ni 16.12.2016 (zirtawpni)


INBUMNA AWM THEI CHUNGCHANG ZIRHO :
Reserve Bank of India hmalaknain nimin khan I&PR Auditorium-ah tlawmngai pawl, khawtlang hruaitute leh thuthar thehdarhtute tan bank tangkaina leh inbumna chungchang zirho a ni.
He huna khuallian Pu CC Lalchhuangkima, Champhai DC charge la mektu chuan thu sawiin, he training hi pawisa lama inbumna thleng thin, Mizoramah pawh chiahpuam avanga kan buaina ang kha a thlen tawh lohna tura Chief Secretary hmalakna buatsaih a ni, a ti a, a hlawk tur ringawt kan zawn thin avangin kan chesual thin a. Heng inbumna pumpelh tur hi chuan bank-ah kan sum hi dah ila a him ber a ni, tiin, kalkhawmte chu an thil zir chhuahte mahnia vawng mai lovin midang zirtir a, chhungkua leh khawtlangah awareness campaign hi an remchan dan anga kalpui ve turin a chah a ni.

Nimin training-ah hian RBI lam atangin pawisaa inbumna leh pawisa thapna lama dan leh hrai chi hrang hrangte zirho niin Pawisa dahkhawm a, ticket vawr hmanga hui thin, chit fund chungchang te, chiahpuam leh inbumna chi hrang hrang awm theite chu chipchiar taka zirho a ni a. RBI hriatpui loh financial institution reng rengin account an hawn theih loh thu te, loan pe chhuak thei mah se demand draft leh cheque lam chi reng reng an pek theih loh thu te tarlan a ni a. 
ATM card leh pin te chu inbumna atan midangin an hman theih avangin pawisa hlawhna pawh nise midang hmantir a him loh dan te, a pung tlema loan pek, pawisa tam tham tak dawn anga inhriattirna, online auction leh member nih hmanga hamthatna dawn tur awm anga sawite hi inbumna tlanglawn ber a nih thu te sawilan a ni a. Duhamna avangin kan sum kan chan thei a, kan sum chan tur kan hum hian pawisa kan thawk chhuak tluk a nih avangin duhamna avanga hetianga pawisa hlawh theih anga sawi hi pumpelh a tul tih te tarlan niin, pawisa hi kan fate anga ngaih tur a ni a, nupui pasal an neih dawna an neih turte kan zirchiang ang hian kan dahna tur chu a him em tih kan finfiah hmasa tur a ni tih te sawilan a ni bawk. He hunah hian zawhna leh chhanna hun hman a ni a, pawisa tihthih chungchanga hriat tur tul te tarlan a nih bakah, bank-a lungawilohna nei an awm a nih chuan RBI-ah complain theih a nih thu te sawilan tel a ni.

INTENSIVE TRAINING :
Nimin khan UD&PA Dept chuan I&PR Conference Hall-ah Self Help Group intensive training an buatsaih.
He training-ah hian Self Help Group te kokhawmin, revolving fund an dawn tur chungchang inhrilhhriatna leh hmalakna tur hrang hrangte zirtir an ni a. Self Help Group chak leh nung tur chuan tih tak takna a pawimawh thu te sawilan a ni a. Self Help Group ten an hnathawh dan leh an tawnhriat hrang hrangte an sawi ve bawk a ni.
He hunah hian Area Level Federation chungchang zirhona neiin, Area Level Federation hi an din fel a, hruaitu tur an thlang nghal bawk a ni. Traning hi nimin lamah kalpui a lo ni tawh a, Self Help Group 26 hnenah Revolving fund cheng sing khat theuh sem chhuah nghal a ni.

MOTOR CHESUAL AH BORAL :
Nizan hmasa dar  5;30 vel khan Tourist Lodge thlangah Wagon R chesualin mi pakhatin nunna a chan.
Champhai Polcie Station atang kan thu dawn danin Wagon R MZ 04-6797, Pu PS Lalrintluanga khalh New Champhai lam atanga Champhai Khawpui chhung rawn pan chuan Tourist Lodge thlang kawnkual lai chhakah Telephone ban suin kawngthlanga a tla liam, Kawngpui atanga Metre 15 vel lumin a thlang kawngah a in sawh a, Motor khalh tu Pu PS Lalrintluanga Kum 58, s/o Lalbeiseia (L) ,Champhai Vengthlang, Awmpui Veng chu damdawi In pan pui nghal a nih hnuin a hlaim tuar lovin a boral a. Motor-a chuang ve mipakhat erawh chuan vanneih thlak takin hliam na lutuk a tuar lo thung. Nunna chanta Pu PS Lalrintluanga hian a luah hliam a tuar tih loh chu hliam dang hmuh a ni lo thung. A ruang hi nizan hmasa khan lumenpui a nih hnuah nimin khan Vengthlang Thlanmualah vuiliam nghal a ni.

LAL ROPUI THANGHLIANGA SAILO CHANCHIN TLANGZARH :
Nimin khan C Lalhruaitluanga lehkhabu ziah Tlangsam Lal, Thanghlianga Sailo chanchin ziahna Lal ropui Thanghlianga Sailo tih chu Pu Lalthangfala Sailo, president Mizo Academic Letters Mizoram chuan a tlangzarh
Tlangzarhna inkhawm Govt Champhai College Seminar Hall-a neih hi Pu C Lalhnunpuia, President MJA Champhai District chuan kaihruaiin Champhai Vengthlang Bial vawngtu Rev Vanlalruata'n hunserh hmangin Thanghlianga sailo thlahte atangin Pu Rolura sailo hnen atangin thusawi ngaihthlak ani bawk. Lehkhabu ziaktu C Lalhruaitluanga chuan thusawiin Thanghlianga Sailo chu Lal ropui tak tih phu anih thusawiin Apa Lalsanga sailo atang mi khwangaih thei leh zaidam mi hnuaihnung leh mi anglo thlenga khawngaih thei an ni ati a, Thanghlianga Sailo chu ziaka thil dahthatna chang hria Lal fel leh remhria anih thu tarlangin Khaw 4-a Lal ni thei chu Lalropui tak tih loh rual a ni a ti bawk.
Lehkhabu Tlangzarhtu Padma Shri Pu Lalthangfala Sailo, MAL President ni bawk pawhin thusawiin Lehkhabu ziaktu C Lalhruaitluanga chu kum naupangte nichunga lehkhabu 9 lai a ziah tawh avangin fak a phu a ni ati a, lehkhabu ziah chawlhsan mai lova chhunzawm zel turin a chah bawk. Sailo Lal Ropui Thanghlianga Sailo tih lehkhabu chu tawngkam thluai thlum tum lova chhiartuten an hriatthiam theih tur zawng ziak leh Paragraph, Sentence leh Bung te mumal taka thliar ani chuan chhiar a tih nawm thu sawiin lehkhabu rotling tak a nih a beisei thu a sawi bawk.
He hunah hian Pu Lalnunmawia'n inhmelhriattirna hun hmangin Zela Pachuau-in Book review-na neiin Pu Vanlalhruaia Sailoin lawmthusawiin he hun hi a khar a ni.
Sailo Lal ropui Thanghlianga Sailo tih lehkhabu hi Rs 150 in leitheih ani ang.

MIZORAM A BUH THAR TAM BER LAWM :
Nimin khan Champhaia buh thar hnem ber Pu F Laltanpuia Sailo chuan a buhthar te lawmna hun a hmang.
Pu F Laltanpuia Champhai Venglai chuan nimin khan a buhthar te Sesih tlang New Champhaiah chhungkhawmin a lawmna hun ruai nen a buatsaih a, Pu F Laltanpuia hian Lo  Fing 5 a neih atangin  tin 1900 vel kumin khan thar chhuak a, Champhaia buh thar chhuak hnem ber a ni a, heng a buh thar atang hian mi harsate pual atan Tin 60 dahin nimin khan mi thlan bik te a buh thar hi a ruh tir bawk a ni. Pu F Laltanpuia hian Champhai District Prometers ten Kut hnathawktu hlawhtling award an lo hlan tawh bawk a ni.

LO THLENG :
Mizoram calendar chuan Champhai a rawn thleng a, vawiin atang hian I&PR Office, Chanem building-ah cheng 50-in dar 10:30 atanga tlai dar 3 thleng lei theih a ni ang. Calendar leina atan hian pawisa hlui, cheng 500 leh cheng 1000 note chu pawm a nih dawn loh bakah, a lei turte chuan pawisa nawi ken sa tur a ni tih thu dawn a ni.                        

FOOD FAIR NEI :
Krishi Vigyan Kendra (KVK) Khawzawl chuan nimin chawhma dar 9:00 atang khan KVK Farmers Hostel kawtah kuthnathawktute tan Food Fair, Kishan Gosthies leh Animal Health cum Free Clinic an buatsaih a. Nimina KVK in hun an buatsaihah hian loneitute hnenah Antam, Chana leh Dal chi te semin ran vulhtute hnenah ran damdawi an sem chhuak bawk a, KVK Scientist te chu kuthnathawktiten harsatna an neih hrang hrangah biakrawnna an nei bawk. Heng bakah hian  Flower Exhibition buatsaih a ni a, pangpar khawi tha zual thlan chhuah pathumte hnenah lawmman hlan an ni.
KVK in nimina hun an buatsaih hi ADHO Pu C. Zosangliana chuan khuallian niin a hmanpui a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Sem rual (Rs. 61.88/litre)
Diesel    : Sem rual (Rs. 52.08/litre) 

FIRE  OFFICE : 
(03831)234026

0 comments: