ni 1.11.2016 (thawhlehni)


RAN VULH THA TE HNENAH CHAWIMAWINA HLAN :
Nimin chawhnu khan Champhai AH & Vety Department chuan Champhai khawpui chhung ranvulh kawnga hmala tha leh mi hlawhtlingte chawimawina Farmers' Award 2016 chu Government Champhai College Seminar Hall-ah a nei.

He Farmers' Award hlanna hun hi Vetenary Officer Dr. TC. Lalthanzauva'n a kaihruai a.  Vetenary Officer Dr. Lalrintluanga chuan Power Point Presentation hmangin Sa ei tura kan intodelh theihna tura Mizoram State AH & Vety Department in Mizoram chhung hmun hrang hrang,  Thenzawl a Ran chaw sawngbawlna hmunte, Tanhril a Ar vulhna leh a inthlanpunna hmun a hmalak anih dan te,  Selesih a Ran inthlan punna tura ranchi lak dan te a lem nen tarlanna a nei.
He hunah hian MJA Chamhai District President Pu C. Lalhnunpuia chuan Sa a Mizoram intodelh tura AH & Vety Department hmalakna-ah mipuiten kan tawiawm atul thu leh ranvulh leh enkawl kawngah nasa zawka tan kan lak atul thu sawiin, ram mipui tla khawp thar chhuak tura ran vulh tura ke pen chhuah a tul thu a sawi a. Government Champhai College Principal Pu Lalnunmawia pawhin lehkhathiamlo kuthnathawk aiin lehkhathiam kuthnathawkin rahtha a thlen thin thu leh zirlaiten sorkar hna ngawt thawh tuma riltu pe lovin ranvulh kawngah lehkhathiamten hmathar la turin a fuih bawk.
Ran eitura mipuite kan intodelh theihna tura mipuite cho chhuahna leh an rilru helam kawnga kaiharhtu anih beiseiin AH & Vety Department chuan helam kawnga mi hlawhtlingte chawimawi leh phochhuah annih theihna tura Champhai AH & Vety in lawmman a siam : Ran vulh a mi hlawhting bik 3 thlanchhuahte leh  ranvulh a titha zual mi 5 te hnena  lawmman siam leh Ranvulh a mi hlawhtling thei ber tura beisei hnenah MJA Champhai District President Pu C. Lalhnunpuia chuan lawmman a hlan a.
Govenment Champhai College Principal Pu Lalnunmawia chuan Ranvulh kawnga Government Champhai College zirlaite thu in ziah siaka titha zirlai 3 te leh Slogan Writing Competition a titha bik zirlai 3 te hnenah lawmman a sem bawk.
Farmers Award hi Pu Chawngchhuana Champhai Vengthlang hnenah hlan niin Pahnihnaah KT Dengthuama Tlangsam thlan a ni a, Pathumnaah Pu R Mawisanga Kahrawt thlan niin Consolation prize Pu PCBiakdika, Kahrawt, Pu C Lalruatliana New Champhai, Pu H Lalrinzuala Vengsang, Pi Lalngairengi Vengthlang, Pu Lalmuanpuia Venglai leh Pu Lalchhuangliana Zote te hnenah hlan ani a. 
Ranvulh kawnga essay inziah siakah Lalchhankimi 5th Semester chu pakhatna a ni a, Kenedy Remruatsanga 3rdSemester chu pahnihna niin Lathakima 5th Semester chu pathumna a ni bawk. Slogan in phuah siakah  Mandawntingi 5th Semester chu pakhatna a ni a, Vanlalmalsawma 3rd Semester chu pahnihna niin  Malsawmtluangi Chhangte 5th semester chu pathumna a ni bawk. 

NATIONAL UNITY DAY HMANG :
India ram hmun dang rualin nimin zing khan National Unity Day pualin Champhaiah Unity Run buatsaih a ni.
Champhai High School 7 thlan bikte chuan tukin khan Kahrawt Field, Venglai leh Bethel Kawn atangin Unity Run hi an nei a, Chhangphut field-ah intawkkhawmin he ni pual hian hun hman a ni a. Pu C Lalbiakzauva SDEO Champhai chuan kaihhruaiin thusawitu Pu C.Rodala, DEO & DPC, RMSA chuan he ni hman chhan Sadar Vallabhbhai Patel-a chanchin a chhiar thhuak a, zalenna sual laia mi pawimawh ber te zinga mi a nih bakah, India a inpumkhatna tura thawh hlawk ber a ni a, a ti a, Sadar Vallabhbhai Patel hian Gandhi-a hnathawhte chu chhunzawmin a theih ang angin a awmnaah loneitu pawlte a din a, British rorelna chu theihtawpin a dodal a, India hminga Home Minister leh Deputy Prime Minister hmasa ber a nih thu te tarlangin, a hnathawh avang hian Iron Man of India leh, Patron Saint of India Civl Service tia tih a ni thin a, All India Services din chhuahna tura bultumtu a nih thu te a sawi tel bawk a ni.
DEO chuan Sadar Vallabhbhai Patel-a khan India ram zalen hnua ram bung hrang hrang 565 te chu ram pakhata an inchhunkhawm theihna turin theihtawpin hma a la a, India sorkarah lungawi takin a inchhunluh theih phah a, hei vang hian a piancham pualin National Unity Day hi hman a ni tiin a sawi.

BHARAT SCOUTS & GUIDES DISTRICT MEETING :
Nimin khan Champhai District Bharat Scouts & Guides District Executive meeting neih a ni.
He meeting hi District Sports & Youth Office VANISH Building-a neih hi Pu C Rodala District Chief Commissioner chuan kaihhruain Pu Lalngilneia Colney District Secretary hnena atangin report ngaihthlak ani bawk. He meeting-ah hian District Council  hruaitu thlanna neih niin thlan chhuah te hi State quarters-ah hriatir leh ani ang a, State Executive member-a ruat tharte appoinment pe turin State Chief Commissioner hnenah ngenna thlen nise an ti a. Commissioner atana appoint tharte lakluh hun tur leh One day Introductory course neih hun tur chungchang pawh sawiho niin State Hwadquarters in commissioner Course an neih hunah District Office lamin a hun leh ni tur te ruahhman na siam se tih ani bawk. Hei bakah hian Unit leader ta Refresher Course neih nise, a hun leh ni ruahman chu District Office kuatah dah a ni a, Camp fire nei tura ruahmanna awm tawh chu remchang hmasa berah neih nise an ti bawk.

QUARTER FINAL CHHUNZAWM :
Nimin khan Vanbawiha hriatrengna Football Tournament chu Quarterfinal thawhkhatna khelh zawh a ni.
Quarterfinal match hmasa berah hian Zotlang FC in Electric FC 5-3 in an hneh a. Inkhel vawihnihnaah Vengthlang FC in 4-1 in Ruantlang an hneh bawk.
Vawiin hian Quarterfinal thawh hnihna khelh chhunzawm leh a ni ang a, Chawhma dar 11:00 ah FC Tlangsam leh Police FC an inkhel ang a, Chawhnu dar 1:00 ah Kahrawt FC leh Kanan FC te an inkhel bawk ang.

RUIHHLO MAN ZAT :
Champhai Excise & Narcotics hian kumin January - September chhungin Rak Zu  Litre 1939.470 an man tawh.
Rak zu bakah hian Zu bilhlai Tin 1023,  Dawidim Gram 169,  ram dang siam Beer Bottle 22,  Cane Beer 923,  Zu bilhna Bel 134 leh Lirthei 4 an man a. MLPC hnuaia mihring man zat 69 niin,  MLPC hnuaiah thubuai 119 ziahluh a ni a.  Heroin Gram 174.650 man anih bakah  Ganja Gram 940 man a ni a.  ND & PS Act hnuaiah mi 86 man an niin,  thubuai 48 ziahluh a ni bawk.
Champhai District-ah District Session Judge a la awm loh avangin Heroin gram 5 aia tam man thubuai hi Aizawl District Session Court-ah thawn thlak zel a ngaih bakah thubuai rip deuh dang pawh Champhai District Court- a ngaihtuah theih anih loh vangin Aizawl lamah thawn thlak zel a ni a. Hei hian Sorkar dan leh thupek keng kawhtute leh hriatpuite tan harsatna a thlen thin bakah kal velna senso-ah sum tam tak sen belh thin a niin, sorkar pawhin sum thahnem tak ba a neih pah a ni.

BUHSENG KHAILAK :
Champhai zawlah ruahsur vangin buhseng a khailak mek.
Champhai zawla lo neitute chuan ruahsur avangin an buhseng a khaihlak mek a, lo neitu thenkhatte pawl tla tawh mahse, a tam zawk chuan buh hi an la seng zo lova, buhzai tawh te chuan ruah a sur avangin buh an vaw thei lova, buh phal te ruahin a nan vang leh Bial chhungah tui a tlin avangin buh phal te tui tlin lohnaah senghawi a ngaih bakah nisaa pho ro leh te a ngaih avangin buh te a hun takah seng theih a ni dawn ta lo a ni. Hetih lai hian buh hmin tawh leh zai hun tawh tak tak te pawhin a hun takah buh an zai thei lo bawk a, buh lo zai tawh te ai chuan an harsatna tawh hi a ziaawm deuh tura ngaih a ni

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 62.26/litre)
Diesel    : Free Sale (Rs. 52.88/litre) 

FIRE  OFFICE : 
(03831)234026

0 comments: