ni 1.8.2017 (thawhlehni)

GANJA SUAT ZEL:
YMA Sub-Headquarters Champhai Executive meeting-in Ganja suat nise tih a Io rel tawh bawhzuina kal zelah Ganja suat mek zel a ni.
YMA Sub-hqrs in Kumpuan bawhzuina kawnga hmalakna peng pakhat atana Branch hrang hranga Ganja suat tura ngenna a siam bawhzuina kal zelah Thuthmun Branch hrang hrangte chuan Ganja an suat mek zel a. Nimin zing khan Tlangsam Branch YMA leh VC tangkawp te chuan an huamchhunga mimal leh vantlang rama Ganja to te vaiin hnatlang an nei a, Ganja hi kung 300 vel suatin Excise &  Narcotics Dept nena tangkawnin halral nghai a ni a. Champhai Electric Veng Branch YMA te pawhin Ganja kung 970 vel suatin Excise & Nacotics Dept nena tangkawpin an halral nghal bawk a. Hei bakah hian Zotlang, Ngur, Ruantlang, New Champhai, North Khawbung leh Vengthar Branch YMA te pawhin Ganja kung thahnem tak suatin an halral bawk. YMA Sub-hqrs in July thla chhunga Ganja te hi suat vek tura ngenna siam mahse Branch thenkhat chuan rokhawlhna  eng emaw avangin hma an la thei lo a, tunkar chhungin suat hman vek beisei a ni thung.

SAWRKAR TIH MUALPHO TUM VANG A NILO:
Nimin khan Pawlrang VC te huaihawt in Ngopa nena an inkar kawng siam thain hnatlang neih a ni. Ngopa nena an inkar kawng NH 102 B, kawngchhe zual Iai leh khuarte hnawhin hnatlang an nei a. Hnatlangah hian motor neiten an motor thawhin mi 120 zet an thawk. Hnatlang chhuakte hma ah thu  sawiin VCP Biakthansanga chuan, hnatlang an ruahman chhan chu sorkar emaw Dept. lam tih mualphona lam nilo in kawngpui te hi a neitu leh hmangtu kan ni a, khua leh tui kan nih ang a kan mawhphurhna a nih thu a sawi. Pawlrang khawtlang hian 24 July khan hetiang hian hnatlang an Io nei tawh bawk a ni.

MJA THUKHAWM:
Nimin khan Champhai District MJA te chuan press club-ah executive committee an nei.
He hun hi C. Lalhnunpuia, President chuan a kaihhruai a, secretary hnen atangin MJA General Assembly report ngaihthlak a niin sawihona an nei nghala. MJA Conference thleng tura Headquarters te inbuatsaihna chu tha an tih thu leh palai kalte an dawn sawn danah lungawi thlak an tih thu an tarlang a ni. Hei bakah hian India ram state 4-a Press tour neih tur te; MJA Coordination committee atana rawtna thlen turte an rel bakah an pawl in relbawlna hrang hrangte an ngaihtuah a tlai lamah chawhlui an kilho nghal a ni.

SANGHA NO SEM:
Kum 2016-17 chhunga Central Scheme pakhat Fish Farmer Development Agency (FFDA) atanga tanpuina an hmuh, Farmer te dil thar laihna tur leh dil nei tawh te'n an dil neihsa an thawm thatna tura pawisa lo dawng tawhte hnenah nimin khan Sangha note a sem a.
He Fish Farmer Development Agency (FFDA) tanpuina Scheme hnuaiah hian Farmer 132 awmin Champhai District chhunga khaw tam zawkah Sangha note  hi sem a ni.

IN SAK SAK :
July ni 26 zana Ngopa Chhim Veng Lane IV-a Pu Genkhanliana te chhungkaw luahlai, bungrua engmah chuh hman loha a kangral chu lnrinni khan sak that leh a ni.
lnsak that hna hi Ngopa YMA leh VC te huaihawtin Ngopa khawtlang in an thawk a, kangmei tuarte tanpuina atan hian Ngopa YMA chuan in tinah veh bur an khawn bakah in sakna tur chak engemawzat an thawh khawm bawk a, Bialtu MLA H. Rohluna' n Rangva Bundle 4 leh hnatlang te thingpui inna tur a pe bawk a. lnsak hna hi Ngopa khawchhunga Branch 3 ten a inchhawkin an thawk a, Branch neitu Chhimveng Branch YMA te erawh ni 3 an hnatlang thung a, ni 3 chhung hian mi 700 vel hnatlangin an thawk chhuak thei a, In hi a dung feet 18 leh a vang feet 12 a zaua sak niin Assam type a sak a ni.

VAWIIN ATANGIN FOOTBALL KHEL DAWN :
Kumtina neih thin Champhai District Football Association buatsaih 1-day Football Tournament chu vawiin 12:00 noon hian CDFA playground Chhangphut field khelhtan a ni dawn ta. Champhai mipui te hian Football kan ngaina tak tak anih chuan hmaih chi ani lo ang. He tournament khel phak veng nih ringawt pawh hi veng mipui te inchhuanna tham a ni a. Veng tam zawkin an khelh phak loh inelna-ah in veng Player-te inkhel en tur i nei bik hi veng vannei in ni tel bawk.
I-day Tournament hi CDFA hnuaia Division sangber lst Division Football Club leh Zone Champion te chauh khelh theih a ni a. Champhai in Football petthiam kan neih te chu an inlan kim ang. Football tui tan chuan mahni vengte awmlo mahse inkhel hmuhnawm en tur a awm dawna, i vengte an telpha a nih thung erawh chuan khuang nen tawiawm turin lo in ring rawh. Hei mai hi a nilo a, Club ten player leikhawmnan sum tam tak an seng a, hmun hrang leh veng hrang hrang Player tha leikhawm an nih avangin Champion hi a hlu bik a, Football class a hniam thei lo hrim hrim bawk.
CDFA hnuaiah hian lst division club paruk an awm a, chungte chu Vengthlang FC, Vengthlang North FC, Vengsang F C, Champhai United FC, Zotlang FC leh Bethel FC te an ni. Heng club paruk bakah hian Hnahlan Zone, N.Khawbung Zone, Zokhawthar Zone leh Rabung Zone Champion theuhte an lo tel dawn bawk a, eng Football Club nge champion ang tih hi Football ngainatute titi ber a ni. Heng team 10 te hi Group 2 ah then niin Group champion leh Runner up ten Semi final an lut dawn a ni.
Tun tournament atan a training kalpui hmasa chu Vengthlang North leh Vengsang FC te hi an ni a. Vengthlang North FC hi 2nd division atang kai thar an hi a, veng mipuiten an tawiawm tha leh ngei ang. Hnahlan Midfielder lar Ramengmawia leh MFA Cup champion keeper Lalnunpuia te an nei a, an veng Player neihsa nen champion thei tur Player an nei. Vengsang FC hi Club hlun ber pawl an ni a, an hruaitute hi faktlak khawpa tang em em reng an ni. Mizoram pawha hmingchher tawh Chama, Kawlkulh an nei a, MPL-a khel reng tawh an veng tlangval Sawmdawnga an kawl leh bawk. An Champion a nih pawhin a mak lo ang. Champion tura rinkai, Champhai a Football Club anga ding hmasaber leh MFA Cup 2016 Champion Bethel FC hi sum hmang nasa ber an ni hial maithei. MFA Cup champion Captain Isaka an chelhzui a,  Midfielder tha Ramsanga chu Champhai United atangin an lalut bawk. Rampawn thleng pawha khel tawh an veng tlangval Christopher-a ho hian Champion thei tak maw? Vengthlang FC, Champhai United leh Zotlang FC te hi Player lalut tam lo mahse englai maha team chhia an ni ngai lo. Champion lai leh neitu thar hnuaia Tournament hmachhawn tur Champhai United FC te khel hi en chakawm an ni. Veng hrang hrang atanga lakkhawm player-te hian fiahna an paltlang zo ang em? Vengthlang FC hian Champhai forward hlauhawm ber tih ngam Chhuanliana an lalut a, Veteran player Rinawma an chelhzui bawk. Rawlthar thaza rual ho-a inlan tur Vengthlang FC te khel hi hmaihphal chi a nilo. Rii & Hawla champion lai Zotlang FC hi Team balance nei tha an nih avangin Champion rinkai an ni. Veng bila Field nei an nih bakah Football a hniamlai neilo Veng an ni bawk a; Fans ah chuan an ni veng tluk an awm ngai-lo. Vawiin inkhel turte:
1.8.2017 12:00 Noon
Champhai United Vs Vengsang FC
2:30 pm
Zotlang FC Vs Hnahlan Zone
( Inkhel en man hi Rs 20 a ni - Lra)

Petrol : Free Sale  (62.35)
Diesel : Sem rual  (53.72)

0 comments: