Vengsang YMA (Vengsang)

VENGSANG SPORTING CLUB
The Vengsang5th April 2009:
Ni 8.4.2009 (Nilai) khian Second Division Football Screening neih tur a ni a, he screening ah hian kan veng pawh tel ngei tum a ni in inbuatsaihna pawh kalpui mek a ni. Ni 3.3.2009 zan khan Sporting club chuan he screening neih tura inbuatsaihna tlirletna leh player thlanna an nei a, a hnuaia mite hi an ni :

Coach : PC Lallianmawia (Keihfangtlang)
Coach : Lalramruatthara N.Sec Asst. Coach : Mapuia V.Sec
Players :
T.Sec.
Lalmuansanga, Lallawmkima, Zohmangaiha, Zohmingmawia, Zonunthanga, Lalrinngheta, Malsawmkima.
N.Sec
Lawmsangzuala, Zomuanpuia, Lalbiakthanga, Lalmalsawma, Lalruatfela, Lalrema, Maruata, Lalhmingsanga, Lalpuithanga, Abraham-a.
K.Sec
James, Anthony, Lalruatsanga.
V.Sec
Lalropuia, Zoramchhana, Thlenga.

Heng hming kan tarlante leh Sporting Club OB te vawiin chawhnu inkhawm banah YMA Hall ah kim taka kalkhawm tur a ni.
(Hming pum hriat chiah loh te an awm avangin Sporting club OB te’n ngaihdam an dil a, mahni inhre mai tura ngaih an ni. Tin, Football a tui hming tarlan lem loh tel thei ngei turte chu inhmuhkhawm hunah hian kal ve tur a ni.)

DAMLO
Pu Thankhuma K.Sec a mi chu pumna avangin Champhai District Hospital ah a awm mek.
Pi Sankili pawh in lamah enkawl mek a ni. Tlem chuan hma a sawn deuh ni in thu kan dawng.
Pu Rodingliana V.Sec chu Aizawl atanga Bike a lo haw cho chu Khawzawl dai ah a chesual palh a, Khawzawl damdawiin ah kalpui a ni in a ke a chet theih loh avangin Aizawl panpui a ni.
Pu Lianlunga V.Sec chu ram kang a thelhna ah a kang palh a, in lamah enkawl mek a ni. Tlawmngaihna avanga vanduaina a tawk hi pawi kan ti a, chutih rual chuan mite tanpui nana mahni indahtha ngam a nihna hi chhuanawm kan ti hle.
(Damlo te hi thachhuak leh thuai turin duhsakna kan hlan a ni. )

-----------------------------------------------------------------

Mikhual thleng :
Tun kar chhung khan Serchip District aiawha Hockey khela lokal (hmeichhia) chu kan vengin kan lo mikhual a, YMA Hall ah an riak khawm. Tin YMA chuan kan mikhualte tlawmngaia lo thleng tute zawng zawng chungah lawmthu a sawi a ni. Kan mikhualte hi Pathumna an ni a, lawmman dawng phaka an awm hi kan lawmpui hle. Tin, Lawngtlai lam pawh kan thleng zet na in Venglai lamah an insawn leh ta zawk.

Chhiatni Fund :
Chiatni fund la pe lo zawng zawng te’n kar leh chhunga pe fel turin kan inngen a, tin, a khawntu ten kan khawn ang ang te Pu Lalrinsanga Fin. Secretary hnenah ni 11.4.2009 (Sunday) ral hma ngeia thehlut turin kan in ngen bawk a ni.

Kuang siamsak :
Pu Lalthanzauva kum 50, Hnahlan khua chu ni 31.3.2009 khan Champhai District Hospital ah a boral a, a ruang hi Pu Lallianluauva N.Sec inah nghah a ni a, kuang siamsaka thlahliam a ni. Lusun chhungte kan tuarpuiin Pathian in awmpui se kan ti hle.

Sub-Headquarter
Ni 2.4.2009 (Ningani) khan Sub-Headquarter YMA OB ten Tuichangral Group Conference Khawhai a neih chu an hmanpui. OB te hi Sub-Headquarter Zaipawl in an tawiawm.

-----------------------------------------------------------------

MHIP
(KAN VENG PAKHATNA)
Ni 1-2.4.2009 khan MHIP Sub-Headquqrters Champhai chuan Hnahlanah conference ropui leh hlimawm takin a hmang. He conference ah hian ‘MHIP NIH HI’ tih an thupui a ni. Conference ah hian Pu TV Fambol DC chu khuallian a ni. Khuallian hian ‘Hmeichhiate hamthatna leh hmalak dan tur’ tih thupui hmangin thusawina a nei a. Tin, Pu C.Cawnghnuna SE PHE chuan thupui chi hrang hrang lakhawmin Paper a present bawk. Headquarters atanga rawn hmanpuitu Pi Rozami’n thu tha tak a sawi bawk a. Thupui hi Pi WC Zorammawii’n sawiin ngaithlatu te’n hlawkthlak an ti hle.
He Conference ah hian Lengkhawm zai in intihsiakna neih a ni in member kal tam lawmman siam a ni a, Lengkhawm zaia intihsiaknaah hian KAN VENG chu PAKHATNA kan ni a, Member kaltamah PAHNIHNA kan la bawk.
Conference ah hian Member 500 vel palai an kal a, Kan veng atangin member 33 an kal thei a ni. Thlengtu lam an inbuatsaihna a tha in mikhual an thleng hneh hle.
He conference a kan veng atanga member kal zawng zawngte chungah Branch OB chuan lawmthu an sawi mawlh mawlh a. Tin, an kalna tura motor thawhtute- Pu R.Kapthanga N.Sec leh Pu H.Vanlalmawia K.Sec. te, phal taka thutthleng hmantirtu leh a tul apianga buaipui inpeih reng YMA chungah MHIP Vengsang Branch chuan lawmthu a sawi tak meuh meuh a ni.
-----------------------------------------------------------------

HSLC PASS
Lalthianghlima C/o HC Rohmingmawia N.Sec. III GMHSS
Lalrinzuala S/o H.Vanlalmawia K.Sec. III Einstein Boarding School

HSLC pass tharte hi kan lawmpui tak zet zet a ni.

(Kar hmasa lam khan Result bu kan hmuh hman loh avangin kimchang lo takin result kan hriat ang ang kan rawn tilang a, hmaih palhte chungah ngaihdam kan dil a, Hriat loh palh la awm thei a nih avangin inhriattir zel ila a lawm awm hle ang)

-----------------------------------------------------------------
AWMLAI
Pi Zohleii Kum 88 M/o Pu SH Lianchhunga N.Sec chu nimin zing dar 9:30 khan anmahni chenna inah a boral. Khawhar chhungte Pathianin awmpuiin thlamuan se kan duh tak meuh a ni.

-----------------------------------------------------------------

PAWI KAN TI
Tv. SH Lalruatkima kan Joint Editor chu a pi, Pi Zohleii kum 88 chuan nimin Ni 4.4.2009 (Inrinni) zing dar 9:30 khan a boral san a. Kan chhungkua atanga chhiat tawk an awm hi pawi kan ti in kan tuarpui tak zet zet ani.

------------------------------------------------------------------

Englo Huang
J Mi ten vanduaina a an ruat kei ni tan malsawmna !!!
- Pu R.Chhunga N.Sec.
J Kan vangkhua ah i lawi rei lo lua e !!! Lawntlai lanu zuna uai chu rilru a awm hla duh ngei mai !!!
- Madonga K.Sec.
J Kan fapa hi tunhma chuan lo haw rawh pawh ti ila, Aizawlah a cham tlat zel a, tunah thung chuan thil pawimawha tirh pawhin ti zo hman lovin a lo haw leh thin !!!!
- Pi Dinsangi V.Sec.
J Nawmsam meuh loh pawh hi chhawr tangkaina a lo awm zel, chhuanlam tha tak a lo ni a lawm mawle!!!
- TMa T.Sec.
J Chhungpui Nu in a ka a an meuh chuan hna lam tul pawh kan sawi ngam tawh hlei nem, Hnahlan lam kan pan vawng vawng mai !!!!!
- Pu Mawitea Leader N.Sec.
J Lianmawi, hmanzan kan kal kawina kha engmah sawi chhuah awih a ni lo a nia, ka awmpui nu in a hriat chuan a pawi ang !!!!
- Pu Tluanga Keihfangtlang.
J Hnahlanah chuan pasalten min hmu phak hek lo kalvari rock leh zo rock kan pawlh nuaih mai!!!
- Pi Tani N.Sec.

------------------------------------------------------------------

Editorial
Thenawm khawveng
Mizote hi thian ngaina tak, thenawm khawveng inlen pawh thin hnam kan ni a, tlakchham neih chang pawha thenawmte inbantawn mai thin kan ni. Heng avang hian laina lam hla zawka awmte ai chuan thenawmte nen kan inlaichinna pawh atha zawk mah a ni.
Mangang ni leh lawmna kan tawn chang pawhin kan intuarpuiin kan inlawmpui tawn thin a, a tulna apiangah kan inpui tawn thin. Hengte hi kan nunphungah thil thlakhlelhawm tak leh duhawm tak a ni.
Changkanna kan um luatah hian thenawmte nena kan inunauna leh kan inlaichinnate hi kan hlamchhiah zo mai ang tih hi thil hlauhawm tak a ni. Hnam dang te’n an neih ve loh leh kan nunphunga entawntlak leh awhawm an tihte zinga mi a ni a, kan roh a tul hle awm e.
A leh lamah chuan kan inpawhnate hi kan hman thiam a tulna lai a awm thei a ni. Chhungkaw pawi hai sawina hun awm lek lova inchim buaite hi thil awm thei a nih avangin hun kan in pek thiam tlante hi a ngai a. Rilru hahna midanga chhuak leh atana duh lem loh pawh kan inhrilhhre fo thin, chung hunah chuan an mi rin ang ngeia kan khawsak pawh a tul hle awm e.
Tin, in bang dan mai a khawsate kan nih hlawm avangin thenawmte thusawi leh an inzilhnate tum em em vang pawh nilova hriat chang a awm thin. Mi tam tak chuan ti ti nikhua ah sawi chhuah chang kan nei fo mai, hengte hi tawk ve vek thei kan nih avangin tum loh thil tak kan lo hre palh a nih pawha beng chhut ngawng chin hi puitling nihna a ni.

------------------------------------------------------------------

Section News
Vanapa Section :
Electric Bill khawntu te’n arang lama khawn fel tur leh a huna pek a nih theih nan thehlut vat turin ngen in ni e.

Khuangchera :
Section kudam sa in zing karah hnatlang anei nei ngawrh hle.

Taitesena :
A vawihnihna atan Section huam chhung thianfaia hnatlang nei turin an inbuatsaih mek.

Neuva :
An Section huam chhungah chhiattawk an awm avangin hmalakna tura an hmachhawpte an kalpui thei rih lo.

-------------------------------------------------------------------

HRISELNA HUANG
Thisen Sang hi thil hlauhawm tak, kan neih leh neih loh pawh mahni leh mahni in hriat harsa tak a ni a.He natna hi ‘The Silent Killer’ ti te pawhin an ko bawk thin. Mizoramah pawh hian vei an tam hle. Kum engemawzat lo nei tawhte pawh hian an vei tih an inhre lo thin a, chuvang tak chuan Silent Killer ( hriat loh hlana thattu) an ti a ni. Vei tih kan inhriat miah loh laiin taksa pung hrang hrang, kal emaw a lo chhe hman reng thei a ni.US ah khuan he natna hi mi maktaduai 50 (50 milloins) velin he natna hi an vei a, an zinga za zela 30 (30%) velin an vei tih reng an in hre lo. Chuvangchuan, Doctor te hnenah a khat tawka inentir reng hi a pawimawh hle a ni.
Thisen sang chu enge ni ? Thisen san leh san loh tehna ah hian thil pahnih (component) a awm a, chungte chu Systolic Pressure leh Diastolic Pressure an ni. BP tehna hmanrua, ban puama han dah hian a ngaihthlakna hmanga ngaihthlakin, thisen pump san lai ber leh hniam lai ber chu a ri hriat theih a ni a. Hei hi marphu ri a ni. Kha marphu ri kan hriat hmasak ber kha Systolic a ni a, kan hriat hnuhnung ber kha Diastolic a ni. A chung lam 120 a hnui lam 80 (120/80) BP hi vantlang (normal) BP a ni.A chung lam 140, a hnuai lam 90 vel hi BP sang (border line) a ngaih a ni. Dan naranin Doctor te hian Damdawi ei hi an chawh mai ngai lova, ei leh ina fimkhur tur leh nun dan phung pangngai thin thlak a Exercise la ngun tura hrilh an ni deuh ber thin. Kum 60 chung lam tan chuan BP 140/90 te chu sang teh chiam pawh a ni kher lo ang. Mahse, Kum 30 mi vel tan chuan ngaihthah mai mai chi a ni hauh lo thung ang.

--------------------------------------------------------------------

INTER-DISTRICT WOMEN HOCKEY CHAMPIONSHIP

Tun kar chhung khan Inter-District Women Hockey Championship chu Champhai Playground ah khelh a ni a. He Championship ah hian District hrang hrang paruk atangin an lo tel thei a, Champhai District nen District pariatin an khel a ni. Ni 3.3.2009 (Zirtawp) khan pathumna zawnna leh final match khelh a ni.
He Championship ah hian Kolasib District chu Champion an ni a, pahnihna Aizawl District pathumna Serchhip District te an ni.

--------------------------------------------------------------------

RAM HMANGAIHTU
-Tluangtea Tochhawng
Kan pipu te chuan he Zoram tan hian an nun an lo hlan tawh a, kan hnam pasaltha tam tak in he Zoram tan hian nun an lo hlan a, an pek theih sang ber an nun hlu tak chu Zoram tan an hlan . An sakruang chu Mizoram tan an hlan a, chu chu a ni ram leh hnam hmangaihna chu.
Abdul Kalam chuan India ram President hna a chawlhsan dawn ah bungrua a nei lo. Suitcase hniah chiah
lehkhabu leh thawmhnaw chhuahpui tur a nei. Lal Bahadur Shastri pawh kha a thih khan a ruang dahna tur In a nei lo.
Duh nise India ram thau hi sawk hek in an mahni leh chhungte hai vur nan hmang thei a sin. ‘Lalpa sum ka ngainepa, rangkachak tangka nen’, ti ve lem lo mahse, nun lungphum nghet: sum te, chawimawinate, ropuinate leh thiltihtheihna in a sawi nghin ve theih loh nun nghet an neih avangin an nun chu Lungawina, Chakna, leh nun thianghlim chuan a tuam tlat a ni.
Muanpuii Saiawi IFS zinga filawr chuan a ACR pawhin chhiat phah dawn mahse thil dik lo tih a tum lo tih a sawi ngam. Chumi awmzia chu dikna avang chuan chan leh tawrh a huam a, a cho zawk a ni. Chapona aia chona nun , sum leh nihna thiltih theihna aia inngaihtlawmna, Dikna leh huaisenna thiltih theihna, Midang chan ai chhuhsak aia petu zawk nih hlutna Nun thiltithei ,ropui leh zahawm nun puitu hi a ni he ram hian a mamawh tak ni.
He ramah hian awm la rinawmna um zel rawh titu Pathian hian he ram luah tlak tur leh he ram rochana A pek tur mi a zawng a ni. Chung a mi zawn hmuhte chu an thlahte; tuchhuan tam tak lo kal zel tur ah pawh malsawmna, damreina leh hausakna pawh a pe tel dawn.
Ka ram tan hian vawi sawm thi thei ila, nung chunga martar in, Ka ram tan enge ka tih theih, enge ka hlan ve ang? Ka hna rinawm leh taima taka thawkin ka ram rawng bawlna ah ka hna hi ngai in, ka tih theih tawk a tha leh rinawmin, a tul chuan thihchilh thak pawh huam in ka ram rawng hi ka bawl ang. Hei lo ram dang ka nei si lo. Mahni hna rinawm taka thawh hi ram tana rawngbawlna, nung chung martar na a ni.

-----------------------------------------------------------------------

TUI CARD SIAM THEIH
Sorkar kum a lo thar leh ta a, PHE Tui Point atanga tui dawng duh turte chuan Ni.7.4.2009 (Thawhlehni) hian Vengsang tan bik tui card PHE Office ah siam thar tir tur a ni.Tui card hi Aprilatana September thla thleng atan siam tur a ni a.

Chhungkaw Member 1-5 awm te tan - Rs.65
Chhungkaw Member 6-10 awmte tan - Rs.125
Chhungkaw Member 11 chin chunglam - Rs. 185s

Tui card siam tir tur chuan Card hlui ken tur ani a, a neilo chuan mahni Ration ard dik tak ken tur a ni.

0 comments: