla zir tur a ni a. Kim taka kal ni se a tha ange.

Vawk vulh tanpuina
Kan Kohhranah, Endowment Fund atanga vawk vulh tanpuina chu tunah hian sem leh mek a ni. Kuminah hian chhungkaw 20-te thlan an ni leh ta a. A pawisa pawh kum dang aiin Rs 500-a titamin Rs 2500 a sem a ni a. Nakum 2009, October thla tawpah khawn khawm leh a ni ang. Kumin atang hian vawk vulhtute hnen atangin Endowment Fund- atan Rs 100/- zel chhung lut theuh tura beisei an ni tawh dawn bawk a ni.
He Vawkvulh tanpuina enkawltu atana Kohhranin a ruat- Upa Hrangvelthanga leh Pu C.Sualneka te hnenah a awmzia chiang kuang taka zawtin an hnen atang hian pawisa pawh lam nghal zel theih a ni ang.

Thlakhata Nikhat tha
Kohhran Hmeichhiaten naktuk Dt.10.11.2008 hian Thlakhata Nikhat tha pek tur a ni a.Biak Inah dar 10:30 A.m ah tawngtai tur a ni ang a, chumi hnu chuan thleng leh No vel silfaia hnatlan nghal tur ani ang.
Tan hun : Dar 10:30 A.m
Hruaitu : Pi C.Lalbiakkimi
Buhfaitham hralh hun : 6:30 A.m.
Khawhar Ina tawngtai: 6:45 A.m
** Hei hi November thla atanga January thla thleng a hman a ni ang.

Zokhawthar tlawh mek
Bial Hmeichhe Khawmpuiin- Bial Centre dangte tlawh ve nise ti a a lo rel tawh angin vawiin hian kan Bial Kohhran Hmeichhiate chuan Zokhawthar Kohhran an tlawh mek a. Tukin zing dar 7:30 hian Chaw ei sain, DK Traffic Point ah innghah khawm tur a ni ang.Kohhran Hmeichhe member zawng zawngte, thahnemngai taka kal tura beisei an ni e.
Hluihlawn thil halral a ni
Thawhtanni Zan khan Biak In kawmchhakah tun tum Camping a Camperte hnen atangin hluihlawn thil chi hrang hrang, Rs 60,477 man zet chu chu halral a ni ta.
Chung zinga thenkhatte chu:
1. Audio Cassette - 200
2. Condom - 23
3. Blue Film - 48
4. CD Cassette - 138
5. Sex Bu - engemaw zat
Hengte hi Upa Lalruma’n a hal ral a. Mipuiten Pathian hnenah hlanin tawngtaihona hun an hmang chhunzawm nghal bawk. Heng hluihlawn thil rawn hlantu zawng zawngte hi i tawngtaipui zel ang u.

&&&&&&&&&&&&&&&&&&&&&&&&&&&&&&&&&&&&&

High School & Higher Secondary School
Question Box - Chhanna thenkhat
( SCERT a adolescence Education Cell a thawkte buatsaih )

Q.1. Engvangin nge kan aw hi tleirawl kan nih hian a lo danglam
ANS: Tleirawl kan thlen hian kan taksa peng hrang hrang a thang a. Kan aw bawm pawh a lo lian ve thut a.Hei hian aw a tithum ve thin.

Q.2.Thinrim thut ka ching a, engtin nge ka tihreh ang ?
ANS: Hei hi temper tantrum an ti a.I thinrim hma kha vawi thum chhiar thin la, ka insum ang tih rilru pu chungin i thinrim thutna chhan kha hmuh chhuah i tum bawk dawn nia.

Q.3. Tiranga ei hian kan taksaah thil tha lo engte nge a thlen ?
ANS: Tiranga ah hian eng chemical ber emaw, drug lampang kaihhnawih a tel a.Hei hian mihring thluak a tibuai theiin tluk thutnate pawh a thlen thei a ni.Hriselna atan chuan thil tha a nih hmel loh hrim hrim.

Q. 4. Ruihtheihthil pumpelh dan min hrilh thei em ?
ANS: Thian, ruihtheihthil ti ngai lo kawm la. I zirlai tha takin ngaihtuah bawk la, tin, hobby neih a tha bawk. e.g: Sports lam emaw, lehkha chhiar lam emaw, i tui zawng tak tihtur i neih chuan thil tha lo ngaihtuahna lak atangin a veng ngei ang che.

Q.5.Engtin nge ‘ drug’ in mihring a ei chhiat ?
ANS: Kawng tam takin a ei chhe thei.Taksa hriatna thazam leh thisen a control tlat a.Rilru lam a piansualtir thin.Mahni chauh inngaihtuahna a siam a.Midangte tana nun hun a awm thin lo.Khawtlang atanga inlakhranna a siam a.Mihring kan nih ang turin min nuntir thei lova, kan nun a pawt zim tial tial a.Rual pawl min theih lohtir a, nun khur thuk takah min tantir thin.

Q.6. Tleirawlten nu leh pate hauhnate hi ngaihtheih loh chang leh thiam zawka kan inhriat hian engtin nge kan awm ang ?
ANS: Tha taka thil awmzia kan hrilha a la sawt lo anih chuan kan cheziain insawifiah a ngai a ni tawh mai.Hun zawng a duh deuh anga, mahse, a tawpah chuan an hrethiam ve mai ang.

0 comments: