ni 22.10.2016 (inrinni)


CT LALHMINGLIANA HRIATRENGNA HUN HMANG :
181 Bn. BSF te chuan ral kuta boral CT Lalhmingliana Lusai, Champhai Zotlang, hriatrenga hun Ruantlang Middle School ah an hmang.

Ruantlang Middle School hi CT Lalhmingliana Lusai school kalna hnuhnung ber anih avangin chawimawina hun hi hman a ni a, Ruantlang Middle school ah hian Pawl 6 pass in Kum 1973 ah BSF zawmin 1993 Jamu & Kashmir a indo naah ral lakah a boral a, vawiin hian BSF 181 Bn. te chuan Martar CT Lalhmingliana Lusai School kalna hnuhnung berah hriatrenga hun hi an rawn hmang a ni. 
He hun hi Dr. Lalrokhawma Dy. Commandant BSF 181 Bn. chuan kaihruaiin PC Lalsiampuii MPS, OC Champhai Police Station chuan thusawiin mihring dam rei zawng hi kan kum tam lam ni loin he khawvela kan awm chhunga kan thiltih te hi a ni a, kum tam tak pawh dam mah ila, thil tha kan tih loh chuan kan boral a kan liam mai a ni a ti a. Zirlai naupang kalkhawmte chu an rilru siam fel a thil engnge maw mai mai a inti buai lova, tum mumal fel tak neia lehkha zirtura chahin zirlai tibahlah thei leh rilru ti chak lo tu ruihhlo laka in thiar fihlim tura chah bawkim ram tana mi tangkai tak ni theuh turin a sawm bawk a ni.
He huanh hian  CT Lalhmingliana Lusai chhungte hnen atanga thusawi ngaihthlak a ni bawk. CT Lalhmingliana Lusai hriatrengna leh sunna lungphun Dr. Lalrokhawma Dy. Commandant chuan hawngin Ruantlang Middle School zirlai naupangte'n National Anthem sa in, hnam lam cheraw mawi takin an entir bawk.
He hunah hian BSF 181 Bn. te chuan Ruantlang middle school hnenah Volleyball leh Football pe in Zirlai naupangte hnenah Lehkhabu leh pen an pe theuh bawk.

COMMEMORATION DAY 2016  HUN HMANG :
India ram hmun dangte hman rualin tukin khan Champhai District Police chuan Additional SP Pu VL Lura Hauzel kaihhruaiin Commemoration Day 2016 hi Champhai Police Station-ah urhsun takin an hmang.  
Champhai District chhung bikah ram tana nun hlantu Police 10 te hriat reng nan heng Police-ten lehkha anlo  zir tawhna School theuhah hian District Police Officer-te kalin vawiin khan anmahni pualin urhsun taka hun hman a ni.   
October 21,  1959 a China sipaiten Ladakh Police Post an lak a,  China sipaiten India Police 9 an kahhlumte hriat rengna atan he Commemoration Day hi India ram pumah kumtin hman turin rel a ni a.  Tukin zing pawh hian 1.9.2015 atanga 31.82016 inkar chhunga India ram Reserve Police boral (ram tana nun hlantu) mi 471 te hriatrengnan rampumah a rualin urhsun tak a hman a ni a. Vanneih thlak takin he hun tarlan chhung hian Mizoram Police zingah nunna chan an awm lo thung a ni.
Ram leh hnam tana hna an thawhna hmuna Police thi te hriatrengna, sunna leh zahna hun, Commemoration Day chu India ram hmundang rualin Khawzawlah pawh vawiin khan urhsun takin hman a ni.
Nimin dar 8:00 khan Commemoration Day pual hian 2nd. I.R. Battalion chuan Headquarters Office Compound thlang tualzawlah hun an hmang a. 2nd. I.R. Battalion Commandant Pu Ngurdingliana Sailo, MPS hova Commemoration Day puala hun hmanah hian an hnathawhnaa boral Police 471 te zahna hun hmangin ngawi rengin Minute 1 an ding a, Silai vawi 3 an kap a, hemi hnu hian Police Martar te Thlanah Commandant hovin I.R. Battalion hotuten pangpar an dah a ni.
Chawhnu dar 1:30 khan Govt. Khawzawl College-ah nikum March ni 28 a Zokhawthiang daia HPC (D) helten MLA bial fang an lambunnaa nunna chan Police 3 zinga tel, S.I. Zoramthara Khawlhring hriatrengna hun hman a ni bawk a. A School luhna hluia S.I. Zoramthara hriatrengna hun hman hi Govt. H/S Khawzawl Headmaster i/C Pu H. Lianruaia'n a kaihruai a, Khawzawl SDPO Pu F. Bulliana'n ram leh hnam tana nun hlan S.I. Zoramthara Khawlhring puala hun hman a ni chu ropui a tih thu sawiin he huna tel zirlaite chu S.I. Zoramthara hnung zui a, ram leh hnam tana mi tangkai ni theuh turin a chah a. S.I. Zoramthara pa Pu K. Hrangnawna pawhin a fa chanchinte sawiin a vanduaina an tawh tuma an fapa vui hun tur Central YMA in an rawn ruatsak te leh Khawzawl Group YMA hnuaia YMA Branch hrang hrangte a ruang hmuak tura an pung khawm te chu an chhungkua in ropui an tih thu leh an lawm thu a sawi a, Govt. H/S Headmaster Pu H. Lianruaia pawhin an School-a a kan lai chanchinte sawiin Zirna Ina a kal tawh loh hnua English Grammer thiam tak tak tuma a hranpaa Coaching a kal leh te chu entawntlak a tih thu a sawi ve bawk. He hunah hian S.I. Zoramthara sunna'n ngawi rengin Minute 1 an ding a, Govt. H/S zirlaite atangin Solo leh zaipawl zaite ngaihthlak a ni bawk. Vawiina hun hman hi S.I. Zoramthara nu leh pa leh unaute bakah Khawzawl Police ten an tel pui a ni.

TUI BILL HMU THA :
PHED Khawzawl WATSAN Division chuan Tui Bill atangin Sawrkar kum liam ta khan cheng nuai 113 chuang hmu-in Sawrkar kum kal mekah thla hlui September thla thleng khan cheng nuai 55 chuang an hmu tawh bawk.
PHED Khawzawl WATSAN Division huamchhungah hian WATSAN Sub-Division 3 - Khawzawl, Saitual leh Ngopa WATSAN Sub-Division te a awm a. Sawrkar kum liam ta khan Khawzawl WATSAN Sub-Division hnuaia Tui Connection 1648 atangin sum Rs.60,53,105 hmuin, Saitual WATSAN Sub-Division  a Tui Connection 984 atangin Rs.29,52,414 leh Ngopa WATSAN Sub-Division huamchhunga Tui Connection 612 atangin Rs.23,00,083 hmuh a ni a, kum 2015-2016 chhung khan PHED Khawzawl WATSAN Division huamchhungah Tui Connection 3244 atangin Rs. 1,13,05,602 hmuh a ni.
Sawrkar kum kal mekah thla hlui September thla thleng khan Khawzawl Sub-Division huamchhunga Tui Connection 1682 atangin Rs.3049947 hmuh a ni a, Saitual Sub-Division a Tui Connection 1034 atangin Rs.1456009 leh Ngopa Sub-Division a Tui Connection 620 atangin Rs.1636465, a vaiin tui connection 3336 atangin Rs.55,42,421 hmuh a ni tawh a ni.

KHAWZAWL JOINT VC TE RAM HUMHALH FANG :
Khawzawl Joint VC  Member te chuan Thawhlehni khan an ram humhalh, Chehzum ram an fang.
Khawzawl Joint VC  Member-te hian sathang chi hrang hrang kam 20 chuang sut a ni a, thangkamtute hi tute nge an nih hriat ala ni rih lova, Joint VC te hian chhui zui mekin hriat chhuah an nih chuan an chungah Action na takin an la dawn a ni. Khawzawl Joint VC te chuan an ram humhalh Chehzum ram chhungah hian Sathang eng chi mah kam an phal lova, ramvah, thinglak, mei hawl rawh thlengin an khap tlat a, hei hi hriatpui a, venpui turin Khawzawl leh Khaw chhehvel mipuite an ngen a ni.

NAUPANG SUTU ZAWNG :
Nilaini zing dar 7:00 vela Zuchhip venga naupang kum 6 mi Lalthanpuia S/o Ramnunsanga, Bike a sutu chu Khawzawl Police ten an la zawng mek.
Lalthanpuia hi Khawzawlah enkawl mek niin a hliamte na hlawm viau mahse a dinhmun erawh hlauhthawnawm tawh lem lo niin thu dawn a ni. Nimin piah zing khan Lalthanpuia hi kawng sira a awm lai Bike pakhat in a su a, Bike khalhtu hian bawihsawm lovin naupang hi a tlansan nghal a. Lalthanpuia hi a ha bal bakah a lu-ah leh a khel leh a mal ah te hliam a nei a, a khel ruh a tliak niin thudawn a ni a, Aizawl lama inenkawl tur in Khawzawl Doctor ten rawn mahse an kal thei rih lo a ni. 
Khawzawl Police te chuan misual hi vawiin lam thleng khan ngawrh takin an zawng zui zel a ni.
Khawzawl Mipui Aw whatsapp group te chuan nizan khan Ramnunsanga Zuchhip 
veng, Khawzawl bike in a sut vangin a malpui ruh a tliak chu tanpuina an hlan Ni 19 zing dar 7 vel khan Lalthanpuia (kum  s/o Ramnunsanga Zuchhip veng, Khawzawl chu bike in a sut vangin a malpui ruh a tliak a. Aizawl lam refer anih hnuin chhungkaw lam harsatna vangin an kal thei lova, Champhai lam panpui a nih hnu in, a malpui ruh a tliah avangin  Aizawl lamah refer leh a ni ta si a,  Khawzawl Mipui Aw whatsapp group te chuan nizan khan ?anpui nan ? 2000/- an hlan. 
A sutu bike hi a tlan tlang avangin an la hre mai thei lo nghe nghe. FIR thehluh a ni. Khawzawl Mipui Aw group te hian Khawzawl leh Tuichang inkar kawng chhe lutuk siam ?hain an lo hnatlang tawh bawk a ni.

ZION VENG VC TE INSIAM REM :
Champhai Zion Veng VC te chu in form tha in Congress VC in ro an rel tawh dawn.
Zion Veng hian VC panga neiin VC inthlan ah khan MNF in VC 1, ZNP in VC pakhat leh Independent in VC pakhat neiin MNF in rorelna vawng an vuanin Congress in VC pahnih an nei thung a. ZNP VC hian Congress a zawm tak avangin Congress hian rorelna fawng an vuan ve thung tawh dawn a. VCP ah Pu S Lalruatsanga awmin Vice President-ah Pu PB Lalchenpuia a awm a, Treasurer-ah Pu T Lawmkima a awm bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 62.26/litre)
Diesel    : Free Sale (Rs. 52.88/litre) 

FIRE  OFFICE : (03831)234106

0 comments: