ni 10.1.2017 (thawhlehni)


CHAMPHAI CHHUAHSAN TA :
Tukin zing khan Champhai SDPO Pu Lalringliana Pachuau chuan Champhai chhuahsanin a awmna tur Kawnpui a pan.
Pu Lalringliana Pachuau, MPS hian kum 2 leh a chanve chhung Champhai SDPO hna a thawh hnuah nimin khan Pi C. Lalbiaksiami, MPS hnenah SDPO Champhai Sub-Division  charge hi a hlan a ni.
Pu Lalringliana Pachuau, MPS hi 1st IR Bn, Kawnpui-ah Asst. Commandant in a awm dawn a. Champhai a hna a thawh chhung hian Champhai Police te nasa takin hma an sawn mai piah lamah infiamna lam thlengin hma an sawn nasa hle a. 

Pi C. Lalbiaksiami, MPS hi Govt. Champhai College ah pawh Asst. Professor hna rawn thawk tawh niin tunah hian pasal neiin fa erawh an la nei hrih lo a ni.

CHIEF MINISTER IN TUIPUIRAL ZIRLAI PAWL CONFERENCE HMANPUI :
Chief Minister Pu Lal Thanhawla'n Inrinni khan Tuipuiral Zirlai Pawl General Conference vawi 32-na Leisenzo, Champhai District ah neih chu khuallian niin a hmanpui a, East Tuipui bialtu MLA leh Mizoram Youth Commission Chairman Pu T. Sangkunga pawhin he hun hi a hmanpui a ni.
Chief Minister Pu Lal Thanhawla chuan thalai leh zirlai te pawimawhna te hriain Sawrkarin thalai te tan khawvel thar buatsaihna kawngah theihtawp a chhuah mek thu a sawi a. Infiammna lamah te, zirna tha leh chhawrtlak zirlaite chherchhuahna kawngah te, sipai lamah officer thlenga thalaite a tam thei ang ber an luh theih nan te, mahni kea dinga eizawnna an neih theih nan te, Mizoram Youth Commission kaltlanga thalaite tan ram pawna eizawnna kawng hrang hrang dapna kawngah te Sawrkarin hmalakna hrang hrang a neih mek thu sawiin heng te hi thalaite hmakhuana tur a ni a, in chhawr leh in hman tangkai kan duh a, chuvangin heng ruahmanna chhawr ngei turin tumna in neih kan duh a ni, a ti.
Chief Minister chuan ama tawnhriat thil hrang hrangte sawiin zirlai ten an nu leh pate thuawih a, aia upa zahna te an neih chuan naktuk naktipah an ni hi khawtlang, Kohhran leh ram hruaitu leh nghahfak te an ni dawn a ni, a ti a. Taimakna atana hriselna a pawimawh dante sawiin Chief Minister chuan zirlai kalkhawmte chu thianghlimna ngai pawimawh a, mahni inthununna nei a, ei leh in ah insum a, zuk leh hmuam ah te fihlim turin a chah a. Cancer leh HIV/AIDS ah Mizoram dinhmun chhuanawm loh hi ngaihtuahin he thil hi zirlaiten veia ngaihtuahna seng turin a ngen a, hengte hi Mizoramah a vei an tlem theih nan midangte zirtira, theih tawpa an theihna apianga tan la a, midangte entawntlaka  awm turin zirlai te hi a chah a ni.
Mizo tawng a hausak leh a mawi thu sawiin tawng hi kan uluk a pawimawh a, tunlai thalai te hian kan tawng hman dan avangin kan tawng hausakna hi kan ti chhe mek em tih kan ngaihtuah chian ka duh a, kan tawng tih hausakna kawngah tan la turin zirlai te hi ka duh che u ni, a ti a. Tunlai zirlai naupangte ah tumna (ambition) fumfe tak neia zir an tam lo nia a hriat thu sawiin a hniam a ni emaw, a sang a ni emaw zirlaite hian tumna (ambition) in neih a pawimawh a, tumna mumal tak neia zirna kawng zawh hi thil tha tak a ni, a ti a. Chezia (manners) leh hawihhawmna kawng (etiquette) hi mihring nunah thil pawimawh tak anih thusawiin, heng te avangin miten min hmuh vawikhatnaah ngaihdan an siam thin a chuvangin hengte hi ngai pawimawha in nunah senglut turin ka chah duh che u ni, a ti bawk.
He programme ah hian Tuipuiral Zirlai  Pawl in an member zirna kawnga hlawhtlingte puala chawimawina thuziak an buatsaih chu Pu Lal Thanhawla, Pi Lal Riliani leh Pu T. Sangkunga ten zirlai ti tha te hnenah an hlan bawk a ni.
Zirlai te programme a hmanpui hmaa hian Leisenzo khawtlangin Chief Minister hi ropui taka lawmin vantlang inkhawm tawite an buatsaih a. Vantlang inkhawm ah Pu Lal Thanhawla'n Zo hnahtlak te inuanau tih chak te, inlaichinna tha zawk neih te leh inpumkhatna nghet zawk neih a pawimawh thute sawiin thlahtu te atangin inla hrang thei kan awm lova, inpumkhatna rilru kan put hi thil pawimawh leh tul tak a ni, a ti a. Mizoram hi Zo hnahtlak te Jerusalem a ni a, nu le pa nih tling lo mah ila, rilru zau tak pua nu leh pa tlin kan tum a tul a, hetiang tur hian kan rilru leh kan ngaihtuahna te kan hman a ngai, a ti a. Ram leilung fate zingah a neitu bik kan awm lova, neitu nihna leh mawhphurna inchen nei vek kan ni a ti bawk a. Pathianin min hunna theuh hi duhsak taka kan mihringpuite rawngbawl turah min dah a ni tih hi kan pawm a, chumi rilru pua khua leh tui tha niin kan phak tawk angin midangte tan malsawmna kan nih theuh a pawimawh a ni,  a ti bawk.

NLUP CHUNGCHANG SAWI HO :
NLUP Implementing Board (NIB) in Kuthnathawk tute ni January 14, District hrang hranga hman dan tur a ruahmanna zulzui in Zirtawpni khan Champhai Districta a hman dan tur chu Champhai DC Pu Vanlalngaihsaka hoin sawiho a ni.
Champhai District a khaw 6 Khawbung, khawzawl, Hnahlan, Ngopa, Biate leh Champhaiah te kut hnathawk tute ni hi hman tur ani a. Champhai ah chuan Chawhma Dar 10:00 ah Kahrawt Veng YMA Community Hall-a hman tura rel a ni a. Hemi ni atan Thupui thlanchhuah chu "Hah tak leh rim taka thawk chungin kan ei zawk ani" tih a ni a. NLUP tanpuina hlawhtlinpui tute hnen atangin an hnathawh dan leh hmalakna te thusawi leh NLUP kaltlanga Auto-Rickshaw dawngtuten mahni Auto-Rickshaw theuhah Flag tar nise ti a rel niin, Kuthnathawk tute Ni hmanpui tur hian YMA, MUP, MHIP, Local Council hruaitute leh mi pawimawh dangte sawm tura duan a ni a. Khaw danga hman dan tur chu BDO leh VC theuh te ruahman tura dah a ni.
Niminpiah sawihona thutkhawm ah hian Sawrkar Official hrang hrang te an tel a ni.

CM IN EAST TUIPUI BIAL KHAW THUM TLAWH :
Zirtawpni khan Chief Minister Pu Lal Thanhawla chuan East Tuipui MLA bial chhunga khaw pathum – South Khawbung, Zawlsei leh Khuangthing te a tlawh a, heng khuaah te hian amah lawm nan vantlang inkhawmte buatsaih a ni, khawtlang hruaitute’n an khaw mamawh hrang hrang a thlen bawk a. Chief Minister hi bialtu MLA leh Mizoram Youth Commission Chairman ni bawk Pu T. Sangkunga’n a tawiawm a ni.
Heng khuaa vangtlang inkhawm buatsaih ah te thusawiin Chief Minister Pu Lal Thanhawla chuan Mizoram mipui tam zawkte chu kuthnathawk te an nih avangin an hamthatna chu Sawrkar ngaihpawimawh berte zing ami a ni, a ti a. Zoram thar leh Zoram nuam siam turin kuthathawktute an pawimawh thu sawiin heng miten lei rem an rah a, khaw eng an hmuh a, an mahni khawbuzawl theuhva thlamuang taka eizawnna an hmuh a, an awm chu Sawrkar duh ber a ni a ti a. Hemi atan Pathianin hmanrua min pek chu NLUP hi a ni a, hun hmasa lamah te mi tam takin an hlawhtlinpuiin an dinchhuahpui  tawh a, hmusitna leh anchhiah hlawh karah pawh tunah hian a hlawhtling chho zel a, a chhan chu Pathian lamtang programme anih avangin a ni, a ti a. Kan thil tih reng reng hi mimal ang a ni emaw, chhungkaw angin emaw, tlawmngai pawl, Kohhran leh political party ang ten a ni emaw, Pathian lam tang anih chuan a hlawhtling thin a, hei hi a takin ka hmu a ni, a ti.
Sawrkar programme thar New Economic Development Programme (NEDP) chu NLUP chhunzawmna anih thu sawiin NEDP hnuaiah hian Agriculture leh Horticulture Link Road te ngaihpawimawh a ni dawn a, kuthnathawktute remchanna tur a tam thei ang ber siam tum niin Zokhaw lam hmasawnna a bika ngaihpawimawh a ni dawn a ti a. Ei tawk tawk economy atanga hralhchhuah tur nei economy lamah Mizoram hruai chhoh chu NEDP tum ber a nih thu a sawi a. Rinawmna, dikna, taimakna leh Pathian tihna nen a thawk leh hmala te chu mi hlawhtling leh chhuanawm anih thin thusawiin Sawrkar atanga hmathatna an dawn reng reng chu hetiang rilru pua dawngsawnga hmala turin mipuite a chah bawk a ni. Hmasawnna chungchang sawiin Sawrkar in a tum ber chu rualkhai taka Mizoram chhim leh hmar, chhak leh thlang ah kawng hrang hranga hmasawnna thlen tir a ni a, hemi atan hian theihtawp chhuah a hmalak mek a ni, a ti a. Mizoram hi Model State a siam tura theihtawpa tan kan lak chhoh mekah  hian ram leilung faten mawhphurna inchen kan nei a, hemi kawnga Sawrkar tawiawmtu leh puitu ni turin mipuite hi ka sawmin ka ngen che u ni, a ti. Bial chhunga kawng hrang hranga hmasawnna a thlen mek chu lawmawm a tih thu sawiin tawn hriat zau tak nei leh a ngaihna hria bialtu MLA an nei chu an vannei hle a ni,  a ti a.
Mipui te chu Kumthar duhsakna hlanin midangte tan malsawmna niturinleh entawntlaka awmturinchah bawk a ni. Bialtu MLA Pu T. Sangkunga pawhin heng khuaah te thusawina neiinEast Tupuibial chhunga hmasawnna hna thawk mek leh thawh tura hmachhawp leh ruahman mek te a tarlang a ni.
Nizan hmasa vek khan Chief Minister Pu Lal Thanhawla chuan Tuipuiral Annual Meet vawi 44-na chu Khawbung ah hawng a. Meet hawnnaah thusawiin Chief Minister chuan Tuipuiral ah chhum lo chat lovin kum 44 chhung infiamna hmanga helai khaw hrang hrang inkara inunauna boruak leh thawhhona tha siam a ni chu fakawm a ti thu a sawi a. Thalai te tana khawvel thar buatsaihna kawnga hmaraw pawimawh ber pawl chu infiamna hi a ni tiin Mizoram chu Hmarchhak state te zinga infiamna hmunhma nei tha pawl ber a ni, a ti. Infiamna hi hriselna tha neihna kawng ni mai lovin eizawnna tling a ni tawh a, Mizo thalai ngeite pawhin football hmangin hming chherin, sum an la lutin hausakna atan an hmang a, an fakawm hle a, midangte tan an entawntlak a ni, a ti. Meet hmang turah infiammi khaw 16 atanga kalkhawmte chu sports hmanga thian tha siama inunauna nghetsiamturina fuih a ni.
Tuipuiral Annual Meet hi kum 1973 atanga neih tan a ni.

REPUBLIC DAY HMANDAN TUR REL :
January ni 5 khan Champhai DC Conference Hall ah Champhai a Republic Day-2017 hman dan tur rel a ni.
Republic Day-2017 lawmna hi Chhangphut Field ah Dar 11:00 Am a tan tura rel ani a, Contingent 26 tel na tur March Past Parade leh Champhai District Football Association huaihawta Republic Day Football Tournament buatsaih tum ani. Hemi bakah hian Republic Day at Home pawh chhun dar 12:00 ah DC Bungalow, Keifangtlanga neih tura rel ani bawk.
Republic Day lawmna atan hian Department hrang hrang te chanvo leh thil dang inbuatsaih lawk ngai te chu ruat fel nghal niin Department hrang hrang ten celebration Fund an pek dan tur bithliah nghal ani. Thutkhawm ah hian Champhai District a National Day puala Sport Discipline hrang hranga Tournament huaihawt tur chu Champhai District Sport Committee in anmahni sum senga lo huaihawt tura ngen nise tia rel ani a, lawmman semna erawh chu National Day a sem tura rel ani bawk.

MZP IN DAMDAWI IN A THAWKTU IN DAIH LOHNA AH HMALA DAWN :
Dt 6 January 2017 khan MZP Hqrs Hruaiitute chuan District Hospital leh Nursing College building te an tlawh a, Medical Superintendent leh Chief Medical Officer te nen inkawmhona an nei.
District Hospital  hian Doctor awm tura beisei zat Norms a phalo hle a, Specialist bakah hian Medical Oficer pawh 11 vel awm turah 1 chiah an nei a. Indian Public Health Standard guideline ang chuan Department 17 awm turah Dept 9 i.e Eye Medicine, Gynae, ENT, Surgery, Pathology, Anaesthesia, Dental leh Ayush kan nei a, tin programme 2  NCD leh mental  health an nei bawk.
Heng zinga 9  ah hian guideline ang chuan specialist Doctor 13 nei turah 9 an nei mek a.
Nurse hi 45 nei tur an nih laiin  31 chiah an nei a, medical Officer(MBBS) phei hi chu 11 nei tur an nih laiin pakhat (1) chiah an nei bawk ani.
Heng bakah hian X-Ray Tecnician 2, Lab-Technician 6, ECG 1 leh fourth grade 22  an nei mek a. Hetiang taka an indaihlo chung hian District Jail an la vil tel bawk ani.
Indaihlohna nasa tak hi uluk taka thlir anih hnu leh khawi hmun mah indaih fal awma a lanloh vang hian duh ang zawng zawng a neih theihloh tih MZP chuan an pawm thu an sawi a.
Champhai District Hospital in  mamawh zual bik 
1) Naupang specialist 1nos
2) Inzai thiam. Tuna kan neih mek hi a zirzawm avangin damlo zai ngai te zai theih anni lova, a zirzawm chhung tal a aiawh tur 1.
3) Medical Officer (MBBS) 2nos
4) Pharmacist 1nos.
5) Jail Doctor 1. te erawh chu sawrkar hnenah ngen nise an ti bawk.
Hetiang khawpa harsatna mipuiin kan tawh avang hian Mizoram Quota a Doctor zir thin te pawh, Mizo mipui vang chauha Doctor zir thei annih inhrethara Aizawl chauh nilo, thingtlang kilkhawra Mizo mipuite harsatna leh mamawhna hrethiama sawrkar hna a lut hram turin MZP Hqrs Champhai chuan a ngen bawk.
MZP Hqtrs Champhai chuan Nursing College tur building sak thar tlawh in CMO nen inkawmhona thatak an nei a.  He Nursing College building hi a bankhur tur laih anih laiin Nursing Council lamin an rawn endika, recognition an pek theihloh tur thu leh, building pawh awm se admission leh certificate pekchhuah an Theihloh tur thu chiang takin an hrilh nghal a, chuti chung chuan Cheng Nuaih 360 bawr sengin he Nursing College Building tur hi sak luih anih thu MZP chuan sawiin Recognition a theihloh ti chunga Building sak luih anih takah chuan theihtawp chhuaha he building cheng nuaih tamtak senga sak hi a nihna tur ang taka hman anih a, Nursing College changtlung tak leh District Hospital indaihlohna pui thei tur kan neih thuai theihnan leh Polytechnic Building Tlangsam te, Zote Road a ITI Building sak thar te anga enkawl loh leh venloh anih lohnana hma la turin a satu sawrkar an ngen a, a sak ringawt nilo a hman tangkaina leh a nihdan tur lam min ngaihtuahsak tel thin turin sawrkar an ngen bawk ani.
Hetih lai hian MZP Hqrs Champhai chuan hnamdang Hminglem hmanga dawr siam te chu hnamdang sponsor tute chu Police Sation ah koh anni a, he hnamdang hian a khattawkin a ILP sponsor tu hi sa Kg te alo leisak thin thu an tarlang bawk
CHAMPHAI mipui Hnamdang ILP hmanga sponsor turte uluk tak leh fimkhur taka inngaihtuah turin Zirlai pawl te chuan ngen in,  Mizote hnuaiah keimahni hna ngei an thawh theihnana fimkhur taka ILP siamsaka enzui turin an ngen a, Zo khua kan neih hi MIZO te enkawl leh Mizo te ta anih zel theihnan MZP hqrs Champhai chuan hma a la zel dawn a, sumdawnna hi Mizo te ngeiin kan enkawl zel theihnana MZP Hmalakna te min thlawp turin Champhai mipuite MZP chuan a ngen bawk ani.

PAWNA DAILENG AWM LOHNAAH PUANG :
Champhai District chhung Village Council 108 zinga thingtlang (Rural) Village Council 80 te December 19, 2016 a Mizoram Sorkar in Pawn a daileng awm lohna (Open Defecation Free) a a puan hnuin, Champhai District huam chhunga khaw lian zual (Town) 4- Champhai, Khawzawl, Khawhai leh Biate chu Ministry of Urban Development (Govt. of India) chuan niminpiah khan Open Defecation Free-ah a puang ve leh ta a.  Champhai District chu Mizoram State chhung District 8 zinga ODF hmasa ber a ni ta a ni.
Champhai District a khawlian zual,  Champhai, Khawzawl, Khawhai leh Biate hi December thla khan Quality Council of India (Third Party Inspection TPI) in uluk taka an enfiah hnu-in, Open Defecation Free (khawlaia inthiar awmlohna hmun) ah puan a ni.   Champhai District huam chhung Town area bika Village Council 28 ah te hian Village Council zawng zawng te, School 97 (sawmkua pasarih),  School naupang 14,061(singkhat sangli leh sawmruk pakhat)  leh heng school zirtirtu zawng zawng te bakah Self Help Group ten ODF Self declaration an thehlut vek a.  Champhai District Urban Development Officer  Pi V. Lalmuanpuii chuan ODF Preliminary Declaration hi 23d Sept 2016 khan a tichhuak a.  Ni 15 (sawm panga) chhung mipui-ah sawiselna hun pekah sawiselna a awmloh avangin October 12, 2016 khan ODF Final Declaration hi tichhuak ta a ni.
Mizoram sorkar Urban Development & Poverty Alleviation Department in Sorkar laipui a Ministry of Urban Development-ah endik tura lehkha a thawn bawhzui hian Third Party Inspection (Monitoring) ti tura ruat,  Quality Council of India chuan kum kalta December thlan khan Champhai District a Urban area-te hi a rawn enfiah hnuah nimin khan Ministry of Urban Development (Govt. of India) chuan ODF-ah a rawn puang ta a ni.
Kum 2015 atanga Swachh Bharat Mission hman tan anih atang khan Champhai District chhunga Town area tin ah Ek in sa theilo leh neilo te uluk taka enfiah a ni a.  Heng Ek in neilote tan hian District UD&PA Department in a  sakna tur Incentive a pek atangin mimal Ek in 406 (zali leh paruk) leh Public Tiolet pakhat sak a ni a,  District Rural Development Department  nen tangkawpin heng mimal inthiarna sak nan hian convergence neih a ni bawk.
Champhai District in Faina kawnga hmasawnna rahbi thar a chuangkai hi mipui leh sorkar Department hotute chuan lawmawm an tiin,  Champhai District-in faina kawnga hma a sawn zel theih nan ropui taka lawm nise an ti a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Service Tanky (Rs. 52.08/litre) 

FIRE  OFFICE : 
(03831)234026

0 comments: