ni 1.10.2016 (inrinni)

ANALOGUE TIHTAWP A NI TA :
Nizan zanlai dar 12 atang hian Cable TV Digitization phase III huam chhung, Champhai, Khawzawl, Khawhai leh Biate ah zanin dar 12 ah TV Analogue Signal tihtawp ani dawn.

Nimin chawhnu dar 1 khan Pu C. Lalzarliana, Addl. DC & District Nodal Officer chuan a Office Chamber-ah Champhai District chhunga notified town area pali, Cable TV Digitization phase III huam chhung, Champhai, Khawzawl, Khawhai leh Biate ah zanin dar 12 ah TV Analogue Signal tihtawp a nih tur thu? a puang a. District chhunga khaw dang zawng zawng, Phase-IV in a huam te pawh December 31, 2016 atanga Analogue signal tihtawp tur a nih avangin Operators zawng zawng inpeih vek turin a ngen nghal bawk.
Ministry of Information & Broadcasting in Cable TV Digitization a kalpui mek ah hian Phase phase III huangah Champhai District chhunga khaw pali Champhai, Khawzawl, Khawhai leh Biate te a huam a. June ni 28, 2016 a Addl. DC & Nodal Officer hova Cable TV Operator-te meeting-in a rel tawh angin nimin khan Addl. DC & Nodal Officer, Pu C. Lalzarliana chuan zanin dar 12 atanga Analogue signal tihtawp a nih tur thu hi a puang a. Hemi rual hian Phase III in a huamloh thingtlang khuaa operator zawng zawng chu December ni 31 a Analogue signal tihtawp a nih theih nana hma chak taka la turin a ngen bawk.
Analogue signal tihtawp a nih tur thu a puanna ah hian Addl. DC & Nodal Officer hi DI&PRO leh Champhai MJA President bakah Champhaia Cable TV neitu pahnih Pu Lalhmingmawia Pachuau (CCN) leh Pu Vanlalhmuaka (LCN Zokhawpui) te'n an tawiawm a ni.

DAY-NULM QUARTERLY REVIEW :
Nimin chawhma dar 11 khan Champhai DC Conference Hall-ah Addl. DC Pu C. Lalzarliana hovin District Level Committee on DAY-NULM chuan Quarterly Review an nei a, hmalakna hrang hrangte sawi hovin hmalaknate a hlawhtlin lehzual theih nana hmalak dan tur an rel.
District Urban Development Officer Pi V. Lalmuanpuii chuan in ruak luah duh leh luah tur nei te, awmpui mamawh leh awmna tur zawngtute tana hmun remchang tak, City Livelihood Centre chu din fel tep a nih thu Meetingah a report a. HDFC bank in nikum chhunga a interest-subsidy loan a pek chhuah tur a la pe chhuaklo chu thalo a ti in meeting chuan sawrkar hmalakna tawiawm tha turin HDFC bank chu a ngen nghal bawk. Vawiina meetingah hian Shelter for Urban Homeless hnuaia in sakna hmun tur, New Champhai VC ten an veng huam chhungah a thlawna an pe chu lawmawm a tih thu leh in sak hna tan a nih thuai theih nana hmala turin DUDO Office a ruat.
Meeting-ah hian DAY-NULM Social Mobilization & Institution Development (SM&ID) hnuaiah kum 2016-17 chhung hian Self Help Group 70 din tum niin thu leh tunah hian SHG 52 din fel tawh a nih thu tarlan a ni a.
DAY-NLUM SM&ID hnuaia SHG inziaklut tur hian member 6 tal tlin a ngai a, chung zinga 70% tal chu khawpuia cheng mirethei (urban poor) an nih a ngaih avangin SHG hi beisei angin a pung chaklo tih tarlan a ni bawk. Chuvangin vawiina meeting chuan kumin target, SHG 70 din chu tihhlawhtlin ngei a nih theih nan Awareness leh Success Stories uar zawka buatsaih leh Bank-te nena thawhhona tha zawk neih a rawt a.
DAY-NULM hmalakna dang, Support to Urban Street Vendors (SUSV) hnuaiah street vendors 102 ziahluh an nih lain inzawrh theihna hmun hi Champhai khawpui chhungah hmun 56 chauh siam theih a nih avangin Town Vending Committee in uluk zawkin zirchiang se a ti bawk. DAY-NULM hmalakna dang, Self Employment Programme (SEP) hnuaiah interest-subsidy a loan pek turin kum 2016-17 chhung atan mimal 40 leh group enterprise 1 thlan fel tawh a ni bawk.?

IN KANG TANPUI :
Champhai Vengsanga Pu C.Pakunga (fam) in kang chu nimin khan Vengsang khawtlang chuan an sak thatsak.
Niminpiah khan Vengsang khawtlangah chhiat tawk an awm avangin section an hnatlang a, nimin khan khawtlang huapin in sak that hna hi thawh a ni a, Vengsang huam chhunga mite bakah hmun hrang hrang atangin mi tlawmngaite chu hnatlangah hian an tel a ni. In hi assam type chawng hniha sak a ni a, a dung feet 12, a vang feet 24 niin a hma lamah feet 6 an nampuk dawn a ni.
In sakna atan hian Champhai North bialtu MLA Pu TT Zothansanga chuan rangva bundle li a pek bakah, Disaster Management atanga sum lokal tur te, khawtlang leh mi tlawmngai thawhkhawm hmanga sak a ni a, naktuk hian zawhfel theih beisei a ni.
Hetihlai hian Zotlanga Pu Thangluaia te in, niminpiaha bungraw chuh hman lova kangral sakna atan nimin khan Zotlang khawtlang chuan an huam chhungah vehbur an khawn a, nizanah tlawmngai pawl leh khawtlang hruaitute chuan thutkhawm neiin in sak that dan tur hi an rel leh dawn a, nimin khan bungraw senghawi ngai leh tihfel tur tul awmte chu thenawm khawveng leh mi tlawmngaiten an thawk a, hnatlangpui puan ni lo mahse mi 100 chuang zet an thawk chhuak thei a ni.

FAINA BEIHPUI THLAK ZEL :
Mizoram sorkar ruahman angin Swachh Bharat Mission (Gramin) kal tlanga faina beihpui hmalakna hmalakna peng pakhat atan PHE Department leh Tourism Department tangkawp chuan Champhai District chhunga Tourist Lodge 5 (Champhai, Zokhawthar, Hnahlan, Khawbung leh Ngopa) a Tourist Lodge thenfai hnatlang an nei mek.
Niminpiah chawhnu khan sorkar Department 2 tangkawpte chuan Champhai Tourist Lodge Compound thenfai hnatlang hi an nei a. PHE Department lam atangin Superintending Engineer (SE) Er. Lalrammawia leh Executive Engineer Er. K. Zohmingliana leh hnathawktu engemawzat an thawk chhuak a. Tourist Department lam pawh Pu Lalhlimpuia Champhai Tourist Lodge Officer in a ho bawk.
Faina leh thianghlimna kawngah Champhai District chuan chak taka hmala chho zelin, Champhai District chu ODF (Open Defecation Free) ah a inpuang tawh a, State sorkar pawmpuina nghah mek a ni. Tunhnaia Education Department in Mizoram State chhunga School fai 31 a thlan chhuah zingah Champhai District atangin School 13 thlanchhuah a ni.
Hetih lai hian Champhaia veng hrang hrangte pawhin faina an kalpui mek zel a, nimin khan Tlangsam Middle School te chuan Tlangsam khawchhung then fai hna an thawk a, Nilai zing khan Clean Tlangsam Committee te pawhin veng chhung thenfai hna an lo thawk tawh bawk.
Kahrawt khawtlang pawhin nimin khan veng chhung thenfai han an thawk bawk.

CERTIFICATE LA CHHUAK TURTE TANA HRIATTUR :
Certificate lakchhuah chungchanga mipuite hriattur Champhai DC thuchhuah a siam.
Champhai District Deputy Commissioner chuan Common Service Centre/RIK kaltlanga E- Certificate hrang hrang - Tribal Certificate, Residential Certificate, Income Certificate te lakchhuah chungchanga mipuite hriattur, Document thil tel ngai tarlan tawhte chu hetiang hian tihdanglam a ni.
1. Tribal Certificate
a) Voters ID (Original)
b) Birth Certificate (Original)
c) VC leh YMA hriatpuina (Original)
d) Passport Size thlalak 1 (Pakhat)
e) Ration Card (Original)
2. Residential Certificate
a) Voters ID (Original)
b) Birth Certificate (Original)
c) VC leh YMA hriatpuina (Original)
d) Passport Size thlalak 1 (Pakhat)
e) Ration Card (Original)
3. Income Certificate
a) Voters ID (Original)
b) VC leh YMA hriatpuina (Original)
c) Ration  Card (Original)
Certificate hrang hrang dilna a document thil tel tur reng reng hi Original a nih loh chuan pawm theih a ni lo.
Tin, Certificate diltu chu kum 18 hnuailam Electoral Roll a la chuanglo a nih chuan a diltu Nu emaw, Pa emaw Voter's ID hman mai tur a ni.

DANCE JAM ZO ANG :
CCN leh Zonet tangkawpa buatsaih Mizoram Dance Jam 2016 intihsiakna chu zaninah Jam Session  leh Result puanna hun hman a ni ang. Mizoram Dance Jam hi Sept. 19 atanga tan niin intihsiakna hran ghrang neih a ni a, District hrang hrang atangin lamthiam 40 vel an tel a ni. He inelnaa Dance Crew winner hian Rs. 50,000; Dance Solo Winner Rs. 10,000 leh Dance Battle a winner ten Rs. 3000 an hlawh dawn a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 60.51/litre)
Diesel    : Free Sale (Rs. 50.14/litre) 

0 comments: