ni 1.12.2016 (ningani)


MJA PRESIDENT IN BORDER AREA PROGRAMME HMANPUI :
Art & Culture, Mizoram leh North East Culture Centre te buatsaih Border Area Programme chu nimin khan zawhfel a ni.
Border Area Programme tawp ni puala inkhawm tawi buatsaihah khuallian Pu C.Lalhnunpuia, Champhai District MJA president chuan thu sawiin, Mizote hi India ram zau zawkah min hre lo an la tam hle a, min hriat theihna kawng remchang hi infiamna, media leh kan hnam ziarang hmangin a ni, a ti a, hemi kawngah hian hmabak kan la ngah a. Theihtawp kan chhuah a tul a ni, tiin a sawi.

Hnam ziarang chungchangah India ram chu hnam hrang hrang awmna kan ni a, kan hnam ziarang leh chindan phung kan inngaihhlutsak a, kan inzahtawn hi inlungrualna leh unau kan nihna pakhat a ni, a ti a, North East Culture Centre ten tun tuma Champhaia Border Area Programme an rawn buatsaih chu lawmawm a tih thu tarlangin, ramri depa awm hnam hrang hrangte kan inpawh tawnna tur te, kan hnam ziarang kan inhriatsakna tur hun remchang an siam hi chhunzawm zel tlak a ni, tiin a sawi.
Border Area Programme tawp ni-ah hian Champhai atangin Kahrawt, Kanan leh Vengthlang te chuan hnam lam an entir a, Assam-a Mishing hnam te, Meghalaya Khasi, Manipur Meitei leh Punjab ten an hnam lam chi hrang hrang hmuhnawm tak tak entirin mipuiin an hlut hle a ni. Tun tum Border Area Programme-ah hian Tamil Nadu chu tel tura beisei an nih laiin pawisa tihthih avanga harsatna an tawh avangin an rawn tel thei lo thung.

KUM THAR ATANGIN TAR PENSION :
Mizoram sorkar hnuai a pensioners  leh Family pensioners hlawh la thin ten State Bank Of India a tang chauh a pension leh Family pension /hlawh an lak thin chu Mizoram hmun hrang hrang a he hamthatna la  thin te tan a awlsam zawkna turin tun hnai khan Mizoram Sorkar a Secretary ,Finance Department chuan order (Office Memorandum) a siam.
Govt.of Mizoram (Finance Department) Secretary Pu Lalropara thuchhuah No.G.19011/23/2014/F-APH Dt.28.11.2016 in a tarlan danin Mizoram Sorkar Treasury department a tanga pekchhuah thin ,  pension leh Family pension hlawh State Bank of India kaltlang a la thin tupawhin an duhthlanna zawk a nih phawt chuan an pension hlawh lakna branch hi SBI a tangin an duhna ber Mizoram Rural Bank branch khawi ah emaw ber an la thei tawh dawn a. Mizoram a bank awm zinga in zar pharh zau ber leh branch nei ngah ber ,Mizoram Rural Bank a pensioner leh family pensioners ten an chhawr tangkai theih dawn tak a vang hian hmun kilkhawr bera awm tan pawh awlsamna nasa tak a thlen ngei dawn niin a lang a ni.
Pension la tur te reng reng in anmahni bialtu Treasury Officer theuh ah MRB a an account pawimawh zawng zawng an thehlut ang a.Treasury Office lam a tangin awlsam takin an hlawh lak duhna MRB branch khawi emaw bera an Account ah thlatin an rawn thawn tawh mai dawn a ni.
Pu H.Lalrammawia chuan,  `SBI a pension hlawh la thin ,an awmna kilkhawr a vang leh remchan zawk na a vanga MRB a la duh te chuan an account hawnna Home Branch theuh ah a  rang lama in report theuh turin an ngen a .‘ Mizoram hmun hrang hrang leh khaw hrang hrang a awm te tan  he sorkar thuchhuak hi a tangkai hle dawn a. Inthlahrung hauh loin a rang lamin mahni hnaih ber  Mizoram Rural Bank ah in report ngei turin kan chah duh a ni  ,Pu Rammawia chuan a ti. MRB Khawzawl Branch a tanga pension leh family pension la thar duhte   pawh ,January 2017 thla ral hma ngeiin  anmahni bialtu Treasury Officer ah leh MRB Khawzawl Branch ah in report turin hriattir an ni.

THALFAVANG KUT TLANGSAMAH :
Tlangsam Branch YMA chuan niminpiah atang khan Thalfavang Kut an hmang tana Nizan khan SYMA hruaituten an telpui a, Nizan hmasaa hun an hman hi Pu Lalrindika Tlangsam Branch YMA Vice President chuan kaihruaiin Pu C Lalbiakzauva SYMA President hnen atangin thusawi ngaihthlak a ni a. Thusawiin Pu Zautea chuan Tlangsam Branch YMA in ram leh hnam humhalh kawnga hma an lak dan chu fakawm a tih thu sawiin Tui hna humhalhna atana an chhehvela ramawl leh mimal ram te khawih chet theih lova khawtlangin an humhalh thei chu entawn tlak atih thu sawiin Champhaiin Tui hniang hnara kan tlan tur kan neih theih nan kawngro a sut ngei a beisei thu a sawi a, Champhai tui tlan ber Tuipui lui a kiam chak lutuk chu kan thanharh a ramngaw kan humhalh deuh loh chuan tui  tlan tur kan nei lo vat dawn ani a ti a.
Tui leh khawmuala nungchate humhalh kawnga Tlangsam khawtlang tan rual dan leh dan khauh tak an siam chu thih tha tak anih thusawiin a rah duhawm tak an seng ngei a beisei thu a sawi bawk. A sawizelnaah Ram leh Hnam humhalh kawnga pawimawh berte zing a mi chu intodelh a ni a ti a, thalai kan intodelh a, hna thawh hreh kan neih loh chuan ramdang miin kan ramah thawh tur an nei dawn lova ram dang mi tan kan ramah awm ve a rem chang dawn lova, sum leh pai kan khawla kan intodelh theih nan Societu hrang hrangte kan hman tangkai a ngai ani a ti bawk.
Niminpiah lam khan Section hrang hrangte Football-a in elna neiin Nizanah Tlangsampar tih hla hmangin Zaipawl intihsiakna an neih bakah Solo mipa leh Hla do chham hmang te in intihsiakna an nei a. Nimin khan chhunzawm lehin Football mipa leh YMA chhang Final neiin Lungden leh intlansiak hmang tein intihsiakna hi an nei chhunzawm leh a ni. Nizan khan chhunzawm leh in intihsiakna chi hrang hrang 6-a intihsiakna an nei leh ang a. Tlangsam Branch YMA President Pu VMS Dawngzela hnen atangin thusawi ngaihthlak ani ang. Naktukah Volleyball Mipa leh Hmechhia bakah Inkawibah te-in intihsiakna an nei leh ang a, Zanah kharna hun an hmang. He hunah hian Lalbiakfela kum 7, a nau nun chhan a tumna lama nunna chanta hnenah huaisen chawimawina an hlan ang a, Pu K Lalthanzuala hnenah chawimawina thil pek an hlan bawk ang. Result puan leh lawmman semna neiin Tv Jacob Lalnunhlima hnen atangin YMA Kumpuan Ram leh Hnam humhalh tih thupui ngaihthlak a ni ang a. Quiz, Tlangsam History leh YMA History hmangin intihsiakna an nei bawk ang.

CEMENT MISTIRI TRAINING ZO :
YMA, LE&IT leh Mizoram Building & Other Construction Welfare Board te tangkawpa buatsaih Champhai Sub-Hqrs hnuaia cement mistiri training chu nimin khan Pu T.Sangkunga, MLA, Mizoram Youth Commission chairman ni bawk chuan a khar.
Kahrawt VC hall-a kharna inkhawm hi Pu C.Lalbiakzauva, Sub-Hqrs YMA President chuan a kaihhruai a. Khuallian Pu T.Sangkunga chuan thu sawiin, cement mistiri training te chuan cement hmanga hnathawh kawngah hriatna tha tak in nei tawh dawn a, eizawnna atan in hmang lo a nih pawhin cement hnathawh enfiah leh vilzuina atan thil tangkai tak a ni, tiin, chutihlai mek chuan cement mistiri hna hi vaiho thawh turah kan dah thin a, mahse Mizote pawhin kan thawh theih loh chhan tur a awm lova. Training chhuakte hian eizawnna atana in hman ngei ka beisei a ni, a ti.
MLA Pu T.Sangkunga chuan Mizoramah sorkar hna kan indaih tawh lova, hei vang hian Mizoram Youth Commission leh Labour & Employment tangkawp chuan phai lamah thalai 3000 vel chu hna a hmuhsak tawh a, ramdanga hnathawh dan ngaihtuahin tunah hian ruahmanna a siam mek a. Kan rama hna awm tawh lo inchuh lovin ram dangah, hlawh sang tak hlawha kan thalaite ei an zawn theihna tur chu ngaihtuah zel a ni a. Hei bakah hian competitive exam hmachhawn turte tan awlsam leh mantlawm zawkin coaching centre din a ni a. Hei hi sorkar hna sang zawk Mizo thalaiten an thawh theihna tura puitu a nih ngei a beiseiawm hle a ni, a ti a, hetianga hmalak a nih chhan hi sorkarin thalaite tana khawvel thar siam a tumna pakhat a nih thu a sawilang tel bawk. Pu T.Sangkunga chuan 13th Finance Commission-ah Mizoram sum dinhmun a manganthlak hle a, mahse 14th Finance Commission-ah chuan sorkar laipui atanga sum lokal chu nasa takin a pung a, India state zingah Mizoram chu sum hmuh tur pung nasa ber te zinga mi a ni a. Hemi hmang hian sorkar flagship programme thar, NEDP pawh hi kalpui tura tih a ni a. Thingtlang khuate pawhin an chhawr tangkai hle dawn a ni, a ti a, inkalpawhna chungchangah Japan sum hmangin Champhai leh Seling inkar, double lane-a siam tura ruahmanna kalpui a nih bakah, Khawbung paltlanga Champhai leh Serchhip inkar kawng pawh tihtel tum a ni a. Tlawva leh Kawlbema kawlphetha siamna tura tui khuah chu fur laiin Champhai District chawm thei tur a ni a, mahse vanduaithlak takin ukil pakhatin back date-in ram pass a siam a, sorkar khin tumin hma a la mek tih thawm a awm a. Hetianga mi pamhamte avanga hmasawnna tur a thuanawp thin hi thil pawi tak a ni, tiin a sawi. He hunah hian Pu Vanlalngaihsaka, Champhai DC pawhin thu a sawi a ni.
Nimina khar tak Cement mistiri training hi November ni 1 khan kalpui tan a ni a. Mizorama Sub-Hqrs tin leh Central YMA thut hmun hrang hrangah neih a ni a. Champhai Sub-Hqrs YMA hnuaiah hian mi 100 training theih tura tih niin, training chhuak hi mi 84 an awm a. An training-na atan hian cheng nuai 9 sing 8 leh za 8 hmuh a ni. Naktuk hian PWD hnuaiah ni thum awh exam an hmachhawn leh dawn a ni. Cement mistiri kharna inkhawmah hian YMA hruaitu, kum 10 lo tang tawh mi 13 te hnenah chawimawina hlan a ni a, cement mistiri training chhuakte hnenah hian khuallian chuan an mamawh tur mistiri bungraw thenkhat a sem chhuak nghal a ni.

VOLLEYBALL TOURNAMENT :
Niminpiah atanga tan Champhai District Volleyball Tuornament chu nimin khan khelh chhunzawm leh a ni.
He Tournament rual hian Inter Office Volleyball Tournament pawh buatsaih tel nghal niin Team 8 in lan theiin, SP Office, SDPO Office, Fire & Emergency, AH&Vety, Middle School Zone I, District Jail, Excise, SSA ten an tel thei a. 
Open-ah mipa Team 11 leh Hmeichhe Team 7 tel theiin Open mipa hi Pool 4 ah then niin Pool Champion theuh ten Semifinal an khel dawn a ni.

SPECIAL HANDLOOM EXPO NEIH A NI DAWN :
Ministry of Textiles, New Delhi leh Mizoram Apex Handloom & Handicraft Cooperative Society (MAHCO) bultum in  Special Handloom Expo neih a ni dawn.
Ministry of Textiles, New Delhi leh Mizoram Apex Handloom & Handicraft Cooperative Society (MAHCO) bultum in Champhai District pual tan Date 07-09 December 2016 chhung hian Town Hall Champhai Vengthlang ah Special Handloom Expo neih a ni dawn a. Puan tah tuten Handloom leh Handicraft hmanga an dehchhuah chi hrang hrang man tlawm zawk a hralh turin an pho chhuak dawn a ni. He Special Handloom Expo hi Date 7.12.2016 chawhma dar 11 ah Pu 
C. Lalchuangkima, Project Director, DRDA in a hawng ang. Champhai District pual bik tan a Special Handloom Expo neih chhung hian mipui ten tlawh a leisak ngei turin a buatsaih tute chuan an ngen a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Service Tanky (Rs. 52.08/litre)

0 comments: