ni 13.10.2016 (ningani)


GRASSROOT FOOTBALL TOURNAMENT HAWNNA HUN HMANG :
Nimin chawhma dar 10:00 am khan SSA Tata Trust Grassroot Football Tournament hawnna Chhangphut Field ah neih a ni.

He hunah hian Pi K. Lalsiamliani DPC, SSA Champhai District-in kaihruaiin he tournament-a kick-off nei tura sawm Pu Lalnunmawia Principal Govt. Champhai College leh Pu C. Lalbiakzauva SDEO ten an rawn tel pui chu lawmawm a tih thu a sawi a. Pu Lalzahawma Varte Co-ordinator District Project Office, SSA Champhai District in report tawi pe in, tuna SSA Tata Trust Grassroot Football Academy ah hian centre hrang hrang atanga rawn riak lut school naupang 195 an awm thu a tarlang a.
Pu Lalnunmawia Principal Govt. Champhai College in thusawiin tournament-a tel naupang te chu India rama player langsar te zingah an hming a lang thei a ni tih sawiin. Thil ti tha peih tak tak tan kawng a awm thu sawiin SSA leh Tata Trust tangkawpin football tournament an buatsaih thei chu fakin kick-off a nei a ni.

VANGPUI DAY HMAN CHHUNZAWM :
Nimin khan Ngur branch YMA Te chuan Vangpui kut hman chhunzawm lehin Pu C Vanlalhmuaka'n khuallian niin a hmanpui
Nimina Vangpui Kut hmanna programme hi Pu K Lalhmangaihtluanga Br.secretary in a kaihruai a, Khuallian Pu C Vanlalhmuaka chuan thusawiin Ngur branch YMA hruaitute thahnemngaihna leh an thawhrimna  chu ropui a tih thu sawiin khawtlang inlungrual tak hmel  a hmuhin lawmawm a tih thu a sawi bawk. Ngur khuaa Vangpui kut kan hman ho na hian khawtlang ah lungrualna leh in hmangaihna, tlawmngaihna leh hnam nun ze mawitak a par vul zual zel a beisei thu a sawiin Ngur khua in an duh sakna a theihnghilh ngai dawn loh thu a sawi bawk.Khualian hian kut hlutpuina leh hriat reng nan dekhi bel a hlanin
Vang pui kut hlim taka hmang zel tur in duh sak na a hlan bawk.
Nimin khan cultural club leh  naupang hnen atangin lam mawi tak tak entir  ani a, Pu PC Vanlalrawna SYMA Secretary  kutpa hnen atang thusawi ngaihthlak niin tlailamah ruai kilho nghal ani.
Nimin hian Ngur khuaiin Vangpui Kut an hman hi a tiak ang a, He hun hi Pu Lalbiakchhuanga Br.president chuan akaihruai anga, thupui Tlawmngaihna tih chu CT Ruma' hnen atang ngaihthlak ani anga,mi tlawmngai leh  HSLC leh  achunglam pass Te,kum 80 chunglam ruihtheih Thil,zuk leh  hmuam tilo Te hnen ah chawimawina hlan ani a anga, result puan leh  lawmman sem in a chhunzawm ang.

NLUP SEM CHHUNZAWM :
Nimin khan Hliappui Community Hall-ah leh Ngopa Community Hall-ah NLUP-a, Bawng vulh thlangtute hnenah 3rd & 4th Phase 2nd installment sem a ni.
Hliappuiah Community Hall-ah hian khaw pathuma NLUP bawngvulh thlangtu Beneficiaries 93 te hnenah sem a ni a, Hliappuiah chhungkaw 87, Saichal leh Kawlkulh Taitawkawna chhungkaw 3 ve ve te hnenah sem a ni a, chhungkaw khat tan Rs 36,000 theuh sem niin Cheng 33,48,000 sem ral a ni.
Nimin chawhnu dar 2:30 khan Ngopa Committy Hall ah pawh sem niin beneficiaries 47 te hnenah Cheng 36,000 theuha sem niin Cheng 16,92,000 sem ral a ni a. Ngopaah chhung 1, Mimbungah chhungkaw 3, NE Khawdungsei leh Chiahpuiah chhungkaw 1 ve ve, Kawlbemah chhungkaw 28 leh Teikhanga chhungkaw 13 te hnenah sem a ni bawk.

RE UNION NEI :
Nimin khan Govt GM High School-a kum 1985 Bagde te chuan GM High School-ah re-union an nei.
He hun hi Session thumah then niin First Session hi Pu Lalhmachhuana Zofa in kaihhruaiin Pu Lalhmingmawia hnen atangin report ngaihthlak niin Pu Lalbuatsaiha Principal Govt GM High School hnen atangin thusawi ngaihthlak a ni bawk. He hunah hian Kum 1985-a GM High School-a zirtirtu thawk te, Office staff leh zirlai boral ta te sunna hun hman anih bakah Kum 1985-a GM High School a zirtirtu leh Office lama thawk te hnenah chawimawina hlan an ni bawk.
Second Session hi Pu F Lalrinmuana'n kaihruaiin Pu Ramchuana, Pu Lalbuatsaiha leh chawimawina hlan leh zirtirtute atang bakah 1985 a zirlaite atangin thusawi ngaihthlak ani a, he hun hi Pu Zormawia Ralte chuan lawmthusawiin a khar a ni.
Third Session hi 1985-a zirlaite tan bik Forest Rest House-ah hun hman niin Pu R Vanlalhmuaka'n a kaihruai a, hun hlimawm tak hmangin chawhlui an kilho nghal a ni.

ODF AH CHAMPHAI DISTRICT PUAN A NI TA :
Champhai District a khawpui bik Champhai, Khawzawl, Khawhai leh Biate ah te  chu ek in ni lova inthiar awm tawh lohnaah (Open Defecation Free) puan (final declaration) a ni ta.
Champhai District a khawpui pali a ek  in ni lova inthiarna awm tawh lohna thu puan lailawkna hi ni 23.10.2016 khan neih a ni tawh a. ODF kaihhruaina dan in a phut ang in he puan lai lawkna atanga ni 15  chhungin sawisel duh nei tan hun hawn a ni a. Ni 15 chhung hian tumahin pawna an ek thu emaw pawna inthiar an awm thu emaw an sawi loh avangin vawiin, 12.10.2016 khan Champhai District Urban Development Officer  Pi V. Lalmuanpuii chuan Champhai District a khawpui pali Champhai, Khawzawl, Khawhai leh Biate te chu ek in ni lova inthiarna awm tawh lohna hmun (Open Defacation Free Area) ah a puang chiang ta a ni. ODF Final Declaration hnuah hian State level atangin a endiktu tur (third party monitoring) an rawn tir leh ang a. Sorkar laipuiin an pawm hunah Official a puan leh tur a ni ang.  Champhai  District hi Mizoram a ODF a in puang hmasa ber an ni.

RS 32,000 SEM :
Champhai District AH & Vety Department chuan Thawhtan chhun dar 12:00 khan Vety Dispensary atangin Khawzawl Distribution huamchhunga NLUP 3rd. & 4th. Phase hnuaia Hill Cattle leh Mithun Trade thlangtute hnenah tanpuina 2nd. Installment Rs.32,000/- an sem chhuak.
Tanpuina dawngtute Khawzawl, Tualte, Chawngtlai, Aiduzawl, Rabung, Neihdawn, Ngaizawl, Tualpui, Chalrang leh Sialhawk khuate atangin an vaiin min 42 an ni a, tanpuina sem chhuahna hi Champhai Dr. Lalchungnunga Pudaite in a rawn hmanpui a ni.
NLUP First, Second, Third leh Fourth hnuaia AH & Vety Department  Trade hrang hrang thlangtute chuan Champhai District-ah hlawhtlinna an hmu chho mek zel a, a hlawhtling ber a ngaih Vawk vulhtuten PRRS natna vanga harsatna an tawh nasat viau laiin Hill Cattle leh Mithun (Sial) ah te erawh chuan hmasawnna nasa takin a kal chho mek zel a. Sial phei chu Champhai District-ah NLUP Beneficiaries ten an vulh pung nasa hle a, Bawng vulhtute pawh an Bawnghnute thar chhuah a pung nasa hle a. Kan Correspondent in NLUP Beneficiaries thenkhat an dinhmun a zawh kualnaah NLUP an hlawhtlinpui thu leh Department a thawkten an harsatna tawh hrang hranga inpe zo taka an puih thinnaah te lawmthu an sawi hlawm a ni.

KHAPNA THUPEK CHHUAH :
Champhai District Magistrate Pu Vanlalngaihsaka IAS, chuan Champhai District huam chhung kawngpuiah Motor lian ke paruk aia tam nei mipui nitin mamawh phur si lo reng reng tlan khapna thupek a chhuah.
Thupek a tih chuaha tarlan anih danin Kumin hian Mizoram-in Fur ruah tui kan dawn tam em avangin Champhai District huam chhunga kawngpuite chu hmun tam takah a chhiain, lirthei kal velin harsatna an tawk mek a.
Kan kawngpuite hi dimdawi zawka hman a nih loh chuan mipuiin nitin eibar leh chakkhai lak kawngah harsatna namen lo tawk thei reng dinhmunah kan ding mek avangin District Magistrate Champhai District chuan Sec. 144 CrPc in thuneihna a pek angin, a hnuaia mi ang hian khapna thupek a chhuah.
Champhai District huam chhung kawngpui khawiah mah Motor lian ke paruk aia tam nei mipui nitin mamawh phur si lo reng reng tlan khap tlat a ni.
He thupek bawhchhia chu IRC Sec 188 hmanga hrem an ni ang. He khapna thupek hian chhuah a nih atanga thlahnih chhung a huam dawn a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Tanky Full (Rs. 60.63/litre)
Diesel    : Free Sale (Rs. 50.22/litre) 

0 comments: