ni 10.8 2017 (ningani)

TV EN MAN BITHLIAH TA:
Champhai Cable Network leh LCN Zokhawpui chuan Sorkar laipui duhdan angin Channel Encryption a kalpui tan dawn ta.
TV Channel hi package thuma siam a ni dawn a. Pack-I, Rs. 150 manah chuan Zonet Bawhbel & Free to Airchannel zawng en theih a ni ang a; Pack-2, Rs. 350/-manah chuan CCN leh Zonet Local Channel zawng zawng & Standard Definition atanga pek Channel leh Free To Air Channel-te man theih ani ang a, Pack-3 Rs.400 manah chuan CCN leh Zonet Local Channel zawng zawng, Standard Definition Channel zawng zawng, High Definition channel zawng zawng leh Free To Air channel-te a man vek ang.
Encryption kalpui a nih dawn tak avang hian September ni 1 atang chuan Cable TV Monthly Fee pawh a danglam tawh dawn a, Monthly Fee hi Pre-paid a kalpui vek a tul tawh dawn a. CCN chhungkua te chu mahni Package lak tur lo inhre chiang tur leh September thlaah chuan August thla fee leh September thla Fee nen Khawn kawp a ngai dawn a ni tih lo hre turin CCN chuan a ngen a ni.
Veng hrang hrangah Smart Card sem mek zel ani a, Fee ba leh Set top Box man ba la pe fel lo te chu Smart Card pek theih an nih dawn loh avangin CCN chhungkaw tinte Fee ba leh Set top Box man ba lo pe fel zel turin a ngen bawk.

CONSUMER COURT NEIH VAT TUM:
Nimin  khan Champhai District Consumer Assn hruaitute chuan District Forum President thar Pu Vanlalena, Addl District & Session Judge, Champhai chu a pisaah an kawm.
Champhai District Consumer Assn hruaitute chuan an president thar chu chibai bukin he hna a chelh chhunga thawhhona tha tak neih an beisei thu an sawi a, Consumer te harsatna hrang hrang leh a chinfel dan tur kawngte an sawipui nghal bawk a ni. President thar Pu Vanlalena chuan Consumer Assn tana theihtawp chhuah a tum thu sawiin, consumer court-a thubuai chinfel loha awmte chu a rang thei ang bera chinfel a tum thu a lo hrilh a. Hei bakah hian Chanem-a consumer pisa hawn tur chungchang sawi bawkin, an pisaaah hian consumer te tan complain thehluh theih a nih dawn bakah, mipuite awlsam zawkna atan consumer court neih nghal theih turin an ruahman a, hun remchang hmasa berah an president thar ho hian Awareness Campaign neih an tum bawk.
Champhai District Consumer Forum-ah hian Champhai DC chu president a ni thin a, hei hi Food, Civil Supplies & Consumer Affairs Dept chuan July ni 14 khan order tichhuakin, president atan hian Addl District & Session Judge chu Forum president atan hian a ruat a ni.

GROUP MATCH KHEL ZO DAWN:
CDFA Independence Day football tournament khelh mekah nimin  khan Dilkawn FC leh Hnahlan Vengthlang FC te chuan hnehna an chang.
Inkhel hmasa berah Dilkawn FC chuan 10-1 in North Khawbung FC an hneh a, inkhel hnuhnung zawkah Hnahlan Vengthlang FC chuan si hnih faiin Rabung FC an hneh ve bawk. Vawiin hian inkhelh hi chhunzawm leh tur niin group match an khel zo dawn a, intum turte chu Zotlang FC leh Champhai United; Vengthlang FC leh N.Khawbung FC; Bethel FC leh Vengthlang North FC te niin, Inrinni hian semi final khelh a ni ang.

MALSAWM RUAH :
July thla chhung khan Champhai District ah Ruahtui 423.3 mm a tla.
July thla kha kumin chhunga ruahtui a tlak tam ber tum a ni a, June thla khan dawtin January thla tih loh chu kumin hian Champhai hian thla tin ruahtui a dawng a, 1404.2 mm ruahtui a tla tawh a, chawh rualin thlatin a ruah tla hi 200.6 mm tla ziah ang a ni.
Kum riat chhungin July thla chhung bikah 2015 kha ruahtui tlak tam ber tum a ni a, 437.90 mm a tla a, kum 2012 kha ruahtui tlak tlem ber tum niin 245.25 mm a tla a ni.

VAWIIN ATANGIN KAWNG KHAR DAWN:
Vawiin atang hian Champhai leh Aizawl inkar kawng siamthat hna thawh a ni dawn a, kawng khar hun tur bithliah a ni.
Saitual SDM leh SDO Civil chuan kawng a tlang that thuai theihna turin PWD te nen inrawn tlanga Champhai leh Aizawl inkar kawng khar hun hi siam a nih thu a sawi a, hei hi chak zawka hnathawh theihna tura tih a nih thu a sawi tel bawk. Ruahman dan chuan kawng hi zing dar 9:30 atanga chhun dar 12:00 thleng; chawhnu dar 1 atanga tlai dar 4:30 thleng khar a ni ang a, Champhai lam tan chhun chhun dar 12 atanga 12:30 chhung hawn tur a ni a, Aizawl lam tan tlai dar 4:30 atanga a tuk zing dar 9:30 thleng hawn a ni ang.

BALL BENG LAM :
Nimin khan Independence Day Volleyball Tournament chu Kahrawt Field ah khelh  leh a ni.
Nimin khan Independence Day Volleyball Tournament chu Kahrawt Field ah khelh chhunzawm leh niin Hmeichhia ah Semifinal lut tur a chiang ta. Nimin inkhel hmasa ber Mipa ah Ngopa in 2-0  in New Chalrang an hneh a, Dinchhungi VC  in 2-1 in TBC an hneh a, Tlangsam in 2-0 Ruantlang an hneh a.
Lalsangliana Memorial VC in 2-0 in Bethel an hneh a.
Vengthlang N  in 2-0 Vengsang an hneh a. Zokhawthar in 2-0 in Bethel an hneh a, MZ Home  I in 2-1 in TBC an hneh bawk.
Hmeichhia lamah
Dungtlang in 2-0 Ruantlang an hneh a, Comet in 2-0 in Khuangleng an hneh bawk. Hmeichhia hian pool match khel zo tawhin Zirtawpniah Semi final khelh a ni ang Ruantlang leh PC Lalsangliana Memorial VC an inkhel ang a. Comet leh Dungtlang an inkhel bawk ang.

Petrol : Free Sale  (63.99)
Diesel : Sem rual  (55.07)

0 comments: