ni 29.4.2017 (inrinni)


NGO TEN CHAMPHAI JAC HNENAH AN THUDAWN THLEN :
MZP Hqrs. Champhaiin District Hospital Champhaia Doctor tam zawk dah tura sorkar a karna kal mekah Voluntary Organisations – Sub-Hqrs. YMA, MHIP, MUP leh MJA Champhai District hruaitute ni 23.4.2017 tlaia inhmu khawmten pawl aiawhte intir a, Mizoram sorkar hotute hnenah kan mamawh ang Doctor-te dah thuai tura ngen nise an tih angin, heng pawl aiawhte hian ni 25.4.17 khan Home Minister chu a chenna inah hmuin an kawm a. Home Minister chuan 'Doctor 26 lak thar tur tuna rawtna awm mek chu a hma thei ang bera lak leh dah an nih theih nan sorkar-in chak taka hma a lak mek thu te, diltu zingah naupang doctor an awm chuan pek ngei an nih tur thu leh an lo awm lo a nih chuan lak tharte posting siam rualin, thawk mek atangin pek an nih tur thu a sawi a. Sorkar hmalakna hi ring ngam tur leh innghat ngam tura lo chahin, Home Minister chuan ‘ka intiam ngai lo va, kan ti ang kan tih chu kan rawn ti ngei ang’ a ti a.

Health Minister, Health Secretary leh Principal Director-te pawh ni 26.4.17 khan hmuin, hemi chungchang hi an sawipui bawk a. Kan ramah Doctor indaihlohna a nasat em avang hian zing zawka Doctor lak thin tha an tih thu, Tlawmngai Pawl hruaitute chuan an sawilang a. Sorkar chuan a hmanhmawh thei ang bera thil kalpuiin, Cabinet Memorandum pawh by-circulation-a an bawhzui thu an lo hrilh bawk. Tlawmngai Pawl hruaitute chuan Champhai chu inkalpawhna kawng a hlat bik thu leh kawngpui that tawk loh vanga Damdawi hmunpui ber Aizawl thleng turin darkar 9 aia tlem lo an hman thin thu te, Myanmar unaute nen lam Champhai District Hospital chu pankhawm thin anih vanga District dangte aia ngaihsak bik atul thu an thlen a. Heng an harsatnate thlente hi tha taka lo dawng sawngin, tihhlawhtlin a nih theih nan ‘sorkar-in chak takin hma a la mek a ni’ tiin sorkar hotute chuan lamkalte hi an lo hrilh.
PWD/Health Minister Pu Lalthanzara pawh a chenna inah kawmin, Serling-Champhai kawng siamthat hna thawh mek chu chak zawka thawh a tul thu sawiin; Kawlkulh – Khawzawl phei chu fur chhiat hma ngeia a chhe zualpui siam that a tul thu an thlen a. Minister chuan an ngenna bawhzuiin PWD hotute chu chak thei ang bera hna thawh a nih theih nana hma la turin a hriattir nghal bawk. Seling – Keifang leh Kawlkulh – Khawzawl inkar kawng siam that hna thawk tur hian Nidhi Creative Infrastructure Pvt. Ltd. (Silchar) chu thlan an ni a. NEIDI Company Project Manager T. Chandhury pawh heng tlawmngai pawl hruaitute hian ni 27.4.17 khan hmu nghalin, fur ruahtui tlak hma ngei a kawngpui chhe zuallai cheitha tura an duh thu an thlen bakah kawng chhiat zualna Tuichang leh Khawzawl inkar chu hna hmasa a neih tha an tih thu an thlen bawk. 
Project Manager T. Chandhury chuan Seling to Keifang leh Kawlkulh to Khawzawl inkar kawngte hi Rs. 13.33 crores ve ve a an thawh thu leh Keifang thlang Petrol Pump (Filling Station) kiangah inbunin, theih ang tawka chak a hnathawh anih thu a sawi a. hian kawngpui chei that hna an thawk mek a ni. Kawlkulh – Khawzawl inkara kawng chhe zual chu May, 2017 hian thawh hman an tum thu sawiin, March, 2018 ah chuan Re-surfacing (black topping) nen peihfel vek turin contract agreement an ziah thu an sawi a. Hna pawh enge maw chen thawh a nih tawh thu alo hrilh. 
Champhai a bawngvulhtute bawnghnute hralhna CHAMUL in a batsak chungchangah AH & Vety Secretary Pu B. Lalthanliana leh Finance Joint Secretary Pu Ramchuana pawh ni 26.4.17 khan a Pisa-ah Tlawmngai Pawl hruaitute hian hmuin, CHAMUL-a chhung thin bawnghnute man bat mek Cheng Nuai 45.37 zet chu a hma thei ang bera pek dan ngaihtuah turin an ngen a. Hei hi Mizoram sorkar-in a pung (interest) awm lovin CHAMUL hminga rulh tura hmalak mek anih thu leh hun reilote-ah chinfel anih tur thu sorkar hotute chuan an sawi bawk.

CHAMPHAI P&E TEN TARGET RS. NUAI 35.51 IN KHUM :
Nimin chawhnu khan Champhai I&PR Auditorium-ah Champhao Power Project Division, Power & Electricity Department chuan Mizoram Sawrkar atanga Department kaltlanga Sales of Energy atanga chhiah chhunkhawm tura a ruahman sak Rs. nuai 720.95 chu Rs. nuai 35.51 chuang laia an khum lawmna leh thawktute infuih tharna hun an hmang.
He hun hi Ronald Laldakzuala, JE chuan kaihruaiin Er. David C. Zahmuaka, SE, P&E Chaphai Power Circle chuan P&E Dept. Champhai Power Division huamchhungah hian Sub-Division pahnih awmin, Thingtlang lamah hian khaw 32 awmah, Consumer 6276 an awm a. Champhai Power Sub-Division huam chhungah hian Consumer 10246 an awm thung a. Champhao Power Division hian nikum sawrkar kum 2016-2017 chhung khan Power an hmuh atanga chhiah an lakluh tur atana Mizoram sawrkarin an Target chu Rs. nuai 720.95 niin, sawrkar kum kalta chhung khan Chhiah sawrkara an chhunluh chu a vaiin Rs. 7,56,46,854 a ni a. Target an khumna hi Rs. 35,51,682 a tling chho a. Champhao Power Division hnuaiah thawktu ten an thawhrimna leh an inpekna avanga he hlawhtlinna ropui leh lawmawm tak an dawn hi nimin khan a lawmna hun hi an buatsaih a ni tih a sawi a. he hunah hian thawktute fuih tharna hun leh nasa lehzuala tan la zui zel turin a fuih nghal bawk a ni.
Er. Thanglura Sailo, EE Champhai Power Project Division chuan an huamchhunga Power changtlung zawk leh tha zawk an hmuh theih nan te leh mipui hnena Engery an hralhchhuah atanga Chhiah an hmuh tura ruahman an khum theihna tura theih tawp an chhuah dan te a tarlang a. mipui lam atanga an hmalakna atanga hlawhtlinna an neih theihna tura tawiawmna tha an dawn avangin lawmthu a sawi a. Media leh Consumer Union lam atanga thlawpna leh an thawhpuina avanga hetiang hlawhtlinna hi nei thei an ni tih an tarlang tel bawk.

BAWNG VULHTU TEN LAWMTHU SAWI :
CHAMUL a bawnghnute an chhunluhna bill tang avanga AH&Vety Dept. a thawkte pisa kai tur dangtuTlangsam leh Vengsang Dairy Co-operative Society te chuan Sawrkar hnenah lawmthu an sawi.
Hetihrual hian bawng vulhtute chuan bill hi an hmuh hma chuan Vety Office chu pisa kai theih lohva dan chhunzawm zel an tum thu an sawi a. Nimin pawh khan Vety Pisa a thawkte dan hna hi an la chhunzawm a ni. Tlangsam leh Vengsang Dairy Co-operative Society te chuan thuchhuah siamin, an bawnghnute bill tang chungchanga tanpui tura sawrkar an nawrnaah DVO leh a Staff chu ni 20 chuang an dang tawh a. An manganna avanga Office kai tur an dan bakah Vety Hospital thlenga an kharsak avanga mipui leh staff te chunga harsatna an thlen avangin hriatthimana an ngen a. An bill chungchangah an harsatnate hriathiampuia hma laksaktu sawrkar chungah thinlung takin lawmthu an sawi a.
Dan lo anga an che chungpawha hriathiamna thui tak nena mi retheite dawmtu sawrkar chungah lawmthu an sawi rualin, an harsatna sutkianna atan hian sawrkar chungah rinna nghet tak an nei tih an sawi a. Palai hna thawktu YMA Sub-Hqrs. hruaitute an harsatna hrethiam a, thlawptu mipui leh moral support petute hnenah lawmthu an sawi tel bawk.

CTM PACS ANNUAL GENERAL ASSEMBLY NEI :
Nimin khan Champhai Town Multipurpose Primary Agricultural Credit Cooperative Society (CTM PACS) chuan an Office, Vengthlang C. Denga Building ah Annual General Assembly an hmang.
Assembly hi an Chairman HS Vanlalfakzuala chuan a kaihhruai a, Board hrang hrang pathum an nei : School Board, Dawr Board leh CTM PACS Secretary te hnen atanga report ngaihthlak a nih bakah Society aiawhin J. Dengruma, Treasurer chuan he Society lo din chhuah dan leh tun hun thlenga kaldante chipchiar takin a sawi a. Lalthanpuia, Chief Manager, MCAB Champhai Branch chuan he hun hi hmanpuiin Society Member te hriat tur pawimawh tak tak leh fuihna thu te a sawi bawk.
Rorel Inkhawmah Society in Cold-Storage enkawl zui chungchang ngun taka ngaihtuahin, zirchian phawt ni se, an ti a. An society hnuaia Board hrang hrang pathumin 2017-2018 atana Budget an thehluhte tihpuitlinsak ngei nise, an ti bawk. Nimin Assembly hian Resolution pahnih : Kan Society Board hrang hrangin kum 2017-2018 Budget an siam hi tha kan ti tih leh kan Society Project pahnih Higher Secondary School leh Vavu Dil Project Nursery atanga College din kan tumte hi a puitlin thuai theih nan chak taka hmalak nise kan ti tihte chu an pass nghal bawk. CTM PACS hi kum 1994 a din tan niin tunah hian member 117 an awm mek a ni.

HIGH SCHOOL SPORTS :
Ningani-a District Level High School Sports Committee, DEO Champhai Office-a thukhawm chuan District H/S Sports Organising Committee te an ruat fel bakah Jury of Appeal turte tihfel nghal an ni.
Kumin High School Sports-a inelna tur thlang felin mipa leh hmeichhe tan Athletics, Badminton, Table Tennis, Volleyball leh Taekwondo te nise an ti a, mipa tan basketball leh Football te an belh tel bawk. Directorate of School Education ina ruahman angin Champhai District High School Sports vawi 8-na hi May ni 16-19 chhunga neih tur a ni a, Mizoram Secondary School Games chu Oct. ni 21 ah neih a ni ang.

FREE CLINIC NEI :
Nimin khan MMU Champhai chuan Tlangsam Sub-Centre ah Free Clinic an nei. Free Clinic ah hian Dr. Lalremruata hovin thawktu mi 5 an kal a, a thlawna damlo thahnem tak an en bakah a thlawn vekin damdawi an sem nghal a ni.

VAWIIN DINHMUN :
MIZOFED POL (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol : Free Sale (Rs. 64.87/litre)
Diesel : Free Sale (Rs. 54.88/litre)

0 comments: