ni 19.1.2017 (ningani)


CHAMPHAI A ZIRLAITE HNENAH VOTE THLAK PAWIMAWHZIA ZIRTIRNA :
Systematic Voters Education and Electoral Participation (SVEEP) chungchangah nimin khan Champhai Higher Secondary School-ah Champhai DC Vanlalngaihsaka`n thusawiin zirtirna hun a hmang.
He hun, Zirsangliana, Principal kaihhruaiah hian DC Vanlalngaihsaka chuan zirlaite hnenah Electoral Roll chungchang a sawifiah a, Electoral Roll-a chuangte hian mawhphurhna pakhat an nei a, chu chu vote thlak a ni, a ti a. Roll-a awm dan leh awm tura tih tur pawimawhte a tarlang bawk. DC chuan electoral roll atanga hming paih tur an awm a nih chuan Objector chu Roll dang a mi a ni tur a ni lova, hming paih tur awmna roll a mi ngei a ni tur a ni a, a ti a. E/Roll atanga paih chhan tur tha tak a awm ngei ngei tur a ni, tiin. Vote thlaktuin vote a thlak dan tur chipchiar takin a lem nena entirin a sawifiah a, polling station chhungah Mobile phone kenluh phal loh a nih thte a sawilang tel bawk.

Vote thlak tur chuan Roll a awm ngei a ngaih avangin Roll a awm leh awm loh hre chiang duh tan District Election Officer pisaah a zawhfiah theih reng a ni. roll ah hian Polling station pahnihah awm phal a ni lova, pakhatah chauh a awm tur ani tih sawiin, mi tute hnenah mah kan vote kan hral htur a ni lova, kan chunga roreltu tur thlang kan nih avangin uluk takin kan thlang tur a ni a, kan vote duh thlang tur hian zalenna kan nei a ni, a ti bawk.
Zirlai lam atanga zawhna awm te chhangin DC chuan Voter`s ID chu tihbo palh awm thei a nih avangin dah that tur a ni a, lo tibo palh an awm a nih chuan Station BLO hriatpuina lehkha kengin DC Office, Election Branch-ah Rs. 25 sengin a thar a siam leh theih thu a sawi a. Inkhel tur leh eng engemaw a chhuak tur ten an kum tih naupan emaw tih upat emaw hi an duh thin a, hei hi khap tlat a nih thu a tarlang bawk. Ni 25 khian Voters Day hman tur a ni a, chutah chuan kal vek turin zirlai te a sawm a ni. Chairman Zirsangliana, Principal chuan DC leh a Staff te chungah lawmthu sawiin he hun hi a khar a ni. 
SVEEP chungchang zirtirna hi nimin chhung dar 12 khan Govt. GM Higher Secondary School ah pawh neih a ni a. He hun hi Lalthantluanga Tochhawng in kaihruaiin, C. Lalzarliana, Addl. DC, ERO chuan thusawiin Vote nei thei chin te chuan Vote thlak ngei hi kan mawhphurhna a ni , a ti a. Vote nei si, Vote thlak duh lo te avangin Vote hmuh zat in ang te a awm thin avangin harsatna a thlen theih a ni, a ti. Kan ram hruaitute thlannaa Vote thlak hi khua leh tui tha nihna a ni a, Vote thlak nachang hrelo leh Vote thak duh lo khua leh tuitha ni lo chu van khua leh tui tha pawh a nih teih bik lovang, a ti bawk.
Kum tling tawh si Electoral Roll a hming la chuan glo tam tak a awm theih a, India khua leh tui dik tak kum tling tawh te E-Roll ah an chuang ngei tur a ni, a ti bawk. He hunah hian Vote thlak pawimawh dan  leh E-Roll a inthun thar tur te tan hriat tur pawimawh chi hrang hrang bakah tul leh pawimawh te inhriattirna neih a ni bawk.

CHHAWRTUI-AH ANTAM KUT HMANG :
Champhai District huamchhunga awm, in 243 awmna khua Chhawrtui khawtlang chuan Thawhlehni khan Tuichang lui Bung kaiah Nul Kut an hmang a, Nul Kut hi Chhawrtui Khawchhuak Welfare leh Nul Lut Organizing Committee ten Tuichang kama an nul an (Antam) chinte Chemical leh Fertilizer hmang lova kumtin tha taka an thar chhuah lawmna leh Zoram mipuiten an Nul an te Chemical leh Fertilizer tel lova an thar chhuah a ni tih an hriatpui theihna tura an buatsaih a ni.
Chhawrtui MUP President  Pu Chhawnkima kaihhruaia Nul Kut lawmnaah hian Chhawrtui Khawchhuak Welfare Chairman Pu Lalkiamlova chuan lui pahnih kar dana awm Chhawrtui khuain Pathian malsawmna tam tak an dawnnaa lawmthu sawina leh Chhawrtui khua chu Chemical leh Fertilizer tel lova Zoram mipuite Antam tui leh hrisel tak a chawmtu an nih zel theihna tura buatsaih a ni a ti a. Kumtina ram thar ang maia tha a Antam chinna hmun Tuichang zawl an nei chu Pathian malsawmna liau liau a ni a ti a, thalaite chu taima taka hnathawk a, ruibo leh dawngdah mai lova chhungkaw awhawm nih phahnana hmang turin a fuih a ni.
NUL KUT lawmnaah hian Pu R. Zothanmawia, Chhawrtui Village Council Member chuan Tuichang zawl a Nul an an chin chhoh dan a sawi a, a tarlan danin Tuichang zawlah hian kum 1938 atangin Chhawrtui khawtlang chuan Nul an an ching tan a. Kum 1955 atang khan khaw thenawmah zuar tanin kum 1978 a Jeep Road laihtlang anih hnuah phei chuan mipuiten nul an chin uar leh zualin hemi kum atang hian an zuar uar leh zual a. Kum 2005 atang khan Chhawrtui leh Aizawl inkarah Motor Service awmin Aizawl lamah an zuar ve tan a. A tirah chuan an Antam te hi a that em avangin Chemical Fertilizers an hmang anih ringin mipuiten an lai tha ngam lo hial a ni. Kum 2012 khan Tuichang zawl panna kawng zauh anih hnuah Tuichang zawlah ngei an Antam Commission tuten an laksak a, kum 2012 atang khan Antam/Nul an hralhna atang hian cheng nuai 5-8 thleng an lei thin a. Ruahtui tla tam lutukin Tuichang lui a tih len avangin a hun takah Nul an ching thei lo mahse kuminah hian  Pick Up Trip 18 vel hralh tawhin cheng nuai 4 chuang sum an hmu tawh a. Pu R. Zothanmawia chuan Zoram mipuite chu Chemical leh Fertilizer hmang lovin Antam an ching tih hriatpui tura an duh thu leh an ram thatna an hlawkpui leh zual theihna turin Tuichang Lei panna kawng chhe lutuk siam thatsak turin Tuichang a Lei dawhsak turin thuneitute an ngen a ni.
Nul Kut lawmnaah hian Chhawrtui khaw mipuite leh an khawchhuak, khaw hrang hrang atangin mi 850 chuang an tel a, thusawi leh zaite ngaithla in lam thiamte an lam a, hlim leh lawm takin tlaiah Kut ruai an theh a ni.

CHAMPHAI DISTRICT MIZO TRADITIONAL GAMES 2017 KHAR :
Nimin khan Education Minister Pu H.Rohluna'n Vanbandhu kalyan Yojana (scheme) Ministry of Tribal Affairs in Traditional Games tih hmasawnna a tana a ruahman, Ngopa a huaihawt chu a kharna hun a hmanpui.
Kharna inkhawmah hian bialtu MLA Pu H. Rohluna chuan thu sawiin " Hnam ziarang leh hnam infiamna vawn nun nachang hria hi Hnam Ropui leh Hnam Changkanga min siamtu a ni" a ti. Mizo infiamna chu hlamchhiah mai loa awi nung zel turin kalkhawmte chu a chah a, taksa hriselna leh zirna a tan bakah Tourist hip nan pawh a that thu a sawi bawk a ni. Taksa mamawh tawka infiamna leh taksa hriselna kalpui chu zirlai tan pawh a that thu sawiin zirlai tibahlah loa infiamna uar turin zirlai kalkhawm te chu a fuih a ni. Sports hmasawnna atana Chief Minister Pu Lalthanhawla leh Sports Minister Pu Zodintluanga te hmalakna chu fakawm tiin a rah chu mizo thalaiten an seng mek thu a sawi a, thalai tamtak in eizawnna an hmuh phah thu a sawi bawk a ni.
Khawtlang aiawh in Pu F.Zothansanga, VCP, Ngopa in thu a sawi a, Sports & Youth Services Department in Champhai District Traditional Games Ngopa a an nghat chu lawmawm tiin bial tana thahnem ngaitu Pu H. Rohluna chu fakawm a ti a, a zarah Ngopa khua in hmasawnna tamtak an hmuh thu a sawi a ni. Traditional Games ah hian mizo infiamna chi hrang hrang ketaminu kal, mizo inbuan,insuknawr, insaihruipawh, arpa insual leh kalchhet kal ah te intihsiakna neih a ni a.
Khuallian chuan lawmman la te hnenah lawmman certificate leh sumfai a sem a. He Mizo Infiamna a School tel te hnenah Football, Volleyball leh Volleyball Net a hlan theuh bawk a ni.
Kharna inkhawm hi Pu Vanlalruata, State Adventure Organiser in a kaihruai a, Sports & youth Services Department Official in lawmthu sawina in hun a khar a ni.
Kharna inkhawmah hian Bialtu MLA bakah, Pi Vanlalhruaii BDO, Ngopa , Ngopa a Sawrkar Official hrang hrangte leh School naupangte an fuankhawm a ni.

LAWMTHU SAWI :
Nimin khan Vangchhia khawtlangin, Tuipuiral Annual Sports Meet Vawi 44-na a Volleyball Champion lawmna neiin khawtlangin Pathian hnena lawmthu sawina hun an hmang.
Volleyball a an Champion pual hian nizan hmasa khan Presbyterian Kohhran Biak Inah inkhawmna an nei a, nimin zing khan Player te chawimawina hun hman niin, chhunah khawtlangin Pathian faka zaikhawmin hun an hmang a, tlaiah ruai an theh bawk.

REPUBLIC DAY FOOTBALL :
Nimin khan CDFA buatsaih Republic Day Football Tournament chu Chhangphut Field ah khelh chhunzawm leh a ni.
Nimin inkhel hmasa berah FC Vengthlang North leh Zotlang FC inkhelin FC Vengthlang North 3-1 in hnehna an chang a, inkhel vawihnihnaah Police FC leh New Champhai FC inkhelin Police FC in 4-2 a New Champhai DC lehthalin hnehna an chang a, inkhel hnuhnung berah FC Tlangsam leh Venglai FC inkhelin Tlangsam hian 3-2 in Venglai hi an hneh a ni.
Vawiin hian inkhel chhunzawm leh a ni ang a, inkhel hmasa ber chawhma dar 11:30 ah FC Tlangsam leh Kanan FC an inkhel ang a, inkhel vawi hnihnaah Zote FC leh New Champhai FC an inkhel ang a, inkhel hnuhnung berah Dinthar FC leh Zotlang FC te an inkhel bawk ang.

MJA HNENAH HLAN :
District Urban Development Officer V. Lalmuanpuii chuan MJA Champhai District hnenah Letter of Appreciation a hlan.
MJA hnenah hian Champhai District huamchhunga Town Area, heng Champhai, Khawzawl, Khawhai leh Biate te chu Open Defecation Free-ah puan a lo ni ta a. Mizoram pumah Record siam a ni hi a lawmawm hle a. Hetiang dinhmuna Champhai District a thlen theihna atana hmaltu zawng  zawngte hnenah leh hemi chungchanga a tul anga thehdarh hna lo thawk thintu Mizoram Journalists` Assn, Champhai chungah SUSO leh a Staff te, Champhai chuan lawmthu an sawi thu an Letter of Appreciation ah hian an tarlang.

VENGTHLANG N LOVIN VENGLAI ZAWK :
Nizan ZONET Chanchinthara Champhai khuaa cheng pawisa thi man leh a kaihhnawih chungchang tarlana C. Lalawmpuia, Champhai Vengthlang tia tarlan chu Champhai Vengthlang ni lovin C. Lalawmpuia (24) s/o C. Lalzedinga, Champhai Venglai tih zawk tur a ni e.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Tanky Full (Rs. 66.97/litre)
Diesel    : Tanky Full (Rs. 56.67/litre) 

FIRE  OFFICE : 
(03831)234026

0 comments: