2.910.2016 (thawhtanni)


INDIA TLANGRAM DISTRICT FAI BER 9-NA AH FAINA HAPTA HAWNG :
Cleanliness Week hawnna chu Champhai khawpui huam chhung hmun hrang hrangah Inrinni chawhma dar 10 khan a ruala neih a ni a, a hawnna programme pui ber chu Champhai Kahrawt field-ah Addl. DC Pu C. Lalzarliana hova neih a ni a, DRDA Project Director Pu CC. Lalchhuangkima’n thuchah tawi sawiin faina hnatlang nei tura kalkhawm Head of Office te, Scouts & Guides leh tlawmngaipawl aiawhte chu a vailiam nghal.

Cleanliness Week hawnna inkhawm tawi kaihruaitu Addl. DC Pu C. Lalzarliana chuan hnam changkang leh changkanglo tehna pawimawh tak pakhat chu faina a ni tih sawiin kalkhawmte chu faina kawnga tanla uar zel turin a sawm a.
Thuchah tawi sawitu Pu CC. Lalchhuangkima, DRDA Project Director chuan tunhnaia Champhai District in faina kawnga a hlawhtlinna hrang hrang tarlangin School Sanitation Award dawng tur school thlanchhuah zinga Champhai District chhung ami 13 lai an tel thei te, kum 2015 NSSO Survey-ah pawh Champhai District in tlangram state zinga District fai kawngah pakuanna lai a hauh thei te leh Champhai District chu pawna daikal awm tawhlohna, ODF District ni tura a in peih thu te a sawiin mipui leh sawrkar tanrualnaah lawmthu a sawi a. India Prime Minister thusawi sawi chhawngin Pu CC Lalchhuangkima chuan fai leh fai loh chu sum leh pai neih leh neih lohah a inghat lova, fai kan tum leh tum lohah a innghat zawk a ni tih sawiin Champhai District mipuite chu uar lehzuala fai kawnga hmala turin a sawm bawk.
Pi V. Lalmuanpuii, DUDO chuan Cleanliness Week hman dan tur District Level Cleanliness Committee in a rel dan report a pe a. Week chhung hian anganwadi, school, veng leh office hrang hrangte fai kawnga in elna buatsaih a ni dawn a. Biate leh Khawhai ah chuan veng fai in elna buatsaih a ni dawn bawk. Cleanliness Week puala fai pawimawh zia inzirtirna atan SMS leh drawing competition buatsaih tum niin lawmman hi PHE Department-in an tum dawn a ni. Champhai Kahrawt Field bakah hian Town area chhung hmun dangah Officer-te insem darhin Cleanliness Week hawnna an hmanpui bawk a ni.

CHAMPHAI-AH UPATE NI PUALIN HUN HMANG :
Khawvel Upate Ni pualin Inrinni khan Khawbung MUP Unit te chuan Zawlbukah hun an hmang.
Kum 2016 hian United Nation International Day of Older Persons chuan thupui atan : Upate harsatna hmachhawn (Take a Stand against Ageism) tih a thlang a. Upate harsatna hrang hrang sutkian dan tur leh khawtlangin upate dinhmun an hriat duh tawk loh avanga harsatna thleng chungchangte chu he thupui hian a dun tel bawk a ni. BDO James Lalnithanga chuan Upate Ni hi hmanpuiin ‘Upate chu an kum indelhtir lovin, tih theih an la nei ve a ni tih hria a, kum 120 dam tur anga an ngaihtuahna hmang thiam turin a chah a, chu chuan chakna thar a pek a rin thu a sawi bawk. Upate Ni hmangtu  zinga upa ber Pi Hrangkili hnenah lawmpuina thilpek an hlan a ni.
Champhai MUP Unit hrang hrangte pawhin Upate ni hi Inrinni khan anmhani remchan danin an hmang bawk a. Kahrawt MUP te chuan Mizofed LPG bula an building thar an hawng a, veng hrang hrangah an huamchhung tifaia hnatlang an awm bakah, intihhlimna atan te an hmang a ni.
Inrinni vek khan Vangchhia MUP Unit chuan an din champha lawmna hun hmangin. Tuaisiala Saphai hmuhna hmun Vangchhia rama awm chu tifai in hnatlang an nei a. He hnatlangah hian mi 17 thawkin tlailamah President F. Runneihthanga In ah chawhlui an kil ho nghal bawk. Vangchhia MUP te hi tunah hian member 60 an awm mek.
Melbuk khuaah pawh Inrinni khan MUP Melbuk Unit huaihawtin Upate Ni pualin hun hman a ni a. Zing karah Upa Pawl Member ten khaw chhung kawngpui thenfai hnatlang neiin Chawhma lamah Melbuk Middle School ah hun hman niin chawhnu lamah indiam leh intihhlimna hun buatsaih a ni a, tlaiah chawhlui an kilho nghal bawk.

ZOTLANG LEH VENGSANG IN KANG SA THA :
September ni 29 a Zotlang Pu H. Thangluaia In kang chu Inrinni khan Zotlang kahwtlang chuan hnatlangin an sak that sak.
In hi a hmun ngaiah Assam Type a sak niin feet 36, feet 24 a zaua sak niin hnatlang hian mi 200 vel an thawk chhuak a, Zotlang khaw chhung mi bakah khaw thenawm atangin hnatlang a thawk chhuak thahnem tak an awm bawk. Insakna chak leh bungrua te hi tanpuina sum lut atanga an lei bakah mi thahnem ngaite thawhkhawm ani hlawm a. Kangmei tuarte tanpuina atan hian Zotlang khawtlang chuan vehbur khawnin Rs. 88,940 leh buhfai thahnem tak an hmu a. heng bakah hian bialtu MLA JH Rothuama chuan Rs. 3000 a pe a, Champhai DC Vanlalngaihsaka chuan Rs. 2000 leh Silpauline 2, CC Lalchhuangkima PD, DRDA in Rs. 1000, PC Zonuntluangi`n Rs. 1500, Forest Dept in Rs. 45800, SYMA Champhai in Rs. 2000 an pek bakah Apex Bank , DPC, SSA leh Excise & Narcotics Dept te chuan tanpuina pawisa fai an pe bawk. heng bakah hian Branch YMA leh VC hrang hrang hnen atangin tanpuina Rs. 33,000 a lut bawk a; hriat theih chinah tanpuina lut zawng zawng hi Rs. 1,60,570 a ni tawh.
Zotlang Branch YMA chuan vanduaina an tawh chungchangah tanpuina petu zawng zawng chungah lawmthu an sawi a. Vanduaina an tawh laia Fire Dept Motor tui phur loa kangthelh tura kal anga thu thehdarh a ni chu pawi an tih thu an sawi a. Fire Dept hian an motor pahnihah tui a khata an rawn phurh thu leh kangmei thelh  mittu an nih thu an sawi bawk.
Hetihlai hian a ni thumna atan Champhai Vengsang a Pu C. Pakunga (L) inkang chu Inrinni khan hnatlanga sak leh a ni a, a chung leh a bang chihin a chhuat tih loh chu an zo fel a. In hi Assam Type  chhawng khata sak a ni a, tha 400 chuang sen tawh a ni. Vanduaina tawkte tanpuina atan hian mimal, pawl leh Sawrkar Department atangin pawisa fai Rs. 94,640 vel a lut tawh a, hetah hian Disaster Manangement atanga sum dawn tur erawh a la tel lo thung. Hei bakah hian mi tlawmngaite chuan kawngkhar, thingzai, thingpui bawlhlo, mutbu leh silhfen chi hrang hrang an pe khawm bawk.

MIS ATANGIN MCS :
Champhai DIPRO Neng Thianlala chu MIS atangin MCS ah a tlin thar avangin Serchhip SDC hna chelh tura tih a ni a, tunkar chhung hian a hna thar hi a zawm dawn niin thu dawn a ni.

THISEN AN PE :
Inrinni khan Champhai Zion Veng Branch YMA chuan an din champhaphak vawi 6-na pualin Champhai District Hospital Blood bank ah a mamawh apiangte hman turin thisen an pe a, thisen hi unit 23 pein mipa 19 leh hmeichhia 4 ten an pe a ni. Champhai ZIon Veng Branch hi kum 2010 October ni 2 khan Bethel Branch YMA atangin an indang tan a. An Branch din ni tak October ni 2 kha Pathianni a nih avangin Inrinni khan thisen hi an pe ta a ni. Zion Veng Branch ah hian member 301 awm mekin Section 2 ah an inthen a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 60.51/litre)
Diesel    : Free Sale (Rs. 50.14/litre) 

MIZOFED LPG (Gas)
(Vawiina an semna hmun)
Nil

0 comments: