ni 14.11.2016 (thawhtanni)


PAWISA AIAWH LEHKHA THEM COUPON HMANG :
Pawisa note Rs. 500 leh 1000 tlang thi avangin thingtlanga dawrkaite leh anmahni dawrtute chuan lei leh hralh chungchangah an harsatna sukiang turin hmun thenkhatah pawisa aiawh lehkha them (coupon) an hmang.
Mizoram khawchhak tlangdung, khaw 25 awmna Khawbung RD Block huam chhungah chuan Rs. 500 leh Rs. 1000 thih avangin harsatna lian tham sawi tur tawk lo mahse, mimal anga Rs. 500 leh Rs. 1000 note kawl reng chu him lova ngaiin an mamawhte lei turin Rs. 500 leh Rs. 1000 note an keng deuh zel a. Hemi avang hian
Inrinni atang khan dawrkariten pawisa nawi kir tur tlachham tanin dawrkai thenkhat chuan pawisa aiawh lehkha them0a a pawisa kir tur hlutzawng ziakin anmahni dawrtute an kir a. He lehkha pawisa hmang hian dawr ngai vekah thil leituten an mamawh an lam leh mai thin a ni. hetianga lehkha pawisa hman hi thingtlan gkhaw lian lovah chuan mihring an inriatchian avangin thil remchang tak a ni a. Dawrkaiten pawisa nawi dawn an neih remchan hunah a mamawh zual chu pawisa pangngai vekin an inkir leh mai a ni.
Khawbung RD Block huam chhungah hian Mizoram Rural Bank 2- Khawbung leh Bungzungah a awm a. Khaw inkarkik tak tak a nih hlawm avangin khaw thenkhat atang chuan anmahni khuaa dawrkaite chu an pawisa thlengna ber an ni a. Heng dawrkaite hian Rural Bank ah thlen glehin emaw, an account ah te an dah lut ve zel mai ani.

MINISTER IN ZOTLANG STADIUM TLAWH :
Inrinni zing khan Champhai a cham mek Sports Minister Zodintluanga chuan Zotlang Sports Stadium chu a tlawh.
Minister hi V. Lalmuanpuii, DUDO bakah Sawrkar mi pawimawh ten an tawiawm a, Zotlanga Sports Stadium sak mek chu hnathawh kawngah hmasawnna hmuh tur zawl zel cdhu lawmawm a tih thu a sawi a. Khua  a that loh avanga hnathawh sawt theih lo chu khua a that chhoh chuan hnathawh pawh sawt zawka a kal a beisei thu a sawi bawk.
Zotlang Sports Stadium hi Rs. nuai 2238.69 senga sak niin thla 12 chhunga zo fel tura ruahman ni mahse rokhawlhna thil avangin a hun takah zawh fel theih a ni lova. He Stadium ah hian Football khelhna tur Synthetic Turf chu phah zawh fel thawkhat tawh a ni a. Galery mi 3500 leng tur leh VIP thutna tur mi 100 leng pawh siam zawh tawh niin Running Track Lane riat Sunthetic Track a siam tur chu buaipui mek ani bawk. He Stadium ah hian Boxing Hall Sqm 400 a zau, Players` room mipa leh hmeichhe tan bika siam sqm 61 a zau, Two Wheelers 200 park theihna, LMV 50 park theihna tur bakah mipa leh hmeichhe inthiarna tur 4 ve ve siam a ni bawk. Minister hian Zotlang VC in inhmun nei lote tana inhmun an theh sak te a thlir bawk.

INTER HIGH SCHOOL QUIZ DRAW FEL :
CCN leh RMSA te buatsaih tur Champhai District Inter High School Quiz 2016 neih turah tie draw neih fel a ni.
Zirtawpni kalta zan khan CCN Office ah naktuk Thawhlehni a he Quiz neih tur chungchangah hian Organiser leh Guide teacher te chuan meeting an nei a, quiz kalphung tur an inhrilhfiah nghal a ni. District Inter High School Quiz 2016 ah hian School 17 atangin team 33 an tel dawn a, North Khawbung High School, Holy School High School, Bethel High School. Bethel Mission School, PES Zotlang, PES Khawzawl, Vengsang High School, BC Academy, Ruantlang High School, R. Hranga High School, Tlangsam High School, St. Joseph, Venglai Secondary School, Far East Experimental School, GM High School leh Einstein te chuan team hnih theuh an thawh a, Champhai High School atangin team khat an tel dawn bawk.
Pool A ah School tin Team 1 leh Champhai High School te an awm ang nga, Pool B ah team 2 te awmin, tunkar hian First ROund hi zawhfel tuma nia. Pool tina point hmu sang 8 te chuan Second ROund an lut dawn a ni.

EXCISE REPORT :
October thla chhung khan Champhai Excise & Narcotics Dept te chuan ND&PS Act. hnuaiah thubuai 14 ziaklutin mi 14 an man.
Excise & Narcotics Dept te hian October thla chhung kha MLPC Act hnuaiah thubuai 11 ziaklutin mi 16 an man a. Rakzu litre 226.400 an man a, Fermented Rice Gram 136 manin Zu bilhna hmanrua bel 13 leh Beer Caned 35 an man a. Heroin Gram 90.455 manin ND&PS Act hnuaiah thubuai 14 ziak lutin mi 14 an man bawk.

AN LO HAW :
Inter District Women Championship Aizawla neih zawh taka Champion zo ta lo Champhai hmeichhe team te chuan Inrinni tlai khan Champhai an lo thleng.
Tarlan tawh angin Champhai District aiawha kal Zotlang FC Women Team te hian Finalah Serchhip nen inkhelin Penalty Shootout ah vanduaiin 2-na an ni a, final a an bitum Serchhip ah hian Serchhip District a mi ni lo, Mizoram Player hmun hrang hrang a mi an khel nual a, Zotlang FC te hian an hneh zo ta lo niin sawi a ni. Champhai District aiawha kalte hi Champhai North Bialtu MLA TT Zothansanga`n chawhlui a buatsaihsak a CDFA leh Zotlang FC hruaitute an lawm hle.

LOK ADALAT DAY :
Champhai District Legal Service Authoruty chuan Inrinni khan District Court ah National Lok Adalat Day an hmang.
Lok Adalat hi loan rul tha lo leh thil dang Court a thubuai siam kher lova a chinfel dan leh inremna neih dan kawng ngaihtuahna a ni a. Inrinni khan State Bank leh Mizoram Rural Bank atanga Loan la, harsatna hrang hranga avanga loan rual tha thei lo te nen inremsiamna runpui neih niin Case 77 inremsiamna neihpui an ni a, heta tang hian sum fai Rs. 41,92,472 hmuhlet a ni. Hei bakah hian inthenawm khawvenna te, chhungkua a harsatna nei, Court thlengkher lova inremsiamna Lok Adalat chu neih a ni bawk a, hetah hian case pahnihte chu  inremsiamna an siampui bawk niin thu dawn a ni.

SOUTH BIALTU MLA IN OFFICE HAWNG :
Cheng nuaih 148.58 seng a sak Superintending Engineer Office, PHED (WATSAN) Circle, Champhai chu ni 11.11.2016 (Zirtawpni) zing dar 8:30 khan NLUP Implementing Board Chairman Pu JH Rothuama’n a hawng a, he hun hi PHE Department changtu Minister Pu Zodintluanga’n a hmanpui a ni.
Hawnna thu sawitu Pu JH Rothuama chuan PHE Department changtu Minister leh Department a thawktute tan lakna avangin PHED chuan nasa takin hma a sawn a, NLUP Implementing Board te nen pawh tanghova tuihna humhalh kawngah nasa taka hma lak anih avangin a rah pawh a tha zawngin hmuh tur a awm tan mek ani a ti a, hetiang bawk hian Sawrkar Department dang zawng zawngte pawhin an phak tawk chin a tan an lak a tula a hriat thu a sawi bawk. Superintending Engineer Office building changtlung tak neih ani ta chu lawmawm atih thu sawiin Champhai khawpui leh a chheh vel ten tui thianghlim hnianghnar zawka an hmuh theihna tura innghahna ngam anih a mipuiten rinna an nghahna hmun nise a duhthu a sawi bawk a ni.
PHE Department changtu Minister Pu Zodintluanga pawhin thu sawiin tun kum 7 kalta chhunga PHE Department in hma a sawn nasat zia a hmuhin PHED a thawktute thawhhona tha leh inlungrualna bakah anmahni changtu Minister te an thawhpui thiam vang ani tih hai rual a nilo a ti a, Saiha water Supply Scheme leh Lawngtlai Water Supply Scheme te chu zawhfel ani thawkhat tawh a, Saitual, Khawzawl, Bairabi leh Bilkhawthlir Water Supply Scheme te pawh chak taka thawh mek a nia , heng bakah hian khaw tenau zawk engemawzatah tui pekna mumal zawk siam ani tawh bawk ani a ti bawk.
Superintending Engineer Office, PHED (WATSAN) Circle, Champhai hi New Champhaiah sak niin a sakna atan hian Rs. Nuaih 148.58 sen a ni a, a satu contractor hi Pu Vanhnuaithanga, Tuikhuahtlang, Aizawl niin July ni 7, 2012 atanga sak tan a ni a, June ni 26, 2015 ah sak zawhfel a ni. A building pumpui zau zawng hi 573.34 square metre niin Basement floor 258.88 square metre a zau leh Ground Floor 314.46 square metre a zau a awm a ni.
Superintending Engineer Office hawnna ah hian PHED Engineer-in-Chief Er. Lalmuanzova, Chamohai District Bawrhsap Pu Vanlalngaihsaka, IAS bakah Aizawl leh Champhai atang official thahnemtak an tel a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 63.34/litre)
Diesel    : Free Sale (Rs. 53.86/litre) 

FIRE  OFFICE : 
(03831)234026

0 comments: