ni 12.10.2016 (Nilaini)


NGUR BRANCH YMA IN VANGPUI KUT HMANG :
Ngur Branch YMA te chuan ni hnih chhun gawh tur Vangpui kut an hmang mek.
Thawhtanni atang khan Ngur Branch YMA chuan nihnih awh tur Vangpui Kut an hmang tan a, chawhma lamah an veng chhung thenfai hna an thawk a, chawhnu lamah YMA Section inelna an nei a, zanah Section intihsiakna hrang hrang neih niin, member boral ta te sunna hun hman a ni bawk.

Nimin khan Outdoor Programme hmang hun an hmang chhunzawm a, chawhma lamah Cultural Club leh RLES naupangte hnen atangin hnamlam mawi tak tak thlirho a ni a, chawhnu lamah intihsiakna neih chhunzawm lehnghal a ni. Nizan khan Ngur Community Hall ah hun hman leh a ni a, Section hrang hrang ten intihsiakna an nei.
Vawiin hian Vangpui Kut hi hman chhunzawm leh ani ang a, Cultural Club leh naupang ten lam an entir dawn a. Zanin hian Ngur Branch YMA Vangpui Kut chu a tawp khar a ni dawn a. he hunah hian mi tlawmngai HSLC leh a chunglam pass te , Kum 80 chunglam ruihtheih thil, zuk leh hmuam tilo te hnenah chawimawina hlan ani ang a, Result puangin lawmman sem in a chhunzawm ang a, Kut hi a tiak tawh ang.

KHAWBUNG BIAK IN LUNGPHUM PHUM :

Khawbung khaw din kum leh Khawbung a Chanchin Tha luh kum 1903 atanga a kum 113 na nimin zing khan Pathian Veng-a Khawbung Kohhran Biak In thar tur lungphum chu Bialtu Pastor Lalhunliana Royte chuan a phum.
Tuipuiral Kristian hmasa ber laitawia Baptisma chan kum 1903 hi Khawbunga Chanchin Tha luh kuma dah a ni a. Sailo Lal Lalbika chuan Pathian thuawih chu veng hlawm khatah dahin Pathian Thuawih Veng tih a ni thin a, hun a lo  kal zel a, Pathian Veng tia sawi zui zel a ni. Tuna Khawbung khaw hmuna an insawm hnuah pawh an awmna Veng chu Pathian Veng tih chhunzawm zel ani a. Biak In pawh tun thlengin Pathian Veng tlang bawkah a la ding zel ani.
Nimin zinga Biak In lungphum phuman hun h iUpa Thanghlira`n kaihruaiin Rev. Lalhunlianan Royte chuan Biak In sak thar tur chu Pathian ropui nan leh a ram zau nan te, a miten thlarauva an inpawlna hmun atan leh thlarauva riltamten chaw an dawnna hmun a lo nih theihnan Biak In lungphum hi a phum a ni.

TLANGSAM YMA TEN TIAU LUI HUMHALH :
Tlangsam Branch YMA chuan tunlai hian an ram chhunga Sangha fuan ngawrh takin an veng mek.
Tlangsam branch YMA Executive Meeting in a lo rel tawh bawhzuiin tunlai hian Tlangsam Branch YMA chuan an ram chhung Tiau luiah Sangha fuan an veng mek a, Section then hrang hrang ten hun insemin Tiau luiah hian an inriah chhawk a. Tlangsam branch YMA chuan an ram chhung luia nungchate October thla chhung hian hmanrua engpawh hmanga man leh tihhlum khap tlatin mipui te hnenah ngenna pawh an lo chhuah tawh a, nungcha man leh tihlum lui an man te chu an chungah na taka Action an lak tur thu an sawi bawk. Tiau luia Sangha leh nungcha dang hmun tur mumal awm tawh lo chu humhalh a nih atangin Len leh nghakuai hmang pawha man tur a awm chho tan tawh chu lawmawm an tih thu sawiin nungcha humhalh kawnga thawhpui turin Champhai mipuite an ngen bawk.

PANDAL SA MEK ZEL :
Zoram Daniel Pawl Chhantu Seventhday Adventist Kohhran Inkhawmpui thleng turin New Champhaiah Pandal sak mek a ni.
Zoram Daniel Pawl Chhantu Seventhday Adventist Kohhran Inkhawmpui Vawi 45-na hi November ni 3 atanga ni 6 chhungin Champhai Daniel Pawl Chhantu chuan a thleng dawn a. Khawmpui hi Champhai Biak a Kohhran hrang hrang 25 ten an inthlen tawm dawn a. Pandal hi New Champhai Field ah hnatlanga sak mek niin hnatlang hi vawi 4 nei tawhin Bial Huapa hnatlang hi neih a ni a. Nimin lam atang khan Kohhran hrang hrangte chuan a inchhawkin hnatlang hi an nei tawh dawn a ni. Pandal hi  avang Feet 90, a dung feet 150 a zaua sak tur niin, Budget atan cheng nuai 2 leh sing 3 ruahman niin Kohhran hrang ten an intum sem bakah hmunpui lam atangin khawmpui tanpuina an dawng bawk a. Tun tum Daniel Pawl Chhantu Inkhawmpui hi Champhaiin a thlen vawi thumna tur  ani.

HNATLANGIN KAWNG SIAM THA :
Nimin khan Mizoram Trcuk Drivers` Assn. Sub-Hqrs. Champhai te chuan Champhai leh Zokhawthar inkar kawng siamin hnatlang an nei a. kawng hi World Bank suma siam mek ni mahse bungraw phurtu truct tan zawh harsa khawpa a chhiat avangin hantlangin an siam a. Hnatlangte hian kawng chhe zual lai an hnawh bakah kawnga leivung te an thianfai bawk.

VC TEN AN RAL :
Nizam hmasa khan Champhai Jt VC te chuan September ni 24 a tui tla, nunna chan Lalbiakfela leh Lalngaihkima te unau ralna hun an hmang.
Tlangsam VEC ten MGNREGS sum hmanga Community Farm Pond an siama nunna chan ta Pu VL Ruatkima fate pahnih Lalbiakfela kum 7 leh lalngaihkima kum 5 te chu an chenna  In Tlangsamah ralna hun an hmang a. Champhai Joint VC te hian ralna Rs. 15,000 an hlan.

RE-UNION NEI DAWN :
Kum 1985-a GM High School a kalte chuan vawiin hian Re-union an nei dawn a. Tukin zing dar 10 atang hian Govt. GM H/S ah Programme hmangin, chawhnu dar 2 atangin Forest Dept. Rest House ah intihhlumna hun an hmang zui ang a, zanriah an kilho nghal ang. he hun hmang tur hian hemi kuma zirlai lo ni tawh zawng zawngte an sawm a ni.

VAWIIN DINHMUN :

MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Tanky Full (Rs. 60.63/litre)
Diesel    : Free Sale (Rs. 50.22/litre) 

0 comments: