ni 7.12.2016 (nilaini)


ZOKHAWTHARAH ZOFEST TAN A NI TA :
Zohnathlak hnam peng hrang hrangte in unau na leh inpumkhatna tha zawk neihna tura MZP in a buatsaih Zofest vawi 6-na chu nimin atang khan Zokhawthar ah tan a  ni a. Environment and Climate Change Minister Lalrinmawia Ralte chuan a hmanpui.
Nimin chawhma Zofest hun hman, MZP General Hqrs. President lalsangzuala Ngente kaihhruaiah hian Minister Lalrinmawia Ralte chuan Ram inrelbawlnain a nghawng, Zohnathlak tlang hrang hranga in beng bel tawhte lungrual taka huang khata lawiza hun tur chu ramtina Zofate nghahfak a nih thu a sawi a. Zohnathlak, hnam hrang hrang, thlahtu chi khat kan nihna tichhe theitu leh min telkhawmtu pawimawh ber inunauna leh inpumkhatna tichhe theitu chu inlungrual lohna a nih thusawiin, Zohnahthlakte Inkhawmpui, Zofest chu lungrualna tlanga hlangtu leh a chhelai siamthatu ni thei se a duh tih a sawi.

India (Mizoram) leh Bangladesh inkara ram 2 inrina awmsa mah thinglungin a vei tawh laiin, helai ramri thirlen hmanga hung mek a ni chu Zohnahthlak rilru a tih nat zual a rin thu Lalrinmawia Ralte chuan a sawi. Engkim titheitu Pathianin rem a tih hunah chuan Zohnahthlak, ram hrang hranga awm mekte hi rorelna huang khatah pumkhata kan la awm ngei a beisei thu a sawi bawk. India (Mizoram) leh Myanmar inkar ramri hung chungchang India ram Sawrkar laipuiin Mizorama Political Party hrang hrang ngaihdan a zawhnaah Lalthanhawla kaihhruai Congress chuan engtik hunah mah ramri hung hi an remtih ngai dawn loh thu a sawi.
Nimin chawhma hunah MZP Gen. Hqrs. Vice President B. Vanlaltana pawhin thu a sawi a. Zofest Organising Committee Secretary L. Ramdinliana hnen atangin report ngaihthlak a nih bakah Zofest chibai bukna hun a hmang bawk. Chawhnu lamah Seminar leh Variety Programme hun hman zu a ni a, MZP Gen. Hqrs. Finance Secy Michael Zonuntluanga chuan kaihruaiin  Zohnahthlak hnam hrang hrang atangin Zofest chibai bukna leh Chin Literature & Culture Association buatsaih Zofest Music Video tlangzarh a nih bakah L. Keivom IFS (Rtd) chuan thu a sawi bawk.

KHAWBUNGAH FAINA HNATLANG NEI :
Khawbung VC te huaihawtin Krismas inbuatsaih nan khawtlang huap faina hnatlang Khawbungah neih a ni.
Niminpiah khan Khawbung VC te chuan Khawbung VC te chuan Khawbung khaw chhunga vantlang in bul leh kawng kama hnim thlo faiin an hnatlang a, khawchhung kawng penhleh, kawng khuar chhilhin kawngko chhak lama leivung tla hnawk an thian fai nghal bawk a ni. Faina hnatlang neih hma hian bawlhhlawh sawngbawl dan, bawlhhlawh tawih thei lehthei lo thliar hran dan inzirtirin nimin zing khan khawtlang mipui hnenah bawlhhlawh bawm sem nghal a ni.
Khawtlang mipui hnena bawlhhlawh bawm an sem hi PHE  Dept. atanga dawn a ni a. bawlhhlawh bawm dawng tute chuan Ration Card hmangin an la chhuak a. Ration Card nei lo leh Sawrkar hnathawk awm tharte chu bawlhhlawh bawmin a daih dan ang a sem kual tur a ni. Khawbung khawtlang chuan faina kawngah hma an lak that avangin PHE lam hotuten bawlhhlawh bawm hi sem an nih thu an sawi.

1ST DIVISION LEAGUE :
CDFA 1st Division League chu nimin inkhel chawlh lailawk a nih hnuin vawiinah Round 4 khelh chhunzawm leh a ni dawn.
Inkhel hmasa ber chawhma dar 10:30 ah Zotlang FC leh Vengsang FC hi an chak a nih chuan Vengsang FC lehpelin Table ah 3 naah an inhlangkai ang. Inkhel vawihnihna dar 12:30 ah Bethel FC leh Venglai DC an inkhel ang a, Venglai FC hi an chak a nih chuan midang result a zirin a sang pali zingah an tel thei bawk. Inkhel hnuhnung ber chawhnu dar 2:20 ah a mawngphaha awm mek Vengthlang FC leh hmahruaitu Champhai United FC te an inkhel ang a. Vengthlang FC hi an chak lo a nih chuan Final khelh beisei theih a ni tawh dawn lova, Champhai United hi an chak chuan Final an lut fel ve thung dawn a ni.

KHAR RIH DAWN :
Vanlallawma Indoor Stadium chuan tun thla ni 22 atang khian nakkum January ni 3 thleng khar a ni dawn a, hemi hun chhung hian hman theih a ni dawn lo.

LIRTHEI KHU ENDIK :
Kumin May thlaa an endik hnuah Mizoram Pollution Control Board, Aizawl chuan nimin atang khan Champhai DTO Office tualah lirthei khu an endik tan. Lirthei khu endik tir tur hian Two Wheeler ah Rs. 50; Three Wheeler ah Rs. 70; LMV ah Rs. 100; Medium Vehicle ah Rs. 120 leh Heavy Vehicle ah Rs. 150 chawi a ngai.

CHAMPHAI THALAI PAWL TREASURER BORAL :
Champhai Higher Secondary School Principal David Lalrammawia, kum 35 Champhai Venglai chu nimin zing dar 3 vel khan Stroke avangin a boral a, nimin khan vuiliam nghal a ni. David Lalrammawia hi Champhai in KTP General Conference a thlen tum khan Organising Secretary hna a chelh a, Champhai Thalai Pawl ah Secretary hna a chelh hnuah Treasurer hna chelh lai mek a ni bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Coupon Only (Rs. 52.08/litre) 

FIRE  OFFICE : 
(03831)234026

0 comments: