ni 28.7.2017 (zirtawpni)

ZIRTIRTU NI HMAN DAN TUR REL :
Nimin khan District Level Teachers’ Day Celebration Committee chu DC Conference Hall ah District Level Teachers’ Day Celebration Committee Chairman, Champhai Bawrhsap ni bawk Vanlalngaihsaka kaihhruaina hnuaiah an thukhawm. Thutkhawmah hian nikum lama Teachers’ Day hman dan thlirlet niin, kumina Teachers' Day hman dan tur rel nghal a ni. Kumina zirtirtute ni hi District Headquarters bakah Sub division, Block leh khaw tina sikul te remchan dan ang a hman tura rel niin, Champhai khaw chhungah chuan zirna in zawng zawngah chawhma lama hemi ni lawmna programme hi mahni zirna in remchan dan angin duan ni se, tia rel a ni. Lawmna hunah hian zirtirtute pawimawhna leh hlutna te uar taka inhrilh thar ni se, an ti. Hemi ni puala Chief Minister, Education Minister leh Deputy Commissioner ten thuchah an buatsaih chu zirna in zawng zawngah chhiar chhuah nise, print media-a tarlan tum nise tiin a rel bawk. Champhai khawpui chhunga hmun hrang hrangah zirtirtute chawimawina pualin Banner tar nise tih an rel bawk. Thutkhawm ah hian Addl. DC, CC Lalchhuangkima;Lalsiamliani, DPC SSA, C.Hualrikhuma, Dy. DPC RMSA bakah Champhai khaw chhunga zirna in hrang hranga Principal te leh zirtirtute antel a ni.

IN KANGRAL VEK:
Nimin Zing dar 1 pelh khan Ngopa Chhim Veng Lane IV-a Pu Genkhanliana te chhungkaw luahlai chu bungrua engmah chuh hman lohin a kangral.
In kan lai hian an chhungkua hi an awm lo va. In neitupa, Pu Genkhanliana hi Aizawl lamah hnathawka a awm lai niin, a nupui Pi Lalhriati hi an thenawmte inah a riak chhuak a. Tumah an awm loh avangin thi leh hliam tuar an awm lo hlauh a ni. In hi a kang a ni tih hriat a nih a, mipui an tlankhawm meuh chuan thelh hman a ni tawh lova. Eirawngbawlna Gas Cylendar ruak meialh-in hneh taka in hi a tuam nghal avangin thelh theih a ni lo. In kan chhan hi hriat chian nilo mah se, Current kalsual vang a kang a nih theih thu Ngopa khawtlang hruaitute hnen atangin dawn a ni. VC leh YMA ruahmanna hnuaiah nimin khan in hi sak that hnatlang neih nghal a ni a, khawtlang mipui ten theih ang ang an thawhkhawm bakah, Biaitu MLA & Minister H. Rohluna chuan hnatlang thingpui lumna tur a pek bakah In chung tur Rangva a tum sak a ni.

VOLLEYBALL INELNA NEI DAWN:
Nimin khan Independence Day Volleyball Tournament thlirin Champhai District Volleyball Association OB meeting an nei. He meeting-ah hian Independence Day Tournament khelh hun Iai hi khaw chhiat Iai a nih thin avangin Champhaia a vawikhatna atan indoor a kheih dan tur ngaihtuah a ni a. Nimin khan OB ten a hmun hma turte an en fel nghal a ni. Champhai District in Volleyball in hma a sawn zeina atan tun tum tournament ah hian District pawn lam mi player lak phal a ni dawn a. Player lak tamin team entry a tlem phah emaw District player te inpumkhatna a nih beiseiin Team tinin player pakhat, an duh ber District pawn lam mi lak remtih sak ni se, tiin an rel a ni.

DINCHAM PUALIN THINGPUI LEH A HMEH:
Nimin khan Hospital Branch KTP te chuan kum 23 an tlin lawmna hun an hmang. Rising Day pual hian Home leh Centre hrang hrangte tanpuina an pek bakah a mamawh te hman atan thisen an lo pe tawh thin a. Kumin Rising Day-ah pawh hian kum 23 an tlin lawmna atan District Hospital-a Damlo leh thawktu Doctor leh  Nurse te hnenah chhun thingpui, Chhang leh Artui te semin Branch hnatlang an nei a. KTP hruaitute chuan midangte tanpui thei a hun tha an nei chu lawmawm an tih thu an sawi a, hnatlangah hian mi 50 vel an thawk chhuak a ni.

TUILIAN TUARTE TAN VEHBUR:
Mizoram Tuilian vanga chhiatna nasa tak thleng tuarte tanpuina, CYMA hmalakna-in Vehbur khawn mek zel a ni.
CYMA hmalakna a vehbur khawn hi YMA Sub hqrs Champhai hnuaia Group leh Thuthmun branch hrang hrangte chuanan kalpui mek a. Tunah hian Branch 18 leh Group 1 ten khawnzo tawhin Branch thenkhat ten an la khawn mek zel bawk. SYMA hian Central YMA ah a hlawmin an thehlut ve leh ang.

GANJA SUAT ZEL:
YMA Sub-hqrs Champhai in Ruihhlo dona kawnga hmalakna atan Branch hrang hrangte hnenah Ganja suat tura ngenna a siam angin Branch hrang hrangte chuan chuktuah huan leh vantlang rama Ganja kung suat beihpui an thlak mek zel a. Ningani zing khan Champhai Kanan Branch  YMA pawhin Ganja hi an suat a ni.

MOTORAH TAR PHALLO:
Champhai DTO hnen atang thu dawn danin, tunlai hian public service vehicle a bik takin Maxicab serviceten state transport authority atanga remtihna awm lovin motor ah thuziak leh chhinchhiahna chi hrang hrang an belin an tar hmuh tur a tam hle a. Hei hi dan phal Ioh a nih avangin a tilui te man an nih chuan MVA Act hmanga hremna pek an ni ang.
Transport Department chuan July 7, 2017 atanga thla 3 chhung atan late fee/penalty ngaihdamna hun a hawng a, hemi hun chhunga tax leh fee ba neite chu late fee tel lova tax leh fee pe turin hriattir an ni.

Petrol : Sem rual  (61.81)
Diesel : Sem rual  (53.27) 

1 comments:

HRIATA KHIANGTE said...

a khai a. teh tlat chuan hei ka va hmu fuh kher em aw. a bengvar thlak hle mai. blog la thilo ka hmuh awm chhun ala ni . len luh fo tur anih hi