Vengthlang Kohhran (Kohhran Aw)

BIBLE STUDY : ROM LEHKHATHAWN
( Rev. Wiliam Barclay hrilfiahna atanga lakchhawn )
Pathian Thinurna ( Rom 1 :18-23) : Kan thu hmalamah khan mihringin intukluhna tluantling leh rinna hmanga Pathian nena inlaichinna a neih theih dan Paula hian a sawi a. Tunah erawh chuan mihringin Pathian lama a mit a tihdel luih tlat a, amah duhzawng leh milem a biak chuan Pathian thinurna a tawngbaw dawn a ni a ti a. Pathian thinurna tih thu rapthlak tak hi eng rilruin nge Paula hian a sawi tih kan chhui dawn a ni. Thuthlung Hlui hunah chuan Pathian thinurna hi a thluthlunpui mite nen a inkaihhnawih zel. Israel fate chu Pathianin a thlang a, a dan an zawm chhung chuan inlaichinna danglam bik an nei zael dawn a ni. Hei hian awmze pahnih a nei thei : (1)An hnamin Pathian dan an zawm loh chuan Pathian thinurna hi an tawngbaw thin. Kora, dathana leh Abirama te helna avanga Israel mite chunga Pathian thinurna Numbers 16 ah kan hmu.. Tin, Baal be tura hruaikawi an nih avangin Pathian thinurna an chungah atla bawk(Num 25:3). (2) Pathian nena inlaichinna bik nei an nih avangin anmahni tiduhdahtu te chungah Pathian thinurna a tla bawk. Babulon mite’n Israel fate an tihduhdah avangin Pathian thinurna Jeremia 50:13 ah kan hmu. Zawlneite hun atang khan Juda sakhua ah hun pahnih hi a lar hle. Hun tha leh hun tha lo te, tun hun leh nakin hun, Lalpa Ni in a kar dan te. He Lalpa Ni hi rorelna ni rapthlak tak, khawvel chhiatna leh misualte boral derna tur, Pathian Lalram a lo lan hma a lei leh van siam thar a nih hunah an ngai. Zawlneite hian Pathian thinurna hi la thleng rih lo ni lovin thleng mek reng, Lalpa ni ah a vawrtawp a thleng turah an ngai.Hei hi Israel fate chungah pawh a chiang hle a ni. Pathian thinurna hi tunlai mithiam pakhat chuan Pathian thianghlim, sual ngai thei lo a nihna tarlanna niin a sawi a. Mi thenkhat erawh chuan pawm har an ti hle. Luther-a chuan Pathian hmangaihna hi Pathian hnathawh liau liau, a thinurna erawhchu a hnathawh mak tak niin a ngai. Paula hian Pathian hmangaihna leh hmangaihtu Pathian, Pathian khawngaihna leh mi khawngaihthei Pathian, Pathian rinawmna leh a mite laka rinawm Pathian a ti thin a. Mak angreng tak erawh chu Paulan Pathian thinurna a sawi hian Pathian thinur angin a sawi lo. Pathian thinurna hi sual hremna chu a ni ngei mai.. Mahse, khawvelah hian khuarel dan a awm a, chumi bawh chhiate chungah chuan chhiatna a thleng thin. Insak dan i bawhchhiat chuan i in chu a chhe vat ang. Lo neih dan i bawhchhiat chuan seng tur i nei chhe ngawt ang. Paula hian mihringten an hriatlohna an chhuanlam thei lo tih a sawi bawk. Pathian siam khawvelah hian Pathian hmel a lang a ni. Tertullian-a chuan, “ Khawvel hi zirtirtu a ni a, thinlung hi zirlai a ni. Pangpar te, ramar te, tuikeplung te hian Siamtu chanchin min hrilh lo em ni?” a ti. Chuvangin, Paula hian ‘Khawvel hi thlir rawh u, engtia siam nge ni? He khawvel hian Pathian chu eng ang nge tih min hrilh a ni’ a ti a ni. Paula chuan,’ Misualte chuan Pathian thlir lovin anmahni an inen a, a ngaihtuahna hmang chuan fingah a inngai a, mi a a nih chian tehreng nen. Engvangin? Pathian duhzawng zawng lovin, a ngaihdan a siam a, nundan tur te a inrel chawp a ni. Mahni indah pawimawhin, Pathian lam pan lovin amah leh amahah engkim a titawp thin. Hei hian milem biakna a siam ta a ni. Pathian ropuina chu mihring leh ramsa limin a thleng a. Chi milim chu a duhdan tipuitling turin a bia a ni. Ama tan milim a bia a, Pathian chu a be duh si lo. Chuvangin, heng mite chungah hian Pathian thinurna chu a thleng dawn a ni. Chhuanlam tur a awm thei lo vang.

----------------------------------------------------------------------

Editorial : Kohhran Inkhawm
Isua krista lal leh chhandamtu atana pawmin piantharna kan chang thin a, mahse a mala kristian nun hman reng erawh chuan chaklohna a thlen sam hle. Kohhran a lo din tirh pawh khan ringtute chu an inpawl khawm a, chu chuan chakna nasa tak a pe a, huaisen takin thu an hril a nih kha
Mizo kristian zingah hian kohhran inkhawm hlutna hre mang lo kan awm ta nual mai. Inkhawm pawh ngaihsak lem lo, mahni that thata tha ve tawp kan tam ta hle. Mahni chauh pawha kristian tha tak nih theih hi a tha, puitling zia pawh a ni. Mahse, kan ringtu puite nena Pathian thua inpawlhona hmanga kan thlarau nun intihchak tawn hi kan mamawh fo thin. Inkhawmna Sermon kan ngaihthlak atang te, fakna hla kan sak atangte hian kan thlarau nun mamawh leh thanlenna tur chaw kan dawng thin, Pathian lama kan rilru kan hawn phawt chuan. Mite avanga inkhawm turah inngai lo ila, Pathian vanga inkhawm tur kan nihna hi hriatreng a tha. Ringtu nun hi a huho nun a ni a, rawngbawlna chi hrang hrang pawh hi a huhova tihtur an ni. Kan Pathian pawh hi mimal Pathian mai ni lovin mi zawng zawng Pathian a ni. Mimala kan tihtur chu a awm ngei mai, mahse a huhova kan tihtur hi Pathianin kohhran hmangin min pe thin a ni.
Chuvangin, inkhawm hi ringtu kan nih chuan thlahtlam lo ila. Kan thlarau nun thanlenna atan pawh chaw Pathianin kohhran kaltlang hian min pe zel a ni tih i ring ang u.


----------------------------------------------------------------------


SS Report : Dt.08.03.2009
Particulars Puitling Naupang
Hming ziak 1124 856
Kal zat 629 736
Kal lo 495 120
Thawhlawm Rs 4890 Rs 2437

Pavalai Aw

## Vawiin Sunday School ban veleh Pu T. Kaphlira Inah Pavalai-te thil pawimawh tak rel tura kal khawm tur a ni. Pastor-te Bethel bial an fan Programme, Tlangsam Kohhranah tawiawm turin Pavalai Member-te a tam thei ang ber kal kan tum dawn nia. Dar 12:30-ah Biak In tual atanga chhuak hman tur a ni ang.
## Pavalai ten Banner thar an nei a, Banner an neih theih nana puanthan petu Upa BL. Chuailova leh a thlawn a nalh taka ziaktu Pu T. Kaphlira te chungah Pavalai member-te an lawm hle.

KTP Aw

## KTP chuan tuna Missionary 8 an chawm mek thla thum lawmman Rs. 24,000/- chu kan Kohhran Treasurer (Synod) hnenah an pe.
## Tunlai hian KTP Member-te’n Good Friday, Easter Sunday leh Bial Inkhawmpuia sak tur hla an zir thin a, Member-te thahnemngai leh zuala hla zirtur an hruaituten an ngen a ni.

Kohhran Hmeichhe Aw
Vawiin Sunday School Inkhawm banah Pu J. Laltlansanga Inah Kohhran Hmeichhia ten lawmbawm hawn tur a ni a. A tam thei ang ber kal turin Kohhran Hmeichhiate an hruaituten an ngen a ni.

Nilai Zan Hun Hmandan
Dt. 25.3.2009(Nilaini) zan khan R. Lalruatfela s/o Pu Lalzarmawia chu inngaihna suala a tluk avangin thunun a ni. Tin, Vengthlang North kohhran atangin Pi Lalhmunmawii d/o Pu Thankhuma leh a fate pahnih - Mal sawmtluanga leh Vanlalfela, baptisma chang tawh te chu kan kohhranah an rawn pem a, kohhranin lawm takin kan lo dawngsawng.

-------------------------------------------------------------------

DARTHLALANG : RINNA A TAWNGTAI
Tawngtai hi ringtu nuna thil pawimawh tak a ni. Raldo tura inbuatsaihna leh raldona a ni nghal a. Rintute hi ring chungin kan tawngtai tur a ni. Ring lo chunga tawngtai hi a awm theih awm e. Larry King-a chu milar a nih avangin kan hre ngei turah ngai i la. CNN TV-a mite kawm thintu leh thuthar thehdarhtu a ni. Larry King-a chuan loneitu pathum, a lo va feh ho thin, khawkheng tuar chanchin ngaihnawm tak a hria a. Chung loneitu pathumte chu thingthia vanlam hawiin, van hawn tira, ruahsur tir turin Pathian hnenah an tawngtai a. Vanduaithlak takin chunglam chu a ngawi tlat a, ruah reng a sur thei lo. Beidawng hle tawh mahse Pathian hnenah tuk tinin ruah an dil zel a.
Tuk khat chu an zingah mikhual pakhat hi a rawn kal a, eng thil nge an tih a rawn zawt a. Anni chuan ‘Ruah dilin kan tawngtai’ tiin an lo chhang a. Mikhual chuan inti ngampa tak hian an chibai kual dan dan a. Chutah muang fan raih hian ‘Ngawi teh u ruah in dil ka ring lo” a ti a. Loneitu pakhatna chuan, “ E dil e a! Hei kan thingthi a, ruah kan dil a nih hi. Han hawi vel teh, khua hi a ro hle tawh a nia. Kuminah hian ruahtui kan la dawng hauh lo’ a ti a. Chu mikual chuan awih lo takin a lu a thing na na a. An tawngtaina Pathianin a chhan loh tur zia chu a hrilh zui a. Loneitu pahnihna chu lo zuang thoin a rawn tawngchhuak ve ta a ‘Ruah kan mamawh, kan tan chauha dil kan ni lo. Kan chhungkaw tan leh kan ranrualte tan pawha dil kan ni a sin’ tiin. Chupa chuan ngun takin a ngaithla a, a sawi zawhah chuan a lu a thing leh a. An thusawi a rin loh thu bawk chu a hrilh leh a, “In hun in khawhral mai mai a ni e” a tih san a. Loneitu pathumna thin chuan a tuar ta lo, thinrim engphiar hian, “ A tha e. Kan dinhmunah hian ding ve ta la, engtinnge i tih bik chuan ang” a rawn ti ta phiar phiar mai a. Mikhual chuan, “ Ka tih tur in hre duh tak tak ang maw? tiin a zawt let a. Loneitu pathumte chuan “Aw, kan hre duh e. Kan eizawnna dinhmun hi a derthawng tawh takzet a ni” an ti rual thawih a. Mikhual chuan, ‘Nihliap ka keng ang’ a tih san ta daih mai a.
Ruah dilin an tawngtaia, thingthiin thahnem ngai tak chuan an dil ve ngei a. Mahse, ruah a sur tak tak an ring tawk lo. Nihliap an keng tlat lo! Nang, I tawngtaina a lo thlen ringa inbuatsaih chungin i tawngtai thin em le?

0 comments: