ni 23.11.2016 (nilaini)


CHAMPHAI THALAI PAWL TE THUKHAWM :
Ni 22.11.2016 (Thawhlehni) zan dar 7 khan Champhai Thalai Pawl te Vengthlang YMA Run-ah thukhawmin Champhai a Polytechnic Building sak zawh tawh tun thleng a la function loh leh Damdawi In chungchanga thawhtu indaih loh chungchang an sawi ho.
He meeting ah hian Tlangsam a Sawrkar laipui Ministry of Human Resource Development (MHRD) in  Rs. 12,30,00,000 a pek atanga Polytechnic Building sak zawh tawh tun thleng a Mizoram Sawrkar in a la kalpui theih loh chu kal pui vat a nih theihnan Mizoram Sawrkar-ah ngen nise an ti a.

Damdawi In a thawktu indaih lohna nasa tak avanga mipuiten harsatna kan tawh mek chungchang sawiin kan Damdawi In hi District khat chauhin kan hman a ni lo a, khawchhak lam unaute thlengin Damdawi In hi an rawn pan avangin thawhtuten nasa takin harsatna an tawk mek a. Champhai District chu District dang nena khaikhin chi a nih loh thu leh kalkawng a thui a vangin hmunpui lam pan tur pawhin harsatna tam tak mipuiten an lo tawk tawh a. Nunna hial chan an awm thu an sawi a ni. Heng harsatna te hi Mizoram Sawrkar-ah thlen phawt nise, mawzia a awm loh a nih chuan ngaihtuahna thar hman leh nise an ti.
Champhai Thalai Pawl chuan District dangten Sawrkar an nawr anga nawr hi kan thiam ve tho a, mahse hemi thlenglo tur hian theihtawp a hmalak hmasak phawt nise an ti.
Tunah hian District Hospital Champhai ah hian Doctor 11 an awm mek a, District thenkhatah Doctor 34 an awm chung pawha an lungawi loh laia Champhai Doctor 11 chiah kan nei hi a lungchhiat thlak hle. 

BANK-IN PAWISA NOTE AN KAWL MEUH TAWH LO :
Tun thla November ni 8 atanga pawisa tihthih a nih tak hnuah insingsakna a kal chho mek zel a, Champhai khawpui chhungah pawisa vang chuan zual lam a pan chho mek.
Rs. 500 leh Rs. 1000 a thih hnuah Rs. 2000 thar chuan Champhai a rawn thleng a, pawisa note thar hi Bank hrang hrangte chuan an pe chhuak mek a. Champhai a Bank 5 zingah chuan tun dinhmunah nei lo an awm rih lova, Bank tam zawk erawh chuan an nghei lek lek thung. Pawisa thi hi Rs. 100, Rs. 50 leh Rs. 20 a thleng ani tlangpui a, hei vang hian bank hrang hrangte chuan kar hmasa leh tunkar chhungin Rs. 100, Rs. 50 leh Rs. 20 hi an pe chhuak nasa hle a. Bank atang hian lak tur a awm mumal tawh lo a ni.
Canara bank chuan heng pawisa hi a note pangngai a nei tawh lova, a thir (coin) in Rs. 10 erawh an la kawl thung. IDBI chuan Rs. 2000 tih loh pawisa note an kawl tawh lova, pawisa thir nen an pe chhuak tawh a. HDFC bank chuan pawisa note hi la kawl kim mahse an ngah tawh loh thu sawiin, a pek chhuahna tur apiangah an pe chhuak a. Apek Bank chuan Rs. 2000 tih loh chu pawisa note ankawl tawh lova, Mizoram Rural Bank pawhin Rs. 2000 bak chu a note in an kawl tawh lo.
State Bank of India chuan Rs. 50 tih loh chu an la kawl kim a, pawisa hi Account atanga la chhuak turte tan ni khatah Rs. 24000 chin hnuailam an pe chhuak a ni. pawisa nawi hi mipui hnena pek chhuah deuh vek ani a, bank ahhian pawisa nawi hi vang mah se mipui lamah erawh a tam rin a ni thung a. A hmangtu turin apek chhuah dan chuan heng pawisa nawi lengvak hi a tam leh tam loh hi a hril thui hle dawn niin Bank a thawkte chuan an sawi.
Hetihlai hian Rs. 500 leh Rs. 1000 note thlengna atan bank tam zawkah Rs. 2000 note thar leh pawisa thir chauh a awm tawh a, pawisa hi a rawn thlen belh lo a nih chuan pawisa thleng kawngah harsatna thleng thei a ni thung. Pawisa indaih lohna avang hian nimin thleng khan ATM te chu hawn lohvin a la awm reng hlawm a ni.

PASTOR THLAHNA THLASIK INKHELH TAN :
Nimin chawhnu dar hnih khan Chhaktiang Badminton Club buatsaih Pastor Lalparchhuana thlahlna Thlasik inkhelh chu tan a ni.
Chaktiang Badminton Club-te hian an Sr. Adviser Vengsang bialtu Pastor kalchhuak tur Pastor Lalparchhuana thlahna atan Thlasik inkhelhpui hi an buatsaih a, Chhaktiang Badminton Club te tana buatsaih Badminton Tournament-ah hian mi 40 an tel thei a. Group 4-ah inthenin intihsiakna hi an nei dawn a ni.
Nimin tlai khan  GM High School Hall-ah hawnna inkhawm tawi buatsaih niin he hun hi Pu Pachhunga Chaktiang Badminton Club Sr. Vice Pre in kaihruaiin Pu Hmingthanchhunga Vice President in pathian hnenah hlanin Dr. Lawrence Lalramenga Ralte Secy hnen atangin report ngaihthlak a ni bawk. He thlasik inkhelh hian November ni 25 thleng a awh ang.
Pastor Lalparchhuana hi Vengsang Pastor Bial ah kum 2012 atang khan Vengsang bialah hian awm tanin kumin hi a kum 5 awmna niin nakkum hian Bial dangah a awm tawh dawn a ni

KHAPNA THUPEK CHHUAH:
Champhai District Magistrate Pu Vanlalngaihsak chuan Champhai District chhungah khapna thupek a chhuah
Pu Vanlalngaihsaka, District Magistrate, Champhai District Champhai chuan Krismas leh kumthar lo thleng tur ah mihring hriselna atana tha lo leh inhliam palh theihna, mi tam tak nun tiraltitu, halpuah, halmawi leh naupang silai lem mu nei te chu Section 144 Cr Pc, 1973 (Act-II of 1974) - in thuneihna a pek angin khapna thupek a chhuah a. 
Champhai District huam chhuangah halpuah, halmawi chi hrang hrang leh naupang silai lem mu nei kawl, zawrh, hman leh ramdang atanga lakluh khap tlat a ni a.
He thupek hian chhuah a nih atanga thla 2(hnih) chhung a huam ang, a zawm lote chu Section 188 IPC hmanga hrem an ni ang.

BUHSENG ZOFEL THAWKHAT :
Hun engngemaw ti chhung ruahsur vanga buhseng a khaihlak hnuah Champhai zawla loneitute chuan buh an seng zo fel thawkhat tawh a, tarlan tawh thin angin nikum aiin buhthar hi a hlawk zawk a. Hetih lai hian buh chi dang deuh ching mi 2 khat te erawh chuan buh an la seng thei lova. An buh te hi an la hmin loh avangin zai pawh an la zai thei lova. Vur in a hmeh hman chuan seng tur a awm mumal lo maithei ni a rin a ni.

SENGHAWI MEK :
BSNL chuan Champhai Vengthlang dawrdung thlaa phone hrui hman tawh loh chu tunlai hian an senghawi mek.
BSNL hian nikum lam atang khan Vengsang atanga tanin phone hrui hman tawh lohte hi an lo senghawi tawh a. A tahtawla kalpuiin nimin atang khan Vengthlang dawrdung thlaa phone hrui hman tawh lo, hnawk tak takte chu an senghawi a ni. Tun tumah hian Darthangvunga Traffic point atanga DK Traffic point chu an hma tur niin vawiin hian an zawhfel theih beisei a ni a, hrui thiah thna hi Tlangsam Branch YMA ten an thawk a ni.

SELECTION NEI DAWN :
Vawiin tlai dar 3 hian hmeichhia Under 17 Champhai RD Block aiawh tur Selection chu Chhangphut Field ah neih tur a ni a. Hmeichhia Football lama tuite chu Sport Dress nen kal tur a ni tih thu dawn a ni.

KRISMAS CHIBAI :
Vawiin hian Gospel Singers Ministry te chuan TNT Champhaiah Krismas Chibai hun an hmanpui dawn a, he hun hi C. Lalzarliana, Addl.DC Champhai chu khuallian niin a hmnapui ang. Zaithiam hrang hrangte an zai ang. Gospel Singers Ministry te hian Camping an buatsaih mek a, he camp Inrinni lo awm tur khian BCM Kahrawt Kohhranah an chhuak dawn a, hemi hnu hian Ngur Presbyterian Kohhran ah Camp an nei zui leh ang.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.72/litre)
Diesel    : Service Tanky (Rs. 52.22/litre) 

FIRE  OFFICE : 
(03831)234026

0 comments: