YMA Palai

Kumpuan thupui atan ‘Khawtlang nun siamthat’ hman a ni ang.
Vengthlang,16th Nov. (Pathianni) : YMA Committee sang ber, Central Co-ordination Committee thukhawm chuan kumi chhunga YMA Thupui a tan ‘ Khawtlang nun siam that’ an thlang. CCC meeting chuan kum puan tihtawp a nih tak avangin YMA chu kumtin, thupui nei a kaltir leh tawh nise tiin a n rel a. Kumin a tana thupui an thlan chuan ruihhlo dote leh khawtlang nuna sualna dang awm zawng zawngte do let dan tur a huam tel dawn a ni. He meeting-ah hian YMA khawih thil, Mizo ze mawi uar zawka inzirtir nise, tih chu sawiho a ni a, thutlukna siam bawhzui tur hian Committee din a ni a, Mizo nun ze mawi, thalaite zirtir tur thil chi hrang hrang pasarih (7) thlan chhuah a ni bawk. Serchhip-a Gen. Conference neiha sorkar khawih, sorkar hnathawk lak danah a tling leh tlakte chauh lak an nih theihna’n sorkar-ah ngenna thlen ni rawh se, tih leh Lunglei khawpui chhim thlang lam rama Saitluk Airport tihpuitlin a nih thuai theihna’n Mizoram sorkar-ah ngenna siam ni rawh se, tihte chu a bawhzui dan tur ruahman ani a, sorkar-a thlen dan tur an ruahman dawn a ni..

&&&&&&&&&&&&&&&&&&&&&&&&&&

Venglai tlawh ang
Naktuk zan hian Vengthlang North Kristian Thalai Pawl chuan Venglai Branch KTP te tlawh an tum. Venglai Branch hian Vengthlang North hi an lo tlawh tawh a ni. Hun remchang hmasa berah Kahrawt Branch KTP chuan Vengthlang Branch KTP an rawn tlawh ang member te ilo inring lawk theuh ang.

Exam tan dawn
Naktuk atang hian School naupang kum tawp exam chu a nawlpuiin an tan dawn a, Zirtawpni khian exam hi an zo vek ang. Zirlaite mahni thawhrah tha tak seng thei theuh tura tan la turin kan inngen nawn leh e.

Talent Search Exam
Nimin khan Govt. GM HSS ah Champhai District huam chhunga Class - VIII zirlaiten talent search exam an nei a, exam beitu zawng zawng hi 100 chuang zet niin kan hria.

Joint Platform neih tum
Mizoram People Forum (MPF), Champhai North chuan karleh Inriini khian Kahrawt YMA Hall-ah Champhai North huam chhunga Party hrang hrang Candidate-te Joint Platform neihpui an tum. Hemi hunah hian Candidate theuhte chuan thu an sawi ang. A duh apaing he hunah hian kal theih a ni dawn lova, anmahni tawiawmtu mi 20 vel theuh te chauh hemi hunah hian kal an phal dawn a ni.

Lawm tum
Vengthlang North Kohhran chuan an kohhran din cham vawi khatna chu lawm tumin an inbuatsaih mek zel a. A lawmna hi ruai nen ropui taka neih tum a ni a, a din cham tak Dt.25.11.2008 (Thawhlehni) khian ruai nen an lawm dawn a, ruai siam nan hian Pi Tuani chuan Kohhranah Rs.5500 a hlan tawh a ni.

Week hmang mek
Govt. Champhai Colleg chuan tunlai hian College Week an hmang mek a, intihsiakna item hrang hrang hmangin House an inel a ni. He an week hi Dt.20.11.2008 (Ningani) khian an khar ang.

Office hawng dawn
Vawiin tlai dar 3 : 00 hian MPF Champhai North chuan an Information Office tur Pu Rokamlova In chung Awmpui pheiah Pathian hnen a hlanna hun hman ani dawn a, he hun hmanpui tur hian YMA / MHIP /MUP Office Bearer, Vengthlang te chu an sawm a ni. Programme kimchang chu phek hnuang lamah tarlan a ni e.
Exam zo fel ta
Board Exam hrang hrang beitu PSLC, MSLC leh MES- LC-te chuan kar hmasa lam khan an kumkhat thawh rahte an seng fel ve leh ta.

Hnatlang dawn
Naktuk zing hian Vana pa Section chuan Pu Chawngvawra Workshop bul atanga Kanan Veng panna kawng Footpath leh kopang samfaiin an hnatlang dawna, member a tam thei ang ber thawk chhuak turin an inngen. Hnatlang turte chuan mipain - Chempui, Suahdur leh Bawngtu thlawh ken tur a ni a, hmeichhiain Buara ken tur a ni ang. Hnatlanga thawkchhuak turte chuan zing dar 6:30 ah Pu J.C.Chawngvawra Workshop kawt pan mai tur a ni e.

Party Flag Inah Tar Loh Turin Ngen
MPF Vengthlang Local chuan kan veng huamchung Party Office tih lohah chuan Party Flag tar lo turin mipuite min ngen. Tunah hian vengchhung in hnih khat emaw lekin kan la zawm lo. Party Flag kan tar avangin vote kan hmuh tam phah dawn chuang lo tih hriain MPF thu leh hla hi zawm hram i tum ang u.


Camp chhuak ta
Vengthlang North Kohhranah Special Camping chhawng 4-na chu Zirtawpni khan an chhuak ta a, camp-a lut mi 20 velte chu hlim takin an chhuak. Zirtawp zan vek atang khan Follow-up Programme an hmang nghal a, tunkar lo awm turah hian Crusade-in an chhunzawm nghal ang.

Damlo
Pu Tlawngbawiha Dawr veng chu an mahni inah Ashma natna vangin enkawl mek a ni a, thatlam a pan mek zel.

Kan Dinhmun tlem
Tun kum chhunga kan Branch dinhmun tlema zawng kan hriatna tizautu atan kan han tarlang mai mai e.
Kohhran Dan thianghlima
Innei zat - 5
Mitthi zat - 17
(YMA member zat - 4)
Ruangthawnchhuah zat - 3

Buh seng tan
Tunlai hian Champhai zawla buh chingtute chuan an seng chho tan mek a, chhungkaw tam zawk chu an tul hle a Tunkumah hian ruahtui a tlak mumal loh avangin kum dang zawng aiin buh pawh an thar hlawklo tlangpui niin kan hria.

Bei ngawrh hle
MizoramLegislative Assembly Inthlan neih chhoh mekah Champhai Bial hnih (2) a candidates tur ten campaign an bei ngawrh chho hle. Hetih lai hian MPF thu chhuahte i hre reng ang u.

Candidate Joint Platform
MPF, Local hrang hrang Vengsang, Kahrawt leh Vengthlang te chuan Champhai North Constituency chhunga MLA Candidate te tan Kahrawt YMA Hall-ah Ni 22.11.2008 Dar 10:00 AM atangin Dar 4:00 PM thleng Joint Platform a buatsaih dawn. Hemi hunah hian Common Question pawh chhantir tum a ni a. Mipuiten he hun hman tur hi lo thlir vek turin min sawm a. Joint Platform hi LIVE-a pekchhuah tum a ni.

&&&&&&&&&&&&&&&&&&&&&&&&&&&&&&&&

Kar Hmasa Vengchhung
Kar hmasa zet chu vengchhung- ah thildang a leng ta meuh lo. Patling zing nilum ai pawn chiahpuam an sawi loh leh Politic chiah an sawi. Party hrang hrangten beihpui an thlak tan mek. Hetih lai hian MPF pawn inthlanna thianghlim tak a awm theih nan an hman hlel hle. Buh sengin vengchhung mipui tam tak an buai mek bawk. Zan lamah thawm bengcheng tak hriat tur a awm leh tan ta...... Security Cell pawn tan lak leh an tum niin thu kan lo dawng bawk. Krismas boruak erawh a la awm lo hle. Thlasik rim a nam tawh hle, mei lum ai a nuam tan ta...

&&&&&&&&&&&&&&&&&&&&&&&&&&&&&&&&&

AK - 47

(AK - 47 hi Chawngkhum dantlang huat loh a ni, i lo hua a nih chuan lo ho mai mai rawh )
J U Marem, kan Inah hian Chiahpuam chu kan chiah ve tho sia ngati nge a va buai lo ve le.Pi Hmingtei w/o Pu Marema
J U Famkim, keichu MPF hi ka vote dawn, an tlin ka ring tlat. Pi Tei w/o Pu Famkima
J Khawzawl-ah chuan min ngaihsang lutuk Negro emaw te min lo ti vel, naupangin min zui dul dul zel. Remnaa, N-Sec
J Tunlai chu Bial nu an tih ang hi ka nei thar ve a, ka thlarau lam nunpawh min vo chau khawp mai. Lalchaka, T-Sec
J CCN-ah hian a hmingin Camera Stand hna ka vuan thar ve tih nula te khan in lo hre dawn nia. Lalsena, N-Sec
J Ka bialnu hlui pahnih chiah in pasal min la neihsan lo. Zaupuia, V-Sec

&&&&&&&&&&&&&&&&&&&&&&&&&&&&&&&&&

Champhai hian Development Authority hi kan mamawh ve em?
Tlangpuia
Ram a lo thanga a chhunga cheng mipuite pawhin hma nasa takin kan sawn chho mek zel a. Hmanni lawka in la changkang taka kan tih thin kha tunah chuan thil thing a lo ni ta. Kum nga liamta chawlhni chawhma inkhawm bana nalh inti taka kan thlalak pawh tunah enlet leh chuan thil thing a lo chang zo ta. Chuti khawpa hmasawnna a than chhoh avang chuan kan in leh lo pawn hma a sawn zel a, a nei apiangin kan theih anga sang sak kan tum ta.
Hemi a nih avang hian mi tam tak chuan khawtlang ram nek zawng leh khawtlang tana hnawksak zawkin in sak te kan ching ta. Revenue-ah an lo patta hman ngat phei chuan khawtlangin ui tak chungin a ram chu a humhim thei ta lo a ni. Chubakah kan in hmunah hian in sak a rem leh rem lo ngaihtuah miah lovin kan ram chinah kan sa a, fur ruahtui vawi hnih vawi thum an tuara kan kawmtlang min kan buaipui leh thin.
Hetiang dinhmuna kan din mek kan nih avang hian Champhai hian Development Authority din hi kan mamawh tawh lo maw? Development Authority hnuaiah hian mimal in a ma ramchhungah a duh ang angin in a sa thei tawh lova. Development Authority phalna la hmasain ama ram chhungah In a sa thei chauh dawn a ni.
Development Authority hi Champhai-ah din nita se khawtlang ram nek chingte avanga kan buai kan buaina hi a lo kiang tawh ang a. Chubakah ruah sur avanga kan kawmthlang leimin hi a lo kiang tawh dawn a ni.

&&&&&&&&&&&&&&&&&&&&&&&&&&&&&&&

Buatsaihtute hmathlir

In hmun lo ram

Kan mizia leh kan rilru pholangtu langsar tak mai chu in hmun lo ram kan enkawl dan leh kan cheibawl dan hi a ni pakhat awm e. Mizote hi kan khawtlang nun phungah in thenawm hnai te te a khawsa leh chengho kan ni a, tunhma lam chuan in hmun lo ramah buaina an tawh ngai kan hre lem lo. Mahse, tunah chuan ‘tunlai khawvel’ hian min ei chhe zo ta.
Kristian piangthar tha tak nia kan ngaih pawh thenawm khawvengte tana hnawksak leh ram chhete chungchangah pawh belhchian dawl lo tak tak kan kat nuk ta mai. Dik tak chuan kan veng leh khua, kawtthler thlalak hi tunhma atang khan fel takin lo nei ni ila chuan zak tak tak tur hi kan tam ngawt ang. Vantlang ram pawh vantlang ta a ni a, mahse mimalin mahni ta anga a chei tlat chuan kum hnih/thum liam hnuah chuan zah pawh dawn zo tawh lovin kan nei leh mai thin. Hetiang hi sawi tur pawh a awm nual ang. Tin, thenawmte ram leh vantlang ram feet 2/3 lek it ngawih ngawih vanga khawtlangin an relrawn nih pawh kan pawisa miah lo hi thil mak tak pawh a tling. Heting thil hi ‘dawt’ vawi tam min sawitirtu a ni fo leh nghal.
Kan sawi bakah hian in sa mek te leh la sa leh turte pawhin mahni ram Patta chin bakah khawtlang mit tikham thei anih chuan pek belh tu zawk dinhmuna kan din ngam pawh a tha khawp ang. Mizote mizo-na phochhuah hi kan bat leh Kristianna tlang atangin kan tihtur leh tihloh tur pawh in hmun lo ram chungchang atang hian tam tak zirtir leh hmuhchhuah tur a awm thei ang.

0 comments: