ni 17.5.2017 (nilaini)


VENGTHLANG KTP TEN MIDANG TANA NI 60 INPEK TAN :
Champhai Vengthlang branch KTP te chuan kum 60 an tlinna, Diamond Jubilee puala ni 60 chhung midang tana inpek chu nimin atang khan an kalpui tan.
Vengthlang Branch KTP te hian Champhai District Hospital a damlo, anmhani awmpuitute leh damdawi ina thawkte tan a thlawnin chaw chhun an buatsaih a. bawnghnute leh chhang an sem a, chaw chhun hi mi 180 bawr velin an chang ani.
Nizan hmasa khan Diamond Jubilee khuhhawnna an neih hnuah Jubilee lawmna chu an kalpui tan a. heng zingah hian midang tana ni 60 chhung inpekna chu kalpui hmasak berah neiin, kumin chhungin Programme chi hrang hrang buatsaihin Jubilee hi an lawm dawn a ni.

Nizan hmasa Diamond Jubilee khuhhawnna hi Pastor R. Vanlalruata, Bialtu Pastor  chuan hmanpuiin, Jubilee khuhhawnna thuchah a sawi a. He Jubilee hi midangte tana malsawmna a nih theihna turin KTP Member te chu Jubilee lawmna kawng hrang hrangah duhsakna a hlan a. Pathian tana rawngbawlna tangkai leh hlawkthlak tak a nih ngei a beisei tih sawiin, Diamond Jubilee Logo a tlangzarh nghalbawk a ni. hei bakah hian Jubilee puala T-Shirt, Lukhum leh thil dang dang an siamte chu pho chhuah nghal niin, Jubilee Choir ten Diamond Jubilee puala phuah Ebenezer tih chu a vawikhatna atan an sa bawk. He hun hi Vengthlang Branch KTP a hruaitu lo ni tawhte chuan an telpui a ni.

CHAMPHAI DISTRICT HIGH SCHOOL SPORTS TAN A NI :
Nimin khan Champhai District High School Sports chu Chhangphut Field ah hawnna hun hman a ni.
hawnna hun hi C. Hualrikhuma, Organising Chairman chuan kaihruaiin High School  Sports ah hian School tin aiawhte chu Dan in tel thei tura a tih ang chiah a fair taka tel tur leh Discipline vawng reng turin a chah a. High School Sports a ti tha zual te chuan thlan khawm leh tur niin thlan chhuah te chuan Mizoram School Games ah Champhai aiawha chhuak tur an ni tih a tarlang tel bawk.
Khuallian Lalnghilneia Colney, DSYO chuan thusawiin, Champhai in Sport lama hma a sawnna leh an that chhoh leh tan tawhna chuvawng nung zel turin a chah a. Zirna leh Sports hi akalkawp thei tih sawiin, zirna lam leh sports ah theihtawp chhuah turin a chah bawk. he Sports ah hian infiamna chi hrang hranga tel turte chuan rilru thianghlim tak pu tur leh dik taka Champion hlawh chhuak turin School hrang hrang atanga kalkhawm zirlaite chu chah in Champhai District High School Sports hi a hawng a ni.
Zohmingthanga, DEO chuan thu sawiin thianghlim taka inelna bei a, Champion School ni ngei tura tan la theuh turin a fuih a. Champhai aiawha School Games a Champion ngei turin a chah bawk.
He Sports ah hian inelna chi hrang hrang mipa leh hmeichhe tan : Football, Volley Ball, Badminton, Table Tennis, Taekwondo, Athletics leh mipa tan bik Basketball hmang hian School hrang hrang te an in el dawn a. He inelna neih turah hian School 25 atangin zirlai an tel thei a, a ti tha zual thlan khawmte chuan October thlaah Champhai District aiawhin Mizoram School Games ah an tel dawn a ni.

AWARD HLANNA HUN HMANG :
Vengthlang Branch YMA chuan kum danga an lo tih thin angin nizan khan an veng huam chhunga HSLC leh HSSLC pass tha te hnenah Award an hlan.
Award hlanna hun hi Govt. Vengthlang Primary School II Assembly Hall ah neih a ni a. He huna tarlan dan chuan Vengthlang huam chhungah tun hnaia HSLC leh HSSLC result tihchhuah takah khan HSLC ah zirlai 42 leh HSSLC ah zirlai 22 an pass a.
Vengthlang atanga HSSLC Pass zinga mark hmu sang ber Lalmuanawma Khiangte s/o K. Ramdinzauva hnenah C. Luaia Award Rs. 3000 leh Momento; HSSLC Top 10 a pass Lalmuanawma Khiangte s/o K. Ramdinzauva hnenah Sainawta Award Rs. 5000 leh Momento bakah Vengthlang atanga HSLC Pass zinga mark hmu dang ber R. Lalrindiki d/o R. Laldinthara hnenah Tezara Award - Rs. 3000 leh Momento hlan a ni. Vengthlang huam chhunga HSLC leh HSSLC pass thar zirlaite hnenah hian lawmpuina pek vek an ni bawk.

TOP 7 A TLIN LAWM :
Nimin khan Ngaizawl Teachers Welfare Association chuan HSSLC (Commerce) result chhuak ta a Top 7 a tling pC Lallianmawii pass lawmna hun an hmang.
Kum 2016-2017 Session a HSSLC (Commerce) Result chhuak taah PC Lallianmawii d/o PC Lallawma, Ngaizawl chu Top 7 ah tlingin Ngaizawl Teachers Welfare Association huaihawtin Ngaizawl VC, YMA, MHIP leh MUP te nen nilengin lawmna hun Ngaizawl YMA Hall ah khawtlang huapin an hmang a, tlai lamah ruai theh nghal a ni bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 62.50/litre)
Diesel    : Free Sale (Rs. 52.50/litre) 

0 comments: