ni 9.5.2017 (thawhlehni)


ZOKHAWTHAR A BUNGRAW LUT LEH CHHUAK KHAP HLIP :
Indo-Myanmar Border Trade Point Zokhawthar a bungraw lut leh chhuak senghawi kawngah Zokhawthar khawtlanga Sociaty pahnihte inrem lohna avanga Champhai Sub-Division Magistrate in helai hmuna bungraw lut leh chhuak khapna thla khat dawn a lo ken kawh tawh chu nimin khan sut a ni.
Nimin khan Zokhawthar a bungraw lut leh chhuak senghawitu pawl hrang hrangte chu Champhai DC Pu CC Lalchhuangkima kaihhruaiin DC Conference Hall ah thutkhawm ani a. helai insumdawn tawnna hmun a bungraw lut leh chhuak senghawi kawngah pheikhai rual zawk a kalpui anih theihna tur leh Zokhawthar khawtlangah inhmuh thiam lohna thleng tawh lo se, tih chu sawrkar duh dan anih thu DC Pu CC Lalchhuangkima chuan a sawi a. Zokhawthar atanga pawl hrang hrang lo kal te chuan bungraw lut leh chhuak senghawi kawnga tha tur ni a an hriatte an sawi hlawm.

He Border Trade Point kal tlanga sumdawng Mizoram Exim Union mi 18 ten Zokhawthar Multipurpose Cooperative Society Ltd. kal tlang a an bungraw lut leh chhuak senghawi khawih tura inremna an siam tak vang leh sumdawng mi 30 ten Zokhawthar VC kaihhruaina hnuaia bungraw senghawi hna khawih thung turin inremna an siam bawk a. Hetia sumdawngtuten an bungraw senghawi tur pawl bik an thlanfel tak avang hian Zokhawthar boruak awh tha turah ngaiin, Champhai Sub-Divisional magistrate-in Section 133(1)(ii), Cr. Pc 1973 tlawh chhana April 12,2017 a Zokhawthar kal tlanga bungraw lakluh leh thawnchhuah tur senghawi khapna thupek a chhuah tawh, thla khat chhung dawn kalpui tawh chu hlih/tihtawp a ni ta a.
Indo-Myanmar Border Trade Point a bungraw lut leh chhuak senghawi kawngah Zokhawthar Multipurpose Cooperative Society Ltd. hian Champhai District Court a thu thlen an neih chu May 12 hian District Court ah Hearing neih tur niin, bungraw lut leh chhuak senghawi kawngah District Court in hemi chungchang hi a ngaihtuah tawh dawn bawk avangin Dan leh thupek ken kawh ngai thil a thleng a nih loh chuan District Magistrate lam chu a inrawlh tawh dawn rih loh thu DC Pu CC Lalchhuangkima chuan a sawi. he thutkhawmah hian Sub-Divisional magistrate Pu Pachhunga leh District law & Order changtu SDC Pu Remlalliana Hnamte ten DC hi an tawiawm a ni.

CJL U-21 Q/F INTUM TUR TIFEL :
Inrinni zan dar 7 khan CJL (U-21) Quarter Final draw chu CCN Studio ah neih niin Quarter Final Fixture chu peih a ni ta a, May 15 zan dar 8 atangin Quarter Final hi tan leh a ni dawn a, Quarter Final atang hi chuan Entry Ticket lak a ni tawh dawn a, mi pakhat tan Rs. 10 zel niin ticket tling khawmte hi match khel te hnenah 50-50 a sem thin a ni dawn a ni. Ni 15 May ah Vengsang BC leh Cannon Balls BC te an in khel ang a, ni 16 may ah Venglai SC leh Phunglung chuani BC (B) te an inkhel ang. Ni 17 May ah Phunglungchuani BC (A) leh Dauglas BC in khel ve leh in ni 18 May ah Minikins BC leh Kahrawtians BC te an in tum bawk dawn a ni. Inkhel hi zan dar 8 ah tan thin tur niin 1 CCN ah LIVE a pekchhuah a ni ang.

CHAMPHAI U-19 IN FINAL LUT :
K. Kawla Memorial Inter District Under 19 Football Championship Aizawla khelh mekah Champhai District mipa Team te chuan Final an lut. Nimin khan Pool match khelh zawh niin Champhai chuan 3-1 a Mamit hnehin Pool Leader nichungin Final an lut a. Champhai tan Zomuansanga chuan Goal 2 khungin lallawmtluanga chuan Goal khat a khung ve bawk. Champhai hian Pool Match ah chak loh nei loin Final hi an inhlangkai a, vawiin tlai dar 5 ah Lunglei nen Final an khel ang.

HERION MAN :
Inrinni zan dar 6 velah khan Police Check Gate, Khankawnah No. 4 hawng khat man a ni. Lalsanpuia kum 41 s/o H. Thanhlira (L) nia insawi hian Scooty MZ01 J 6552 mudguard hma lam hnuaia thuhruk Heroin No. 4 chu Aizawl lam panpui tura Zokhawthar atanga lo kla chu Check Gate ah man a ni a, No. 4 neitu hi thubuai siamsakin Champhai District Jail ah dah nghal a ni.

HNATLANG NEI :
Tlangsam High School a Eco Club te chuan kum danga an lo tih thin tawh angin nimin khan Tlangsam khawchhung thenfai hna an thawk a, zirlai te leh zirtirtu ten khawlaia bawlhhlawh te an chhar khawm a ni. Eco Club te hian kuminah veng chhung thenfai hna an vawikhat thawhna a ni. Kum dangah chuan tum 3 te an thawk thin.

KUTTHLAK :
Champhai Kanan Venga Vanlalneihmawii kum 62 chu nimin khan misual tu tih hriat lohin rawkin nikhaw hre lova kut a thlak bakah Rs. 30,000 vel a laksak bawk.
Vanlalneihmawii hi a u, Sangbiakvela te In hnuaiah khawsain Vaihlo zuara eizawng a ni a. A in hnuaia vaihlo a chhut laiin a ina misual thawm hriain a lut chho a. He misual hian dawhkanah pawisa lo chhiarin Vanneihmawii chu vau betin kut a thlak a, a lu a hliam tam tak a tawrh vangin Champhai District Hospital ah dah luh a ni.
Vanlalneihmawii hi harh chhuak tawhin, ngaihtuahawm lutuk a ni lova, in rawktu misual hi man ngei tumin Police ten ngawrh takin an zawng mek a ni. Nimin chawhnu khan Champhai DC hming SDC Pu Remlalliana Hnamte chuan Champhai District Hospital a awm Vanlalneihmawii damlo kanna Rs. 1000 a hlan a. In rawktu kut thlaktu misual chu man chhuah a nih ngei theih nan Police ten chak taka hnuchhui hna an thawh thu Pu Remlalliana Hnamte chuan a sawi a, Veng chhung mipuite pawhin pawikhawihtu man anih ngei theih nan theih ang tawk a Police puih leh tawiawm an tum thu an sawi bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 64.87/litre)
Diesel    : Free Sale (Rs. 54.88/litre) 

0 comments: