ni 9.11.2016 (nilaini)

MCS-AH TLING :

Mizoram Sawrkarin Gazetted Officer-te atanga MCS a lakna result chu nimin khan tihchhuah a ni a. Hetah hian Taxation Dept-a Superintendent hna chelh mek C. Lalthazuala s/o Satthanga, Champhai Vengthlang leh Champhai Taxation Office-a Superintendent hna thawk mek Ngulzathuama te pawh an tling a. MCS hi an zawm duh chuan an zawm thei tih thu dawn a ni.



CORTEX THAHNEM TAK MAN :
Champhai District Special Branch (Champhai SP),  10 Assam Rifles leh Zokhawthar Police Outpost tangkawp-ten nimin khan Myanmar a lakluh tum puakthei siamna hmanrua Cortex thahnem tak an man.
Police hotute hnen atanga thu dawn danin heng Puakthei siamna Cortex Coil 20 te hi an thu dawn bawhzui a man a niin,  puakthei siamna hmanrua neitu a puh Thanglura kum 48 S/o Vanhnuna Tahan 'C' Group a awm ni a inchhal chu man tel a ni a,  amah bawk hi puakthei thil kawl vangin Champhai Police-in an lo man tawh a ni.
Cortex man tak Coil 20 hi Coil khat Meter 250 zel a sei a ni a,  Coil 1 hi Rs 5000/- zelin Aizawl atanga a lei anih thu Thanglura hian sawiin,  he puakthei tha-tih-chakna hmanrua te hi lunghlu laihchhuahna hmuna hman atan hralh chhawn leh tura a lei anih thu a sawi tel bawk.
Thanglura leh a hnen atanga Cortex mante hi Champhai Police kutah hlan a niin, U/s 5 Explosive Substance Act leh 14 Foreigner Act hmanga thubuai siamsak a ni a.  Vawiinah Champhai District Court a hruai a ni ang.

SERTHLUM CHIN LEH ENKAWL DAN ZIR HO :
KVK Champhai District chuan nimin chawhma dar 11:00 khan Dungtlang khuaa Serthlum chingtute chu an khuaah kalchilhin Serthlum chin leh enkawl dan chungchangah Training an pe.
He hunah hian Serthlum chingtute hi thlai damdawi chi hrang hrang an pe nghal a ni.
Training hi Lalrinawmi Renthlei, KVK Head & Scientist in kaihruaiin KVK kalphung leh hnathawh dan tlangpui te tarlangin loneitute tana awm leh thawk annih anga an harsatna tawh apiangte an hnena thlen zel turin kalkhawmte chahin, an theih ang a puih chu an tih tur a ni tih a sawi a. Training-ah hian Malsawmkimi, Horticulture Scientist in Serthlum chin leh enkawl danah Training pe in R. Vanlalduati'n leithur dan hriat theihna tura Soil Sample lak dan leh Test dante bakah Serthlum chingtute tana lei chungchanga hriat tur pawimawhte a hrilhfiah a. Training-ah hian Dungtlang a Serthlum chingtute an tel kim hle a ni.

CHAMPHAI CHAK :
Inter District Football Tournament Aizawla khelh mekah nimin khan Champhai aiawha kal ten hnehna an chang.
Inter District Football Tournament Aizawla khelh mekah Champhai District aiawha kal Zotlang FC Woment Team te chuan vawiin khan an match hmasa ber khelin Si 4 faiin Saiha District an hneh a, Zotlang FC tan hian Zualbawihi'n goal hnih khungin, Ramnghaki leh Lalhlupuii ten goal khat ve ve an khung bawk. Vawiin chawhnu dar 1:00 ah Serchhip District nen an khel leh ang.

BUHSENG RUNPUI :
Dr. C. Lalzarliana, Director, Agriculture (Crop Husbandry) chuan 'Thenkhat chuan buhseng  leh  lozawh tihte hi sawiselna thu ri thin mahse Kumtluanin rim takin hna kan thawk a, kan thawhrah alo lang chhova, hetianga intihhlimna hun nikhat kan hman te hi chu kan phu a ni' a ti.
He thu hi Thawhtanni a Khawzawl Tuisen phai a Buhseng runpui neihah a sawi a, Director chuan 'In harsatna kan hmuh atangin Department in tanpuina kan pe thin a, a dil ngawrh te hnenah ni lovin a phute hnenah tanpuina kan sem thin a ni a ti a' Tuisen phai in Tuisen phai leilet neitute Agriculture Department in hma a laknaah lawmthu sawina chang an hria chu lawmawm a tih thu a sawi a, leilet neitute chu Line Plating an tih chu nakum lamah pawh chhunzawm zel tura chahin hei hian buh kung a ti tam a, enkawl a awlsam a, buh thar a ti hlawk a ni a ti a. Director chuan Tuisen phai leilet neitute chu Tha takin hna an thawh a, chhuanawm taka an awm avangin Custom Hiring Center pakhat a pek tur thu a sawi a, buh an phurh chhuah theihna tur atan kawng an ruahman thu leh NEDP hnuaiah emaw kawng tha zawk an buaipui dawn tih a sawi bawk.
Buhsen Runpui neih hi Pu Lalchharliana, SDAO, Khawzawl chuan a kaihruai a, Agriculture Department Deputy Director Pu Lalthanzuala, Champhai DAO Pu R.K. Nithanga leh Department hotu thenkhatin he hun hi an hmanpui a, zaithiam zaite ngaihthlak anih bakah tlaiah leilet neitute nen ruai an kilho a ni.

HNATLANGIN SENG HAWI :
Inrinni a ruahsur nasa tak vanga an kawmchhak lei minin Pi Lalhlupuii te In,Khawzawl Vengthar ami a hnawl chu nimin khan mi tlawmngaiten hnatlangin an seng hawi.
Inrinni zan dar 9:00 vel khan Pi Lalhlupuii te in hi an kawmchhak leimin in hnawlin bang chhak lam chu a hnawl chhe vek a, vanneihthlak takin Pi Lalhlupuii te chhungkaw Member 7 chu an thenawmte inah an insaseng hman a, thi leh hliam an awm lo a ni.
Pathianni leh Thawhtanni lamahte ruah a sur reng vangin in seng hawi hna hi an thawk ngam lova, vawiin khan thenawm khawveng leh mi tlawmngaite chuan leimin leh in chhung a chirh lut te chu an ti fai a, naktuk lamah bang chhak lam leiminin a hnawl chhiat chu siam that tum a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 63.34/litre)
Diesel    : Free Sale (Rs. 53.86/litre) 

FIRE  OFFICE : 
(03831)234026

0 comments: