ni 28.4.2017 (zirtawpni)


BAWNGHNUTE MAN BA MIZORAM SAWRKARIN RULHSAK DAWN :
Champhai khawpui chhunga bawngvulhtute bawnghnute hralhna man Rs. nuai 45.73 chuang Champhai Milk Producing Union Ltd. (CHAMUL) in a batsak chu Mizoram Sawrkar in a rulhsak phawt dawn niin thudawn a ni a, leiba pek ngiat hian ni 22 chhung bawnghnute hralhtuten Champhai DVO Pisa kai thei lova an dan chu nimin pawh khan kalpui chhunzawm a la ni.

Champhai bawnglian vulhtu, Tlangsam leh Vengsang Dairy Cooperative Society te chuan an bawnghnute bill December 2015-May 2016 an lak theih loh avanga April ni 4, 2017 atanga CHAMUL Managing Director leh DVO Lalchungnunga Pudaite Pisa kai tur an dan mek chu nimin pawh khan kalpui chhunzawm a la ni a. Tlangsam leh Vengsang atanga bawng vulhtute chuan an bawnghnute hralhna man bat a nih chungchangah CHAMUL Managing Director leh DVO Lalchungnunga Pudaite chu mawhphurtu ber ah puhin, a Pisa kai tur chu ni 22 chhung an dan tawh bakah DVO hi Sawrkar in Aizawla hna sang zawk thawk tura a tih mek laiin, CHAMUL-in an lei a bat sak pekfel a nih hma chuan Champhai a chhuahsan an remti lo bawk.
Champhai khawpui chhunga Society 14 intelkhawm  ten an din, CHAMUL member 50 te chuan nikum April thla a CHAMUL Board of Directors thiah a nih tak avanga bawnghnute an pekluh thinnaah pek theih a nih tawh loh vangin nikum May 26 khan Champhai AH & Vety Complex a CHAMUL Office tualah bawnghnute an leihbua a, Tlangsam leh Vengsang bika bawng vulhtute chuan anmahni bik, CHAMUL in a batsak zawng hi Rs. nuai 25 chuang a ni tih an tarlang bawk.
CHAMUL enkawl zui hna chelh tur hian Champhai Assistant Cooperative Registrar (ACR) Liankhuma kutah hlan a ni a. Hetih lai hia Champhai, Hmunhmeltha leh Kahrawt Venga Bawng vulhtute chuan CHAMUL in an lei a batsak chung pawhin bawnghnute hi hralh chhunzawm zel thovin, tunhnaia an hralhna man erawh an dawng thin thung.
Mizoram Sawrkar chuan CHAMUL in bawnghnute hralhtute hnena a bat Rs. nuai 45.73 chuang chu a puang awm lovin a rulhsak phawt dawn a, Mizoram sawrkar chuan leiba rulh sakna tur sum hi tunkar chhung hian a tih fel hman beisei a ni a. CHAMUL dinhmun dik tak leh heti zat leiba a awm theihna chhan pawh sawrkarin uluk takin a chhui zui dawn tih anmahni kawmtu YMA Sub-Hqrs. Champhai, MHIP, MUP leh MJA Champhai District hruaitute hnenah AH&Vety Secretary B. Lalthanliana leh Joint Secretary (Finance) Ramchuana te chuan an sawi.

CHAMPHAI-AH ELECTORAL ROLL OFFICER NET TRAINING :
Election Commission of India in thupek a chhuah angin nimin khan DC Conference Hall, Champhai ah District Level Training on Electoral Roll Officer Net neih a ni.
Training ah hian District Election Officer, Election Officer, Electoral Roll Officer leh Assistant Electoral Roll Officer ten internet hmanga Election kaihhnawiha thil hriat tur chi hrang hrang inhrilhhriatna hun hman a ni a, mipui tana Electoral Roll a hming inziahluh, hming thlak, vote neihna insawn leh Election kaihhnawiha thil chi hrang hrang alo awlsam zawk nana Internet kaltlanga kalhmang inzirtirna hun hman a ni bawk.
Hemi bakah hian Election kaihhnawih a Form chi hrang Form 6, Form 6A, Form 7, Form 8 leh Form 8A chungchang thlirho a ni bawk. Training hi lalremruata Kullai, EO in a kaihruai a, CC Lalchhuangkima, DEO in a pawimawhn aleh mipui tana Election kalphung alo awlsam zawk dan tur sawizaun aneiin, Bethlotha Nohro, District Level Master Trainer (DLMT) in zirtirna a pe a ni. Training ah hian District chhunga Election kaihhnawiha Sawrkar Official hran ghrangte an tel kim hle.

CHAMPHAI AH ATS SQUAD DRIVE NEI :
Champhai Anti-Tobacco Squad te chuan nimin khan Squad Drive neiin, Office hrang hrang fang kualin dan phal lohna hmuna meizu an awm em tih an enfiah a, meizu man tur an awm lo, Office bakah hian Bank thenkhat te an tlawh bawk a, Office leh bank an tlawh te hi a thlianghlimin a fai hlawm hle tih sawiin a lawmawm an tih thu an sawi bawk.
Dawr erawh Gutkha leh Cigarettes zawrh phal loh zuar an lo tam leh tawh hle a, Signage tar lo pawh eng emaw zat lo awm leh tawhin signage pek nghal an ni a. Dan phal loh zuarte pawh Warning pek nawn leh niin Drive neih leh hunah chuan zahngaihna awm miah lova mansak an ni tawh ang tih an hrilh hre nghal a. Warning pek loh dawr te pawh Warning pek sa, hre sa tawh an nih avangin man hmak hmak tawh tur an nih thu an hrilh bawk.
V Cigarettes T-Shirt a hluar hle tih sawiin, hetiang T-Shirt hi Cigarettes Advertistment a ih avangin hak phal loh a ni a, Nimin duty ah hetiang T Shirt ha an hmuh chu chhuak tawh lo tur a hrilh nghal an nih bakah School thenkhat an tlawh bawk a, Signage la neilote chu peka tar tir nghal a ni bawk.

TARGET KHUM :
Kum kalta 2016-2017 chhunga Sales of Engery atanga Power Project Division, Champhai hnena Department in Revenue Target Rs. nuai 720.95 an tum chu an khum a. Hemi chungchang report leh a lawmna hun hi vawiin chawhnu dar 2 hian I&PR Auditorium, CHANEM ah neih a ni dawn a. hei vang hian vawiin chawhnu lam hian P&E Dept. Champhai chu dawr theih a ni dawn lo va, mipui hriatthiamna an ngen.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 64.87/litre)
Diesel    : Free Sale (Rs. 54.88/litre) 

0 comments: