ni 2.3.2017 (ningani)


CHAMPHAI DISTRICT HMASAWNNA SAWIHO :
Champhai District Development Co-ordination & Monitoring Committee chu nimin khan DC Conference Hall, Keifangtlangah an Chairman Pu CL Ruala, MP Lok Sabha hovin an thukhawm.
Chairman Pu CL Ruala chuan “Swachh Bharat hnuaia Mizorama Champhai District ODF hmasa ber a ni thei chu a lawmawmin a ropui hle a ni” a ti a, inbiakpawhna leh internet-a Champhaiin harsatna a tawh chungchangah Telecom dept te a titipui tawh thu sawiin, an khawl mamawh ang chu Aizawlah a awm tawh a, March thla chhung hi chuan internet pawh a that beisei a ni, a ti bawk.

Nimin thutkhawmah hian Champhai District chhunga Central sorkar hnuaia Dept hrang hrangte hmalakna thlirho a ni a. BADP atana fund pek chhuah mumal lo chu enzui a, fund hi tha zawka pek chhuah a nih theihna tura bawhzui nise tiin an rel a. PHE Dept-in Champhai District chhunga khaw hrang hranga tuilakna tur hnathawh dan te, Power & Electricity Dept hnuaia DDUGJY hmanga Saikhumphai leh Saron Veng Hnahlan-a power supply pekna tur hmalakna chungchang te ngaihthlak niin, Integrated Power Development Scheme hmangin Khawzawl district khaw thenkhat eng lakluhna chu thuamthat a nih tur thu te sawilan a ni. PWD-in PMGSY hnuaia Champhai District chhunga an hnathawh hrang hrangte an tarlan bakah, Champhai panna kawngpui Khawhai-Lungpho chu survey tawh niin Lirthei zawh theih tura hmalak nise an ti a. Social Welfare Dept hnuaia sorkar tanpuina hrang hrang chu rualkhai zawka a dawng tur dik takten an dawn theih dan tur ngaihtuah nise an ti bawk.
Hemi bakah hian MGNREGA hnuaiah Champhai District-a job card nei 28231 te tan ni 17 inhlawhna siamsak a ni tawh a, IWMP hmalaknain Champhai District chhungah chhungkaw 284 ten tlangram loneih an bansan tawh thute bakah UD&PA, Health Dept, Sericulture Dept, Minor Irrigation Dept leh SSA kaltlanga central sorkar hmalakna hrang hrangte report ngaihthlak niin an hmalakna te enzui a ni bawk. 
Nimin thutkhawmah hian Pu TT Zothansanga, Champhai North bialtu MLA leh Pu Lalrinliana Sailo, Tuichangral bialtu MLA te bakah Champhaia Office hrang hrang aiawhte an tel a ni.

LARSAP IN KHAWCHHAK TLANGDUNG FANG :
Nimin khan Mizoram Larsap Lt.Gen (Retd) Nirbhay Sharma, PVSM, UYSM, AVSM, VSM chuan khawchhak tlangdung a Pi Pu te sulhnu leh hmunhlui te a tlawh. 
Larsap chuan Khawbung tlawh hmasa berin, hetah hian Khawbung BDO Pu James Lalnithanga, MCS kaihhruaina hnuaiah hmuahna hun hman a nih zawhah Larsap chuan Hla Kungpui mual (Mizo Poet’s Square) chu a fang a. Hemi zawh hian Dungtlang ah kalin Dungtlang khaw mipuite chuan hmuahna hun an hmanpui hnuah Dungtlang khaw hmunhlui leh Lianchhiari lunglen tlang a tlawh a. Dungtlang a fan hnu hian Vangchhia ah kal leh in Vangchhia tumhmun (Abrahama Tlang) ah chuan Champhai Bawrhsap Pu Vanlalngaihsaka, IAS, kaihhruaina hnuaiah hmuahna hun hman a ni a. Hemi zawh hian Vangchhia a Pi Pu te sulhnu leh kawtchhuah ropui a fang leh a ni. 
Khaw 3 a hmuahna programme hmannaah hian Larsap chuan thu sawiin, Mizo Pi Pu te sulhnu awmna khuate a fang thei chu lawmawm a ti a, Mizoram chu hmun nuam tak, mipui rilru inhawnzauna hmun leh sik leh sa pawh nuam tawk tak a nih thu a tarlang a. Mizo mipuite zingah theihna leh thiamna sang tak a hmuh thu a tarlang a, ziak leh chhiar thiamna lamah pawh India rama a sang ber pawl an nih thu sawiin, nunphung dik zawh chuan Mizote chu sang tak an thlen theih thu a tarlang a ni. Hetih rual hian Mizoram a Zuk leh Hmuam, Zu, Damdawi leh chhan hrang hrang avanga Cancer leh HIV+ve/AIDS natna te a hluar phah nasa chu pawi a tih thu sawiin kalkhawm mipuite chu mahni inthunun chunga nunkawng dik zawh turin a sawm a ni. 
Hmuahna Programme ah hian Pi Pu sulhnu humhalhtu aiawh te chuan Mizoram Larsap ina heti khawpa Mizo te history min ngaih pawimawhsak chu lawmawm an tih thu an tarlang a, Pi Pu Sulhnu humhalhna kawnga an harsatna leh tanpui an ngaihna lai te chu ziakin Larsap hnenah an thlen a, Larsap chuan an lehkha thehluh te lo zirchianga a theihna zawna a tanpui tur thu a sawilang a ni. 
Khaw 3 a khawtlang pawl hrang hrang aiawh te chuan Larsap Lt.Gen (Retd) Nirbhay Sharma leh a nupui Pi Jyotsna Sharma chu Mizo thil chi hrang hrang Chempui, Em, Thangchhuah kawr, Tawlhloh Puan leh a dangte an hlan a, Larsap chuan khaw 3 ah hian zirlai naupang te tan chi thlum leh football a sem a, Khaw 3 a Pi Pu te Sulhnu leh hmunhlui a tlawh hnu hian tlai lamah Aizawl panin a thlawk haw leh nghal a ni.
Mizoram Larsap hi Pi Jyotsna Sharma, Lady Governor bakah Pu Rohmingthanga, IAS (Retd), President INTACH, Mizoram Chapter, Pu Deepak Gauri, IPS, ADC(P) to Governor leh Pu Lalngaihzuala, MCS, PS to Governor ten Aizawl atangin an rawn tawiawm a. A hmunah hian Champhai Bawrhsap Pu Vanlalngaihsaka, IAS, Pu VL Lura Hauzel, Addl Sp Champhai leh Champhai District a Sawrkar Official hrang hrang, Khawtlang aiawh pawl hrang hrang leh sikul naupang ten an lo hmuak a ni.

MZP THUKHAWM :
Niminpiah khan MZP Hqrs. Champhai chuan OB Meeting a nei a. He Meeting ah hian pawl hmalakna tur hrang hrang te thlir ho a ni a. Heng zingah hian tun thla ni 5-a ‘Zoram Ni’ hman dan tur chungchang rel niin Zoram Ni hi Pathianni a nih dawn avangin a tuk Thawhtanni ah hman mai ni se, he hunah hian Party hrang hrangte sawm nise, an ti a. Zoram Ni ah hian Zofate inpumkhatna leh Ram hmangaih kawnga nasa zawk a hmasawnna a awm theih nan inzirtirna neih a ni ang. Kum danga MZP in a lo kalpui tawh thin angin Champhai Technical Entrance chu kalpui leh tum a ni a, kal tur ten hriattirna lo ngaichang turin an ngen.

NIMIN ATANGIN HSSLC EXAM TAN :
Nimin atang khan Higher Secondary School Leaving Certificate Exam chu neih tan a ni. Champhai khawpui chhungahchuan GM Higher Secondary School Centre ah Exam hi neih niin Zirlai 451 Form Fillup zingah zirlai 434 ten Exam an hmachhawn a, Exam Form Fillup zingah zirlai 17 ten exam hi an hmachhawn theilo thung a ni. Arts Subject ah zirlai exam form 328 fillup zinga zirlai 315 ten exam an hmachhawn a. Science ah zirlai Form Fillup 69 zinga 68 ten Exam an hmachhawn a, Commerce Suject ah zirlai Form fillup 30 zinga 29 ten Exam an hmachhawn a. Computer Technic ah zirlai 9 in Form fillup in an exam vek a, Horticulture Stream ah zirlai 15 in form fillup mi 12 te exam an hmachhawn bawk.
GM Higher Secondary School Centre ah hian GM Higher Secondary School, Zokhawpui Higher Secondary School, Zokhawthar Secondary School leh Einstein Boarding School ten an exam.

MNF TEN FANG :
MNF Champhai South Block chuan Assembly Budget Session lo awm turah Champhai Bil hmasawnna atana thil pawimawh chi hrang hrang, an Party MLA te auchhuah tir tur dapin nimin khan an vak chhuak a, tlaiah an sawiho nghal bawk a ni. Nimin an vahchhuahna ah hian District Hospital, Polytechnic te bakah Sawrkar hmalak tawh tih phuisui ngai leh la function loh hmun hrang hrangte an enfiah a ni.

TLANGSAM KTP :
Nimin khan Tlangsam Branch KTP te chuan kum 64 an tlin champhai lawmna pualin Biak In leh a chhehvel hnatlangin an tifai.
Tlangsam Branch KTP hi kum 1953 March ni 1 khan din tan niin din a nih atang hian vawiin thleng hian meimit lovin a la ding ta zel a. Kum 2013 khan Diamond Jubilee an lo lawm tawh a, kumin an kum 64-na tlin champhaphakah hian an Kohhran Biak In leh a chhehvel ti faiin hnatlang an nei a. Tunah hian Member 212 an awm mek.

ZIRLAI TEN TIFAI :
Nimin khan Helen Lowry School NSS Unit chuan Mizo Hlakungpui Mual tihfai pahin pangpar leh sahbuk a tan rual a, Mizo Hlakungpui Muala hman tur bawlhhlawh bawm an dah nghal bawk. Helen Lower School naupangte hian TUipuirala pi pu sulhnu leh hmun pawimawh te tlawhin an zirna pui thei thilte an zirchiang pah a. Heng bakah hian hmun pawimawh dang an tlawhna hmuna bawlhhlawh an hmuh ang angte chhar faiin an hnatlang nghal bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Tanky Full (Rs. 56.67/litre) 

RD PUMP (9862137196)
Petrol    : Free Sale 
Diesel    : Nil 

FIRE  OFFICE : 
(03831)234026

0 comments: