@@Vengthlang Kohhran {Kohhran Aw}

NGAIMAWH THAM RAWNGBAWLNA

Genesis 18 : 16 - 22; Tirhkohte Thiltih 19 : 13 - 16; Johana 13 : 12 - 17

Thuhmahruai :
      Ringtuten kan tihtur pawimawh ber mai chu Pathian rawngbawl hi a ni a. Rintu inti sia Pathian rawngbawl ngaihsak lo chu rinna kawnga ke bai tihna a ni. He rawngbawl hna hi keimahni min hmangaihzia a tarlanna, ama lama kan insawhnghehna tur atana kawng a buatsaihna a ni. Chuvangin rawngbawl hi kan tihmakmawh a ni a, chutih rual chuan kan rawngbawlna hian engtianga nasain nge hna a thawh tih erawh chu kan ngaihtuah a ngai hle a ni.
Ngaimawh awmzia :
  ‘Ngaimawh tham rawngbawlna’ tih kan sawi dawn a ni a, ‘Ngaimawh’ tih tawngkam awmzia kan hriat hmasak a tul awm e.
  1. ‘Ngaimawh’ tih tawngkam hrim hrim hi a awmze bulah chuan a tha lo lam sawina a ni fo; amaherawhchu, tunlaiah tawngkam kan hman pawlh nasa a, kan ngaih pawimawh leh tul kan tih sawina tawngkam atan ‘ngaimawh’ tih hi kan hmang ta tho mai.
  2. A awmze dang lehah chuan mi khawsakzia leh an thiltih kan ngaihtheihloh viau leh kan nin viau hian, “Ka va han ngaimawh em,” kan ti thin a ni. Kan thupui nena hmah rem dawn chuan ‘Thik’ tih nen pawh a intluk thei ang.
Ngaimawh thama rawngbawlna :
  Ngaimawh thama rawngbawl kan sawi dawn a ni a. Chumi a nih chuan tu ngaimawh thamin nge rawng kan bawl tak ang tih hi kan hriat a pawimawh.
  1. Genesis 18 : 16 - 22 kan en chuan Pathianin Abrahama a ngaih pawimawhzia kan hre thei awm e. Abrahama hian Pathianin a koh atang khan a mit a tlung hle a, chumi avangin mihring mai pawh ni mahse Sodom leh Gomora chunga a thiltih turah Abrahama a hriattir leh hriattir loh turah a inkhap thlu a ni.
  Tin, Genesis kan chhiar zawm zel chuan Sodom leh Gomora tihchhiat chungchanga Abrahama,n vawi li nga lai mai Pathian a thu a sawhsawntir thei ringawt pawh hian Pathianin Abrahama thu a ngaih pawimawhzia a hriat theih a ni.
  2. A dang lehah chuan Tirhkohte Thiltih 19 : 13 - 16-a kan hmuh ang khan Skeva fate rawngbawlna kha Pathianin a ngaimawh tawk lo mai pawh ni lovin Setana ngei pawhin thik enah pawh a en lo a ni tih kan hria.
  Ngaimawh tham rawngbawlna chi hnih kan han tarlan atanga kan hriat theih chu rawngbawlna hlawhtling tak nei tur chuan Pathian hriatpuin leh Setana thik khawpa rawng kan bawl hian a hlawhtling chauh dawn a lo ni.
Ngaimawh thama rawngbawl dan :
       Pathian leh Setana ngaimawh thama rawngbawl hi thil har tak a ni tih kan hre theuh awm e. Hetiang rawngbawlna nei tur chuan ringtu chak- taksa leh thlarau lamah pawh mi chak tan lo chuan thil har tak a ni. Chuvang chuan rawngbawl hi thil tih namai a ni lo tih pawh kan hriat a tul awm e. Engtianga rawngbawl tur nge tih tlem i lo tarlang ila.
  1. Rawngbawlna awmzia-Inngaihtlawmna :
  Kan rawngbawlnain awmze thuk tak a neih theih nan chuan rawngbawltute rilrua rawngbawlna awmzia a chian hi a ngai a. Johana 13 : 12 - 17-a kan hmuh ang khan Lal Isuan Zirtirte ke a silsak chhan ber nia lang chu rawngbawltute awm dan tur kawhhmuh a tum niin a lang. Chuvang chuan rawngbawlna awmzia tak chu- Tlawmna, chhiahhlawh leh bawih dinhmun leh tuarna a ni. Chumi rilru atang lo chuan rawngbawlna a hlawhtling thei lo.
  Rawng kan bawl tum danah chuan khawvel dinhmun anga ngaia sang taka awm a, phak ang tawka thuneihna lek kan chhak nite hian a hriat thin. Tling leh tlak em em chuang si lo rawngbawl tura thiamna avanga duhsak taka inlak ai chuan inngaitlawm tak chunga mimawltein rawng a bawl hi a hlawhtlingin a hlu em em zawk a ni.
  2. Rawngbawlna tur leh mahni inhriat chian :
  Genesis-a Abrahaman Sodom leh Gomora tana a dilna kha kan thlir chuan kha khaw hnih dinhmun kha a hre chiang hle tih a lang mai a, chu a rawngbawlna chu ngaihthlaksaka ni reng bawk a ni.Khai le, keini hi i han inbih chiang teh ang. Pawlho leh mimal anga kan rawngbawlna field tur hi kan chiang chiah thin em ? An mamawh tak tak chaw kan pe em ? Tute tan chiah nge ? Engtiang kawngin nge ? Engtik hunah nge ? tih thleng pawh ngaihtuah lova ‘A lang’ tih vang ringawta rawngbawl hian awmzia a nei thui har khawp mai.
  Hemi ruala kan hriattur pawimawh tak pakhat chu mahni inhriat chian hi a ni. Mahni inhriat hi thil har tak chu a ni tih pawh kan hre tlang theuh awm e. Rawngbawl tura min kohna zawn hi kan hriat a pawimawh. Min kohna niloah pawh rawng chu a bawl theih ngei mai; amaherawhchu, rawngbawlna a hlawhtlin theih loh mai bakah vuivaina a titama, mahni nun nen lam pawh a vaw chhe thei tih kan hriat a tha.
  Chapo silova mahni dinhmun hre tak chunga kan rawngbawlna tur tak kan hriat chian chuan harsatna pawh lo thleng se Pathianin kan rawngbawlna a sawt zawkna tura a remruat sa a nih ka ring.
  3. Hmangaihna leh thahnemngaihna :
  Abraham’n Sodom leh Gomora tana a dil khan a rilrua cham reng tura rin hrit theih chu a unaupa fapa, Lota te chhungkua kha an ni. A hmangai em em a ni tih a hriat theina chu -
  (1) Hmelmain a run pawhin a uma, a va chhuhsak leh
  (2) Ram insem chungchangah pawh a sawm pawh ni lo kha ram a thlan hmasak tir. 
  Chutiang taka a hmangaih Lota te chhungkaw dam khawchhuahna tur chuan thahnem a ngai hle a ni. Lalpa leh misual (Thlarau bote) hmangaihna tak tak kan neih phawt chuan thahnem ngai takin rawng kan bawl thei ngei ang. Chutiang bawkin Kohhran, Kohhran Hmeichhia leh K.T.P hmangaihna tak tak kan neih chuan a huang chhung atangin thahnem ngai takin a rawng kan bawl anga, a chhiat a that chungchang ringawtah pawh thahnem kan ngfai hle ang. Chuvangin hmangaihna leh thahnemngaihna hi a inkawp tlat a ni.
  Tlangkawmna :
  Rawngbawlna hlawhtling nei tur hian tul leh mamawh tam tak a awm thei a, sawi vek sen pawh a ni lo. Kohhran rawngbawlna chang tur te, rawngbawlna hlawhtling nei tur te hian pawimawh tak mai chu nghah peih leh inpekna a ni. Mi inpe apiang Pathianin a hnar ngai lova. a tel peih leh a intineitu thiam apiang ta a ni. Chumi neitu nihna rilru pu chunga rawng kan bawl phawt chuan Lalpa’n mal min sawm ngei ang tih a rinawm a, Kohhran, khawtlang, Pathian leh Setana ngaimawh tham rawngbawlna kan nei thei ngei ang.
  Kan Kohhran atanga Bial zaipawl memberte
1)R.Laltanpuia c/oR.Lalrinchhana
2)C.Vanlalpeka s/o C.Ramthianghlima
3)H.Lalramsanga s/o H.Neihkiamlova
4)LalfamkimaVarte s/oVanenga varte
5)VL.Chhanhimi Hrahsel d/o Rev.Laldailova
6)H.Lalsangpuii d/o H.Lalchhuanmawia
7)HS.Lalengzuali d/oHS.Lalfakzuala
8) Laltlanthangi d/oJ.Vanlalsiama

Editorial : Kohhran Puitling Zia
   Kohhran puitlin leh puitlin loh hi tehna hrang hrang a awm thei awm e. Kohhrana member dan zawhkim tam vangte, Kohhran Upa leh Tual Upa neih tam vangtea kohhran puitling ta viaua ngaite awm theih a ni a. Kohhrana thlarau mi an tam avang leh thlarau lama tui taka kan kal avang pawha Kohhran puitling ta viaua ngai pawh a awm theih bawk. A enga pawh chu nise tehna chi khat chu a ni tho mai. Tun tumah erawh hi chuan tehna danglam deuh zawkin teh kan han tum chhin dawn a ni.
   Kohhran puitling zia kan han sawi duh pakhat chu programme awmsa zah leh programme phuah chawp tam lutuk chungchang hi a ni dawn a ni. A lan danah chuan Kohhranin programme a duan reng reng hi chu a nih angin a kal ngar ngar mai tur a ni a, chanvo changtute pawhin an chanvo chu an tihlawhtling ngei tur a ni ang. Chu chuan chanvo neitu chu mi puitling a ni tih a tihlan bakah chu Kohhran chu a puitling a ni tih a entir thei bawk.
     A lehlamah chuan Kohhran programme-a awmsa ni lem lo belh leh phuah chawp hi a puitlin loh thlak bawk. Kohhran inkhawma ruatlawk ni silova thilpek hlan tur emaw, tawngtai tur emawa mipui zinga mi sawm fo mai hi Kohhran puitling zawkte tihdan a ni em tih pawh ngaihtuah a ngai telin ka hria. Kohhran puitling zawkte tihdan ena a thalai entawna kan tihdan tha lo paih ngamte pawh hi a tul ve thin.
 
  BIBLE STUDY : ROM LEHKHATHAWN
  ( Rev. Wiliam Barclay hrilfiahna atanga lakchhawn )

   Duhsakna vanga mawhphurhna( Rom 2:1-11) Chhunzawmna: (2) Judate hian Pathian khawngaihna chu sim tura hun remchangah hmang lovin sual tura sawmnaah an chantir. Heine-a chuan khawvel lo la awm tur hi a lungkham lo hle. A chhan an zawh chuan “ Pathian chuan min ngaidam ang, a hna a nia” a ti! Tleirawlin a nu leh pate tana zahthlak leh lungchhiatthlak tak mai thil tiin hmangaihna avangin ngaihdam ni ta se, tihtur pahnih a nei thei : Min ngaidam leh tho vang tiin a ti nawn zel thei a, a thlawna ngaihdamna avang chuan chu ngaihdamna phu tawka nun tumin a hun hmang thei bawk. Khawngaihna leh hmangaihna avanga ngaihdamna kan chan, sual zuina chhuanlam atana hman hi thil zahthlak tawp a ni. Hei chiah hi Judate thiltih chu a ni. Tun thlengin mi tam takin kan ti bawk. Pathian khawngaihna leh hmangaihna hi thil sual kan tih pawha ngaihdamna kan chan lehna tura chhuanlam atana hman tur a ni lo va, hmangaihna avanga kan thinlung chu keh a, sual tawh lohna tur zawk a ni. (3) Paula hian Pathianah chuan duhsak bikna a awm lohzia a sawi uar hle. Pathian economy ah chuan Most Favoured Nation (Hnam Duhsak Ber) a awm ve lo, tiin Paula hi a tang tlat a ni. Tihtur engemaw bik vang emaw mawhphurhna bik vang emaw a hnam bil thlan chhuah chu a awm thei a, duhsakna bik emaw ngaihthiamna bik emaw chang tura hnam thlan erawh chu Pathian hian a nei ngai lo, a ti a ni.Milton-a pawhin, “ Pathianin hna ropui tak a neih chuan English-ho a pe thin” a ti. Heta hna ropui bik hi a pawimawh lai chu a ni, duhsak bikna ni lovin. Juda sakhaw innghahna bulpui ber chu Judate hian Pathian mitah duhsak bikna leh vanneihna bik an chang, tih hi a ni. Hetiang dinhmun bik hi chu hmanlai thil a ni tawh, kan ti mai thei. A ni meuh em le? Vun rawng vanga inthliarna te hi tunlai hian a awm tawh lo chiah em? Hman deuha German-hovin hnam ropui bika an inngaihna ang te kha a bo tak tak meuh maw ? Hei hian hnam zawng zawng hian tih theih zawng inang vek, finna leh theihna pawh intluk tlang an nei tihna chu a ni lo. Hnam fing leh changkang zawk te hian hnam dangte hi an hmusit tur a ni lo va, anmahni tluk an nih theihna tura enkawl hi an mawhphurhna a ni, tihna a ni ang. (4) A tawp bera kan sawi tur hi Paula ngaihdan dik tak kan hriat theihnan uluk taka zir a tul hle. Paula ngaihdanah chuan thil pawimawh ber chu rinna hi a ni, an ti fo thin a. Chuvangin, thiltih pawimawhzia sawi uarna sakhua chu Thuthlung Thar zirtirna nena inrem lo ti a deusawhna pawh a hring fo mai. Hei hi a ni teuh lo mai. Paula chuan, “ Pathian chuan mitin hi an thiltih ang zelin a relsak ang” a ti. Paula ngaihdanah chuan thiltihin a umzui loh rinna chu rinna lem, a tak pawh zo lo a ni. a nihna takah chuan, rinna tak tak pawh a tling lo a ni. Paula sawi duhdan tur chu mihring rinna in hmuh theihna tur chu a thiltihah a ni, tih a ni ang. sakhaw zirtirna hlauhawm ber chu rinna leh thiltih a hrang leh inzawm lova dah daih hi a ni. thiltiha lang lo rinna a awm thei lo va, rinna hnathawh ni lo thiltih pawh a awm bawk lo. Thiltih leh rinna hi inzawm chiat a ni. Pathian hian an thiltih atang lovin engtinnge mihring ro a relsak theih reng reng ang le? Ngaihtha takin, “ Rinna ka nei a lawm” tiin kan duhtawk mai thei lo vang. kan rinna chuan thiltih a siam ang a, chu kan thiltih hmang chuan pawm emaw hnawl emaw kan ni dawn a ni.
KTP News
Ni 14-18 chhung khan Venglai Kohhran Biak In-ah KTP Musical meet neih ani a. Hetah hian Hla pahnih Thianghlim Thianghlim(KHB.No 1-na) leh Lalpa Pathian engkim titheia Vanmawia phuah hmanga intihsiakna neih ani a.Duet, Trio, Quartette, leh faifuk hmanga inelna neih niin hetiang hi a pumpui intihsiakna result a ni.
1.Vengthlang Group-I
2.Venglai Group-II
3.Vengthlang North Branch
4.Venglai Group -I
5.Vengthlang Group-II
6.Electric Veng Branch.
Intihsiakna lawmman atan hian Pakhatna Rs.2500.00 Pahnihna Rs.2000.00, Pathumna Rs.1500.00, Consolation Rs.1000.00 pek a ni a. Intihsiakna -ah hian an tih tha tlang hle a, Kan Branch Thalai ten Pakhatna an la thei hi an chhuanawm a, An hma lak leh zelna tur kawng hrang hrangah phur taka an kal chhoh zel kan beisei e.
Nilai zan Inkhawm hun hman dan
Tv. Lalremruata Fanai s/o F.Lalzehmanga chu inngaihna suala a tluk avangin Kohhranin a thunun.
I Tawngtaipui ang u :
Rev.Thanhnuna Bethel Bial Pro Pastor ni thin tuna Tuipuibari Bialtu Pastor nita chu Thisen sang natna avanga pangkhing che theilovin Durtlang Hospitalah a awm mek a Kohhran ho ten i tawngtai pui ang u.

SS Report : Dt.17.05.2009
Particulars Puitling Naupang
Hming ziak 1124 858
Kal zat 474 684
Kal lo 650 174
Thawhlawm Rs 4530 Rs 2193
Pangpar Tuipek Dan
Biak in hungchhunga pangpar,tuipek
dan tur hetiang hi a ni ang :
25th - 23st May : Estheri Group


0 comments: