Buatsaihtute Khawthlir

Image and video hosting by TinyPic

YMA-a inhman a har em?
YMA hi a huapzo ta lo emaw ni, “YMA te chu a hman deuh ho lo inhmang se. Zirlai tan chuan a la ngai lo.” tih zilhna hi dawn tur a awm nual mai a. Hetianga YMA kan dah hrang ta hrim hrim pawh hi ngaihtuah tham a tling. Mahse chu lam chu dahthain YMA-a inhman hi a har em tih i ngaihtuah teh ang.
YMA hian tih tur a nei tlem khawp mai. Chhiatni-ah chhiat tawkte phungbawm a ni. A khat tawkin hnatlang neih a ni leh deuh lawng mai a. Vanduai vanga veng chhunga chhiat tawk kan inzin changin thawh chhuahna tur a tam deuh tih zawng a ni. Hnatlang phei hi chu a huang leh huam a zau hran lo, Office bearer leh a taima zual bak an thawk chhuak ngai lo. Heti zawnga ngaihtuah chuan YMA-a inhman hi inhman loh nen a danglamna a tlem khawp mai.
Hnatlan nikhuaah leh chhiat tawh ni-ah hian thawk chhuak ta ziah ila, chhiatni bik hi chu engtia zing nge a hriat theih lova, hnatlan hi chu thla khatah vawi khat bak thawh chhuah a ngai lo. Tunlai phei chuan YMA-a inhmang leh inhmanglote danglamna awm lo turin ‘YMA thil tih’ a awm lova. Chuvang chuan YMA-a inhman hi thil har a ni lo tih a chiang.
YMA member kan nih tawh phawt chuan YMA thil tih hi kan ngai pawimawhin kan tel ngei ngeina tur zawk a ni.Zirlai ti khaihlak thei khawp a nihna a awm lo. Exam dawn hnaih te a nih ngawt loh chuan. Midang mamawh kan nih chhung chuan YMA-a inhman hi kan bat a ni. Mi tih tura kan dah chhung chuan YMA hi a huapzo thei lo ang a, a dinhmun a hniam tual tual bawk ang. Ka unau, YMA-a inhman hi kan mawhphurhna a ni e .

===============================
Chhiartute Huang

KAN VANGLAI I CHEN ANG

Bawihpuia~Pa
Zan khat chu kawnga ka kal lai hian nula leh tlangval rawl puitling tawh nui vak vak ri hi ka hria a. YMA Section pakhat-in Meeting an nei nge KTP Group lam zawk aw tiin ka in ngaihtuah a. Ka kut veilam a hun min vawn dik tir tawra mithiam ten an rawn duan amaherawh chu ka hman tangkai thiam loh luat avanga ka tlai pui fona chu kan bih vang vang a. Dar zat en chuan YMA leh KTP Meeting neih nan chuan a tlailam mah mah tawh a. An aw rawl atang chuan Dr Thartea leh Pu Huapzauva te an tel ve lo tih hi a chiang ngawih ngawih a. Ri lo chhuahna chu kan ngaihtuah vang vanga ka thianpate In chung atangin ani tih ka hre thiam nghal mai a. A ni hi nupui neih a tum anga chhungkua an inhmukhawm nge a ngaihzawng kha a hawn ta zawk aw tiin ka ngaihtuahna a insual buai hle a. Chutia ngaihtha lo taka din reng ai chuan thil a nihna chian lo lo a tha in ka hria a, ka thianpa te Inchung panna kailawn lah chu an Choka paltlang kher a ngai lo bawk nen ka pan chho ta tham tham mai a.
Kawngka bul ka thlen chuan an thawm chu kan ngaithla chiang leh deuh a. Tlangval pakhat a aw ri pawh vawi tam tak ka lo hriat thin zaithiam vang leh fiamthu thiam vang pawh ni lova a aw hmanga Champhai mai pawh nilo Mizoram dengchhuak pha hial hian an naupan laia LP School II a a pawlpuite Sikul luh tirh ni a an Sikul a fanpui thu hi alo sep rawtui a, nula than belh tur awm tawh chuang tawh lo tih hriat tak ho chuan an lo nuihpui tlawrh tlawrh hi a lo ni a. Inthlahrung tak chuan kawngka chu vawi thum kan kik kauh kauh a, ka kik zawh rual rual chuan tunge a neitu ber tih pawh hriat theih loh khawp hian ‘Lo lut rawh’ an rawn ti tluar tluar a. Kawngka kan hawn nak chuan ka rin loh pui pui hi an lo thu kek hui hlawm a. Tun ang zan rei tawhah te enge an tih kan zawh nak chuan tunlaia pawl dingthar FOREVER YOUNG ho inkhawm khawm hi an lo ni reng mai a.
An zingah chuan kei pawm lai nei Pathian zara kum rei lo teah mo tha chhawr mai tawh tur tan chuan awm ve reng na chi a ni lo tih hrereng chungin an pawl lo din chhan leh an hmalakna te kan zawt a. He pawl khai nung ber a an sawi nula pian nalh taka Lady Diana sam anga mawi taka a sam met, a Jacket sen dang hnunga Baby tih inziak, kum 1986 KTP Fellowship-a Ka Sava Eng tih pawh a bu a lo tlangzarh tawh chu rawn dingchhuakin an pawl member-te hi tuna an awm ang bak he khawvelah beisei tur an neih loh thu a rawn sawi chhuak a. Chubakah an naupan laite sawi khawmin zan dar 11 thlengte an ti ti thin tih a rawn sawi tel bawk a. An member-te hian an innghahna ber chu ‘Nupui/Pasal chauh lo chuan min then suh se’ tih a nih thu a rawn sawi lang bawk a. Ka tan tih tur vak a awm ve loh avang leh an khawvel hlimawm taka an hman mek han tih buai reng chu thil tih chiah ka ngaih loh avang leh thingpui in rawh pawh min tih ve lem loh avang chuan ka chhuah san leh ta mai a. Ka chhuah pah chuan zawn pui dan an awm lo a mi aw.... khatiang tawpa an khawvel an hmang zo tur chu tiin lainat tak chung chuan kan In lam panin ka kal ta a.
Ni e, mihringte hian khawvela kan awm chhung hi chuan keimahni theih ang tawk tawka hlimawm leh nuam a kan khawvel hi chen kan tum vek a. He khawvel hlimawm leh nuam taka chen kan duh luat avang hian thenkhat chu ruihhlo bawiha kan tlu mek a, thenkhatin kumtlinglo kan pawngsual a, thenkhatin ruk kan ruk avangin Jail bang kan zut phah hial a, thian thenkhat lahin an bialnu te an lo in thei sem thul. Kan nuam tih leh kan hlimna pawh mihring kan nih chhung chuan a in ang vek thei lo a. Amaherawhchu hlim luat kan tum avang hian hum sual hi kan lo dai reng ang tih a hlauhawm khawp mai. Chuvang chuan Thalaite hian min siamtu hre reng chungin kan vanglai hi i chen ang u.

1 comments:

Anonymous said...

Hei le kan rawn chhawp chhuah sak leh ta che u a ni a. Tun tum chu Kohhran Aw kan la dik thei tlat lo min lo hrethiam mai dawn nia.