ni 8.12.2016 (ningani)


ZOFEST HMANG CHHUNZAWM ZEL :
Zofest 2016 ni 2-na chu nimin khan neih chhunzawm a niin, AH & Vety Minister Pu C. Ngunlianchunga chuan a hmanpui. Zofest Souvenir a tlangzarh bawk.
Minister chuan ram rorelna-in kan karah ramri kham mahse Zohnahthlakte thinglungah erawh ramri kham theih anih loh thu sawiin, ‘Zofate Jerusalem’ anih angin Mizoram pawn atanga inpui pantute hi khua leh tui a siam mai hi tha a a hriat thu leh, hemi kawngah zirlaite chu ke pen chhuak turin a chah a. Inlungrualna in hnam ropui a siam thei angin inpumkhatna leh in unauna tha in hnam a tungdingin, hmasawnna a thlen thin a ni, a ti. Inpumkhatna tak tak nei turin Zo-hnahthlakte pawmtlan theih tur Hming neih atul thu leh inbiak pawhna Tawng mumal tak neih a pawimawh thu Minister Pu C. Ngunlianchunga chuan sawi telin, Hnam bil
chawilen tumna leh hmasialna in inpumkhatna a ti chhe thei a, Chi leh hnam tlem zawkte thlauhthla lova inzah sak tawn hian inpumkhatna a siam zawk thin a ni, a ti a. Zo-hnahthlak te insuihkhawmna hmalatu Zirlai pawlte chu fakawm atih thu leh hetiang hun duhawm tak hman theih a ni chu vanneih thlak a tih thu sawi a.
Chawhma hun hi Pu Lalnunmawia Pautu, MZP General Hqrs. Treasurer chuan a kaihruai a, Mizo Students' Union President RB. Lalmalsawma pawhin thu a sawi bakah he hun hmanga lo kal hnam hrang hrangten chibai bukna hun an hmang a, Hnamlam hrang hrang leh zai nen hun hman a ni.

PAWISAAH HARSATNA TAWK :
Khawbung RD Block khaw hrang hrang mipuite'n an Bank dawr ber thin Mizoram Rural Bank Khawbung Branch te chuan Rs 2000 note bâk pek chhuah tur an neih loh avangin pawisa nawi awm loh harsatna a zual belh zel dawn niin a lang.
Kar kalta khan Khawbung Branch MRB-ah hian pawisa lak chhuah tur a awm mumal loh avangin pawisa hlawm lian deuhva lei leh pêk/hralh te, hna thawhna leh khawl (motor) hman man ang chi chu Bank Account transfer-in mi thenkhat chuan pawisaa an harsatna zualpui chu an su kiang a ni.
Nimina Khawbung Branch MRB dawrtute chuan Rs 2000 biin Rs 10000 (Singkhat) thleng an la chhuak thei a. Rs 500 leh Rs 1000 note hlui awm ang angte Bank lamah an dah luh rêm zel avangin Rs 2000 tlang hman chu a hma aiin a harsa tual tual dawn niin a lang.
Khawbung Branch MRB hi Khawbung khaw thenawm atang dawrtu an thahnem thei hle a. Inkalpawhna lamte a buaithlâk avangin mi pakhatin Bank account 4/5 te an inkenkêp thin a ni.
Branch Manager Pu Lalduhkima chuan Rs 100 leh Rs 500 note thar SBI lam atanga an pek chhuah thuai loh chuan an Branch mai bakah mipui lamah harsatna nasa zawk a thlen belh zel a ring.

SPECIAL HANDLOOM EXPO HAWNG :
MAHCO, Mizoram buatsaih Champhai Special Handloom Expo, ni thum awh tur chu nimin khan Champhai Town Hall-ah tan a ni.
He expo hawnna puala inkhawm tawi buatsaihah khuallian Pu CC Lalchhuangkima, DRDA Project Director chuan thu sawiin, Mizote hian kan thil deh chhuah ngei hi kan ngaihsan a tul tawh a, ram dang kut chhuak aia kan kut chhuak ngei kan ngaihhlut zawk hi kan hnam dinchhuahna tur a ni a. Handloom hmanga Mizo hmeichhiaten puan leh thil dang dang an siam chhuah hi economy atanga thlir pawhin Mizo tan thil hlu tak a ni a, a hlawhtlinna erawh chu Mizo mipui kutah a innghat a. Kan deh chhuah aia ram dang deh chhuah kan ngaisang zawk a nih chuan intodelhna lamah kan hlawhtling thei lovang, a ti a, tun hnaia pawisa tihthih avangin Champhaia Expo chu beisei pha lo ni thei mah se puantahtute tana expo hmanga remchang siamsak chu vanneihthlak a tih thu a sawiin, he expo hi a hawng a ni.
He hunah hian Pu RV Lalzara, MAHCO Secy pawhin thu sawiin, MAHCO hi kum 1979-a din a ni a, a thil tum ber chu thawmhnaw lama Mizote kan intodelh a ni a. Kan pi leh pute khan an thawmhnaw hak tur chu an intodelh vek a, mahse rambuai avangin nasa takin kan tlahniam a, Myanmar bakah Assam leh Manipur atangin thawmhnaw chi hrang hrang kan lalut a. MAHCO din hnuah thawmhnaw lamah hian nasa taka hmalak niin tunah chuan Myanmar, Assam leh Manipur-ah hian kan deh chhuah chu kan thawn tawh zawk a. Thawmhnawa intodelh tuma hmalakna kawngah hian puantahtute chu a fawng chelhtu an ni, a ti a, tun thlenga MAHCO a kal theihna tura an thawhpui Cooperative Society leh Industries Deptt te hnenah lawmthu a sawi bawk a ni.
Champhai Special Handloom Fair hi ni 9 thlenga neih tur niin Champhai, Aizawl leh Thenzawla puantahtu mi 21 te deh chhuah thawmhnaw leh thiamhnang chi hrang hrang chu mipui lei theih tura zawrh chhuah a ni a. Nimin a hawnnaah hian Cooperative Society lamin an hmanpui bawk a ni.

VAWIINAH CHIEF MINISTER CHAMPHAI-AH :
Vawiina Mizoram Chief Minister Pu Lal Thanhawla'n Champhai a rawn tlawh turah nimin khan lo dawnsawn dan tur ngaihtuahin DC Conference Hall-ah thutkhawm neih a ni.
He thukhawm hi Champhai DC charge la mektu Pu CC Lalchhuangkima chuan a kaihhruai a. Ruahman dan chuan Pu Lal Thanhawla hian vawiin hian Zokhawthara Zofest neih mek chu khuallian niin a hmanpui dawn a. Zanah Champhaiah rawn kirin Zirtawpnia Govt Champhai College-in NAAC accreditation-a B++ an nih an lawmna chu khuallian niin a hmanpui dawn a ni. Nimin thutkhawmah hian Champhaia Mizoram Chief Minister lo kal tur lo hmuah dan tur te, thil tih tur tul hrang hranga mawhphur turte an inruat a. Govt Champhai College-a hmun hman hi Champhaia Head of Office zawng zawngte chuan telpui vek tum nise an ti a ni.

AADHAR CARD SIAM HNA THAWK MEK :
Biometric enrollment, Aadhar card siamna chu tunlai hian DC Office, Keifangtlangah kalpui mek a ni.
Biometric enrollment hi Champhai bakah khaw hrang hrang atangin an pan khawm a. Thla hmasa atang khan kalpuiin kumin chhung chu DC Office-ah hian kalpui tura ruahman a ni a. Hei bakah hian block hrang hranga kalpui turte pawhin tunah hian training nei mekin, remchang hmasa berah block hrang hrangah hian kalpui leh tum a ni. Nitin khawsak phunga Aadhar card a pawimawh zel avangin biometric enrollment tih tum hi an thahnem hle a ni.

TUIBUR LEH SAHDAH AH CHHINCHHIAHNA TAR :
Gauhati High Court chuan Mizorama Tuibur leh sahdah siamtute chu vaihlo atanga siam thil dang ang bawka a hlauhawm dan tarlang ngei turin a hriattir.
Tunhnai a thupek a siamah Gauhati High Court chuan Tuibur leh Sahdah siamtu leh zuartute chu an thil siam leh zawrh chhuah zawng zawngah mihring hriselna atana a pawizia lanna thuziak tar vek turin thu a pe a. Tuibur umah leh Sahdah nuai sa dahna ip-ah ‘Vaihlo hian Cancer a thlen thei’ tih leh ‘Tuibur/Sahdah hi hriselna atan a pawi thei’ tih leh ‘Kum tlinglo hnenah hralh phalloh’ tihte ziaka tarlang turin a ti a. He thupek bawhchhiate chu COTPA 2003 dan hmanga hrem theih an ni ang.
Mizoram State Tobacco Control Society hotu Dr Jane R. Ralte chuan hetianga High Court-in thutlukna a siam ta chu lawmawm a tih thu a sawi a. He thil hi Assam state-a mi pakhatin Court-a PIL a thehluh atanga lo in tan a, Court hian thupek siam ta niin a sawi a. Mizoram sorkarin Gutkha a khap chungchanga chu High Court-ah mi thenkhatin an khing a. Court-in Mizoram sorkar thiam a chan tir hnu-ah Mizorama vaihlo kaihhnawih zawng zawng khap tura PIL thehluh leh a ni a. Chumi kal zelah chuan hetiang hian High Court chuan thutlukna a siam ta niin a sawi.
Mizoramah hian vaihlo leh a kaihhnawih ti an tam avangin cancer leh natna dang dang vei leh thih phah an tam niin mithiamte’n an ngai a. Chuvangin COTPA dan hi khauh taka kenkawh a ni a, meizuk phal lohna hmuna meizute chu vai-in pawisa chawitir thin an ni a. Ramdang atanga sikret lakluh, a bawma meizuk thatlohzia tarlan ve lohte pawh tam tham tak man a ni tawh a. Mizoram sorkar chuan sikret atanga chhiah lak thin pawh za zela 30-ah a tisang tawh a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Service Tanky (Rs. 52.08/litre) 

FIRE  OFFICE : 
(03831)234026

0 comments: