ni 23.9.2016 (zirtawpni)


BUH SENG ZAWHA PURUN CHING TURIN AGRI. DEPT INBUATSAIH :

Champhai District chhunga Agriculture Field Officer leh Technical Staff te tan nimin khan DAO Conference Hall-ah Purun chindan chungchangah training neih a ni a. Training pe tur hian Aizawl atangin Lalthanzuala, Dy.Director (Agronomy) leh Lalhmingmuana, SMS te lokalin zirtirna hi an pe a ni.
He training hi RK Nithanga, DAO Champhai chuan kaihruaiin DAO chuan Cluster 13 thlen chhuah tawh niin, Cluster I chu KNK lam enkawl tur a ni a, a bak 12 te chu a enkawl leh viltu tur Officer ruat fel vek tawh an ni tih a tarlang a. Training neih zawh atang hian mahn ienkawl Cluster theuhah kut hnathawktute hnenah training pe in Community Nursery buatsaih nghal tur a ni a sawi a, loneitute an phur tlang hle nia hriat thu a sawi bawk.

Mizoram Sawrkarin NLUP chhungzawmna atana policy a ruahman NEDP hnuaiah Agriculture Dept chu Purun ching tura tih an nih angin ruahmanna kalpui mek zel a ni a. Agri Dept chuan Directorate of Onion and Garlic Reasearch (DOGR), Pune atangin Purun chi tha Bima Kiran leh Bima Shakti Qntl 6 a chah thleng tawh a, hei hi District 6 ah Acre 240 a zaua ching turin ruahmanna kalpui mek a ni bawk. He ruahmanna kal zelah hian Champhai District bikah chuan Acre 90 a zauah tun thlasik chhung hian chin tum a ni a. Zau 13 thlang chhuakin leilet buh seng zawh velah phun nghal theih beisei a ni.
Nimin training-ah hian lalthanzuala, Dy Director (Agronomy) chuan thusawiin, Mizoramin Purun kan mamawh zia kan hre tlang vek a, kan mamawhte hmun dang atang la lut lo a, kan intodelh ve theihna turin thawktute kan tanrual a ngai a. Tih tak takna nen tha tho takin kut hnathawktute nen kan beih tlan a ngai dawn a ni, a ti a. Thawktute chu mipui rawngbawl tur an nih ang a, kut hnathawktute tana chhawr tlak leh an thian ni thei turin a chah bawk.
Lalhmingmuana, SMS pawhin thusawiin, NLUP Beneficiary ten an dinhmun atanga hma an sawn zual theihna turin Sawrkarin NEPD hi a ruahman a ni, a ti a. Mizoram kan intodelh leh hma kan sawn theihna tur pawimawh ber chu kut hnathawktute an ni a, kut hnathawktuten hlawk zawk an thlai te an thar chhuah theina tur leh hlawhtlinna an chan theihna tura a lai mu pawimawh ber an nih inhre chiang turin kal khawmte chu a chah bawk. Purun chin dan training hi Aizawl, Lunglei, Mamit leh Kolasib ah te neih zawh tawh niin Champhai a neih zawh hian Serchhip ah neih chhunzawm leh a ni ang.

ZIRLAITE TAN RALTHUAM PHOCHHUAK :

Nimin chawhma dar 11 khan 10th Assam Rifle te chuan MZP Champhai Headquarters ngenna bawhzuiin Darthlalangtlanga an hmunpuiah ralthuam entirna, Arm Display an buatsaih a. Zirlai naupangte tan India sipaia luh dan inkawhhmuhna, career guidance buatsaih nghal a ni bawk.
Nimina 10th Assam Rifle in Arm Display a buatsaih hi Mizo mipuiten India sipaia tan thatzia an hriat theih nan leh mi tamzawk India sipaia an luh theihna tura hmalakna peng pakhat a ni a. Govt. GM High School leh Govt. Champhai College NCC atanga hen huna tel cadet 200 zet te chuan an hlawkpui hle.
He hunah vek hian India sipai a luh dan kawng inkawhhmuhna, Career guidance, Maj. Ashok Kumar-a hova neih niin zirlaiten an hlawkpui hle. Major Ashok Kumara chuan India sipaite hnathawh dan zirlai kalkhawmte hnenah a hrilh bawk. Kumin November thlaa sipai lak runpui lo awm tur atana dilna thehlut duhte chu tunah hian 10th Assam Rifle te chuan form an fill up sak mek bakah training te pawh an pe dawn a ni.

COUNSELLING NEI :
Nimin khan Champhai Higher Secondary School ah Education Counselling Seminar neih a ni.
He hun hi Rev. Lalhleia, FG&CC chu Resource Person a hmangin Counselling Seminar hi neih a ni a. He hunah hian Powerpoint Presentation hmangin zirlai ten zirna kawnga hma an sawn theihna tur leh nun kawng an zawhna tura thil tul pawimawh leh hlawhtling tua rilru put hmang pawimawhna te hrilh hriat niin, zirlai kalkhawmten hlawk thlak an ti hle.

ODF PUANG ANG :

Vawiin chawhnu dar 2 hian DUDO Room, CHANEM Building ah Champhai District ODF Preliminary Declaration neih a ni dawn.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Beisei (Rs. 60.17/litre)
Aizawl-ah motor a chhiat avangin Petrol hi a la rawn thleng thei lo
Diesel    : Free Sale (Rs. 50.20/litre)

MIZOFED LPG (Gas)
(Vawiina an semna hmun)
Vengsang GM Gate

0 comments: