ni 2.12.2016 (zirtawpni)


BC ENGLISH ACADEMY-II THIAM BER :
Champhai District Inter High School Quiz 2016 chu nizan khan Final nein, a hmarbawk a ni ta. BC English Academy II te chuan Final a an bitum Venglai Secondary School I chu Point 250-200 a hnehin an champion.
Final ah hian English, SS leh Mizo atangin zawhna pangngai 3 an chhang a, Science leh mathematics ah zawhna 4 chhangin heng hian Point 10 theuh a pu a ni. mathematics a zawhna pahnih leh Scoence a zawhna pakhat Mark 20 pu chu hun rei zawk neiin an chhang bawk a. Hei bakah hian Rapid Fire Round ah an Subject zawng zawng, General Knowledge leh Mental health zawhna, a vaiin zawhna 15 chu minute 1 chhungin an chhang a, Audio leh Visual Round a awm bawk.

Nizan Quiz Final hi Champhai DC Vanlalngaihsaka chuan khuallian niin a hmanpui a, C. Hualrikhuma, Dy DPC RMSA chu khualzahawm a ni.

CHAMPHAIAH INTERNET SERVICE PROVIDER THAR NETSURF :
Nimin khan Champhaia Internet Service Provider thar NetSurf te chuan Press mite kawmin an hmalak dan tur an tarlang.
I&PR Conference hall a hun hmanah hian NetSurd aiawhte chuan Champhaia Internet Service an pek dan tur tlangpui an tarlang a. Aizawl atangin Internet hi Airwave hmanga rawn kah chhoh a ni dawn a, signal bo thlau a awm lohna turin Ruallung ah Tower bun tel a ni. Champhaiah hian Darthlalang tlang, CHANEM Building, Kanan Veng Field bul leh PHE SE Quarters, New Champhai bulah te Tower bunin hemi hmang hian internet hi an sem chhuak dawn a. Hrui thlun ngai lovin Satellite hmangin mipui hnena pek chhuah tur a ni.
Tun dinhmunah chuan internet hi 100mbps vel Champhai hian dawng theiin, hei hian connection 500 vel chu duhthusamin a chawm thei dawn niin an sawi a. Inbun tan an nih angin Internet Connection ti hmasa mi 50 hnenah Connection Fee Rs. 5500 chu a chanve a tlawmin an tihsak dawn a, internet fee hi mamawh dan a zirin unlimited, FUP leh time shift plan te chu thlan theih a nih thu te, Connection hi Champhai a Office : CHANEM Building a Revenue Pisa hluiah tih theih a nih thu te an tarlang a ni.
He bakah hian NetSurf chanchintlangpui an tarlang a. NetSurf hi Zoram Business Enterprise Private Ltd. peng pakhat a ni a, kum 2012 December ni 12 a din niin kum 2013 June thla khan mipui hnenah Internet hi an pe chhuak tan a. Tunah hian Aizawl, Lunglei, Silchar leh Champhaiah an inbun tawh a ni. Mipui hnena internet pechhuak tur hian Company hrang hrang te nen an thawkho a, an tum ber chu internet a mipui mamawh phuhruk a nih thu te, Company thang mek an nih ang a service an ngaih pawimawh tur thu te, darkar 24 chhung duty an indah dawn tih an tarlang tel bawk. 

HELICOPTER SERVICE CHUNGCHANG THUPEK :
Rualkhai zawka mipuiin helicopter service an hman theihna turin Champhai DC Vanlalngaihsaka chuan thupek a tichhuak.
Thupeka tarlan danin Champhai leh Aizawl inkar Helicopter Service hi sumdawnna anga a neinung leh chuh helh peih apiangte bakah, a awlsam leh lirthei zin aia a nawm zawk avanga thlangte tan a ni lova, mipuiin kan khawp kham loh em avangin, damlo lirtheia phurh ngam loh te, pumpelh theih loh thil hmanhmawhthlak bik te, sawrkar duty hmanhmawhthlak avanga zin thut ngaite tana inken a ngai a. Hei vang hian vawiin atangin Helicopter a zin tum reng rengin ziakin Champhai DC hennah ticket dilna an thehlut thin tur  ani a. Dilna ah hian Helicopter a zin tulna chhan chiang taka ziah lan tur a ni. Ticket mamawh zual tak tak pek ngei an nih theih nan zin chhuah tumna helicopter thlawh hma ni 2 hmain ticket hi pek chhuah theih  ani lovang a. Ticket diltu zawng zawng pek vek sen loh tum awm thei a nih avangin, ticket dilna thehluh vanga chiangsa a ngaih loh tur a ni a, mamawh dan a zira ticket pek tur a nih avangin dilna thehluh hmain awmzia a nei kher lo tih hriat bawk tur a ni, tiin thupekah hian Champhai DC chuan an tarlang bawk.

TUI BILL :
Krismas leh Kumthar Kohhran mipu iruai buatsaih nan tui mamawh chuan 12.12.2016 ral hmain Sectional Officer Section-I Site Office, Kahrawt emaw, Section III Side Office DC Complex hlui ah in report tur a ni a. Tui bill pe tur ten 15.12.2016 ral hmaa pe tur leh hemi ni thleng hian Rs. 1000 leh Rs. 500 note hlui la pek theih a ni ang.

1ST DIVISION LEAGUE :
Nimin khan CDFA 1st Div. League chu Chhangphut Field ah tan a ni. Inkhel hmasa berah Venglai FC leh Zotlang FC inkhelin 2-2 in an inhneh tawh a. Inkhel vawihnihnaah Champhai United in si 5 faiin Vengsang FC an hneh a. Inkhel hnuhnung berah Bethel FC chuan Vengthlang FC chu 3-1 in an hneh bawk.

MZP TEN MIPUITE SAWM :
MZP Hqrs. Champhai chuan Zofest Dec 5-9 a Zokhawthar a thlen tur atan chak takin hma a la mek a, he hun hmang tur hian Mizo zawng zawngte an sawm tih MZP Hqrs. Champhai chuan a sawi.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Service Tanky (Rs. 52.08/litre) 

FIRE  OFFICE : 
(03831)234026

0 comments: