Bethel YMA (BYMA)

CHHURA HMUN HALL HAWN A NI
Bethel. April.5 Sunday) : Bethel Community Hall chu nimin 4.4.09(Inrinni) khan mipui hman theihin Champhai DC TV.Fambol chuan a hawng.
Kum 1995 atanga sak tan Bethel Community Hall chu nimin zing dar 7:30 ah hawn a ni ta a, he hawnna inkhawmah hian Hall Committee Chairman leh BDO ni bawk Pu K.Vanlalthiana chuan kaihhruaiin Pu R.Vanlalvuana chuan hunserh a hmang bawk a, Hall sak tan dan leh tun dinhmun thlenga chanchin Pu C.Zokhuma hnen atangin ngaihthlak a ni bawk a ni. Khuallian hnen atangin thu tha tak ngaihthlak niin Hall tha tak kan nei ta chu lawmawm a ti a, tangkai zawka chhawr ngei turin duhsakna pawh min hlan a, a sawi zel naah hmasawnna awm tur chuan inthlakthlengna a awm a ngai a, inthlakthlengna hi buai thlak taka rawn thleng thin mahse lo dan tum chi a ni lova, a lo dangtu te tan chuan tlakchhiatana mai bak thlen a nei lo a ti bawk. Heng bakah hian Branch President Pu Lalsanglura Zote pawn thusawina neiin Hall kan nei ta chhuangin tha hnem ngai taka lo thawk tu te chungah lawmthu sawina a rawn nei ve bawk. Chumai ni lovin vengchhunga zaithiam Nula Zairemthangi leh Nl.Lallawmzuali ten thiam taka an awih mai bakah Branch YMA zaipawl chuan Rimawi Ram tih hla hmangin thiam takin kalkhawmte an rawn awi bawk. Hall Committee Vice Chairman leh VCP ni bawk Pu M.Tlanghmingthanga chuan lawmthu sawina a nei bawk a, kalkhawmte hian thingpui ruai tui taka an in hnuah Chawhlui tuihnai tak an kilho leh nghal bawk a ni. Vengchhunga pawl hrang hrang hruaitu YMA, VC, MHIP, MUP leh Sporting Club hruaitute bakah tun hma lama Hall sakna atana tha leh zung lo seng tawh veng dang atangte in he hun hi an rawn hmang a. He hunah hian mi 100 vel an kal thei a ni.
Kan Hall hi kum 14 dawn teh meuh sak a ni a, vengchhung mipui te pawn Rawra tin khat theuh a bul tan nan thawhkhawm tawh a ni. A chipchiara hriattheih chiah ni tawh lo mahse Hall sakna atan hian Rs.25lakhs vel hman ral a ni. Chhuanawm tak a ni.

------------------------------------
DAMLO
(Kan Hriattheih Chin)
V Pi Lalkutthangi W/o H.Vanlalthanga N-Sec. chu Kalna avanga Champhai Damdawi Ina enkawl a nih hnuin nimin khan an rawn chhuak.
V Tv. Lalmuanpuia S/o C.Rokima V-Sec. pawh Khawsik Luna avangin anmahni In lamah la enkawl mek bawk a ni.

------------------------------------
INNEI
Kan Asst.Editor u Lalhmunsiama N-Sec chuan Certificate dawng lo zawngin Sazep lam nula a rawn hawn ve leh ta rup mai. Kan lawmpui e.

------------------------------------
NEI HNAI
Kan Branch chuan Computer kan nei hnai ve ta a, Sawrkar lam atanga a thlawna dawn tur a ni. BYMA chhutna tur kan neih hun tur chu a nghahhleh awm tawh hle mai, a ngaihnawm phah ang chu.

------------------------------------
HMANG
Kan Branch fapa Vengthar Branch YMA chuan tunkar Nilaini khan an din champha vawi sawm pathumna an hmang.

------------------------------------
FAMCHANG
Lalniropuia S/o Laldenga Neuva Sec. chu Thluak lam natna avangin ni 29.3.09(Pathianni) khan Aizawl Damdawi Inah a boral a, a ruang hi zan dar 11 velah rawn thlengin a tukah Thlanmual No.I ah vuiliam a ni.

Vungdeihluni, kum 35 Vanapa Sec. chu nimin zing dar 5:30 khan an mahni chenna In ah Asthma avangin a boral a, Nimin vek khan Thlanmual No.1 ah vuiliam nghal a ni.
Lusun/Khawhar chhungte Editorial Board ten kan tawrhpui tak zet e.

------------------------------------
Editorial
Tun tum kan han in sawi thei ve lawk ang nge. Keini leh ni lo angin Bethel Community Hall hawnna function-ah BYMA Editorial Board hmingin sawmna kan dawng ve khiah mai a. A lawmawmin a ropui ngei mai, Board member pawh
ei leh in a tel vang pawh ni chuang lovin kan tel kim thei a. Amaherawh chu zan lam kan meng rei deuh bawk nen
mut chu a chhuak duh lap lap ngei mai.
Programe lo duan lawk sa tawh angin zing dar 7:30 ah chiahah Khuallian in hawnna hun a hmang a, amaherawhchu Vengchhungah chhiat tawk te kan awm avangin duh angin mipui lam kan tam thei lo deuh. Khuallian hnen atanga thu ngaihnawm leh bengvar thlak tak tak kan ngaithla a a hlawk thlak hle a ni. Hall Committee lamin program tawi fel taka an siam kha an fak tlak khawp mai. Tin, ruai tuihnai takin an zui leh zat bawk a, a nuam khawp mai. Mahse ka sound sytem thar ah buaina kan tawk, a hman dan ka la inzir deuh chu a ngaih hmel, Chubakah stage lama dawhkan khuhna atana puanchei an hman kha chu a hlutna a ti hniam ka ti deuh, achhan chu kan Mizo puan neih that ve ber a ni si a.Tin, thil pakhat leh chu kan Hall hawn hmingkha kan chiang lo hlawm tlat mai kha a zia lo deuh. Chhura Hmun Community Hall tih ni lovin Bethel Community Hall a ni tih i chiang ila. A awmna hmun chu Chhura hmun a ni.

------------------------------------
BYMA A TAN
Kan hriat angin BYMA -ah vengchhung mi thu leh hla Article-ah kan hmu tam lo hle a, chuvang chuan BYMA Edt. Board chuan vengchhung mi thu leh hla lam thiam deuh te hnenah Topic pe in BYMA-a chhuah atan a ruahman dawn.

------------------------------------
Lawmthu
Branch Committee in a lo rel tawh angin Bawngtuthlawh -2, Suahdur -2, Baltin -4, No -2 leh Chempui - 2 te Chhiat tawh nikhua a hman turin lei a ni a,Thlanmual No.I leh II ah te a inzat a dah a ni. Tin, heng kan hmanraw lei thar te hi Pu K.Lalbiakhlira’n tlawmngaiin Bawngtuthlawh leh suahdur fawng te hi min vuah sak a, tin heng hmanrua te hi a chhinchhiah nan Pu HT Lalbiakkima’n ‘BYMA’ tih a chhu bawk a. an chung ah lawmthu kan sawi takmeuh meuh a ni.Kan hmanrua te hi lo la duh tawk kan la awm zel a, a hmangtu tlangval lam te pawhin kan hman apiangin a theih anga ngaihven zui thin nise.

------------------------------------
HALL CHOWKIDAR
Kar hmasaa Hall Chowkidar kan rawn chhuah kha tihsual palh niin Pu Tlangkhuma te an ni zawk e. An ni hnen atang hian Hall hmang turte chuan in hriattir zel tur a ni e

------------------------------------
RESULT THA LAWM

3.4.200 Zirtawp ni khan Bethel Mission School te chuan Matric Result tha taka an neih chu sawmbik - Exam a pass nu leh pate, VC, Chanchinbu mi te leh zaithiam Lalchhanhimi(Youth Icon Top Ten), Lalchhani (Zoawi Lelte Top Ten) te nen hun hlimawm tak hmangin Tlai lam ah chawhlui an kil ho.

------------------------------------
CONFERENCE-AH KAL
Sub Hqrs. MHIP Conference Hnahlana neih zawh takah kan veng atangin member 16 an kal thei ve.

------------------------------------
LEH LAWKS
Hun kan neih loh em avangin tih sual leh chhuah hmaih kan nei fo, min hriatthiam kan ngai zel e. Tin, kan thu hman te pawh Zo tawng ziak dan diklo te pawn kan ziak fo min hrethiam zel a niang chu. Tan kan han la zel ang e. Kan thuchhuah zawng zawngte hi Editorial kamchhuak a ni vek lo tih erawh min hriatpui ve bawk u la.
------------------------------------

TUNLAI BETHEL

Nghakhlel taka kan nghah malsawm ruah chu kan khamkhawp la tla chiah lo mahse kan khaw awmdan leh huan lam pangah nuho an chet tam phah tho niin a lang a, lum viau tih tawha kan awm laiin vawt huang chhungah min chen tir leh zawk thin. Mahse tumah kan phunnawi chuang lo a, kan changkang chho zel e.
Veng thang mek zel tih takah In tam leh ropui zawk leh hmasawnna hrang hrangin min tlakbuak ve zel a, veng mi nih pawh nuam kan ti tlang hle bawk. Chutih lai erawh chuan YMA hmalakna chi hrang hrang, thlanlaih, hnatlang, khawhar In kal leh riak, nula thingpui sem chenin kan tlem ta hret hret zel niin a lang a, chuvang chuan he kan zo ze nunmawi tak pawh tun atangin kan chhawm nung zel a niang chu.
Mitin tena kan pumpelh theih loh natna chuan he vengchhung ngeiah pawh bu a la khuar cheu a, a tu a te pawh kan fimkhur tlan a tul deuh deuh zel hle bawk.
Kan nunna pawimawh tak ei leh in lamah Khanghu chuan kan Chaw ei dawhkanah hmun an rawn chang chho ve zel a, Tlangau deuh mahse tui ti takin kan zut zel bawk a nih hi. Nimahse tukin a lo tlen leh chuan engdang mah kan ngaihsak leh thei tak tak lova, a ngai te vawksa lo chu kan ti leh thei tak tak chuang lo a nih hi.

------------------------------------
SPORTING CLUB NEWS
Ni 28.4.09(Thawhlehni) atang khian Football Second Division Screening neih tur a ni a, heta tan hian Second Division Players te Practice tan turin kan in hriattir e. Hemi a nih avang hian Executive Committee pawh neih thuai a ni ang.
Tin Jersey a la lut kim lo fo, thehlut thuai thuai thin ang u. Discipline vek a nih si.

------------------------------------
LUN THIN HLE
Infiamna tui veng tih takah tlai lam pangah Chhura Hmun pawh a lun thin hle a, infiamna ti thin chi hrang hrang an fuankhawm na sa thin hle a ni. A bikin Football khel thin te an tam hle thin.
------------------------------------

MHIP THU
Bethel Branch MHIP hnuaia enkawl Creche Centre(Nau awmna) ah Senior Ayah leh Junior Ayah hna a dil leh thei ta a, a dil duh chuan ni 6.5.09(Thawhtanni) ral hmain hruaitute hnenah theh luh theih a la ni.

------------------------------------

Article Lawma pa
Khawnge mahni phak ang tawk te in he lai hmun te hi mahni insit tak chungin a thupui pawh phuah tur hre mumal lovin kan luahlum ve dawn chhin teh ang.Kei aia thu leh hla thiam zawk te lah chuan ngawih an chuh tlat bawk si a, kei a kara veng tlaberh lam a awm ve mai hi chuan thu beng lut tak erawh han fah tur phei che u zawng ka hre bik hauh lo nan, mahni aia thiam zawk te cho nan ka theih ang tawk tawkin ka rawn in phawrh mualpho ve teh ang ti in kan thupui a kan luh tak tak hma in kan thuziah te a lo tam hmel zawk nan in ti deuh duah teh ang.
Awle, kan thupui lam luhchilh tak tak in tum dawn teh ang hmiang. A hmasa ber ah chuan kan hnam nun dan leh kan khawsak dan chungchang hi han thlur bing ta ila, tunlai khawvel changkanna leh hmasawnna in kan nitin hun hman dan leh kan khawsak dan te pawh nasa takin a ti danglam zo ta a, chutih rual erawh chuan mi tin te kan hun hman dan a inang vek kher lo. Kan Mizo dan hrang hrang te pawh tamtak chu palzut a awmin a hlamzuih chho tan mek a nih hi. Hun hmasa lam deuh kha chuan tlangval te kha Zawlbuk ah riak khawmin a theih ang ang in mi harsa te leh chhumchhia te tanpuiin an hun tamzawk an lo hmang thin a, tlawmngaihna kawngah pawh nasa takin mi te aia thawk hnem lo nih hlau in an hun leh ni te an lo hmang thin a ni. Tunlai thangthar te hun ah chuan kan Mizo rohlu Tlawmngaihna chu a ni tel in kan ti dal telh telh a, he Tlawmngaihna hi mimal tin ten kan phak ang tawk tawka kan chhawm nun zel a pawimawh hle a ni. Hnamdang tena kan hnam an chung enna a ni tih hria ila. Kan Zo nun ze mawi tak hi a lo par vul zel theihna turin mimal tin te hi kan pawimawh theuh a ni tih i hre thar leh ang u. Chutih rual erawh chuan kan sawi tak ang khan mitin te kan hun neih dan a in an loh avang leh kan buai tlan hlawm tawh em avangin chhiattawh nikhua a zualko in tirh chungchang ah pawh khawvel changkanna in a hrin chhoh Mobile Phone, Television etc. te a theih ang ang chuan kan han hmang chho tan ta a, thenkhat te hi chuan Zualko lehkha hmang kher lo chuan kan ngaih a la tha meuh lo niin a lang a, kan in zir chhoh zel a pawimawh hle awm e.
A dawt leh ah chuan vengchhung chhiat tawh chungchang ah YMA ten hma la in theih tawk in Lusun /khawhar chhung te kan puibawm thin a. Thlanlaih, Khawhar Ina kal, khawhar in riah etc. te YMA members te chung ah tla in kan hmalak dan leh kan inpek dan erawh a inchen vek kher lo. Mizo kan nih a, mi pangngai kan nih chuan heng te hi thahnemngai taka kan tih makmawh a ni tih hre thar leh bawk ila.
Chutih rual erawh chuan kan khawsak dan te leh kan nundan te han en hi chuan Nula/Tlangval mitthi awm nikhua a Tlaivar thin , khawhar in kal thin, thlan lai thin, khawhar in riak etc. kan tlem thin ta lutuk te pawh hian tun huna kan in sawngbawl dan erawh hi chu en nawn deuh chu a ngai em aw tiin ka ngaihtuah ve deuh mai mai a, kan tlin loh leh kan phak loh dan hi kan in zam mai mai emni aw ti te in ka ngaihtuah a, tih dan dang te hi ngaihtuah a hun tawh em aw tiin mithiam zawk te kamkeu nan kan thai rang ve a ni e.

------------------------------------
Enge an sawi
œ Kan veng nula thenkhat, Khawhar In zai laia, Mobile Phone khalh ching hmuh tur kan la awm cheu. Hma zan maiah pawh kan la awm a nia. Zaikhawm hun chhung chuan in sum tlang dial dial tawh ang u hmiang.
.....Bill Jack
M Hall tha leh changtlung tak kan nei ta a, mipui hman theiha hawn hial a lo ni a. Chuvang chuan a kal leh inkhel thin ten vawng thianghlim leh uluk taka hman thiam i zir hram hram ang u.
......Sawmtea Pu
M Bethel kawn zun in bul PWD lam atanga Drain an rawn siam hi, an laihna leivung an kalsan leh ringawt a, zun a luang chhuak thei si lova a va rimchhe duh ve. Tin, ek leh thil dang pawh paihna tur a ni lo tih i hria ang u.
.....................Mr.Clean

------------------------------------
BYMA Shotgun

M In ngaih ang hi ka ni miah lo a nia. Hmanni ah pawh Tiau-ah Motor kan sil.(Ngaihtuah peihte tan) ....Valtea V-Sec.
M Tunlai chu Chul hlui kan rih leh tak tan chu. Pawi em lo ang chu.
....Tv.Hruaia N-Sec.
M Ka Nu, ka hlawh hnem loh pawn min hrethiam hram ru. Mualbuhvum lamah kal zeuh zeuh a lo tul ve bawk nen.
....Tv. Chhana T-Sec.
M Awm bula nula an rawn thawk lum thar thar tawh hi chuan Mobile siam pawh a tui thei tak tak tawh lo
....Tv. Thangboiha N-Sec.
M Tih tak em ah chuan engmah ni lo mahila enge in nih bik le.Ka in sawi duh lo mai mai pawh a.
....Tv.Nunzira V-Sec.
M Zei thawkhat tih takah duh duh thlang theia han awm chu a nuam ve khawp mai.
....Pu Oh Tv.Ruatsanga N-Sec.
M Job Card thehlut turin Chawhma hmain thehluh vek tur ti chuan ka au tawh bik lovang.
.....VC Tlangau N-Sec.
M Ka hming bulah hian B ni tawh lovin S=Sapthei tih ka dah tawh zawk dawn a mi chu aw.
....Pu Zohmaa Ch-Sec
M Thlanlaihnaah hi chuan amah Ramhluna pui riau ruau hi chu ka ngam vak lo a nih hi.
.....Pu Hmuna T-Sec.
M VC ai chuan BYMA zaipawl Conductor nih ka lo in hmeh daih zawk. A rim ka hnaih phah bawk.
......Tv Kunga V-Sec.

0 comments: