Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga din nise an ti bawk.
Rorel IV-na Chhiatni thatni Fund la pe remchang lo te Section tin hruaitu ten April ni 15 chhunga khawn nawn leh nise an ti bawk.
Rorel V-na Kuang siamna atan Ply Board hman ve chhin nise an ti bawk.
Rorel VI-na Thingphel Thuthleng siamna tur 50 lei nise an ti a, tin, Thlan laihana hman tur Bawngtuthlawh(2), Suahdur(2), Chempui(2), Hreipui(2), Baltin(2) leh No(2) lei nise an ti bawk.
Rorel VII-na PWD Complex chhunga Information kan lo sak, kan senso Rs.30000/- min pek chu Building-ah dah nise an ti bawk.

HNATLANG
Ni 26.3.09(Ningani) zing khan Chhura Hmun-ah Branch hnatlang neih a ni a, tuiluankawr(Sidedrain) siama hnatlang neih a ni. Hetah hian member sawmriat vel hnatlangin an chhuak thei a ni. Hnatlang chhuak zawng zawng chungah Branch chuan lawmthu a sawi tak zet ani.

HRIATTIRNA
Bethel Branch YMA huam chhunga kum 2009 atan chhiatni thatni Fund la pe lo zawng zawng ten April ni 15 hmaa pek vek tur a nia, section hruaitu ten an rawn khawn leh dawn a, lo in ring turin kan in hriattir a ni.
Sd/-
Secretary
Bethel Br.YMA

LANG LO
Sub Hrqs. YMA SPorts neih zawh takah kan Branch pawh intihsiakna hrang hrangah kan tel ve a, nimahsela items pakhatah mah kan lang ve ta lo a ni.

NGENNA
Bethel Branch YMA Vanapa Section te chuan Section Sumtuak nan In tinah Tel an rawn zuar dawna, tlawmngaia lo leisak theuh turin vengchhung mipuite an ngen lawk e.

YMA ZAIPAWL NEWS
YMA Zaipawlte chuan ni 21 leh ni 28 zan khan hla an zir a, kan Hall hawnna turah Item an nei dawn a, Tin tunkum hian Music Video ropui tak siam an tum a memberte pawh an phur tlang hle.

DAMLO
(Kan Hriattheih Chin)
V Pi Lalkutthangi W/o H.Vanlalthanga N-Sec. chu Kalna avangin ni 26.3.09(Zirtawpni) khan Champhai Damdawi Inah dah luh a ni.
V Tv. C. Lalmuanpuia S/o C.Rokima, V-Sec. ami chu khawsik leh luna avangin an chenna in ah enkawl mek a ni.
V Pi Laltlanengi W/o S.Lalruatsanga Ch-Sec. chu dam lohna avangin an In lamah enkawl mek a ni.
V Pu Lalnunthara T Sec chu ni 27/3/09 (Zirtawpni) khan a nak leh a ban zai a ni a, tunah an mahni chenna Inah enkawl zui mek a ni

AWM THAR
Pu TC Sawinghinglova te chu Kahrawt atangin Pu C.Roliana T-Sec. te inah an rawn awm thar.
Pu Kaptura V-Sec. te chhungkua chuan an in sak thar Chhura Hmun ami chu an luah phei ve ta.

LUNG PHUN
Dt. 27.3.2009 ( Friday ) khan Pi Zachhingi W/o Pu Khuangchhuma lung chu chhungkhat laina te leh vengchhung mipui te sawm khawm in phun a ni.

NAUTE NEI THAR
Pu Zoherliana N-Sec.Treasurer te chuan fapa duhawm tak ni 24.3.09(Thawhleh) khan Champhai Damdawi Inah an nei thar a, kan lawmpui hle

RUANGCHHUAK
Ni 24/3/09 khan Lianpui khua Nl.Tetei chu Champhai Hospitalah Internal bleeding avangin a boral a. A ruang hi Pi Lalzuii te In hnuai Pi Vanlallawmi te In nghah a ni a, a zan hian an khaw lamah phurh phei nghal a ni

HRIATTIRNA
Kan hriat theuh angin kumin hian YMA chuan kum dang angin kumpuan kan nei lova. Kum kal ta velah kha chuan ‘RUIHHLO DO’ kum puana kan hman avangin Veng chhungah pawh ruihhlo check in kan vak vel thin a. Veng chhung pawh a thianghlim hman hle a. Amaherawhchu, kumin hian kan vah ngai tawh loh avangin Vengchhungah ruihhlo a hluar leh ta hle mai a. Hei vang hian Kumpuan nei tawh lo mah ila YMA Security Sub-Committee te chuan a tul angin Veng chhung then thianghlim hna kan thawk zel dawn a, hetiang lama fihlim lo te chu tumah kan indim dawn lo a ni tih kan in hriattir a bawk a ni.

HALL TI CHANGTLUNG
Chhura Hmun Hall a hman tur Sound system thar tha tak Rs.90,000 man chu lei thar a ni ta. Kan VC Secretary Pu S.Lalruatsanga leh Pu Thiangina ten Aizawla mi an zu lei a ni.
Tin, Hall Chowkidar tur atan Pu HT Lalmalsawma S/o HT Lalbiakkima chu lak a ni a. An ni hi an nupa in Hall hnunga Qtrs. an luah lum nghal a ni.
Hall hi ni 4/4/09 (Inrinni) khian Champhai DC Pu TV Fambol in min rawn hawn sak dawn bawk a, hata kal tur hian vengchhung mipui a tam thei ang ber i thawk chhuak ang u.

LEHKHA KAWNG BO
Chingsianmuani Champhai Bethel tih chu dak pu ten pekna tur an hriat loh avangin Pu H.Lalduhawma Asst. Editor BYMA te Inah lam theihin a awm e.

LAWMTHU SAWINA
Dt.16.3.09(Thawhtanni) a kan nu Ningzamchingi (K-72) chuan Asthma natna avanga min boral san chungchangah Bethel Veng YMA leh khawtlang nu leh pa te chungah lawmthu kan sawi tak zet a ni.
Pathianin a let tam takin rul che u rawh se.
In khawngaihna dawngtu,
A fate

TUNLAI BETHEL

Van lam pang atangin Vanchung nula chuan ka chung zawnah a tui chawi a a rawn ti baw tan ta der a, duhthusam erawh chuan la tam rih lo mahse Nu ho erawh huan lam pangah an liam thla nghal dual dual. Lum tawh viau mahse boruak a in thlak leh chuan vawt tih min lam tir leh hlawm a, nunphung a her danglam hret niiin a lang.
Zirna kawtchhuah(Matric) result chhuak chuan In tam takah lawmna a rawn thlen a, chutih lai erawh chuan a thenah lungngaihna erawh a thlen ve tho niin a lang. Nimahsela Thufingin Bei la, bei nawn rawh tih an hriat avangin tawrh dan pawh an thiam tlang bawk a, tan lak sauh pawh an tum tlang a niang chu.
Damlohna chi hrang hrang a tam hle a, naupang mai nilovin puitling te pawn kan tuar tlang namen bawk. Kan fimkhur tlang a niang chu. Hnatlang neih thin a ni a, nimahsela tam tak YMA member ni ve si a, awm hmun che sawn eih lova ral khat thlir tawk pawh kan la awm cheu a, nimahsela tun atang chuan chet chan an tum tawh niin a lang bawk.
Nimin piah lama kan khawlai lun bera Sa Free awm chuan mipuite tam tak a ko khawm hle bawk. Chutih lai erawh chuan kan sawi fo tawh angin ke chhep rual lo deuh hmuh tur an la awm cheu a, an ni lah chuan Lam lama an la ti zel bawk a.
Mahse tukin zawng a ngaite bawk loah chuan tudang mah kan tlei leh thei ta tak tak lova, Saum rawn chawr chhuahna ngei mai chu tui ti takin i hap leh pian pian tlang leh phawt mai ang aw!


SPORTING CLUB NEWS
Kan sawi ngun ta malh malh bawk e, kan Jersy a la lut kim thei lo fo mai. A la kawl te khan hruaitu te hnen ah a rang lamin han thehlut teh u. Tin, Pu R.Lalramhluna te chhungkua chuan Chhura Hmun Field a Football goal ban tur Rua min pek avangin an chung ah kan lawm tak zet zet a ni. Bethel High School mipa Volleyball steam te Mizoram School Games-a in champion avangin kan lawmpui hle bawk a ni.


COMMITTEE NEI
Zirtawp zan khan Taitesena Section te chuan an Secretary Pu Lalhrima K. te In ah committee an nei a, Chhiatni/Thatni Fund an khawn chungchang te leh Census report te, YMA member zat te thlirletna leh bawhzui ngai tur te an rel bak ah section hmalakna tur hrang hrang te an sawi a ni.
Tin, Section hrang hrang ten kan Section News te BYMA a chhuah turin thehluh thin nise.

MHIP HRIATTIRNA
Kum 2009 chhunga Creche enkawltu tur Senior Ayah leh Junior Ayah lak a lo hun leh ta a. Heta thawk duh tur te chu President emaw Secretary hnenah emaw April ni 3 hmain dil theih a ni e.
Tin, MHIP Conference a kal tum te chu Vawiin chawhma inkhawm ban hian President Pi Lalthlengliani te In in hmuih khawm tur a ni e.

HSLC Result Tha.
Kan veng English Medium School, Bethel Mission School chuan kumin HSLC examah an ti tha hle a. Exam beitute hi mi 14 an ni a,paruk (6) Distinction ah passed in,paruk (6) I Div. leh 1 ve ve II Div. leh III Div ah an passed. Champhai Dist. ah chuan BMS hian an ti tha ber a, kan lawmpuiin hetiang school tha kan vengin kan nei hi kan chhuang hle a ni. Result kimchang chu a hnuaia mi ang hi a ni.
Sn Hming Div
1. Thanglianmanga Dist. L in M, SS,Sc,Mz
2. Thangrodinga Dist L in M,Sc,SS
3. Zarzokimi Dist L in M,Sc, SS
4. Lalthazuali Dist L in Sc,SS,Mz
5. Liansangpuii Dist L in M,Sc
6. PC Lalnunzira Dist L in M,Sc,SS
7. Ramtharnghaka I L in Sc,SS
8. Vanramngaihzuala I L in SS
9. C. Lalhmangaihzuala I L in Sc
10. HB Hmingthantluanga I
11. Lalhunkimi I
12. R. Vanlalenkawli I
13. C.Rodingliana II
14. Lalchawiliana III

BETHEL HIGH SCHOOL NEWS

Kumin 2009 chu kan veng High School in par a chhuangin Zirtirtu te pawh khawtlang nuleh pate chungah an lawm a. Mizoram pum High School Games ah khan Volley Ball (Boys) ah champion an ni a. Tin an school hian phone an nei thara a number chu (03831)234444 a ni e. Tin, tun exam ah khan Candidate Regular-12, Private Cadidate-5, Fail-3 neiin result chhuak ah khan result tha tak neiin hetiang hi an din hmun a ni.

Sn. Hming Div.
1. C.Rammuansangi II
2. Ningsianmawii II
3. Catherine Lalhmingmawii III
4. Lalrengpuii III
5. Lalfakawmi III
6. Lawmkimi III
7. Vungngaihdawni III
8. Rampanzela III
9. Jenny Zengzaluni III
10. Thangdeihmanga III (Private)
11. Esther Lalawmpuii III (Private)
12. Lalhriatzuali (C) Mathematics
Tin heng bakah hian kan veng mi School danga kal pass an awm bawk a, hengte hi kan hriat theih chin a ni
1. Zalawmsanga II
2. Lalhmangaihsangi II
3. Lily Malsawmi II
4. Lalrammawii III
Tun tum Matric result chhuaka Pass zawng zawng te Editorial Board ten kan lawmpuiin in kal zelna turah duhsakna kan hlan bawk a. tin, kan tarlan hmaih te chungah ngaihdam kan dila, a theih BYMA-ah in hrilh hriat zel ni se.

Enge an sawi

œ Khawhar In kan kalna a zai tur a ni tih pawh hre lova midang tibuai zawng a lo awm thin te leh ei tur eina hun amaw ti a lo awm ho te, lo nui vur vur thin te hi chhiat an tawh hun ah an awm dan ang chiah in va awm ve ila an duh bik kher ang em le ?
... Treed
œ Sub Centre chhak lama Vawk In awm hi a bula kal te tan a rimchhiat mai bakah a thlang lawkah Tuikhur a awm bawk si, chumai bakah kawngpui hnaih lutuka Vawk In awm hrim hrim hi a a va tha lo ve maw le. Hmun hranah dah sawn thei hram se kan va ti ve le.
..............................A.g
œ Mak ve angreng tak chu chhungkaw tin te hian chaw ei dawhkan kan kil hian thutna bik kan nei tlat mai. I lo ngaihtuah ve mai mai ngai em. Chuvang chuan mi ina chaw kan ei dawn in a neitu te rawn hmasa lo chuan lo thut thurh hi chin loh atan a that ka ring a, ka rawn vei ve loks a ni e.. ..........Bool


Shotgun

M U Biakhlir, BYMA-ah hian ka lan reng a, U Zohminga a lawm tawh lo a nia.
....Tv.Ruata(Langsung) T-Sec.
M Ka Auto te hi hlau viau rawh u. Ruling Motor a nih hi!
....Amah Ku Hlira VC T-Sec.
M Bethel hian ruai thehin fatu bik in nei a mi? Ruai theh apiangin Pu Faka hi Batch a bel ziah thin a.
....Mi Veng Pa
M U LTa a awm lova Volleyball pawh kha ka tui thlawt lo a nii
....Mahlimi T-Sec.
M Bethel Veng nula ah hian ka te ber tawp lo ve.
.......Lal Mami , V- Sec
M Kei pawh
..... Nl Humi, V- Sec
M Lar lutuk pawh hi a nuam lo. Tum loh ram ram kan chuan kai phah. Zahthlak thei e.
....Nl.Mami T-Sec.
M Hei.........h.............ha!
.....Pi Awii V-Sec.
M Halleluuuuuuuiiiiaaaaah!
....Pu Tluanga T-Sec.
M TUAH MAI A!
.....Scoudy V-Sec.
M Ka Computer Exam tur chu Exam hall-ah chiah practical nge theory tih ka hria.
...Pi Laltei T-Sec
M Khawnge ni kan ti ta sa sa, Volleyball team khat daih law law fapa nei mai ang aw.
..........Pu Pekpara N-Sec

Editorial

Chanchinbu Buatsaih Dan
Tun tum chu in tana kan hun hman dan hi min han hriatpui ve daih teh u. Thu leh hla lamah chuan tumah hi thiam kan awm lek lo ang le. Nimahsela hruaitu ten kan kuta an dah ve viau avangin kan han ti chho ve chawt chawt zel a, nimahsela kan tlin lo teuh thin hle a ni.
Changkanna leh hmasawnna a than zel avangin Press-a han tih tir loh chu a tunlai lo kan ti ve bawk si, nimahsela Inrinni chhun dar khat velah dah a ngai ziah thin chuan min ti up to date lo thin hle bawk a nih hi. Engatimaw? Zirtawp zanah chuan kan chhut a ngai tlat thin a, kar tawp thu kal lam leh haw lam a tam zawk chu kan hre hman thin lo a ni. Kan Editor te Inah dar 8 velah kan han kalkhawm tan a, thlen veleh Thingthupui-Thu, In pui sang kai manah min lo hun nghal a, chhawlhal hlawm tih takah kan han dawm zo leh te te phawt a, tichuan kamram te kan han ti zui a, Computer hmaa kan han thut tan chuan Leng hnawtchhuak Ar a rawn khuang ta der thin. Tichuan kan thu hriat ang ang leh thu awmsa tlem a zawng te chu kan han chhu ve a, nimahsela thu awmsa tlemte kan han chhut zawh chuan Computer Keyboard a rim lo tan ta, tichuan kan thluakte chu kan han sawr ve a, zawi zawiiin kan ti chho ve zel a, kan mita meng thei ta lo, banga Sana pui kan en nak lai chuan vawiin a lo ni ta daih thin. Kan la zo fel hman bawk si lo. nimahsela Nupui fanau chawm hlawm kan nih avangin kan tin a lo ngai ta thin. Tichuan a tukah kan zawh hman loh chu eng tin tin emaw kan zo ve leh tawk thin a ni. Kan buai ve hlawm cha cha ve thin viau a nia!

0 comments: