ni 20.1.2017 (thawhtanni)

MBBA ATANGIN CDBBA CHHUAK :
Ni 18.2.2017 (Inrinni) tlai khan Champhai District Basketball Association (CDBBA) chuan I&PR Conference Hall-ah Press Conference neiin Mizoram Basketball Association (MBBA) atanga an inhnuhdawh thu an tarlang.
Pu C.Vanlalnghaka, President CDBBA kaihhruaiah hian Mizoram Super League (MSL) Season 4-na khel tura playoff khelhah CDBBA Affiliated Club Minikins Basketball Club te disqualify an nih chungchangah MBBA laka an lungawi lohna an tarlang a. CDBBA-in Minikins BC te document a kentir a pawm lo te, CDBBA lehkha leh ngaihdam dilna a pawm lo te, Ni 11.2.2017 (Thawhtanni) a playoff khel team pathumte kohkhawmnaa CDBBA thuin ngaih pawimawh a hlawh lote chu pawi an tih thu sawiin, CDBBA chuan Mizoram Basketball Association chu in ziahluhna tlakah a ngai lova, hei vang hian MBBA atangin CDBBA hi a inhnukdawk ta a ni, tiin an sawi.

MSL4 Playoff atanga Minikins BC te disqualify an nih chungchang pawh tarlangin, Minikins BC in player transfer chungchanga a document ken chu a famkim lo a. Mahse CDBBA hian transfer chungchang chu club te zalennaah a dah a, CDBBA atanga lehkha a ken chu an pawm duh lova. Document lem an siam nia sawi erawh thudik lo hulhual a ni, an ti a. Inkhelh zawh hnua VR4 leh Dawrpui Vengthar SC te complain pawm a nih dan pawh chu FIBA complain dan zawm a nih loh chu pawm a ni ta tho niin an tarlang tel bawkin, Minikins te disqualify an nih chungchangah hian MBBA lamin thu leh hla an thlak chhen avangin a chhan dik tak hi an hriat theih bik loh thu leh MBBA in Minikins an Disqualify chhan an sawite hi CDBBA chuan chan tlakah a ngai lo a ni.
Press mite zawhna chhangin CDBBA hruaitute chuan talent nei tha zawkte hmasawnna kawnga hmalak chhoh zel an tum thu an sawi bawk.
Press Conference an neih hma hian CDBBA hian Champhaia tlawmngai pawlte kawmin an kal zel dan turah inrawntlanna an nei a, hemi hnu hian General Body Meeting neiin an pawl kal zel dan tur chungchang an lo ngaihtuah tawh bawk a ni.

GREEN RIBBON CLUB DIN :
Zirtawpni tlai khan Govt. Champhai College Seminar Hall ah Dist Mental Health Prog Champhai leh Mission Moundation Movement(TI) buatsaihin College Student Union OB leh Class Representative te nen Green Ribbon Club din a ni.
He hun hi Pi C.Lalnunpuii Associate Professor Mizo Deptt. chuan kauhruaiin,Champhaia Green Gibbon Club din a nih ve ta chu lawmawm a tih thu leh, zirlaite pawhin an hlawkpui ngei a beisei a tih a sawi a, rilru hriselna chungchangah zirlaite chu an thiante tanpuitu nih turin a chah a ni. He hunah hian Dr.Elizabeth, Psychiatric Social Worker chuan Green Ribbon Club kalphung leh hmalak zel dan tur te sawiin, Green Ribbon Club hi India state ramah pawh la kalpui loh a nih laiin, Aizawl ah din ani tawh a, Champhai ah pawh din ani ve thei ta hi lawmawm a tih thu a sawi a ni. 
He hunah hian Jane Lalduhchhungi, Clinical Psychologist chuan Mental Health clinic a damlo an enkawlte dinhmun leh rilru hriselna langsar zualte zirtirna hun a hmang bawk. Programme khar nan hian kalkhawmte chuan "rilru lama natna neite thinhrikna hian thinlung a hliam thin avangin,thinhrika awm thin paih kiang turin leh rilru hrisel tak nei reng chunga midangte puih leh thlawp tlat ka tum ang a, rilru hriselna hi keimah atanga intan tur ani tih hi ka hre reng bawk ang" tiin thutiam an sawi rual bawk a ni.

BSI CIRCLE MEET HMANG :
Zirtawpni atang khan Pathianni zan thleng awh Champhai Vengthlang Presbyterian Kohhran Biak Inah Bible Society of India Champhai Circle Meet vawi 11-na a tiak ta.

Zirtawpni zan khan local area leh Circle secretary theuhte chuan report an pe a, Inrinni khan Vengthlang Kohhran Committee Room-ah Circle committee hi an thukhawm a, Cicle Meet hi neih chhunzawm zel nise tia relin nakum Circle Meet vawi 12-na chu Khawbung Branch hnuaia Khuangleng South Area-ah nghah nise an ti a, hemi atana Office Bearers te leh Branch tin aiawh tur Committee member te an ruat fel nghal bawk.
Aizawl Auxiliary hnuaia awm Champhai Circle Meet Vawi 11-na hi Besy Choir te chuan an rawn hmanpui a, Pathian biak inkhawmah zai rawngbawlna neiin, Champhai North leh South BSI zaipawlte bakah Area zaipawl, Masihi Sangati leh Kohhran zaipawlte hnen atangin zai ngaihthlak thin a ni. Vawiin khan chawhma leh chawhnu Pathian biak inkhawm a ni a, naktuk hian chhunzawm lehin zanah Meet hi a tiak dawn a. Meet hmang hian mikhual riak lut mi 305 awmin langa chhimtu mi thahnem tak an awm bawk.
Champhai Circle huam chhungah hian Area 27 awmin, local 202 a awm bawk a. BSI hnuaia rawngbawl tlang Kohhrante chu Presbyterian Church of India, Baptist Church of Mizoram, Salvation Army, United Penticostal Church NEI, Seventhday Adventist Church, Weslyan Methodist Church, Zomi Baptist church, Assemblies of God, Evangelical Free Church of India, Gospel Baptist Church, Christ Redemption Church, Isua Krista Kohhran Kros Var, Covenant Chuch leh Prebyterian Chuch of India Reformed te an ni.

MFA KHEL TURIN BETHEL FC :
MFA Cup khel tur Bethel FC te chuan ngawrh takin inbuatsaihna an kalpui mek.
MFA Cup 2017 Lungleia khelh tura Champhai District aiawha kal tur Bethel FC te chuan inbuatsaihna ngawrh takin an kalpui mek zel a, inrinni khan CDFA hruaitute nen infuihtharna an nei bawk. MFA Cup 2017 hi February ni 28 atangain Lunglei Thuamluaia mualah tan a ni dawn a, Bethel FC te hi Pool A ah Aizawl District aiawh, Mizoram Police FC, Mamit District aiawh Chhim Veng FC leh Lawngtlai District aiawh North Gate FC te nen an awm ho va, Pool B ah Siaha Distric aiawh FC College Vaih, Serchhip District aiawh Hmar Veng FC, Lunglei District aiawh Bazar Veng FC leh  Kolasib District aiawh Project FC te an awm bawk. 
Bethel FC te hian an match hmasa ber March ni 2, Ningni chawhma dar 11:00 ah North gate FC an hmachhawn ang a. An inkhelh kual hnuah Pool A leh B a point hmusang pahnih te hian Semifinal an lut dawn a, March ni 10 ah final khelh ani ang a, Champion in Cheng Nuai 1 leh Trophy an dawng anga, pahnihnain Cheng Sing 5 leh Trophy an dawng ang a, Semifinalist ten Rs 15000 an dawng ang a, hei bakah hian Fair Play leh mimal lawmman Best Player leh top scorer hnenah lawmman pek an ni ang a, Team tel semifinal thleng zo lo te hnenah Cheng Sang 5 theuh hlan an ni bawk ang.

VAWIIN DINHMUN :
MIZOFED POL (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol : Free Sale (Rs. 66.97/litre)
Diesel : Semrual (Rs. 56.67/litre)

RD PUMP (9862137196)
Petrol : Free Sale 
Diesel : Nil

FIRE OFFICE : 
(03831)234026

0 comments: