ni 18.3.2017 (inrinni)


MJA ZOKHAWTHAR PANNA KAWNG SIAM TLAWH:
Nimin khan Mizoram Journalist Association, Champhai District te chuan World Bank sum hmanga Champhai leh Zokhawthar inkar kawng siam mek an tlawh.


MJA te hian Khankawn atanga fang tanin Zokhawthar thleng bakah, Zotlang atanga New Champhai inkara hnathawh dan chu chipchiar takin an fang a. Hnathawh tha lo lai nia hriatte bakah kut an thlak tawhna chinah siamna dan tura ruahmanna awm sa chu a pha em tih te an enfiah nghal a. Tun dinhmunah chuan kawngpui an siam chinah a inthuah tur pali zinga a hnuai ber, compacted subgrade thawh a ni a, kawngpui hi feet 1 leh a chanve vela chhah tur a ni a, kawngpui zauh leh kawng thar sial hna chu tuna an thawh tam zawk niin, kawng zauh hna hi za zela 80 chu zawh tawh a ni a. Kawngpui km 23.75 atangin km 18.8 chu zauh ngai a ni. Champhai leh Zokhawthar inkar kawngpui hi kum 2014 December ni 26 khan thawh tan a ni a, kum 2018 October thlaa zawhfel tura ruahman niin, Tarmat Limited ten a siam hna hi an thawk a, tunah hian hnathawh tur za zela 42 chu thawh zawh tawh niin, sum ruahman cheng vaibelchhe 137.14 atangin za zela 37 chu hman a ni tawh bawk.  

He kawngpui siamna avanga compensation leh assistant atana sum an pek chhuah zat chu cheng nuai 2465 sing 9 sang 9 za 124 niin vantlang mamawh sawnna atan cheng nuai 55 sing 3 za 501 hman a ni tawh bawk a. Kawngpui hrulah hian vantlang ek in 2, zun in 5, bus shed 5 leh bazar 5 te siam tel tura ruahman a ni. MJA te hian Tarmat, Sheladia leh PWD te chu Base Camp-ah kawmin kawngpui siam kawnga harsatna an tawhte sawiho a ni a. A leilungin a zir loh avanga hmun thenkhata leimin te, a tira he kawngpui CTS anga siam tumna chu a theih dawn loh avanga GSB-a thlak a nih thu te tarlan a ni a. Hei bakah hian spar road, Zotlang atanga New Champhai inkar kawngpui pawh tunah hian thawh mek anih thu pawh sawilan niin, kawngpui a tlo theihna tura ruahmanna hrang hrangte MJA te hian Tarmat hnenah hian an thlen a, lo enzui an tiam a ni. 

Tarmat hian khawtlang tana hnathawh turah ruahmanna la nei lo mah se mimal ngenna avangin 7th Day tlanga Med Aim damdawi in panna kawng chu an laihsak bakah, kawngpui zauhna atan Bethel VC te chu JCB an hmantir thu Tarmat hotute chuan zawhna chhangin an sawi a ni. 

MJA te chuan Tarmat Limited hotute chu Champhai leh Zokhawthar inkar hi Champhai atana thil pawimawh a nih avangin uluk taka thawk turin an chah a, fur lai pawhin chawl mai lova hnathawh theih ang thawk chhunzawm zel tur leh, an hnathawh tithuanawp thei harsatna an neih chuan hmalakpui an inpeih reng thu an hrilh a ni. 

Nimina MJA ten Champhai leh Zokhawthar inkar kawngpui siam mek an tlawhnaah hian PWD atangin Er John Lalchhuanawma, Senior AE (Social); Er B.Lalhmingsanga, EE (Environment); Er Vanlalruata Sailo, EE (Procurement); Er Lalremngheta JE te. Tarmat Ltd atangin Madhav Prasad, Argha Ghosal leh Kundan Kumar; Sheladia atangin Reddy, Arun Katiyer, Somnath, Vinod leh Laldinmawii te chuan MJA te hi an tawiawm a ni.  

MISS CHAPCHAR KUT:
Vawiin hian Mizo Photographers Society, Champhai District te chuan Kahrawt Hall-ah Chapchar Kut Lady 2017 an puang dawn a, top 5 an thlan chhuah atangin Kut lady tur hi thlan niin, he hun hi Pu Lalchungnunga Pudaite, DVO chuan khuallian niin a hmanpui ang.

CHAWLHBUK SAK HAWNG:
Nimin khan Ngur Upa Pawl te chuan Ngurtlang sanga chawlh buk an sak chu hawnna hun an hmang.
He chawlhbuk hawnna ah hian khuallian tura ruahman DFO Champhai chu rokhawlhna avangin a lo tel thei lova, Ngur VC Vice President Pu Sawngpaua chuan hawnna hun a hmang a ni. He hun hi Pu Lalnunnema President Ngur Upa Pawl chuan kaihruaiin Pu Ralkapzaua Finance Secretary chuan tanna hun hmangin Pathian hnenah inhlanna hun a hmang a. Ngur VC Vice President Pu Sawngpaua chuan hetianga Ngur tlang sanga chawlhbuk tha tak mai sa thei tur a hruaitu Pathian chungah lawmthu a sawi a, a sakna tura sum hmanga tanpui tu PCCF Govt. of Mizoram chungah lawmthu a sawi a, chumai ni lova, mahni tha seng a a sak hna thawkt

0 comments: