ni 10.2.2017 (zirtawpni)


TUIHNA CHUNGCHANG SAWIHO :
Nimin khan Champhai DC Conference Hall, Keifangtlang ah District Level Workshop on Mission Water Conservation chu Champhai Bawrhsap Pu Vanlalngaihsaka, IAS, hoin neih a ni a, hemi chungchanga a kaihnawih Department hrang hrang an thukhawm.
Workshop ah hian Champhai District huam chhunga tui hna humhalh leh fur ruah tui khawl pawimawhna leh kalpui dan tur rel niin, a hmun tur te pawh ngaihtuahin line Department hrang hrang rawtna thlen te chu sawiho a ni a. Heng rawtna leh ruahmanna duan chhin te hi uluk taka zirchian leh tur niin, Sawrkar Laipui hnenah Report kimchang nen la theluh leh tur a ni. He Workshop hi MGNREGA Annual Action Plan 2017-18 hnuaia hmalakna tur bawhzuia huaihawt a ni.

Thutkhawm hi Pu CC. Lalchhuangkima, MCS, Project Director, DRDA, Champhai in a kaihruai a, Department hrang hrang Agriculture, PHE, Soil & Water Conservation, Horticulture leh DRDA Officials te an tel a ni.

VAI LAL LOKAL :
Ni 8.2.2017 (Nilaini) khan Union Home Ministry hnuai a High Powered Committee din Madhukar Gupta Committee for Border Protection chuan Champhai a tlawh a, Champhai Bawrhsap Pu Vanlalngaihsaka, IAS, Champhai SP Pu  Brijendra Kumar Yadav, IPS leh Champhai District Sawrkar Official hrang hrang ten lo dawngsawngin Indo-Myanmar Border kaihnawih a thil chi hrang hrang an sawiho.
Meeting ah hian India leh Myanmar Border kaihnawih thil chi hrang hrang Ruihhlo tawlhruk, Silai Tawlhruk, Land Customs Station, lei dawhthat chungchang, Border Trade, Ramri Phui thalo  leh lamlian chungchang  te sawiho a ni a. Harsatna chi hrang hrang te chu Committee member te hnenah thlen niin Member te hriat duh Zawhna leh Chhanna neih nghal a ni. Bawrhsap Pu Vanlalngaihsaka leh SP Pu Brijendra Kumar Yadav ten Committee Member te hnen a an sawilan dan in Kum 2016 chhung in Champhai District ah Ruihhlo cheng Nuai 15 hu, Silai leh pistol engemawzat man niin NDPS Act hnuai ah case 28 ziahluh a ni a, India leh Myanmar Ramri chu hmun 12 ah awlsam taka luhruk theih a nih thu tarlan a ni bawk. Champhai DC chuan Ramri hung leh tih phui that a pawimawh thu thlenin kawng hrang hranga hmalak ngaihna leh hmalak tawhna chungchang chu ziakin a thehlut bawk a ni. Hemi bakah hian Border Security Force (BSF) leh Border Roads Organisation (BRO) Officials te pawhin harsatna an tawh chi hrang hrang te chu lo thlenin harsatna sutkian dan tura ruahmanna tha ni a an hriat pawh an sawi lang a ni. Committee Member te chuan harsatna te chu tha taka lo ngaithla in Report kimchang nen Sawrkar Laipui ah thlen a hmalakna tur pawh anlo zirchian tur thu an sawilang a ni.
Champhai Assam Rifle hmuna Meeting neih ah hian Madhukar Gupta Committee Chairman, Union Home Secretary ni thin Pu Madhukar Gupta, Dr. Arvind Gupta, Deputy National Security Adviser, Pu Ashok Prasad, Adviser (Technology,Ministry of Home Affairs), Dr. Shivananda H, Deputy Director, National Security Council Secretariat, Champhai Dc Pu Vanlalngaihsaka leh Champhai Sp Pu  Brijendra Kumar Yadav bakah BSF, BRO, Assam Rifles leh Champhai District Official hrang hrangte an tel a ni.

VAPHAI-AH TUIPUIRAL GROUP YMA CONFERENCE NEI :
Tuipuiral Group YMA Conference chu nimin khan Vaphai Community Hall ah neih a ni.
He hun hi PB Rosanga, President, Tuipuiral Group YMA chuan a kaihruai a, nimina rorel inkhawm neihah Tuiral Group YMA hian Documentary Sub-Comt din rawh se tih te, Group YMA hminga Tiau Lui dung nungcha te humhalh nise, TGYMA Committee in hmalak dan tur lo ngaihtuah bakah sawrkarah thlen nirawhse tih te an pawm a. Tuipuiral Group huamchhunga Ruangthlak ni leh thlannghah nia ei siam dan inang tlanga hman a nih theih nan Group YMA in ruahmanna siam rawh se tih te pawhin. Tuipuiral Group YMA huamchhunga Ruihhlo Do kawnga Branch tinte chak zawka hmalak a nih theih nan Group YMA inruahmanna siam rawh se, tih chu Branch hrang hrang ten tun aia nasa zawkin hmalak theuh nise tiin lungrual takin an pawm.
East Tuipui Constituency tih chu Tuipui Constituency tia thlak ni rawh se tia pawmin, Group YMA sum hnar atan an Group chhung khaw lian deuhah in sak emaw thil dang remchang siam ni rawh se, tih chu lungrual taka pawm a ni. Kum 2018 Group YMA Rorel Inkhawmna hmun, a hun chhung leh hman dan tur chu ruahmanna siam a ni bawk a. Kum 2018 Rorel inkhawm chu lang a hman nise an ti a, a hun leh ni leh hmun tur chu Tuipuiral Group Committee in lo ngaihtuah se ti a pass a ni a. Kum 2019 Group Conference chu Vangchhia ah nghah a nih bakah kum 2017 Budget atan Rs. 1,17,150 chu lungrual taka pawm a ni.
Hei bakah hian Group YMA hmalak mekna leh bawhzui turah Cultural Centre din te, Lurh, Tan leh Zopui tlang leh a chhehvel humhalh leh a tul anga sawrkara bawhzui t, Tuipuiral Group huamchhunga kawngpui siam that a nih theih nana hmalak te, Tuipuiral Group huam chhunga pHC a Doctor awm lohna hmuna Doctor dah leh Police Out Post dah tura hmalak te an rel bawk.
Nimin Conference ah hian kum 2017-2019 chhunga Tuipuiral Group YMA hruaitu turte CYMA kaihhruaina hnuaiah thlan a ni a. 
President : Lalniliana, Khawbung
Vice President : MC Romawia, Farkawn
Secretary : MC Lalramenga, Vaphai
Asst. Secretary : C. Liantluanga, Leithum
Treasurer : C. Lalpekthanga, Sazep
Fin. Secy : Thangmunga, Sesih
Conference hi Central YMA, YMA Sub-Hqrs. Champhai hruaitute leh Champhai zaithiam thhnem takin an hmanpui a ni.

CHAMPHAI POLICE TEN RUIHHLO AN MAN :
Nimin zing dar 4:30 vel khan Champhai Police te chuan Zokhawthar kawngah Myanmar atanga lakluh Rs. nuai 21 man Heroin Gram 555 an man a. heroin neitu a puh Zokhawthar mi 2 an man tel bawk.
Champhai a Mizoram Police hotute hnen atanga thudawn danin Heroin Gram 555 hi an thu dawn bawhzui a man an nih thu leh Myanmar atanga lakluh Heroin hi Zokhawthar atanga Champhai lam panpui a nih laiin Melbuk leh Zokhawthar inkarah nimin zing khawvar hma deuh khan man  a ni a. Heroin neitu a puh Lalhmunsiama kum 20 s/o Lalropuia leh Lalthansangin kum 40 d/o Lalthangliana, Zokhawthar a cheng ve ve nia inchal te hian Registration mumal pawh neilo Two Wheeler ah heng ruihhlo man takte hi an phur a. Heroin manna hmunah hian hruaipuitute awm laiin tih tur tul tih nghal niin lirthei pawh hi man a ni bawk.
Heroin man tak hi sahbawn bawm 42 a dah niin a hlut zawng hi tualchhung hralhna a chhutin Rs. nuai 21 man hu a ni a. Champhai Police Station ah ND&PS thubuai siamsak a nih hnuah Heroin neitu a puhte hi nimin chawhnu khan Champhai District Court a hruai an nih hnuah Champhai District Jail ah dahluh nghal a ni.
Champhai Police te hian nizan hmasa dar 8:45 khan Mualkawi bulah Maruti Car atangin Heroin hawng khat leh a neitu Thluaichini kum 54 w/o K. Lalsangliana, Khuangthing khua nia insawi chu an man bawk a. Nimin khan Court ah hruai niin District Jail ah dahluh a ni.

AWARENESS NEI :
Nimin zing khan Joint YMA Ngopa leh Forest Dept tangkawpin Zawlbuk ah Fire Prevention Awareness campaign neih a ni. He hunah hian F. Zothansanga, VCP Ngopa, Vanlalhruaii, SDO Ngopa leh V. Lalsangzuala, Treasurer Joint YMA Ngopa ten thu an sawi a. Kangmei tichhuak lo tur leh kangmei laka kan him theih nan theihtawp chhuah a hma la turin kalkhawmte fuihna thu an sawi.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Semrual (Rs. 56.67/litre) 
JCB/12 wheelers - 79.4 lits
Truck - 65.2 lits
1109/909 - 51.1 lits
407/LPK - 31.7 lits
207/Sumo - 19.4 lits
Tata Ace/Super ace/SUV/Car etc. - 10.5 lits

RD PUMP
Petrol    : Free Sale 
Diesel    : Beisei 

FIRE  OFFICE : 
(03831)234026

0 comments: