Bethel YMA {BYMA}

BETHEL COMMUNITY HALL, CHHURA HMUN HMAN DAN LEH ENKAWL DAN TUR SIAM A NI
Bethel.Tau Thla 12 (Sunday) : Bethel Community Hall, Chhura Hmun Committee chuan Hall hman dan tur leh enkawl dan tur relin Committee an nei.
Ni 7.4.09(Thawhleh) zan khan Bethel Community Hall, Chhura Hmun Committee te chuan Vice Chaiman PuM.Tlanghmingthanga, V.C.P te Inah Committee neiin Hall hman dan tur leh enkawl dan tur te leh kan hriat tur pawimawh leh zawm tur te a hnuai ami ang hian an rel a ni.
1. Hall kan lo hawn takah chuan hawh/hmang duh te an lo awm takin hawh theih nise tih a ni a, Sound system telin hetiang hian a hman man tur ruahmanna siam a ni.
(i) Ni khat atan = Rs. 2,500/-
(ii) Ni khat leh zan khat = Rs. 3,500/-
(iii) Zan khat atan = Rs. 2,500/-
2. Chair hawh man pakhat Rs 5/- zel a ni anga, tih chhiat palh a awm chuan pakhat man Rs. 300/- zel chawi tur a ni ang.
3. Sound System hi kan Hall ah dahna hmun tha kan la neih loh avangin VCP in kawl rih se tih a ni a, a dahna tur hi siam thuai ni se tih an ti bawk a, Sound System hi hawh chhuah phalloh nise tih a ni bawk.
4. Hall chhunga dah tur Dawhkan leh Lecturn siam tir nise tih a ni. Tin, PHE Department ah Tui Connection dil nise tih a ni.
5. Hall hmang tur reng reng in Hallchahbi chowkider hnenah lam thin tur a ni a, hman zawh ah dah leh nghal zel tur a ni.
6. Hall chhunga infiam reng rengin Hall chhung hi uluk leh thianghlim taka vawn tur a ni a, Hall chhunga infiamna hmanrua reng reng hi uluk leh dimdawi thei ang bera hman tur a ni.
7. Zan dar 9:00 hnu lam ah Hall chhungah infiam theih a ni tawh lovang.
8. Hall kawta Football khel thin ten Hall bang ti bal lo thei ang berin inkhelh tur a ni ang.
Heng a chunga dan leh dun zam te hi Dt. 13.4.2009 atanga hman tan nghal tur a ni ang. Tin, Hall (Chowkider) lak dan tur leh a mawhphurhna tur chungchang ah pawh hetiang hian ruahman a ni :
(1) Ruihtheih thil an ti tur a ni lo.
(2) Ruihhlo an zuar tur a ni lo.
(3) Hall leh a vel te fai takin an enkawl tur a ni.
(4) Hall chhung bungrua reng reng fai takin an enkawl tur a ni a, a bo thu ah pawh Chowkider in mawh a phur ang.
(5) Infiam leh Hall hmangtur an awm loh chuan Hall hi hawn loh tur a ni.
(6) Chowkider term hi kumkhat chhung atan a ni ang.

-------------------------------------------

DAMLO
(Kan Hriattheih Chin)
V Pi Lalkutthangi W/o H.Vanlalthanga N-Sec. chu Kalna avangin Aizawl lamah in entir turin Zirtawpni khan an kal.
V Tv. C.Hranghluna N-Sec chu Bike a a chetsualna lamah a kutzungtang pahnih a titliak, enkawl mek a ni.

-------------------------------------------
TUAK THAR
Nl.Lalrokhumi chuan a lungdumtu Hmingthansanga (Sangtea) of Emmanuel After Care Centre a mi nen YMA Certificate dawng lo chi in a hruai lut ve leh ta rup mai.

-------------------------------------------
BABY SHOW
Champhai District Baby Show neih zawh takah Lalnunpuii d/o Lalramliana V-Sec (PWD Complex) chu pakhatna niin Lalnunsiami Tlau d/o B.Lalramnghaka T-Sec chu pahnihna a ni bawk. Lawmman atan tangka fai leh Certificate mawi tak an dawng a ni.Hetiang lawmman dawng thei kan veng chhung mi kan nei hi kan lawmpui takmeuh a ni.

-------------------------------------------
FAMCHANG
Joshua Lalrinawma kum 3 S/o Rokunga Ch-Sec Asst. Leader chu ni 8.4.09(Nilaini) tlai khan damdawi lem sual avangin an mahni chenna Inah a boral a , a ruang hi tlaivarpui ni in tuk ah Thlanmual No. II ah vuiliam a ni.
Lalmawii Ralte (50) D/o R.Khawhluna (L) T-Sec ami chu Dt. 10.4.2009 (Zirtawpni) zan dar 9:15 khan anmahni chenna Inah Cancer vangin a boral a, a ruang hi tlaivarpui niin a tuk ah Thlanmual No.I ah vui liam a ni.
Lusun/Khawhar chhungte Editorial Board ten kan tawrhpui takzet a ni.

-------------------------------------------
Editorial
Mihring tawh phawt chu tupawh mai hi han fak ila fak lawmlo kan awmlo ang, kan in fakna ki a zirin kan dawnsawn dan pawh a dang ngei ang. Fak lawm lo chu kan awm àwm kher love.
Mizo te hian kan Zo ze nunmawi te hi vawng nung zel tur chuan kan khawtlang nu leh pa, YMA, etc. te hian kan thalai tlawmngai leh fel tak tak te hi chawimawi dan kan hriatchhuah a hun tawh tak zet a ni. Hmanlai pawh khan khang mi tlawmngai leh hmingtha te kha an chawimawi thiam in; nula tlangval te rilru ah in chawimawina leh fakna te khan kawngro a su em em a ni. A la chawimawi ve loh nula tlangval te pawhin rilru siamin chawimawi ni ve ngei tumin tan an la ngei ang.
Tunlai a kan thalai tlawmngai tak tak te hi ka fak em em na chu, an tihturah an chiang, an thiltih te hi an tan hlawkna a awm miahlo, fakna leh chawimawina nopui an tlawmngaih a vang hian an dawng lemlo. Mahse an theih tawp an chhuahna te hi erawh ah hi chuan nu leh pa , YMA etc te hian chawimawi dan thar hi i ngaihtuah sak ang u. Tuna kan chawimawina pakhat vanduaini ah chauh mai lantir thin hi chu ngaihtuah chiang deuh ila, hei aia tihdan tha deuh hi chu kan hmuchhuak ngei in a rin awm.
Keini BYMA chuan kan thalai tlawmngai tak tak te hi kan hrechiang lawm che u in kan fak tak zet zet che u a ni.

-------------------------------------------
PHE HRIATTIRNA
Sawrkar kum a lo thar leh ta a, PHE tui Point-a tui dawng duh turte chuan Ni 15.4.09(Nilaini) hian Bethel Veng tan tui Card PHE Office ah siam thar tir tur a ni. Tui Card hi April atanga september thla thleng atana siam tur a ni a,
Chhungkaw member 1-5 - Rs 65
Chhungkaw member 6-10 -Rs. 125
Chhungkaw ember 11 chunglam Rs 185
Tui Card siam tur chuan Tui Card hlui ken tur a ni a, a neilo chuan mahni Ration Card dik tak ken tur a ni.

-------------------------------------------
HRIATTIRNA
IKK Biakin pan thlak dawna YMA Sign-Board ti rang leh thil ziak kan awm a. Tin, Pu R.Khawhluna In chhaka YMA sign Board ah pawh hian Poster tarna hnuhma a awm bawk a,tun hnuah chuan ti tawh lo turin kan in hriattir a. Tin, Vengchhunga YMA thil ziah Sign Board leh banga thil ziah leh lehkha tar phal a ni lo. Zawm theuh i tum ang u.

-------------------------------------------
LAK BELH
Kan Branch YMA zaipawl member atan Nl.Linda Vanlalruati d/o K.Thuamluaia V-Sec leh Nl.Linda Lalngaihawmi c/o Lalbiakkunga Pachuau T-Sec te chu lak belh an ni.

-------------------------------------------
SPORTING CLUB NEWS
Kan hma lawk Ni 28.4.09(Thawhlehni) atang khian Champhai District Football Association te huaihawt in Second Division Screening neih tur a ni a, heta tan hian Second Division Players te taima taka Practice leh theuh turin kan in hriattir a.Practice tha peih lo te chu khelh tir an nih loh pawhin sawisel theih a ni lovang. Hemi a nih avang hian Executive Committee pawh neih thuai a ni ang.
Tin Jersey a la lut kim lo fo, thehlut thuai thuai thin ang u. Discipline vek a nih si.
-------------------------------------------
HSSLC RESULT
Kan hriat theih chin ah kan vengchhung atangin heng mi te hian kumin result chhuak ta ah khan hlawhtlinna an chang, chung mite chu :
1. B. Lalhmunsiama S/o B.Biakvela I Div.
2. Vanlalzawmi D/o C. Keilianthanga II Div.
3. Jerry Vanlalkima C/o Zomuankima II Div.
4. Lalhmachhuana S/o Lalbiakthanga II Div.
5. R. Lalnuntluangi D/o R. Thangseia III Div.
6. Biakrinawmi C/o C.Rinliani III Div.
7. Malsawmtluanga S/o B.Rothuama III Div.
8. Mary Lalruatfeli D/o M. Tlanghmingthanga III Div.
9. Malsawmtluanga S/o Lallianmawia III Div.
Hlawhtlinna chang tu te BYMA Editorial Board te chuan kan lawmpui tak zet zet a, kan tarlan hmaih in awm anih chuan ngaihdam kan dil nghal bawk e.

-------------------------------------------
BETHEL LOCAL MPF HRIATTIRNA
M.P inthlan kan hmachhawn tur ah hotu te hnen atanga thu kan hmuh angin hetiang hian duty leh tur a ni a, duty tura kan ruat te tlawmngai taka lo thawkchhuak leh theuh turin kan in hriattir e. Hetiang hian ruahmanna siam a ni.
ZION VENG BOOTH
1. Pu C. Lianthangvunga, Leader
2. Pu S. Lalruatsanga 3. Pu C. Roenga
4. Pu Thangromawia 5. Tv. Thangkhanenga
6. Tv. C. lalthazuala 7. Tv. Vanlalringa
8. Tv. Malsawmtluanga 9. Nl. Lalduhawmi
10. Nl. B.Lalrinawmi
BETHEL BOOTH -I
1. Pu Lalmuanpuia Ralte, Leader
2. Pu H.Lalduhawma 3. Tv. Kaizasiama
4. Tv. Mungngaihsanga 5. Tv. Kapsianpianga
6. Nl. Laldawngzeli 7. Nl. Rosy Lalawmpuii
8. Nl. P.C Lalthanmawii 9. Nl. Lalrinchhani
10. Nl. C. Lalnunthari
BETHEL BOOTH -II
1. Pu C. Rohmingliana, Leader
2. Pu C. Zohmingthanga 3. Pu Nelson Khiangte
4. Tv. Keneth Lalthanzauva 5. Tv. H. Lalfaka
6. Tv. Malsawmthara 7. Tv. Kapthuama
8. Tv. P.C lalmuanpuia 9. Tv. Lalngaihawma
10. Tv. Lalengthanga 11. Nl. Vanlalruati
12. Nl. Zosangpuii 13. Nl. Lalnunsiami
14. Nl. Lallawmzuali

Sd/- P.C LALHMINGLIANA
Secretary
Bethel Local M.P.F

-------------------------------------------
ENKAWLNA HMASA(FIRST AID)
...Din Dini Pa
Pu Hriata chuan ho a lo ti viau maithei a, Pu Buata chuan ‘Hetiang Tha na lam pawh ni hlei lo’ te pawh a lo ti maithei. Mahse kan thianpa Rokunga’n a tuai duh lawm lai a chan atang khan First Aid pawimawh zia ka thinlungah a lang tlat mai a, ka hriatna tawi hle mahse tlem te ka han tarlang ve ang e.
Thil hak/lem sual : Naupang hian an thil ei hi lem sual an ching duh viau a, pawisa thir, marble, chana etc. an ei hian an thawkna dawtah lem pawlh a awl thin, naupang damdawi ei tirin mi thenkhatin an hnar hup sak an hmang bawk, a hlauhawm khawp mai, tih hauh loh tur a ni. Hetianga thil an lem sual chuan :
1) Amah chu i malchungah bawh tir la, naupang chu a awm hnuaiah a lu uai fual tir deuh ang che. I kut veilamin a dar pheng inkar velah beng thek thek rawh.
2) Naupang chu a letling zawngin khai vat la, a hnungah na lutuk lovin chum/beng rawh.
3) A hrawk chu a ka lamah zut rawh(Khai reng chungin)
4) A thil hak chu a la chhuak thei lo a nih fo chuan, mut zangthal tir la, a ka-ah puan pan deuhin khuh la, mi pakhatin a ka-ah fawp vak se, a fawh rual chiahin mi dangin a awmah nem rawh se. Vawi tam tak tih tur a ni.
Khawsik : Taksaah natna hrik a luh vang emaw, chhan tam tak avangin khua a sik thei a, damdawi ei ngai lovin kan taksa a natna do tute avangin a lo dam leh mai thin bawk. Naupang hian khawsik hi an nei duh viau mai a, a enkawl dan chu :
1) Naupang chu a kawr hak lai tawt deuh leh phuartu awm chu phelh thawl la, thawmhnaw thawl deuhin thlak rawh.
2) Taksa, hmai leh chal te chu tui lum pip pep a puan tih huhin dep rawh.
3) Dam lo chu tuivawt tam tawk, chini tlem leh chi tlem tuia pawlh in tir rawh.
4) A khawsik tih hniam nan nachhawkna ei tir tur (Naupang kum nga hnuai lam chu damdawi tui(Syrup) chuah pe thin ang che).
5) Puitling khawsikah chuan pem emaw pan vang a nih loh phawt chuan emaw a chhan hriatchian loh avanga khua a sik a nih chuan thisen lak tir a, Malaria damdawi mithiamte rawna ei vat a sual lo ber.
Pem/hliam :Hliam, pem kan neih reng reng in enkawl uluk a tha hle, a pawng ataka Dettol hnawih mai a tha lo, Dettol hi pema hnawih tur a ni lova, tui nena pawlha pem te hliam te silfaina tur a ni. Chumi hnuah damdawi hnawih tur a ni. Pem i neihin :
1) Thisen chhuak a awm chuan hup/hmeh pin vat tur.
2) Lapua thianghlim deuh puanthem thianghlim a tuam hnan tur. Tlangsam hnah, khiang pil tuam hnan hi damdawi In pan a ngaih leh si hian tih fai a harsa a, hliam na deuhah chuan tih loh tur a ni.
3) Pem satliah leh pan satliahah chuan Betadine Ointment hnawiha tuam hian awlsam tein pem leh hliam a enkawl dam theih.
4) Hliam nasa deuh leh thui ngai chu Hospital pan vat tur.

-------------------------------------------
Enge an sawi

M Kan veng nula thenkhat, Khawhar Ina zai lai mai pawh nilo Biak In ah lehzel pawh Mobile Phone khalh ching hmuh tur kan la awm cheu. Nu leh pa te lam pawh khan kan fa te hetiang lam kawng ah hian i zilh deuh teh angu.
.....RVss
M Zion Veng panna kawng thingzai khawl bula Vawkin hi tunge sawntir thei ang le. Vengchhung hmel a tibal in hriselna kawng atan pawh a tha lo hle mai.
.....Bilk Hack
M Engatingeaw? Kan tana a hnawksak lo leh kan hlawkna tur a nih rihngawt avanga midang leh khawtlang ngaihtuah lova a chep zawngte leh a hnawksak zawngtea kan awm thin aw. Kristian tih atan chuan a mawi lo hle thin lo maw. Chuvang chuan a tu ate pawh hian dik tak leh fel taka hun hman i tum tlang ang u hmiang.
.....Nundik Zirmeka
-------------------------------------------
VOTE THLAK ANG AW
Tunkar awm tur ni 16.4.09(Ningani) khian Mizoram pumah Lok Sabha MP thlanna neih tur a ni a, kan vengah pawh Vote thlak turin a buaipuitu tur leh MPF Duty turte pawh na in ruat fel tawh. Vote nei chin chu a bo a bang awm lovin kan tih tur a ni tih hriain Vote i thlak vek ang aw.

-------------------------------------------
A DUH APIANGIN
BYMA chanchinbu-a chhuah atan ‘Khawtlang nun siam that’ leh Zo ze nunmawi’ tih thupui hmangin thumal 600 atanga 700 bawr velin a duh duhin han ziak rawh u. Branch OB leh thuziak thin te phei chuan rawn ziak ngei ngei ru. Ni 17.4.09(Zirtawp) aia tlai lovah Editorial Board hnenah thehluh mai tur a ni. Sum a remchan chuan lawmman pawh siam a ni ang.

-------------------------------------------
TUNLAI BETHEL

Tunkar chu kan sual zawng zawng tlantu amah kan biak Pathian ngei Kross-a ankhenbeh na ni an hmang a, kan sual min tlanna a ni tih pawh kan hre thar bawk e. Vawiin a thawhleh ni champha kan thleng a, lawm leh hlim takin kan kalna tur dik tak Biakbuk lamah kan lawi dial dial dawn lawm ni.
Chutih laiin Sawrkar kum thar a ni a, April Full ni pawh mi tam tak chuan thenawm te pawh kan tibuai phah bawk kha. Nimahse Sawrkar hnathawk ten an thawhhah an lak thin an la har deuh chuan khawlai leh Bazar-ah sum leng vak a vang deuh niin a lang bawk.
Lehamah Van atanga tui rawn baw pheuh chu kan duhthu anga a la tam loh avangin kan tui mamawhna leh Nu ho thlai chin ten harsatna an tawh phah deuh niin a la lang bawk.
Kan sawi fo tawh ang zelin thlahphung tur lam kan pung zel a, min siam chhan dik tak kan tihlawhtling tlanga kan lawmpui zel bawk a niang chu. Pawl sawmpahnih result chhuak avangin lawmna In tam takah a thlen a, a hmui hmer lam pawh buatsaih an tum chho zel bawk.
Kan In chhunga a pawimawh ber lamah Uisa ti Uisa tu Phuihnam chuan par a rawn chhuah tan a, Alu, Khanghu, Antam, Farm Artui leh thil dang dang ten a changin Dawhkanah hmun rawn chang mahse naupang lungmawl chenin nakin lawka Dawhkana kan ban zir ber turin kan Hrawk a ti fawk tan leh tawh a nih hi.

-------------------------------------------
BYMA Shotgun
M U Biakhlir damlai lu ka sun lo a nia.
..... Ruata of Langsung
M Damlai lusun hi a lungthu kimna ani ta der mai...
....Tv. Tha-a Ch.Sec.
M Ngaiteh!!?? Ka mumang ah te chuan Chhura hmun hi a lo langruih mai a...
....Tv.Ngaihawma T.Sec.
M Hman zan ka leng chu a ni lo zawk Sihal ka hawn daih mai. A pawi chuang lo e, hlawkna ani tho
......Tv.Chhana T-Sec.
M Kei pawh Tlangsam lamah ka mit ka len phei a.
.....Pu Oh Tv. Notea N-Sec.
M Min hre thiam hram ru, in awm zin a ngaih hun lai a nia. Duh leh Pa lo min ti rih mai ru.
.....Pu Maremruata V-Sec.
M Ka tih reng kha, OB-ah chuan Nula ka hruai thei ber.
.....Fin. Secretary
M Hriata, khulai ami kha rawn hruai zel rawh. Ka vei leh ta bur mai, VC a ni lo ti rawh.
.....Pu Biakhlira T-Sec.
M Tunlai chu Thla bial vang ngeni, kei leh kei lovin ka haihawt a zual tlat, ka Bike ka theihnghilh thul Pu Ruatsang.
.....Branch Treasurer

0 comments: