ni 3.11.2016 (ningani)


KHAWLAI THIL ZUARTE ENKAWLNA LEH KAIHHRUAINA DAN ZIR :
Mizoram Street Vendor Act and Tules chungchangah nimin khan UD&PA Dept, Champhai chuan VC te tan One Day Training a buatsaih.
V. Lalmuanpuii, DUDO chuan he hunah hian Street Vendor Act chungchang sawizauna a nei a. Kawngsira inphote kaihhruaina dan hi Champhai khawpuia hmang turin hun rei tak chhung ruahmanna kalpui tawh a ni a, an thutna tur pawh rin fel tawhin mi 56 te inphona tur rin chhuah a ni, a ti a. Street Vendor Act hi
NULM hnuaia Component pakhat niin kawng sira inphote eizawnna humhalh rualin, khawtlang tana hnawksak an nih lohna tura an eizawnna kalpui chu a tum ber a nih thu a sawi a. he dan hi hman tak tak hunah chuan hmalatu tur berte chu VC ten an ni dawn a, chuvangin Street Vendor and Rules hi hriatchian a tul hle  ani, a ti.
V. Lalmuanpuii chuan he dan hnuaiah hian kawngsir inpho thinte chu sawrkarah an inziaklut tur a ni a, hetihlai hian inziak lut tawh zingah identity card nei leh inpho thei tur an ni tih sawi bawkin, identity card hi voter`s ID tluka hman theih a nih avangin pek chhuah kawngah fimkhur a tul thu te, inziaklutte tana hamthatna awm thei hrang hrangte a tarlang a. Bank-ah a pung tlem zawka loan an puk theih dawn bakah, an eizawnnaa mamawh tur thil hrang hrangte chu sawrkarin a tumsak thei dawn a. An inphona bawr velah hian an awlsamna turin inthiarna, tui leh thil dang dah theih a nih bawk dawn avangin mipui nawlpuiiin hei hi an chhawr tangkai theih a beisei thu a sawi tel bawk.
Street Vendor Act hnuaiah hian kawngsira inpho tura dilna thehlut hi mi 100 chuang an awm tawh a, inphona tur hi 56 chiah a awm thung. Inpho turte priority list pek dan turte bakah, inphona hmun siam belh theih dan tur chungchang te chu nimin training ah hian sawiho nghal a ni a. Krismas vuakveta kawngsira inpho phalna chungchang pawh sawi lan tel a ni bawk.
Street Vendor Act hnuaiah hian Champhai khawpui chu Zone pathum : inpho phalna, inpho phal lohna leh bithliah chin neia inpho phalnaa then a ni dawn a. Inpho phal lohna hian School leh Pisa te a huam dawn a ni. Kawngsira inpho thinte hian kum khat chhung atan an thil pho chhuah tur chu a thlak theih dawn lo a, hei bakah hian inpho phalna hi kum khat daih tur niin, kum khat dang tihnun leh theih tura ruahman ani bawk.
Nimin training ah hian Street Vendor Act hmang thei tur VC hrang hrangte kohkhawm an ni a, vawin chawhnu hian Street Vendor te chu training neihpui zui veleh an ni ang.

KHAPNA THUPEK :
Champhai District Magistrate Vanlalngaihsaka chuan Halpuah hal leh lakluh khapna thupek a chhuah.
Kristiante hunpui Krismas leh Kumthar alo thlen hnaih tak vang leh he hunpui hi mitinin boruak thianghlim leh muanawm tak hnuaia an hman theih nan Champhai District Magistrate Vanlalngaihsaka chuan Champhai District chhungah thla hnih chhung, November leh December atan Halpuah, Halmawi leh Silai lem mu nei lei leh hralh khapna thupek a chhuah a. he khapna thupek chhuah hian Champhai District chhungah mi tumahin Halpuah,Halmawi leh Silai lem a mu nei ramdang/hmun dang atanga lakluh, zawrh leh hman khapna thu tarlan a ni.

NGHAL RUALIN BUH TICHHIAH :
Pathianni zana nghalrualin Khawbung Tlangva Zau a leilet buh a tihchhiat vangin nimin khan leilet neituten Khawbung Forest Range Office-ah nghalrualin an thlai a tihchhiat dan report an theh lut.
YMA leh Forest Dept. ten ngawrh taka nungcha humhalh an kalpu laiin ramsa thenkhat chuan lo neitute buh a suasam fo a. Kum khat an thawhrah seng tur awm miah lova ramsa, a bikin sanghal leh sazuk ten an tihchhiat a awm thin a. hetih lai hian sawrkar lam atanga zangnasawmna chu a tihchhiat hlur zawng hmun 4-a thena hmun khat pawh a tling ngai lo niin lo neitute chuan an sawi. Tun Pathianni kalta khan, nghalrual 120 chuang zet Tlangva Zau leileta chhuak chuan leileta buh an suasam nasa hle a. Pu T. Khumtira leilet buh tin 200 chuang thar theihna chu buh seng tlak awm lovin an tichhe vek a. Pu S. Thangzova leh Pu H. Laldika leilet pawh bial 2/3 a zuah bak chu nghalrual hian an tichhe hneh hle. Leilet neitute hian an buh hi riakin an veng reng a, an ven loh zan Pathianni zanah tak nghalrual hi a chhuak niin lo neitute chuan an sawi. Khawbung RO Lalhmingthanga chuan tlangram lo a tihchhiatte nen nimin thlenga sanghal buh tichhiat inhriattir chu chhungkaw 7 an tling tawh niin a sawi.

CHAMPHAI CHAK :
Mizoram Badminton League vawi hnihna, Aizawla khelh mekah nizan hmasa khan Champhai Smashers te chuan an game hmasa ber an khel a, Tuikual Phengphehlep 3-2 in an hneh a. Champhai Smashers hian he League a an elpui ber leh rinkar berte zinga mi Mission Veng chu nuzan khan an hmachhawn leh nghal in Champhai Smashers te hian 3-2 bawkin hnehna an chang leh a. Tarlan tawh angin Champhai Smashers te hi MBL vawihnihna Aizawl pawn atanga team tel awm chhun niin tunah hian League ah point 8 an hmu mek a ni.

SCHOOL FAIR :
Vawiin hian Presbyterian English School, Vengthlang chuan School Fair an buatsaih dawn.
Presbyterian English School Fair hi tukin dar 10-ah Vengthlang Presbyterian Kohhran Biak In tualah hawn a ni ang a. C. Hualrikhuma, Dy DPC, RMSA chu khuallian a ni ang. School Fair hi ni hnih awh tur niin he hunah hian zirlai naupangte chuan an talent pho chhuahna hun an hang dawn a, hei bakah hian an kut chhuak leh ei tur hrang hrangte chu lei theih tura phochhuah a ni bawk ang. Zirtawpni zan hian an School tualah kharna hun an hmang dawn a. School naupang ten items chi hrang hrang an entir bakah zaithiam lar Hmingtea Chhangte an chah chhuak bawk a ni.

NGHAFUAN VENG :
Khuangthing branch YMA chu Tlawva luiah nghafuan ngawrh takin an veng.
Tlawva luiah hian ni 5 chhung chu Khuangthing Branch hi nghafuan vengin an Duty tawh a, chhun lama an fuan tlangpui avangin a inchhawkin mi 8 vel chu nghafuan veng hian anthawk chhuak thin a. Thu dawn danin nghafuan hi quintal 1.5 chuang a ni tawh a. Khuangthing Branch YMA  te hian kar hmasa khan Tuipuiah nghafuan hi an veng tawh bawk a, zan lama a fuan thin avangin zanah a n thawk chhuak thung a, an duty naah hian quintal 4 vel chu an fuan an rin thu an sawi.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 62.26/litre)
Diesel    : Service Tanky (Rs. 52.88/litre) 

FIRE  OFFICE : 
(03831)234026

0 comments: