ni 2.11.2016 (nilaini)


CEMENT MISTIRI TRAINING BUATSAIH A NI :
Central YMA, LE & IT leh Mizoram Building & Other Construction Workers Board buatsaih, Champhai thla khat chhung awh tur Cement Mistiri Training chu nimin khan hawn a ni.

Training hawnna inkhawm hi C. Lalbiakzauva, YMA Sub-Hqrs. President chuan a kaihhruai a. KhuallianVanlalngaihsaka, Champhai DC chuan thusawiin, YMA in kumpuanah ram leh hnam humhalh a puang a, he kumpuanah hian mi tu pawhin mawhphurhna kan nei a. Kan intodelh loh chuan ram leh hnam humhalh kawngah hma kan sawnthei lovang,a ti a. Intodelhna tur chuan ei leh bar zawnna kawngah thiamna kan puakchhuah a ngai a ni, a ti.
DC chuan Mizorama Cement hna tam zawk chu Vaiin an thawk a, hetihlai hian Mizo kan intofelhna tura YMA in hma a lakna avanga Mizo Mistiri kan pung zel chu a lawmawm hle tih a sawi a. Thiamna pu darh turin training a tel te a chah bakah inngaihtlawmna nen lo chuan engmah a thiam theih loh a, tlawmna nun nena zir turin a fuih a. Cememnt Mistiri hna chu hna tlawm a ni lo tih sawiin an zir tur chu mimal, chhungkua leh khawtlang tan ni mai lovin Mizo hnam tan a ni tih hre reng turin a chah bawk.
Jeffrey L. Fanai, CEC Member, Central YMA  pawhin thusawiin training hi ram leh hnam humhalhna kawnga intodelhna tura siam a ni a. Cement, Aluminuim leh Glaze tile lamah te a tahtawlin training hi buatsaih a nih thu te, Cement ah mi 700 chuang an training chhuah tawh thu leh phaia sum luangral thin venna a nih a beisei tih a sawi a. Mistiri ni tur chuan dawhtheihna a pawimawh tih a tarlang bawk.
Cement Mistiri Training hi Central YMA hian a lo buatsaih tawh thin a. Kumin hian YMA Sub-Hqrs. ngenna angin YMA Sub-Hqrs. tinah mi 100 theuh tan training hi kalpui tan ani. Champhai ah chuan thuthmun Branch leh Group hrang hranga Branch tinah mi 2 zel koh an ni a. CYMA hnuaia Cement Mistiri Training chhuak tawh mi pathumin zirtirna an pe dawn a ni.

INKHAWMPUI TURA INBUATSAIHNA :
Zoram Danial Pawl Chhantu Inkhawmpui vawi 45-na Champhai in a thlen tura Pandal sak hna chu zawh fel thawkhat a ni ta.
Seventh Day Adventist Zoram Danial Pawl Chhantu Inkhawmpui hi Champhai Bialin a thleng dawn a, Kohhran 25 ten an inthlen tawm dawn a ni. Inkhawmpui Pandal hi New Champhai Field ah sak a ni a, Central YMA Structure hman niin a dung Feet 150 leh avang Feet 90 a zau niin mi 2500 bawr vel leng tura ruahman a ni a, Pandal sakna atan hian Rs. nuai 2 Budget siam niin tunah hian Pandal sak hna hi zawh thawkhat tawh a ni a, pandal cheimawi hna an thawh chhunzawm leh dawn a ni.
Inkhawmpui Sub Committee hrang hrang 7 te tan avaiin Rs. nuai 7.5 vel Budget ruahman ani bawk a. Budget hi Champhai Biala Kohhran hrang hrang 25 ten an intum sem bakah Danial Pawlin an tum then ve bawk a ni. Hriat theih chinah Mizoram hmun hrang hrang atangin palai 1500 vel inkhawmpui hmang turin an in report tawh a. Inkhawmpui palai te hi Pandal hnaih veng 7 Vengthlang, Venglai, Electric, Bethel, Tlangsam, New Champhai leh Zote ah te thlen tur tum niin, YMA Branch hrang hrangte hnenah ngenna an siam tawh bawk a ni.
Zoram Danial Pawl Chhantu Inkhawmpui hi Champhaiin vawi thum a thlenna tur niin, inkhawmpui thlengtu tur Kohhran hrang hrangte pawh an phur tlang hle a. Pandal sak leh pandal chhehvel cheimawi hian ainchhawkin Kohhran te an hnatlang thina ni.

SPECIAL EXAM :
Kum 2016 a HSLC (Special Exam) Fail tawhte tan MBSE chuan Special Exam a buatsaih leh dawn a. Champhai District tan Exam Centre, Govt. GM HS-ah 9.11.2016 thelngin Form Fill Up theih a ni e. Fail Marksheet, Admit Card Xerox, Registration No., Passport size thlalak 2 leh Exam Fee Rs. 760. Hre chiang duh tan Ph. No : 9612062695 ah leh 9612322334 ah te zawhfiah theih a ni ang.

INTER HIGH SCHOOL QUIZ :
CCN leh RMSA te tangkawpa buatsaih tur Champhai District Inter High School Quiz 2016 a tel tum team 28 an awm tawh.
District Inter High School Quiz 2016 hi tun thla ni 15 atanga neih tan tur a ni a, School pakhat atangin Team hnih tel theih niin, vawiin thlengin tel tum hi team 28 an awm tawh a, School hrang hrang hnena Form sem chhuah chu a la luhbelh zel bawk a ni. He Quiz intihsiakna hi CCN chuan tan atanga a tawp thlengin LIVE in a pe chhuak thin dawn a ni.

DAN BAWHCHHIA :
Champhai Traffic Police te chuan October thla chhung khan Lirthei dan bawhchhia 191 an man.
Lirthei dan bawhchhia an man zingah hian Two Wheelers tam berin 98 man an ni a, an pawisa chawi tlingkhawm hi Rs. 13,900 a ni a. Ke pali neiin dawtin dan bawhchhia 76 man an ni a, an pawisa chawi tlingkhawm hi Rs. 14,400 a ni. Heng bakah hian Ke pathum nei 17 man niin an pawisa chawi tlingkhawm hi Rs. 2800 a ni bawk. Lirthei dan bawhchhia an man 191 te pawisa chawi tlingkhawm hi a vaiin Rs. 31,100 a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 62.26/litre)
Diesel    : Service Tanky (Rs. 52.88/litre) 

FIRE  OFFICE : 
(03831)234026

0 comments: