ni 24.2.2017 (zirtawpni)


INSAK TANPUINA DIL HUN HAWNG THAR :
Pradhan Mantri Awas Yojana-Housing for All (Urban) hnuaia insak tanpuina dil hun hawn thar leh mekah diltu an thahnem hle.
PMAY HFA dilna hi Champhai District UD&PA Dept chuan hawngin, vawiin thleng khan form la chhuak hi mi 1800 bawr vel an awm tawh a, hemi rual hian form fill up zo tawh thehlut tur pawh vawiin khan chawhnu thleng khan an intlar a ni. In sak tanpuina hi naktuk thleng hian dilna hun hawn a ni a, Aadhaar card nei lote tan chuan tun dinhmunah dilin awmzia a nei lo niin UD&PA a thawkte hnen atanga thudawn a ni.

PMAY HFA (Urban) hnuaia in sak tanpuina, BLC dawng tur hi a thawhkhatna tihchhuah a ni a. Champhai Proper town huam chhunga VC hrang hrang heng: Hmunhmeltha, Vengsang, Kahrawt, Vengthlang, Vengthlang North, Venglai, Electric, Kanan, Dinthar, Bethel, Zion Veng, Vengthar, New Champhai, Zote, Tlangsam, Zotlang, Ruantlang leh Chhungte atangin mi 2421 in an hmu tawh a ni.
PMAY Housing for All hi Ministry of Housing and Urban Poverty Alleviation hnuaia kalpui niin kum 2015 atang khan bultan a ni a, kum 2022-ah chuan India ram mi zawng zawngin chenna in an neih theihna tura sorkar laipui hmalakna a ni a. Ram nei, in sakna tur neilote hnenah cheng nuai 1 leh sing 5 chu in sak tanpuina atan hian pein, a satute hian cheng sing 5 in an dolet ve a ngai ve thung.

TUIALHTHEI HARSATNA :
Meghalaya State National Highway 31-C danpin a nih avangin Ni 4 chhung chu Champhai Mizofed Petrol Pump chuan tuialhthei an hmu tawh lova, mipui zingah tuialhthei nghei bik an awm lohna turin Diesel bik chu semrual a ni a, an semrual dan aia tam beisei lo turin mipuite ngenin, midang aia tam lak tum te venpui turin an sawm a ni. Emergency, Ambulance, Mourge Van bakah dan leh thupek kenkawhna lam kaihhnawih erawh semrual hian a huam lo thung. Diesel an semrual dan chu: lirthei ke 12 nei emaw JCB tan litre 52.9, cheng 3000 man; truck tan litre 40.5, cheng 2300 man; 1109 tan litre 28.2, cheng 1600 man; 407 leh 909 tan litre 19.4, cheng 1100 man; 207 leh sumo tan litre 14.9, cheng 850 man; Tata ace, SUV leh a dang tan litre 8.8, cheng 500 man te a ni.

TRAINING NEI :
RMSA buatsaih, ni hnih awh Community Training & Environmental Building Programme (IEDSS) chu Ngopa Block tan zawhfel a ni.
Ngopa Zawlbuk YMA Hall-a he training-ah hian Pu C.Hualrikhuma, Dy DPC RMSA chuan zirtirna a pe a, zirna lama nu leh pate leh khawtlang hruaitute mawhphurhna sawiin kan fate zirna kan tuipui lo a nih chuan zirna lamah hmasawnna a awm thei lova, lehkha an zir theihna turin in chhung leh khawtlang boruak kan siam a tul a ni, tiin, ram ngaw humhalh kawnga tanlak a tul thu te uar takin a tarlang bawk a ni. Hei bakah hian Pu Samuel Lalrinzuala, Coordinator, Finance RMSA chuan SMDC te tan account vawn dan leh sum kaihhnawiha an hriat tur hrang hrangah zirtirna pein, Pi Lalrengpuii, Coordinator IEDSS chuan zirlai zinga pianphung leh rualbanlote chanvo leh dikna te, hamthatna an dawn theih leh enkawl turte bakah, hemi kaihhnawiha SMDC te mawhphurhna chungchangah zirtirna a pe a. Dr.Lalsangliani, Coordinator, Common Invervention chuan SMDC ten school enkawl chungchanga an mawhphurhna sawi bawkin, school kalphung relnaah chuan SMDC hi an lal ber a, an mawhphurhna pawh a sang hle a ni, a ti a. School Annual Fund kum tina kal an dawn thin hman dan pawh an kuta a awm thu leh, SMDC te thahnemngaihna avangin zirna in chuan kawng hrang hrangah nasa takin hma a sawn thei tih te a sawilang tel bawk.
RMSA staff te hian Say No to Drugs & Suicide tih thupui hmangin Govt. NE Khawdungsei, Khawkawn HS leh Govt Rabung HS-ah te hun an hmang bawk a ni. Community Training & Environmental Building Programme (IEDSS) hi Champhai District-a block hrang hrangah neih a ni a, Ngopa hi a hmawrbawkna atan hmangin block dangah chuan hemi hma hian an nei fel tawh a. He hunah hian block huam chhunga zirtirtu, tlawmngai pawl leh SMDC member te an tel thin a ni.

HEROIN MAN :
Excise & Nacotics Dept te chuan nizan hmasa khan Heroin leh a neitu nia puh mi 3 an man.
Nizan hmasa dar 8:30 vel khan Excise & Narcotis enforcement staff, Champhai duty te chuan Kahrawt veng atangin herion gram 65.8 leh a neitu nia puh mi pathum: Vankungpuii kum 45, Vanlalpeka fanu; Lalrinchhungi ku 32, Lalrinawma fanu, Lalbiak thangi kum 43, Laldinthanga fanu nia insawite chu an man a, an vai hian Khawmawi, Myanmar a awm vek niin an insawi tel bawk. Hei bakah hian lirthei MZ 01K-7313, Chevrolet Beat hring leh a khalhtu Lalfakzuala, Lalduha (L) fapa, Tuikual A, Aizawl a mi nia insawi te chu an man bawk. Heng an mi mante hi NDPS dan hmangin thubuai siamsak an ni a, vawiin khan CJM Court, Champhaiah thawn nghal an ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Semrual (Rs. 56.67/litre) 

RD PUMP (9862137196)
Petrol    : Free Sale 
Diesel    : Free Sale 

FIRE  OFFICE : 
(03831)234026

0 comments: