ni 26.10.2016 (nilaini)


SE,PWD DAH TURIN SAWRKAR-AH THLEN DAWN :
Kawng hrang a District hmasawnna thlithlaitu leh viltu (Distriict Development & Monitoring Committee) chu Co- Chairman Pu Ronald Sapa Tlau MP (RS) kaihhruaina-in nimin khan Champhai DC Conference Hall-ah neih a niin, Champhai District chhunga MLA 5 zingah Pu Lalrinliana Sailo, Pu TT. Zothansanga, Pu JH. Rothuama leh Pu T. Sangkunga te an tel a. He thutkhawmah hian thutkhawm hnuhnung bera thudah thlirletna neih anih rualin, tih hlawhtlin anih dan pawh thlirlet hmasak a ni.
Kumin chhunga thutkhawm vawi 2-na vawiin a neihah hian sorkar Department 30 zet-ten thla 3 chhunga Champhai District hmasawnna kawng hrang hrang an thawh dan leh hmachhawp an neihte thlirho anih bakah hmasawnna rahbite tha zawk leh mipui tana chhawr na-awm zawk a kalpui anih theihna tura rawtnate tarlan a ni bawk.
Champhai DRDA hnuaiah 2016-2017 chhungin MGNREGA Job Card kawltu mi 28231 tan ni 6 inhlawhna siamsak anih tawh thu tarlan a ni.
PHE Department chuan a huamchhunga mipui in tur tuilak hna khaw 10 a thawh mek chu tun sorkar kum chhunga zawhfel theih an beisei thu leh Champhai District chhung tuihna dinhmun an zirchianna-ah kum 15 chhunga Tuihna kiam dan chu 15% anih thu an sawi.
Health & Family Welfare Department chuan Champhai District chhungah kumin sorkar kum chhunga (IMR Infant Mortality Rate) Naupang thizat chu 24 anih thu leh Nu Nauchunga thi Mother Mortality Rate)zat chu 1 anih thu tarlan a ni a. Khuangthing, Vangchhia, Zawngtetui leh Buang khuaah tunah hian Health Worker staff an awm rih loh thu dawn tel a ni.
Champhai District chhungah Eng pek lohna khua a awm loh thu P&E Department chuan sawilangin, Saikhum phai (khawper) chu engpek tura hmalak mek anih thu leh Champhai Vengthar huama Veng pakhat chu eng pek turin hmalak mek anih thu tarlan a ni bawk.
Social Welfare Department atangin Champhai District chhungah Tar pension hamthatna dawng mektu zing atangin m 37 an boral thu leh hnawh khah lehna tur buaipui mek anih thu tarlan a ni.
Khawchhak tlangdunga inkal pawhna kawngpui dinhmun a that leh xual theihna tur leh tha zawk a enkawl anih theih nan Champhai District-ah PWD Eastern Circle SE awm thei se tha tih aniin sorkarah rawtna thlen tura tih a ni

SAWRKAR HMALAKNA THLIRHO :
Nimin khan Champhai Deputy Commission hovin D.C Conference hall-ah Champhai District chhunga sawrkar hmalakna hrang hrang sawi ho na neih a ni a. Media Cell, I&PR/NIB te nen a hmuna kala en ho nise tih Department hrang hrang sawrkar Officer ten an rel.
DC Champhai, Pu Vanlalngaihsaka chuan Chief Media Offficer leh Media Team ten Champhai an chamchilh lai hian, Deppt. hmasawnna leh hmalakna hrang hrangte a hmunah enpui nise heng an thlalak leh deppt. hmalakna te chu mipui hriat ah puanzar nise tih a sawi.
Pu David L.Thangliana, Chief Media Officer chuan, sawrkarin theihtawpin sawrkar sum hmangin hma lak a nih laiin puanzar a ni thin lo chu, mipuiin an hriat ngei theihnan department zawng zawng hian mawh kan phur a, ti tha te chu an chawimawia, ti tha duhlo te pawhin tan an lak nan thawh-ho a pawimawh a, chumi atan chuan District tinah beihpui thlak a tul a tih thu a sawi.
Media Team hian niminpiah leh nimin khan Project hrang hrang an tlawh bakah naktuk atangin Zirtawpni thleng District hotute nen tlawh ho zel an tum bawk a ni.

CHAMPHAI POLICE LEH VDP THAWHHO DAN TUR SAWIHO :
Nimin khan Champhai Police buatsaihin Champhai Police Station Ceonference hall ah Champhai District chhunga VDP te nen meeting neih a ni.
He meeting ah hian Champhai District chhunga khaw 50 a VDP te kohkhawm niin, he meeting hi Vanlalzawni, DSP (Hqrs) chuan kaihruaiin VDP te chu ram leh khawtlang venhim kawnga Police kaihza vengtu an ni tih hrethar turin a chah a, kan thil hriat te Police hrilh hriaa thawhhona tha tak kan neih a ngai a ni, a ti bawk.
Khuallian Thomas Lalrammawia, Judicial Magistrate 1st Class, CJM Charge la mektu chuan thusawiin, VDP te hi Police thachhang dawltu pawimawh tak an ni a. Champhai bikah phei chuan Police te an indaihlo em em a, sual dona kawnga Police kuta kan nghah ringawt chuan kan him tawk zo lo mai thei. Chuvang chuan VDP te hi sual dona kawngah kan pawimawh em em a ni, a ti a. Sawiselna tam tak karah theihtawp chhuaha kan kal a ngai a hna tha kan thawh chuan sawiselna hi kan pumpelh dawn lova, a rah sengtu tur chu kan nupui fanaute leh ram hi a ni tih kan hriata theihtawp kan chhuah a ngai a ni, a ti. Kan chet lak kawngah Dan hi kan zah a ngai a, dan hnuaiah sual do hna kan thawh loh chuan thiam kan chang dawn lova, dan hi kan zah a, dan hrulah mai nilovin dan hnuaiah sual kan do tur a ni, a ti bawk.
Addl. SP VL Lura Hauzel Champhai SP Charge la mektu pawhin Mizoram Sawrkar Police, Excise leh YMA ten ruihhlo do beihpui thlak turin thuthlukna an lo siam tawh a. Sawrkarin tihtak zetin sual a do dawn tih a sawi a. VDP te nen thawh hona tha tak an nei a nih chuan kan ram sualna hi a ziaawm ngei a beisei tih a sawi a. Sual kan dona kawnga Dan ang taka kan chet thin loh avangin Court ah thiam loh kan chang fo thin a, dan hmaa thiam kan chan theihna turin dan hnuaiah chet kan lak a ngai a ni, a ti bawk.
SDPO Lalringliana Pachuau pawhin thu sawiin, Champhai chu Ramri hrula awm kan nih avangin ruihhlo dona kawngah kan tanho lehzual a ngai a ni, a ti a. VDP kalkhawmte chu thawhhona tha tak neihpuiah a sawm nghal bawk. Nimin meeting ah hian Sawrkarin VDP ten Ruihhlo dona kawnga an senso atan pawisa leh hmanrua a pek te sem nghal a ni a. VDP te thawh that dan a zirin tanpuina pek belh theih a ni dawn tih tarlan a ni bawk.

2ND DIVISION FOOTBALL :
2nd Division Club te tana buatsaih Vanbawia hriatrengna Football Tournament chu nimin khan Chhangphut Field ah khelh tan a ni a. Nimin khan Match 4 khelh niin, result :
Zotlang 1-1 Vengthlang
Vengthar 1-0 New Champhai
Police 7-0 Venglai
Nimin inkhelah hian Ruantlang tan C. Zonunmawia`n Goal 3 khungin he tournament a match khata goal 3 khung hmasa ber a ni. Vawiin a inkhel tur te :
Vengthlang N Vs Tlangsam
Kanan Vs Venglai
Electric Vs Dinthar
Vengthar Vs Vengthlang

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 62.26/litre)
Diesel    : Service Tanky (Rs. 52.88/litre) 

FIRE  OFFICE : 
(03831)234026

0 comments: