ni 4.10.2016 (thawhlehni)


VENGTHLANG PRESBYTERIAN KOHHRAN IN TANPUINA HLAN :
Champhai Vengthlang Presbyterian Kohhran chuan YMA Sub-Hqrs. Champhai hnuaia Kumpuan Committee hnenah nimin zing khan tanpuina sum Rs. 20,000 a hlan.

YMA Sub-Hqrs. Champhai in Ruihhlo Do na kawnga chak leh zuala hma a lak theihna tur leh an kaihza tha tihchakna tura tanpuina sum inhlanna hi Sub-Hqrs. YMA Office (Tlangrawt) ah neih a ni a. He hun hi Kumpuan Sub-Comt. Chairman F. Lalrinmuana chuan kaihruaiin, he hunah hian Champhai Vengthlang Kohhran Bialtu Pastor Vanlalruata Ralte chuan Ruihhlo hi ram leh hnam hmelma a nih paihlamah mimal nun chhunglam leh pawnlam thleng pawh a tichhe theitu a ni, a ti a. Ruihhlo Dona kawngah leh khawtlang siamthatna kawngah Kohhran pawhin mawhphurhna thuk tak a nei tih hria in, Champhai Vengthlang Kohhran chuan RUihhlo Dotu YMA Sub-Hqrs. Champhai Kutah phal takin tanpuina hi a a hlan tih a tarlan bakah, YMA hmalakna chu an thlawp tlat thu leh puihbawm an tul hun apiangah inthlahrung lo turin a chah bawk.
Tanpuina Rs. 20,000 Upa C. Keikhuma`n YMA Sub-Hqrs. Champhai hnenah a hlan chu President C. Lalbiakzauva`n dawngin, YMA Kumpuan kaltlanga Ram leh hnam hmelma Ruihhlo Dotute kutke tichak tura Champhai Vengthlang Presbyterian Kohhranin tanpuina a hlan chu lawmawm a tih thu C. Lalbiakzauva chuan a sawi a. Sum parlawrna atana RUihhlo hmangtute leh ruihhlo in a bual at mekte thianfai turin YMA chuan tha leh zung a thawh theih rualin chethlakna tura sum leh pai tam tak senso ngai a nih thu a sawi a. YMA in sum dehchhuahna hranpa a neih loh thu leh mi tlawmngai leh hmangchang hriate tanpuina thilpek hmangin ram leh hnam tan ke a pen thin a ni, a ti.
YMA Sub-Hqrs. Champhai hnuaia Kumpuan Committee hian kumin June thla atang khan Ruihhlo Do beihpui a thlak tan a. Champhai khawpui leh a chheh velah RUihhlo ngai mi 100 chuang an awm mek thu leh hmun dang atanga ruihhlo tlantu mi 50 chuang an awm mek thu YMA Sub-Hqrs. hruaitute hnen atanga dawn ani. Ruihhlo ngai/titute tihrem (Demand Reduction) hmanga hmalak hmasak niin, Ruihhlo tawlhtute lakah beihpui thlak chhunzawm a nih tur thu dawn ani bawk.
YMA Sub-Hqrs. Champhai kumpuan Squad te hian Heroin Can 10 chuang, Chhinsen 15 leh Ganja Kg 42 an man tawh bakah RUihhlo kaihhnawih a man mi 4 te chu thuneitute hnenah an hlan tawh bawk. Ruihhlo Dotu Squad ten chak zawk leh awmze nei  zawka hma an lak theih nan Sawrkar dan leh thupek kawngkawhtute atangin zirtirna tha tak pek an ni a. YMA Kumpuan Squad te hian Police leh Excise te nen inpawh tlang takin hma an la thin a. YMA Sub-Hqrs. Champhai huamchhunga YMA Branch 118 uaptu Group YMA 8 ah Ruihhlo Dotu Squad hi dinfel vek tawhin, chak taka hmalak chhoh mek a ni.

TAN TLANG HUMHALHTU PAWL THUKHAWM :
Inrinni khan Tan tlang humhalhtu Coordination Committee te chu YMA Run, Vaphaiah an thukhawm.
He hunah hian dan an siam bakah hmalakan tur hran ghrangte an rel bawk. Tan tlang  huamchhungah hian Thingzai tur kit an awm chuan kung khat zelah Rs. 5000 chawi tirin, an thingzai leh hmanrua zawng zawng laksak an nih tur thu te; Tuahthing leh hmanraw dang atana thing late pawh Rs. 5000 chawi tirin an thing lak ang laksak ni se,  tih te rel a ni a.
Pangpar leh ramhmul dang la chu pakhat zelah Rs. 200 zel an chawi ang a, Sava that chu Sava pakhat thahah Rs. 500 zel chawitir an ni bawk ang. Ramsa eng pawh Thang hmanga awk, kap a tihlum chu pakhat that manah Rs. 2000 chawitir a, Forest Dept ah report an ni bawk ang. Tan tlang huamchhunga Lung la chu Cubic khat emaw, Boulder pakhat zelah Rs. 50 zel chawitir an ni ang a. kangmei tichhuaktu chu Rs. 5000 chawitir an ni ang a. A tul angin Forest Dept. ah report an ni bawk ang. 
Heng bakah hian Developmet Work leh khawtlang pawimawha humhalh chhunga lung la duhte chuan Coordination Committee leh a khaw neitute VC phalna an la hmasa phawt ang a, phalsak an ni ang, tih thu leh dan bawhchhia an awm a nih chuan a mantu khuaten Coordination Comt hmingin man an nih rualin Action an la nghal zel ang tih te an rel bawk.

NGOPA RAMA LUI HUMHALH ZEL DAWN :
Jt. Ngopa chuan khauh zawkin luidung a nungcha humhalh kawngah hma an la dawn.
Kum danga an lo tih thin ang bawkin luidung nungcha humhalh kawngah Jt YMA Ngopa (YMA Ngopa Branch, Ngopa Chhimveng Branch, Ngopa Hmarveng Branch) chuan chak takin hma a la chho leh dawn a. Ngopa ram chhung lui leh a dintu lui reng rengah leh Khawdang nena lui an intawm TUiphal luiah Sangha fuan hunlai leh a no than len chhoh hunlai Oct ni 1 atanga APril ni 30 thleng eng hmang maha Sangha man phal ani lo tih thuchhuah siamin an tarlang a. Tumah Sangha manlui lo tur leh a venghimtu ni theuh turin Joint YMA Ngopa chuan Zoram mipui an ngen a. Man phal hun chhung pawhin Len den hmang chauhin Sangha hi man phal a ni. Khap hun chhunga manlui an awma, man an nih chuan an chungah na taka Action lak a nih tur thu an sawi bawk. Mipui te chu dan bawhchhetu ni lo va, venghimtu ni theuh turin an ngen bawk.

LIRTHEI NEITE TAN :
District Transport Office, CHamphaia Mazi Cab, Taxi, Auto Rickshaw Permit leh Counter Agents Licence dil ten a rang lama ngaihven tur a ni a. Auto Richshaw Registration ti tur ten kawngkhar ding lam chhuah theih loha kalh sa bawk tur a ni tih thu kan dawng.

KAWNG SIAM THA :
Khawzawl leh Tuichang inkar kawng chhe lutuk chu nimin khan hnatlangin siam that hna thawh a ni.
Khawzawl leh TUichang inkar kawng, hun rei tak siamthat tawh loh, khawchhak tlangdung zin mite leh chak lakluhna kawng pawimawh ber siam thain nimin khan Khawzawl Mipui Aw Whatsapp Group Member leh kawng chhe ngaimawh mi engemaw zat an hnatlang a. An member zinga mi thahnemngaiten sum leh pai thawhkhawmin Boulder lung an lei a, JCB thawhchhuahpui an awm bawk. An siamthat lai hi Tuisenphai kawngpui a ni a, Khawzawl mipui Aw Group chuan he an thil tih hi tumahin POlitics a inchirhtheihna atan hmang lo turin an ngen bawk a. Khua leh Tui thaten an tih tur ti maiah an inngai thu an sawi.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 60.51/litre)
Diesel    : Free Sale (Rs. 50.14/litre) 

0 comments: