ni 13.12.2016 (thawhlehni)


YMA TEN TUIPUI LUI HUMHALH THA :
Tuipui tlawhchhan khaw hrang hrang Branch YMA Joint Comt kum tawp thutkhawm chu Inrinni khan Tuipui Pump House ah neih a ni.
He hunah hian E. Lungdar leh Leng Branch YMA te chu khawtlangah hmalakna kalpui laklawh an neih avangin an tel thei lova, a bak YMA Branch te chu an tel kim thei a ni. Branch hrang hrang aiawha kalten nungcha humhalhna kawnga an hmalak dan an report a. A bikin nghafuan hun laia lui kal loh tih leh sangha him taka a fuan theih nan venhim tih chu Branch tinten hlawhtling takin an kalpui a.

Committee thu lo dah tawh angin Khuangthing leh Biate Branch te chu nghafuan venhim kawngah lawmman atan tanka fai leh thuziak hlan nise tiin Joint Comt. chuan a rel a. Joint Comt. hmalakna avanga mipui mimirin nungcha humhalh kawngah nasa taka hma an sawn thu leh an hmalaknate mipuiin an thlawp tlat avanga an lawmzia report petuten an tarlang a. Khawbung leh Biate Branch YMA ten Tuipui lei bul, eng hmanraw hmang maha khawih lo tura an humhalh pawh nikum lama sangha hmuh theih let engemaw zata tamin sangha a puang tawh a. hetih lai hian Tui lei bul hi tui a thuk loh avangin sangha tawmna tur puk cement hmanga siam leh tui tam zawk tling thei tura siam an tum bawk a ni.
Thala lui kal turte tan Len leh Lenkhang No. 25 chin chunglam leh nghakuai chauh sangha man nan hmang turin mipui an ngen a. Tuipui lei bul erawh eng hmanraw hmang maha khawih phal a ni lova, balu leh lung lak pawh a luikuang a tihdanglam thin avangin phal a ni lo.

THING/HNIM CHHINCHHIAH DAN TUR ENFIAH :
Conservation and Resion of Unique Vengetation and Ecosystem hmanga Mizo Hlakungpui uala thing leh hnim chi hrang hrang chhinchhiah dan tur enfiahin Chief Conservator of Forest Liankima Lailung, Planing & Development, Environment and Climate Change hovin nimin khan Mizo Hlakungpui Mual a thing leh hnim ramhlum damdawi awm ang angte enfiaha hmalak dan tur ruahmanna siam a ni.
Chief Conservator of Forest hi Lalchuailova, DFO Champhai leh Lalhmingthanga, RO Khawbung Forest Range ten an tawiawm a. Mizo Hlakungpui Mual Committee te nen thawhho dan tur an sawiho nghal a ni. He hmalakna hmang hian Mizo Hlakungpui Mual a thing leh hnim, ram hmul damdawi awm ang ang chu fel taka chhin chhiah a ni ang a. Zirmite tan pawha thulakna atana rintlak tur lehkhabu te siam tum a ni.

MIDDLE  SCHOOL AH NAUPANG HIMNA ZIRTIR :
Nimin khan Champhai hmun hrang hrangah Sexual Abuse & Protection chungchangah zirlai naupangte zirtirna neih a ni.
Nimin khan Education Department leh District Child Protection Champhai District te buatsaihin mipat hmeichhiatna lakah naupangte an mahni an lo in ven him theih dan tur chungchang hrilhhriatna Awareness Campaign chu Champhai ah neih a ni a, Awareness Campaing hi hmun 7 ah neih niin Zirlai naupangte hnenah mipat hmeichhiatna chungchang hrilh hriatna neih a nih bakah hursualna laka an him theihna tur te hrilhhriat an ni a. Naupangte danin a humhim dan leh an dikna chanvo hrang hrangte hrilh hriat an ni bawk. School 14-a zirlai naupangte hnenah zirtirna hi pek niin Vengsang YMA Hall, Vengthlang MS, Paris Hall, Kanan MS, Zotlang MS, Tlangsam MS leh Hmunhmeltha Middle School ah te Awareness Campaign hi neih a ni.

ENDOSCOPE TIH THEIH :
District  Hospital Champhai ah Thawhlehni leh Zirtawpni apiangin ‘Endoscope’ a tih theih tawh tih thu dawn a ni. 

ADHAAR CARD :
Champhai SDC Beithlotha Nohro chuan Ashaar Card siam chungchangah hriattirna a tichhuak a. Champhai Vengsang huam chhunga mite tan tunah hian Adhaar Enrollment hi bul tan chhoh mek a nia. Vengsang VC huamchhung lak zawh anih veleh veng dang tan lak theih a ni a. Mahni veng lak hun tur chu VC tlangau hmanga inhriattir tur a ni ang. Adhaar card siam tur hian form fill up ngai a awm a. He form hi VC te hnenah dah niin, VC te atanga lak chhuah tur  ani a. VC kaltlanga form la chhuakte tan chauh thla hi lak theih a ni a. Ashaar Card siam tur hian Votes ID, Birth Certificate, Driving License emaw ration card ken tel tur a ni ang.

CDFA 1ST DIVISION :
Niminkhan CDFA 1st Division League 2016 chu Final khelh a ni.
CDFA 1st Division League 2016 Final hi RL Thianghlima, DIET Principal chuan khuallian niin a hmanpui a, lawmman a sem nghal bawk. Ist Div. Club 6 te an inkhel kual vek hnuah Point hmusang Pahnih Bethel DC leh Champhai United  ten final hi an khel a. Champhai United hian an khelh tawhah chak loh nei loin POint 13 an hmu a, Bethel hian Champhai United lakah an lo tlawm tawh avangin POint 12 an hmu thung. Nimin inkhel hmuhnawm takah hian min 90 chhungin Goal a lut lova. Hun pek belh min 30 khelh niin, min 113 naah Champhai United FC tan Saihmingthang`n an hmahruaina Goal a khung a, Min 116naah Lalkhawpuimawia`n a belhchah ve lehin Min 120 naah Lalchhuanliana`n Champhai United FC Goal thumna khungin si 3 faiin Champhai United FC hian hnehna changin CDFA 1st Division League 2016 Champhai an ni ta a ni. 
Vengthlang FC hian Point 3 hmuin 2nd Division League a point hmu dang ber dawt nen Play off an khel dawn a, Venglai FC te erawh 2nd Division ah an tla thla thung a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Service Tanky (Rs. 52.08/litre) 

FIRE  OFFICE : 
(03831)234026

0 comments: